Созмони “Freedom Now” бори дигар аз мақомоти Тоҷикистон хост, ки вакили дифои шинохта ва маҳбуси сиёсӣ Бузургмеҳр Ёровро фавран ва бечунучаро озод кунанд.
Freedom Now, як созмони ҳуқуқии мустақар дар Вашингтон рӯзи 16-уми декабри соли ҷорӣ дар ҳисоби “X”-и худ аз Бузурмгеҳр Ёров ёдовар шуда, навиштааст, ки “3000 рӯз пеш мақомоти Тоҷикистон вакили мудофеъ Бузургмеҳр Ёровро барои расонидани кумаки ҳуқуқӣ ба мухолифини сиёсӣ боздошт кард. Мо даъват менамоем, ки ӯ фавран ва бидуни шарт озод карда шавад”.
Чанде пеш ин созмон аз мақомоти Тоҷикистон озодии зиндонёни сиёсии аъзои ҲНИТ, аз ҷумла муовини раиси ин ҳизб Маҳмадлӣ Ҳаитро талаб карда буд.
Гуфта мешавад, маҳбуси сиёсӣ Бузургмеҳр Ёров соли 2015 замоне боздошт шуд, ки вакили мудофеи аъзои боздоштшудаи Ҳизби наҳзати исломии Тоҷикистон буд.
Мақомот баъд аз боздошт ӯро бо иттиҳомоти сохта, аз ҷумла таҳқири мансабдорони давлатӣ, беэҳтиромӣ ба додгоҳ, тавҳин ба президенту қаллобӣ ва дар умум ба 28 соли зиндон маҳкум карданд. Наздиконаш ин иттиҳомотро рад карда, ҳукмро дорои ангезаҳои сиёсӣ меноманд.
Баъдан тибқи Қонуни ҶТ “Дар бораи афв” соли 2019 шаш сол ва соли 2021 чор сол аз муҳлати иҷрои ҷазои ӯ дар зиндон кам гардида буд ва дар умум дар ин марҳила 10 сол аз иҷрои ҷазои ӯ кам карда шуд.
Вале дар моҳи июли соли ҷорӣ дар як мурофиаи дигар, ки паси дарҳои баста гузашт ва ба меъёрҳои байналмилалӣ ҷавобгӯ набуд, ба ҳукми ӯ боз даҳ соли дигар бо иттиҳоми сохтаи қаллобӣ изофа карда шуд. Худи Ёров иттиҳомоти мақомотро дар муҳокимаҳо сохта номида буд.
Гуфта мешавад, Бузургмеҳр Ёрови 52-сола дар маҳбас борҳо мавриди фишор ва шиканҷа қарор гирифтааст.
Дар баробари созмонҳои ҳуқуқи башар ва кишварҳои ғарбӣ, соли 2019 Кумитаи ҳуқуқи башари Созмони Милали Муттаҳид баъд аз баррасии парвандаи Бузургмеҳр Ёров ва дигар раҳбарони ҲНИТ, боздошти ӯро худсарона эълом карда, аз ҳукумати Тоҷикистон хоста буд, ки бидуни қайду шарт фавран ӯро озод кунад, вале то имрӯз ҳукумати Эмомали Раҳмон ҳеч дархости ин кумитаи СММ-ро иҷро накарда ва ба таъаҳудоти байналмиллалии худ пойбанд набудааст.
