Рӯзи ҷумъа, 15-уми марти соли 2024 дар Русия интихоботи президентӣ оғоз мешавад ва то охири рӯзи 17-уми моҳи ҷорӣ идома мекунад.
Тибқи гузориши Комиссияи марказии интихоботи Русия, 112 миллиону 309 ҳазору 947 раъйдиҳанда дар ин кишвар сабти ном шудааст ва давоми ин се рӯз онҳо барои интихоби президенти нав ба пойи сандуқҳои раъй хоҳанд рафт.
Ҳамчунин гуфта мешавад, ки дар намояндагиҳои Русия дар хориҷ аз кишвар беш аз 2 миллион нафар, аз ҷумла наздики 12 ҳазор нафар дар пойгоҳи Байканури Қазоқистон дар ин интихобот ширкат хоҳанд кард.
Ба иттилои расонаҳо, интихоботи Русия ҳам тариқи сандуқҳои раъй ва ҳам тариқи электронӣ дар беш аз 80 минтақаи ин кишвар баргузор хоҳад шуд.
Мақомоти Русия ҳамзамон дар шаҳрҳои Қрим, Донетск, Луганск, Херсон ва Запорожеи Украина, ки Русия онҳоро ба хоки худ даровардааст, низ барои овоздиҳандагон сандуқҳои овоздиҳӣ гузоштаанд. Вале то ҳол шумори овоздиҳандагон дар ин минтақаҳои забтшудаи Русия эълон нашудааст.
Комиссияи марказии интихоботи ин кишвар мегӯяд, барои назорати интихоботи президентии Русия беш аз 200 нозир аз 36 кишвар ва 5 созмони байналмилалӣ, аз ҷумла Созмони Паймони Амнияти Дастаҷамъӣ ҳузур доранд.
Дар ин интихоботи президентии Руися 4 нафар аз ҳизбҳои гуногуни ин кишвар номзад шудаанд. Аз ҷумла, худи Владимир Путин, президенти феълии ин кишвар номзад аз Ҳизби ягонаи Руися, Леонид Слутский номзад аз Ҳизби либерал-демократ, Владислав Даванков номзад аз Ҳизби мардуми нав ва Николай Харитонов номзад аз Ҳизби коммунисти Русия бо ҳам рақобат хоҳанд кард.
Ба гуфтаи таҳлилгарон, интихоботи президентии Русия низ мисли интихоботи президентии кишварҳои ИДМ ва дигар кишварҳои диктотурӣ ба сурати рамзӣ аст, чун аз ҳоло пирӯзии Путин, ки аз соли 2000 то ин дам қудратро дар Русия дар даст дорад, мушаххас аст.
