Дар Русия чанд қонуни наве таҳия мешавад, ки ҳадафашон сахттар кардани қоидаҳо барои муҳоҷирони корӣ мебошад.
Ҳизби “Одамони нав”-и Русия пешниҳод кардааст, ки дар ин кишвар имтиҳони вежа барои муҳоҷирон дар бораи қоидаҳои муошират бо занон ҷорӣ карда шавад. Муаллифи лоиҳаи қонун ва муовини раиси Думаи давлатӣ Владислав Даванков мегӯяд, ки ҳар касе ба Русия меояд, бояд қоидахои асосии муошират бо занонро омӯзад ва дар бораи ҷавобгарии ҷиноятӣ барои вайрон кардани онро донад.
Илова бар ин, Даванков пешниҳод кардааст, ки ҳамаи муҳоҷирон ба хотири пешгирии ҷинояткорӣ миёни муҳоҷирон дар баробари шаҳрвандони Русия ҳатман дар паёмрасони “MAX” сабти ном шаванд.
Пешниҳоди дигари ҳизби “Одамони нав” ин боло бурдани арзиши шаҳодатномаи ронандагӣ то 20 ҳазор рубл барои муҳоҷирон мебошад. Ҳоло он ҳамагӣ 4 ҳазор рублро ташкил медиҳад. Сабаби ин пешниҳодро ба паст будани сифати ронандагии муҳоҷирон ва рух додани беш аз 2000 садамаи нақлиётӣ аз аввали сол бо айби муҳоҷирон гуфтаанд.
Инчунин вакилони Дума аз ин ҳизб талош доранд то шумораи кӯдакони муҳоҷир дар мактабҳои Русия маҳдуд карда шавад, яъне на бештар аз як хонандаи муҳоҷир дар як синф бошад. Ба гуфтаи муаллифон, ин иқдом ба омӯзгорон ва кӯдакон кумак мекунад ва ҳамгироии кӯдакони муҳоҷирро суръат мебахшад.
Яке аз лоиҳаҳои дигари Ҳизби “Одамони нав” – низоми профилҳои рақамии “Мигрант ID” аз аввали соли 2026 фаъол хоҳад шуд, ки он назорат аз болои хориҷиёни қонунӣ иқоматдошта дар Русияро пурзӯр менамояд.
Раҳбари ин ҳизб Алексей Нечаев дар шарҳи ин қонуну пешниҳодҳо гуфта, ки дар Русия муҳоҷирони ғайриқонунӣ бо бузургтарин ихроҷ аз кишвар рӯ ба рӯ хоҳанд шуд. Ин ҳам дар ҳолест, ки танҳо дар соли 2024 аз ин кишвар 190 ҳазор муҳоҷир ихроҷ шуданд, яъне 90 ҳазор нафар бештар аз соли қаблӣ.
