Ҳамлаи Исроил болои Ғазза идома дорад, 200 кушта бо шумули зану кӯдакон

Рӯзи 8-ум аст, ки ҳамлаи Исроил болои шаҳрҳои Фаластин идома дорад. То ин муддат аз ҳамлаи ҳавоии нерӯҳои исроилӣ болои аҳолии осоишта дар Ғазза 197 фаластинӣ зери биноҳо монда ҷон бохтааст, ки дар байни онҳо 58 кӯдак ва 34 зан мебошад.

Хабаргузориҳои маҳаллӣ аз захмӣ шудани 1235 нафар хабар медиҳаднд. Рӯзи гузашта 38 ҳазор аз аҳолии Ғазза хонаҳои худро тарк карда ба духтуру мактбаҳо ва ҷойҳои умумӣ паноҳ бурданд.

Дар ҳамин ҳол раиси намояндагии “Табибони бидуни марз” дар Ғазза ба хабаргузории “Ал-Ҷазира” гуфта, ки аз сабаби муҳосира ва бомборон шудани Ғазза соҳаи тиббӣ ба як ҷолиши бузург рӯбарӯст.

“Ҳоло ба мо ҳеч навъ кумак намерасад, илова бар ин бар асари ҳамлаҳои Исроил ду табиби мо рӯзи гузашта кушта шуд, намедонем бо ин вазъият ва ин имконоти кам чӣ қадар истодагарӣ карда метавонем”.

Ҳамчунин Салиби Сурхи Фаластин рӯзи гузашта гуфт, сокиноншудагони яҳудӣ бар мошинҳои ёрии таъҷилӣ дар Ҳивора ҷануби Ноблус ҳамла намуда, як мошинро нобуд карданд. Масъулони беморхонаҳо аз набудани имконоти тиббӣ танқисӣ мекашанд, аз ҷомеаҳои байналмиллалӣ талаб доранд, ҳарчи тезтар ба онҳо кумак расонида шавад.

Дар пасманзари ҳамлаҳои шадиди Исроил болои Фаластиниҳо рӯзи гузашта 16 май Шӯрои амнияти СММ ҷаласаи изтирории худро дар мавриди таваққуфи ҳамлаҳои Исроил болои мардуми Фаластин оғоз кард, аммо намояндаи Амрико хост ин ҷаласа ба таъхир гузошта шавад, ки Чин аз он интиқод кард.

Дабири кулли СММ аз “Ҳамос” хост аз партоби мушакҳо ба шаҳрҳои Исроил худдорӣ кунад ва аз Исроил низ хост ҳамлаҳои ҳавоӣ ва “оташбозӣ” дар Ғаззаро поён диҳад. Аммо сарвазири Исроил Бинёмин Натанёҳу баъд аз поёни ин ҷаласа гуфт, ҳамла болои “Ҳамос” дар Ғазза “бо тамоми қувва” идома хоҳад ёфт. Натанёҳу пештар ҳам аз адами ризоиятиаш ба сулҳу гуфтугӯҳоро гуфта буд.

Тибқи иттилои ҷониби Исроил, аз оғози ҷанг Ҳамос ҳудуди 3 ҳазор мушак ба Телабиб ва дигар шаҳрҳои Исроил партоб кардааст. Вазорати дифои Исроил мегӯяд, 90 дарсади ин мушакҳо дар ҳаво хунсо карда шудаанд. Дар натиҷаи ин ҳамлаҳо 10 исроилӣ ҷон бохтааст. Омори маҷруҳин дақиқ нест.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.