Тоҷикистон аз моҳи июл то декабри соли ҷорӣ бидуни шартнома ба ҳукумати таҳти нуфузи Толибон дар Афғонистон барқ содир кардааст.
Ширкати Бришнои Афғонистон эълом кардааст, ки барои воридоти нерӯи барқи Тоҷикистон ба Афғонистон бо ширкати “Барқи тоҷик” дар шаҳри Душанбе қарордоди нав имзо кардааст.
Дар иттилоияе, ки ширкат нашр кардааст, гуфта мешавад, ки қарордоди воридоти нерӯи барқи Тоҷикистон ба Афонистон барои соли 2022 байни раиси ширкати “Барқи тоҷик” Исмоилзода Мирзо Иброҳим ва ҳайъати ҳамроҳаш ва раиси ширкати “Бришно” Ҳофиз Муҳаммад Амин ва ҳайъати ҳамроҳаш имзо шудааст.”
Гуфта мешавад, дар бораи имзои ин қарордод ширкати “Барқи тоҷик” расман дар сомонааш ҳеч матлабе нашр накардааст, аммо ширкати “Бришно” меафзояд, ин “қарордод дар ҷараёни музокироти ду рӯза аз сӯи ду тараф имзо шуда, зимни он қарордоди моҳи июли то декабри соли равон, ки ба далели таҳаввулоти сиёсӣ ба таъвиқ уфтода буд, низ имзо шудааст.”
Инчунин гуфта мешавад, дар ин музокироти ду рӯза дар бораи CASA 1000 ва сектори хати 500 кВт ҳам суҳбат карда, ҷониби Афғонистон дар бораи тарҳои мутаваққиф шуда ба Тоҷикистон ваъдаи ҳамкорӣ намудааст.
Равобити Тоҷикистон бо Афғонистон пас аз суқути ҳукумати пешини ин кишвар бо раҳбарии Ашраф Ғанӣ ва сари қудрат омадани Толибон тира шуд, Эмомалӣ Раҳмон ва дигар раҳбарони боломақоми кишвар борҳо эълон карда буданд, ки то Толибон ҳукумати ҳамашумул ташкил накунанд, онҳоро ба расмият намешиносанд, аммо сафари намояндаҳои ҳукумати сарпарасти Толибон ба Тоҷикистон ва имзои чанд қарордоди тиҷоратии ҷадид байни ду кишвар ҳама даъвоҳои пешини Эмомалӣ Раҳмон дар бораи ҳукумати зери нуфӯзи Толибон зери суол мебарад.
Бо ин вуҷуд, Тоҷикистон дар ҳоле ба кишварҳои ҳамсоя Афғонистон, Ӯзбекистон ва Қирғизистон нерӯи барқ содир мекунад, ки ҳудуди 80 дарсади сокинои кишвар дар шаҳру ноҳияҳо дар фасли сармо аз бебарқӣ ранҷ мебаранд. Ҳукумат барои онҳо реҷаи лимити интиқоли нерӯи барқ ҷорӣ карда, рӯзона ба ҳисоби миёна то 7 соат барқ меҳмони онҳо мешавад ва боқӣ ҳудуди 17-18 соати дигар дар сардӣ ва торикӣ ба сар мебаранд.
