Баъзе сокинон аз вилояти Суғд ва Хатлон аз он шикоят доранд, ки аз ҳоло барқ надоранд ва дар як шабонарӯз тақрибан аз 2 то 4 соат ба онҳо барқ дода мешавад.
Як бошандаи ноҳияи Шӯрободи вилояти Хатлон ба Azda tv гуфт: “Имсол аз моҳи сентябр “лимит” ҷорӣ шуд. Ҳоло баъзе шабҳо пас аз намози хуфтан агар хоҳанд барқро барои як ё ду соат медиҳанд, ҳатто телефонҳоямонро пур карда наметавонем. Дар як шабонарӯз 8 соат гуфтаанд, лекин 2 соат шаб, 1 соат рӯз медиҳанд.”
Агарчи масъулони “Барқи тоҷик” ба мардум сабаби ин бебарқии шадидро шарҳ намедиҳанд, аммо ба назари сокинони кишвар, мадум ҳам одат кардааст ва ин масъаларо, бо вуҷуде, ки азоб мекашанд, чандон сахт намегиранд.
Дар ҳамин ҳол аз “Барқи тоҷик” ба “Азия-Плюс” гуфтаанд, ки сабаби бебарқӣ кам шудани сатҳи об дар обанбори “Норак” аст. Масъулони ин ниҳод таъкид кардаанд, ки сатҳи об “нисбат ба соли гузашта 2 метру 47 сантиметр кам шудааст.” Ба назари корбарон, ин суханест, ки ҳар сол масъулони ниҳоди мазкур барои шона холӣ кардан аз масъулият чунин мегӯянд.
Мақомот омода нестанд сари вақт мардумро аз ҷорӣ шудани “лимит” расман огоҳ кунанд ва онро эътироф надоранд. Вале хабаргузории давлатии “Ховар” 13-уми ноябр бо нашри хабаре аз ҷаласаи гурӯҳи кории филиали “Шабакаҳои тақсимоти барқи ноҳияҳои тобеи ҷумҳурӣ”, ки дар он масъалаи пешгирии талафот ва истифодаи ғайриқонунии нерӯи барқ баррасӣ шудааст, аз забони масъулин тасдиқ кард, ки “лимит” ҷорӣ шудааст.
Дар ҷаласаи мазкур масъулин гуфтаанд, ки бо сабаби назорати сахт болои истифодабарандагон “ҳаҷми ҷамъоварии маблағи истифодаи нерӯи барқ дар соли равон нисбат ба ҳамин давраи соли 2024 дар ҷумҳурӣ 1 миллиарду 342 миллион сомонӣ зиёд гардидааст.” Ин дар ҳолест, ки сокинон аз бебарқӣ шикоят доранд, аммо масъулин бошанд, аз ин ки тавонистаанд пули бештаре аз мардум ҷамъоварӣ кунанд, шодӣ доранд.
Корбарон дар шабакаҳои иҷтимоӣ суол мегузоранд, ки агар сатҳи об дар обанборҳо кам шуда бошад, ин чӣ ҳукумату ҳукуматдорӣ аст, ки захира надорад ё захирааш ба як моҳи зимистон ҳам намерасад? Дар ҳоле, ки дар тобистон зимни ироаи оморҳояшон мегӯянд, имсол миқдор нерӯи барқи иловагӣ тавлид шудааст, вале дар зимистон ин нерӯҳои тавлидшудаи иловагӣ куҷо мешаванд, ки пеш аз расидани фасли сармо дигар мардум барқ надоранд? Яъне, агар фарзияи мақомотро ҳам бовар кунем, наход баробари камшудани об дар ҳол барқ аз сокинон қатъ шавад?
Ин ҳам дар ҳолест, ки Тоҷикистон солона даҳҳо ҳазор киловат-соат барқ ба кишварҳои ҳамсоя, аз ҷумла Афғонистон, Узбекистон ва Қирғизистон мефурӯшад. Моҳи августи имсол Эмомомалӣ Раҳмон дар суханроние гуфт, ки аз рӯзи бунёди аввалин чархаи “Роғун” дар соли 2018 то имрӯз ин нерӯгоҳ 9,1 миллард киловат-соат барқ истеҳсол кардааст. Сокинон ҳам ҳаминро мепурсанд, ки ин миқдор нерӯи барқ куҷо меравад, ки аҳолӣ солона 6-7 моҳ барқ надорад?
