Рӯзи шанбе, 1-уми моҳи марти соли 2025 моҳи Рамазон оғоз меёбад ва тақрибан тамоми мусалмонони дунё аз фардо шуруъ карда, як моҳ рӯза медоранд.
Рамазон моҳи раҳмату мағфират, моҳи сабру истиқомат ва моҳи тақвову ихлос аст. Дар ин айёми пурбаракат Худованд тоату ибодати мо ва шуморо қабул кунад ва моро аз файзу баракати ин моҳи муқаддас баҳравар гардонад.
Фаро расидани моҳи Рамазонро мусалмонон бесаброна интизор мешаванд. Ва чун фаро бирасад бо рӯза гирифтан ва тиловату Қуръону додани садақот худро ба Худо наздик мекунанд.
Аз ин фурсат истифода бурда, ҳайати эҷодии Azda tv фарорасии моҳи шарифи Рамазонро ба мусалмонони Тоҷикистон ва тамоми ҷаҳон муборакбод мегӯяд!
Рамазон дар баробари ин ки моҳи нузули Қуръон, моҳи тиловату ибодат ва моҳи хайру эҳсону қабули дуоҳост, инчунин моҳи худсозӣ, моҳи ислоҳсозии ҷомеа ва зудудани фасоду зулму истибдод, моҳи таҷдид ва таҳкими робитаҳо бо Худо ва мардум аст. Аз ин рӯ, барои ҳама ҳамвандони азизамон тавфиқи бандагӣ, қабули тоъот ва бедории ҳақиқиро аз даргоҳи Худованди Маннон орзумандем.
