20.4 C
Dushanbe

Гурснанишинии занони тоҷик дар зиндонҳои Ироқ

Гурӯҳе аз занони тоҷик, ки дар зиндонҳои Ҷумҳурии Ироқ ба сар мебаранд, ба нишони эътироз нисбати иттиҳомоте, ки алайҳи онҳо аз ҷониби мақомоти ин кишвар эълон шудааст, гурснанишинӣ эълон карданд.

Наворе дар шабакаҳои иҷтимоӣ нашр шуда, ки дида мешавад, ҳудуди 7-8 зан бо забони тоҷикӣ ҳарф мезананд ва худро шаҳрвандони Тоҷикистон муаррифӣ карда, мегӯянд, ки дар зиндони Ар-Расофаи шаҳри Бағдод бо иттиҳомоти сохта зиндонӣ шудаанд.

Ба гуфтаи занони зиндонии тоҷик, наворро дар торихи 24-уми апрели соли ҷорӣ сабт кардаанд. Онҳо бо нашри он ва баёни эътирозашон аз мақомоти Ироқ хостори озодии фарвии худ шудаанд.

“Ҳамаи моро мақомоти ҳифзи ҳуқуқ бо роҳи фиреб, таҳдид ва бо фишори Хадамоти махсус шоҳидӣ гирифта, дар натиҷа ҳамаи моро бо айбҳои беасос ба муҳлатҳои тӯлонӣ аз озодӣ маҳрум кардаанд.”, мегӯянд занҳо дар навори муроҷиатӣ.

Занони тоҷик мегӯянд, бо вуҷуди он ки дар амалиёти террористӣ ва ҷангҳо иштирок накардаанд, боз ҳам иттиҳомоти сангинеро алайҳи онҳо эълон карда, равонаи зиндонашон кардаанд.

Онҳо ҳамчунин таъкид мекунанд, ки айни ҳол дар маҳбасе қарор доранд, ки “дар он ҷо мо аз имкони дидани фарзандон, хешу табор ва дӯстон ва ғизои муқаррарӣ маҳрумем“.

Ин занҳои маҳбуси тоҷик низ аз он шикоят карданд, ки аз оддитарин ҳуқуқҳои инсонӣ дар зиндони мазкур маҳруманд ва аз ин сабаб аксари маҳбусон ба бемориҳои музмин гирифтор шуда, ҳатто нафарони зиёде ҳам фавтидаанд.

То ҳол дар бораи ин навор вокуниши мақомоти кишвари Ироқ ва ё мақомоти тоҷик расонаӣ нашудааст.

Ин дар ҳолест, ки чанде пеш сафири Тоҷикистон дар давлати Кувейт Зубайдулло Зубайдзода дар бораи баргардонидани шаҳрвандони тоҷик аз ин кишвар ба Тоҷикстон бо мақомоти он гуфтугӯ карда буд.

Аммо, ба гуфтаи бархе коршиносон, раванди бозгардонии шаҳрвандони тоҷик, ба хусус занону кӯдакон, ки бо иттиҳоми узвият дар ДИИШ ва ширкат дар ҷангҳои Сурия дар зиндонҳои Ироқ ба шиканҷаҳои шадид рӯбарӯ ҳастанд, бисёр кунд пеш меравад.

Бино ба иттилои ғайрирасмӣ, ҳоло 36 зани тоҷик ҳамроҳи фарзандонашон дар зиндонҳои Ироқ ба сар мебаранд. То кунун мақомоти тоҷик ду занро ҳамроҳи фарзандонашон аз зиндонҳои ин кишвар ба Ватан бозгардонидааст. Омори дақиқ дар бораи теъдоди зиндониён аз ҳисоби шаҳрвандони Тоҷикистон дар Ироқ дастрас нест.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Бозгашти нахустин гурӯҳи зоирони тоҷик

Нахустини гурӯҳи зоирони тоҷикистонӣ баъд аз анҷоми маросими Ҳаҷ-2024 аз Арабистони Саудӣ ба Ватан баргарштанд.

Нопадид шудани панҷ сокини Язгулом дар фурӯдгоҳи Кӯлоб

Панҷ нафар аз сокинони ноҳияи Язғулом дар фурӯдгоҳи шаҳри Кӯлоб нопадид шудаанд. Дар ин бора хешовандонашон ба расонаҳо дар Тоҷикистон хабар додаанд. 

Ҳамлаи террористӣ дар Доғистон 20 кушта ба ҷо гузошт

Бино ба иттилои Вазорати корҳои дохилии Русия, шаби 23-уми...

Абдусалом Одиназода аз зиндон озод шуд

Абдусалом Одиназода, донишманди тоҷики муқими Австралия баъд аз 3,5 соли зиндон рӯзи 19-уми июн ба озодӣ баромад.