Azda.TV аз тариқи як манбаи худ тасдиқ кард, ки хабари “ошӯб” дар зиндони шаҳри Ваҳдат ҳақиқат дорад ва инчунин номи баъзе кушташудаҳо низ ба дасти расона расид.
Azda.TV ҳоло номи танҳо 7 маҳбусеро, ки гуфта мешавад, дар ошӯби имрӯза дар зиндони шаҳри Ваҳдат кушта шудаанд, дастрас кард. Дар ҳоли ҳозир номи ду нафари онҳо дурустсанҷӣ шуда, боқӣ танҳо афроде ҳастанд, ки манбаъ мегӯяд, кушта шудаанд. Номҳо аз ин қабиланд:
Ҳасанов Суҳроб Сафармадович
Ҳасанов Ҷамолиддин Камолиддинович
Тилабов Али Тилабович
Орузев Шаҳзод Ҷамшедович
Бурҳонов Шуҳрат Муҳамадиевич
Ҷураев Маҳмадшариф Бобомуродович
Давлатов Фарҳод Саймаҳмадович
Дар ҳамин ҳол хабаргузории давлатии “Ховар” низ ин хабарро аз баёнияи Маркази робитаҳои ҷамъиятии Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон тасдиқ кард. Аммо ин хабаргузории давлатӣ адади кушташудоҳоро танҳо 3 нафар гуфтааст.
Бино ба гузориши “Ховар”, як гурӯҳи маҳбусони 9-нафара бо истифода аз асбобҳои худсохти халландаву бурранда ба кормандони масъул – нигаҳбонҳои муассисаи ислоҳотӣ ҳуҷум кардаанд. Дар натиҷаи ҳамла, 3 нафар корманд, ки ба иҷрои вазифаҳои хидматии хеш машғул буданд, ҷароҳатҳои вазнини ҷисмонӣ бардоштанд. Сабаби ҳуҷуми ин маҳбусонро баёнияи расмӣ “қасди фирор аз маҳбас” гутфааст.
“Муҳофизон тибқи қонун ва дастурамали хизматӣ амал намуда, маҷбур гаштанд, ки дар муқобили ҷинояткорон аз силоҳи оташфишон истифода баранд. Дар натиҷа, 3 ҷинояткор безарар ва боқимондаи онҳо дастгир карда шуданд”, – омадааст дар баёнияи расмӣ.
Гуфта мешавад, ҳоло вазъ дар маҳбас ба эътидол дароварда шуда ва ба маҷруҳон ёрии таъҷилӣ расонида шудааст.
Ёдовар мешавем, ки имрӯз Azda.TV бо такя ба сомонаи Кумитаи наҷоти гаравгонҳо ва зиндониёни сиёсии Тоҷикистон аз ошӯбе дар зиндони куҳнаи шаҳри Ваҳдат хабар нашр кард. Гуфта мешуд, дар пайи ин ошӯб 10 маҳбус кушта ва даҳҳо нафари дигар захмӣ шудаанд.
