Бино ба иттилои дастрас, блогери маъруфи тоҷик Комрони Шуҳрат маъруф бо лақаби “Коля тоҷик”, дар ҷанги Русия алайҳи Украина кушта шуд.
Ба гуфтаи манбаъҳо, Комрон тақрибан ду сол пеш дар шаҳри Маскав бо иттиҳоми тамаъҷӯӣ ва одамрабоӣ боздошт ва зиндонӣ шуда буд. Пас аз он аксҳо ва наворҳое аз ӯ бо либоси низомӣ дар фазои маҷозӣ паҳн гардида буданд. Бархе аз наздикон ва касоне, ки ӯро мешинохтанд, иддао доранд, ки боздошти ӯ бо туҳмати як зани рус сурат гирифта буд.
Бар асоси наворҳое, ки дар шабакаҳои иҷтимоӣ нашр шуд, гуфта мешавад, ҷасади Ҳоҷӣ Комрон ба Тоҷикистон оварда шуда зуҳри имрӯз, 15-уми декабр маросими ҷанозааш дар зодгоҳаш деҳаи Алмосии шаҳри Ҳисор баргузор гардида ва қабристони зодгоҳаш ба хок супурда шуд.
Комрони Шуҳрат 34 сол син дошт ва дар шабакаи YouTube беш аз 232 ҳазор пайгиркунанда дошт ва ҳамчун блогер фаъолият мекард. Ӯ асосан бо нашри наворҳо ва барномаҳо дар бораи мушкилот ва ҳимояи ҳуқуқи муҳоҷирони тоҷик, бахусус дар Русия, маъруф шуда буд ва дар миёни муҳоҷирон ҳаводорони зиёд дошт.
Бояд зикр кард, ки пас аз оғози ҳамлаи Русия алайҳи Украина, теъдоде аз шаҳрвандони Тоҷикистон, аз ҷумла афроди дорои шаҳрвандии Русия ва ҳамчунин маҳкумшудагон дар зиндонҳо бо роҳҳои гуногун ба ин ҷанг ҷалб шудаанд. Расонаҳо борҳо аз марги шаҳрвандони тоҷик дар ин ҷанг хабар додаанд. Инчунин дар шабакаҳои иҷтимоӣ наворҳое паҳн мешаванд, ки дар онҳо баъзе тоҷикони иштирокчии ҷанг аз шароити вазнини худ шикоят мекунанд ва аз дигар тоҷикон мехоҳанд ба ваъдаҳои фиребандаи мақомоти рус барои додани шаҳрвандӣ розӣ нашаванд ва ба ҷанг наоянд.
Бо вуҷуди ин, омори расмӣ дар бораи шумораи дақиқи тоҷиконе, ки дар ҷанги бедалели Русия алайҳи Украина ширкат доранд, нашр нашудааст. Ҳарчанд қонунгузории Тоҷикистон иштироки шаҳрвандон дар ҷангҳои хориҷиро ҷиноят мешуморад, то ҳол ягон шаҳрванди тоҷик ба таври расмӣ бо иттиҳоми ҷангидан алайҳи Украина муҷозот нашудааст. Бархе коршиносон ин вазъро ба унвони нишонаи пуштибонии ғайрирасмии ҳукумати Эмомалӣ Раҳмон аз Русия арзёбӣ мекунанд.
