Кормандони ФСБ ва Вазорати корҳои дохилии Русия як гурӯҳи ҷиноиро кашф ва боздошт карданд, ки ба қонунигардонии муҳоҷирон тавассути издивоҷҳои қалбакӣ машғул будаанд. Дар ин бора хабаргузории “Lentа.ru” бо истонад ба намояндаи расмии Вазорати умури дохилии Русия Ирина Волк хабар дод.
Гуфта мешавад, амалиёти вижа дар Маскав, вилоятҳои Вологда, Новгород, Ярославл ва Твер доир шуда, беш аз 20 нафар, аз ҷумла созмондиҳандаи ин гурӯҳ боздошт шуданд.
Тибқи гуфтаҳои масъулин, тафтишоти пешакӣ нишон дода, ки гумонбарон ба занҳои рус барои издивоҷи муваққатӣ бо шаҳрвандони хориҷӣ ё сабти онҳо ҳамчун падари фарзандонашон то 50 ҳазор рубл пул медодаанд.
Бо ин роҳ муҳоҷирон метавонистанд иҷозаи иқомати муваққатӣ ё шаҳрвандии Русияро ба таври содда ба даст оранд.
Нисбати боздоштшудагон бар асоси қисми 2 моддаи 322.1-и Кодекси ҷиноии Федератсияи Русия (Ташкили муҳоҷирати ғайриқонунӣ) парванда боз шудааст. Шаш нафари онҳо ба ҳабс, ду нафар ба ҳабси хонагӣ гирифта шуда, як ҷинояткори дигар бо шарти берун нарафтан аз ватан озод карда шудааст.
Ёдовар мешавем, ки пештар аз ин як зани рус бо роҳи қалбакӣ як марди тоҷикро ҳамчун падари писараш дар ивази гирифтани пул сабт карда, марди тоҷик бо ин роҳ мехостааст будубошашро дар Русия қонунӣ намояд. Гуфта мешавад, бо талаби додситонии шаҳри Пскови Русия ин шаҳрванди Тоҷикистон аз ҳуқуқи падарӣ маҳрум карда шуд.
