25.9 C
Dushanbe

Кӣ дурӯғ мегӯяд, донишҷӯён ё Вазорат?

Донишҷӯён аз “облава” неву аз “нодуруст ба роҳ мондани корҳои фаҳмондадиҳӣ”-и Комиссариати ҳарбии ноҳияи Варзоб гурехтаанд. 

30-уми майи соли ҷорӣ, Раёсати Вазорати корҳои дохилии шаҳри Душанбе бо нашри изҳороте навори баҳбарангези “облава” дар Донишгоҳи тиббии кишварро ба қавли худ шарҳ дод. 

Ба иддаои Раёсат “29-уми майи соли ҷорӣ, дар мувофиқа бо роҳбарияти донишгоҳ кормандони Комиссариати ҳарбии ноҳияи Варзоб бо мақсади ҷалби хоҳишмандон ба хизмати ҳарбӣ бо хатмкунандагони донишгоҳи мазкур мулоқот доир намудаанд. Дар натиҷаи нодуруст ба роҳ мондани корҳои фаҳмондадиҳӣ баъзе аз донишҷӯён мулоқотро тариқи маҷбурӣ ба хизмати ҳарбӣ сафарбар намудан гумон карда, бетартибӣ намудаанд”.

Вобаста ба ин ҳодиса Раёсати ВКД-и Душанбе аз масъулони Комиссариати ҳарбии ноҳияи Варзоб танҳо эроди ҷиддӣ гирифтааст. 

Ин ниҳод дар охир мегӯяд, ки “расман ба иттилои шаҳрвандон расонида мешавад, ки нақшаи шаҳри Душанбе ҷиҳати ба сафи Қувваҳои мусаллаҳ ҷалб намудани наваскарон пурра иҷро шудааст”.

Корбарони шабакаҳои иҷтимоӣ суол мегузоранд, ки агар нақша дар шаҳри Душанбе пурра иҷро шудааст, пас чаро сарбозшикор ҳамоно дар пойтахти кишвар идома дорад ва ҳатто донишҷӯёнро ба хидмат бурда истодаанд. 

Дирӯз, 29-уми май Радиои Озодӣ бо нашри наворе аз облаваи донишҷӯёни соли охири Донишгоҳи тиббии Тоҷикистон ҳангоми супоридани имтиҳон хабар дода буд. 

Дар ин навор дида мешавад, ки донишҷӯён ба ҳар тараф мегурезанд.

Як донишҷӯи хориҷӣ дар суҳбат бо Радиои Озодӣ гуфт, ки “Ҳангоми аз имтиҳон баромадан бачаҳои маҳаллиро қапида дар мошинҳо шинонда бурданд. Чанд касро. Бархе гурехтанд, баъзе кӯшиш карданд, ки қапида нашаванд ва як қисми дигар аз тарс ба имтиҳон надаромадаанд”.  

Масъулони Донишгоҳии тиббии Тоҷикистон сарбозшикорро рад карда, гуфтанд, ки “21 хатмкунанда бо хоҳиши худ ба артиш рафтанд”.

Бадрафторӣ дар қисмҳои ҳарбии кишвар боис шудааст, ки ҷавонон аз рафтан ба хидмат даст мекашанд ва мақомот барои ҷалби онҳо аз усулҳои “облава” ва фишор ба пайвандону наздиконашон истифода мебаранд.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Тоҷикистон: 8 миллиард барои обу ҳаво

Кумитаи ҳифзи муҳити зисти Тоҷикистон ва Бонки Осиёии Рушд...

Боздошти Шокирҷон Ҳакимов, муовини раиси ҲСДТ

Шокирҷон Ҳакимов, муовини якуми раиси Ҳизби сотсиал-демократи Тоҷикисон аз...

Боздошти марди 59-солаи тоҷикистонӣ дар Олмон ба иттиҳоми қатли ҳамсар

Мақомоти олмонӣ як марди 59-солаи тоҷикистониро бо иттиҳоми қатли ҳамсараш боздошт кардаанд.

Баъди латукӯби сарбоз раиси суди ноҳияи Шамсиддин Шоҳин аз вазифа барканор шуд

Раиси суди ноҳияи Шамсиддин Шоҳини вилояти Хатлон, ки як сарбозро латукӯб карда буд, аз вазифа барканор шуд.