Дар Русия беш аз 30 ҳазор муҳоҷиреро дастгир кардаанд, ки шаҳрвандии Русияро дарёфт карда, худро дар қайди ҳарбӣ нагузоштаанд.
Александр Бастрикин, раиси Кумитаи тафтишоти Русия рӯзи 27-уми июни соли ҷорӣ дар як нишасти байнулмилалӣ дар Санкт-Петербург гуфт, ки аз ин шумора 10 ҳазор муҳоҷирро ба артиш ҷалб карда, ба ҷанг дар Украина фиристодаанд.
Раиси Кумитаи тафтишот нагуфт, ки дар миёни онҳо чанд зодаи Тоҷикистон аст, аммо ӯ таъкид кард, ки муҳоҷиронро барои он ба ҷанг дар Украина мефиристанд, ки “худашон Русияро оҳиста-оҳиста тарк кунанд”.
Инчунин ӯ илова кард, муҳоҷирон дастони кории хуб доранд ва дар ҷанг барои кофтани хандақҳо лозиманд.
Бояд гуфт, ки мақомоти интизомии Русия пайваста дар корхонаҳое, ки муҳоҷирони корӣ дар онҷо кор мекунанд, рейдҳо анҷом дода, ба онҳо даъватнома медиҳанд ё ба комиссариатҳои ҳарбӣ мебаранд ва ба муҳоҷироне, ки шаҳрвандии Русия надоранд, ваъда медиҳанд, ки дар сурати имзои қарордод бо Вазорати дифоъ ба зудӣ шиносномаи Русияро хоҳанд дод.
Бастрикин зимни суханронияш дар нишасти байналмилалии Санкт-Петербург тасдиқ кард, ки ба масъалаи дар қайди комиссариатҳои ҳарбӣ гузоштани муҳоҷирон муфаттишони кумитаи зери раҳбарияш машғул ҳастанд.
Александр Бастрикин, ки ҳамчун як нафари муҳоҷирбадбин миёни хориҷиҳо шинохта шудааст, ин дафъа низ аз сахттар кардани қонуни муҳоҷирату қабули қонунҳои нав гуфт ва Думаи давлатии Русияро интиқод кард, ки “Государственна дура” кай қонунҳои хубро қабул мекунад”.
Танқиди Бастрикин аз порлумони Русия дар ҳоле аст, ки вакилони ин кишвар 18-уми июни соли ҷорӣ қонунеро қабул кардаанд, ки пулиси Русия метавонад шаҳрвандони хориҷие, ки даст ба қонуншиканӣ задаанд, бидуни қарори додгоҳ аз Русия ихроҷ кунанд.
Раиси Кумитаи тафтишот мегӯяд, ки сиёсати муҳоҷират дар Русия тағйиротро талаб мекунад ва ҳангоми ба кор қабул кардани муҳоҷирон бояд дар бораи масоили амнияти миллӣ андешида шавад.
Бастрикин инчунин идао кардааст, ки ҷиноят дар байни муҳоҷирон бештар шуда, пешниҳод кардааст, ки механизми муҳоҷирати дохилӣ бо истифода аз таҷрибаи замони шӯравӣ таҳия шавад.
Суханҳои зидди муҳоҷиронаи Бастрикин дар ҳоле саддо медиҳад, ки вазъи муҳоҷирон аз кишварҳои Осиёи Марказӣ, бахусус Тоҷикистон, пас аз ҳодисаи хунини “Крокус Сити Ҳолл” дар Русия бадтар шудааст. Ҳатто муҳоҷирони тоҷик дар фурӯдгоҳҳо ва марзҳо соатҳо тафтишу бозпурсӣ мешаванд ва баъд аз интизориҳои зиёд ба онҳо ҳаққи вуруд ба хоки Русия дода намешавад.
