Президенти Тоҷикистон дастур дода, ки китоби “Шоҳнома”-и Фирдавсӣ ба тиражи бисёр зиёд чоп ва ба ҳама оилаҳо дар кишвар тақсим карда шавад.
Бино ба иттилои расмӣ, 5-уми декбари соли 2023, Президенти Тоҷикистон Эмомалӣ Раҳмон дар “Симпозиуми байланмилалии илмӣ ба ифтихори 115-солагии академик Бобоҷон Ғафуров” дар шаҳри Душанбе иштирок ва суханронӣ кард.
Эмомалӣ Раҳмон дар рафти суханронии худ аз китоби “Шоҳнома”-и Фирдавсӣ тавсиф карда, дастур дод, ки “ба хотири огоҳии ҳарчи бештари мардум аз таъриху фарҳанг ва тамаддуни аҷдодони хеш “Шоҳнома”-и безаволи Абулқосим Фирдавсӣ чоп ва ба тамоми мардуми кишвар дастрас карда шавад.”
Ин бори аввал нест, ки дар Тоҷикистон китобе барои ҳама чоп ва дастрас карда мешавад. Пеш аз ин дар соли 2020 китоби “Тоҷикон”-и академик Бобоҷон Ғафуров ба тиражҳои зиёд чоп ва ба сокинони кишвар тақсим гардида буд.
Аммо он замон як таҳқиқи “Радиои Озодӣ” нишон дода буд, ки дар рафти чопи китоби “Тоҷикон”-и академик Бобоҷон Ғафуров ҶСП “Нашриёти муосир”-и домоди Эмомалӣ Раҳмон ғолиби озмун эълон шуда буд. Рақиби домоди Президенти Тоҷикистон дар ин озмун ҶСК “Эр Граф” буд.
Бо вуҷуди он ки Ҷамъияти саҳҳомии кушодаи “Эр Граф” нархи чопи ҳар як китобро бо тиражи 1,6 миллион нусха 2 сомониву 81 дирам гуфта буд, дар озмун ноком шуд. Аммо Ҷамъияти саҳҳомии пӯшидаи “Нашриёти муосир”, ки барои чопи ҳар як китоб 83 сомониву 30 дирам талаб карда буд, барандаи озмун эълон шуд.
Ба гуфтаи таҳлилгарон, аз ҳисоби чопи китоби “Тоҷикон” домоди Эмомалӣ Раҳмон зиёда 128 миллион сомониро муфт ба даст овард. Ва эҳтимол меравад дар нашри “Шоҳнома” низ ширкати наздикони худи Эмомалӣ Раҳмон боз чопи онро ба дӯш мегиранд ва аз ин роҳ миллионҳо сомонии маблағи буҷетро аз худ хоҳанд кард.
