Дар чанд рӯзи оянда дар аксар шаҳру ноҳияҳои кишвар дамои ҳаво хеле гарм шуда, сатҳи оби рӯдхонаҳо боло меравад, ки ин эҳтимоли омадани селҳоро зиёд мекунад.
Кумитаи ҳолатҳои фавқулодда ва мудофиаи граждании Тоҷикистон бо такя ба Агентии ҳавошиносии кишвар хабар дод, ки “рӯзҳои 15-17-уми июли соли равон дар натиҷаи болоравии дамои ҳаво дар ҳавзаи дарёҳои Панҷ, Вахш ва Зарафшон эҳтимоли зиёди баланд шудани сатҳи об вуҷуд дорад.”
Ҳамчунин дар хабарномаи КҲФ таъкид мегардад, ки дар ин рӯзҳо ба сабаби шиддати сахти гармо эҳтимоли об шудани пиряхҳо хеле зиёд аст.
Дар пайи эҳтимоли баланд шудани сатҳи обҳо дар рӯдхонаҳои кишвар ва ҷорӣ шудани селҳо, КҲФ аз сокинони хоста, ки “дар ин рӯзҳо ҳамнгоми будубош дар соҳили обҳо қоидаҳои бехатариро ҷиддан рияо намоянд.”
Ҳамчунин Кумитаи ҳолатҳои фавқулоддаи кишвар маслиҳат дода, ки “сайёҳон хати ҳаракати худро ба ин ё он гӯшаи кишвар дар ҳамкорӣ бо мутахассисони КҲФ таҳия намоянд. Бахусус сафар бо роҳҳои кӯҳӣ, ки хатари баногаҳ омадани селҳо ба асари об шудани пиряхҳо вуҷуд дорад.”
Кумита ҳамчунин аз сокинони кишвар хоста, ки ҳангоми ҳаракат аз роҳҳои кӯҳиву ағбаҳо, ҳангоми ҷамъи ҳезуму гиёҳҳои кӯҳӣ ва моҳидориву шикор эҳтиёт кунанд.
Ҳамзамон дар хабари КҲФ аз аҳолии кишвар хоста шуда, ки ба хотири пешгирӣ аз хатари селҳои эҳтимолӣ “сари вақт ҷӯйборҳо, каналҳо ва селроҳаҳои минтақа ва макони зисти худро аз ҳар гуна хасу хаспораҳо тоза кунанд, то оби сел бемамониат ба як маҷрои бехатар ҷорӣ шавад.”
