Раисҷумҳури Амрико Доналд Трамп дар ҳошияи нишасти Маҷмаи умумии Созмони Милали Муттаҳид бо сарони бархе кишварҳои исломӣ дидори хусусӣ кард.
Гуфта мешавад, Трамп рӯзи сешанбе, 23-юми сентябр бо раҳбарони кишварҳои Урдун, Туркия, Арабистони Саудӣ, Қатар, Покистон ва дигарон мулоқот дошт. Ба иттилои расонаҳо, ин дидор бидуни ҳузури хабарнигорон сурат гирифт.
Қабалн Кохи Сафед хабар дода буд, ки дар ин дидор бештар ба қазияи Ғазза, ки ду сол боз зери ҳамлаҳои бевақфаи Исроил қарор дорад ва ҳарчи тезтар поён додани ҷанг дар ин борика гуфтугӯ мешавад.
Ба иттилои расонаҳои хориҷӣ, Трамп дар ин ҷаласа гуфт: “Ин ҷанг ҳеҷ гоҳ набояд оғоз мешуд. Мо мехоҳем онро ба поён расонем ва гаравгонҳоро аз дасти ҲАМОС баргардонем.”
Ҳамчунин дар навбати худ Шайх Тамим бин Ҳамад, амири Қатар, дар ин нишаст ибрози нигаронӣ намуда, ки вазъ дар борикаи Ғазза хеле вазнин аст.
Хабаргузории амрикоии “Axios” пештар хабар дода буд, ки Трамп пешниҳоде барои сулҳ ва ояндаи идораи Ғазза пас аз ҷанг ба роҳбарони кишварҳои исломӣ пешниҳод хоҳад кард.
Ин сомона, илова бар мавзуи озодии гаравгонҳо ва поён додани ҷанг, хабар додааст, ки Трамп эҳтимолан баъзе шартҳоеро, ки ба хориҷ шудани Исроил аз ин минтақа ва ояндаи идоракунии он пас аз хатми ҷанг бидуни ҳузури ҲАМОС марбутанд, мавриди муҳокима қарор медиҳад.
Гуфта мешавад, Амрико инчунин мехоҳад кишварҳои арабӣ ва исломӣ пас аз поён додани ҷанг дар Ғазза нерӯҳои посдори сулҳро дар Ғазза ва ҳамчунин тамоми масорифи молие, ки барои ободии Ғазза дар назар аст, аз худ таъмин кунанд.
Ин мулоқот дар ҳоле сурат мегирад, ки Исроил аз моҳи октябри соли 2023 Навори Ғаззаро ба шиддат бомборон дорад. Созмонҳои байналмилалӣ мегӯянд, вазъи инсонӣ дар ин борика ба шидат вахим шудааст ва рӯзона бо сабаби бомборонҳои сахт даҳҳо зану кӯдаки фаластинӣ ҷони худро аз даст медиҳад.
