Аз 1-уми октябр то охири моҳи ноябри соли 2025 дар Тоҷикистон маъракаи даъвати тирамоҳии ҷавонон ба хидмати ҳатмии ҳарбӣ баргузор мешавад.
Тибқи Фармони Президенти Тоҷикистон, шаҳрвандони солҳои таваллуди 1998–2007 ба сафи Қувваҳои мусаллаҳ ҷалб мегарданд. Дар ин бора расонаи давлатии АМИТ «Ховар» бо истинод ба маркази матбуот ва иттилооти Вазорати мудофиаи Ҷумҳурии Тоҷикистон хабар доааст.
Гуфта мешавад, вобаста ба ин масъала дар Вазорати мудофиаи Ҷумҳурии Тоҷикистон таҳти роҳбарии муовини Сарвазири Ҷумҳурии Тоҷикистон Дилрабо Мансурӣ ҷаласаи навбатии комиссияи даъвати ҷумҳуриявӣ оид ба омодагӣ ба даъвати тирамоҳии соли 2025 ба хидмати ҳарбӣ баргузор шуда, масъалаҳои иҷрои нақшаи даъват, беҳтар кардани шароити хидмат, пешгирии қонуншиканиҳо ва тарбияи ватандӯстии ҷавонон баррасӣ шуданд.
Барои ҷавонони 18 то 27-сола хидмати ҳарбӣ ҳатмӣ буда, муҳлати хидмат барои хатмкунандагони мактабҳои миёна ва миёнаи касбӣ 2 сол ва барои хатмкунандагони донишгоҳҳо бо кафедраи ҳарбӣ 1 сол пешбинӣ шудааст. Ҳукумати кишвар барои сарбозон баъзе имтиёзҳо, аз ҷумла гирифтани шаҳодатномаи ронандагиро ваъда додааст.
Мақомоти масъул таъкид карданд, ки хидмат ба Ватан қарзи шаҳрвандӣ ва виҷдонии ҳар ҷавон аст ва маъракаи тирамоҳӣ бояд дар сатҳи баланд гузаронида шавад.
Дар Тоҷикистон маъракаи даъвати ҳарбӣ, ки миёни мардум бо номи «Облава» маъруф аст, ҳамасола боиси баҳсу вокунишҳои зиёд мегардад.
Қисме аз ҷавонон аз хидмат дар сафи Қувваҳои мусаллаҳ худдорӣ мекунанд ва мақомоти масъул онҳоро бо роҳҳои ғайриқонунӣ тавассути боздошт дар кӯчаҳо ва хиёбонҳо ба хидмат мебаранд. Инчунин солҳои охир сокинон аз он шикоят доранд, ки мақомот барқи деҳаро қатъ мекунанду дарҳои масҷидҳоро баста, талаб мекунанд, ки фарзандонашонро ба артиш фиристанд.
Таҳлилгарон яке аз омилҳои асосии фирори ҷавононро аз хидмати ҳарбӣ набудани шароити муносиб дар қисмҳои ҳарбӣ, инчунин ҳолатҳои озору азияти аскарон аз ҷониби сарбозони бузургсол медонанд. Борҳо расонаҳои кишвар аз ҳолати ба ҳалокат расидани сарбозони ҷавон дар натиҷаи чунин муносибатҳо ва шароити сахт дар қисмҳои ҳарбӣ хабар додаанд.
