Намояндагони ширкати сохтмонии “Тех строй”-и шаҳри Маскав барои ҷалби муҳоҷирони меҳнатӣ ба корҳои сохтмонии ин ширкат ба Тоҷикистон омадаанд.
Ба навиштаи хабаргузории “Sputnik”, намояндагони ин ширкати сохтмонӣ нахуст дар шаҳри Хуҷанд ва сипас ба шаҳри Душанбе сафар карда бо сокиноне, ки хоҳиши дар Русия кор карданро доранд, шартномаи корӣ ба имзо мерасонанд.
Шаҳрвандоне, ки моҳҳост дар ҷустуҷӯи кору мунтазири кушодашавии роҳҳо нишастаанд, бо шунидани ташрифи корфармоёни рус ба Тоҷикистон даҳҳо нафар сокинон аз шаҳру навоҳии Суғд рӯзҳои 2 ва 3 март ба Хуҷанд омаданд.
Николай Папов, роҳбари ҶСК “Тех строй”-и шаҳри Маскав дар суҳбат ба Sputnik Тоҷикистон гуфта, ки бахши аъзами коргарони ин ширкат аз ҳисоби муҳоҷирони меҳнатӣ аст ва аз ҳамин лиҳоз ӯ дар ҳамкори бо Хадамоти муҳоҷирати Тоҷикистон бо гурӯҳи иборат аз 16 нафараи худ барои бастани шартномаҳо ба корҷӯён ба Тоҷикистон омаданд.
“Давоми ду рӯз бо бештар аз 500 нафар шартномаҳо ба имзо расонида шуд. Дар ин миён бештар аз 40 нафар ҳамчун мутахассиси баландсоҳа қабул гардиданд”, гуфт роҳбари “Тех строй”-и Маскав.
Бино ба гуфти Папов, баъд аз Хуҷанд сафари онҳо ба шаҳри Душанбе низ дар назар буда, то 6 уми март сокинонро барои ҳамкорӣ қабул мекунанд.
Гуфта мешавад, ширкати “Тех строй” бастани 1000 шартнома бо ҳамкорони тоҷикро дар нақша дошта, масъалаи ташкили хатсайри чартерӣ, расмиётдарории ҳуҷҷатҳо аз қабили иҷозатномаи ҷойи кор, таъмин намудан бо хобгоҳ ва сари ҳар моҳ пардохт намудани маоши муҳоҷиронро ба уҳда гирифтааст.
Аксари шаҳрвандони Тоҷикистон то баста шудани марзҳо байни Тоҷикистону Русия дар ин кишвар кор мекарданд ва зиндагии худу хонводаашонро мечархонданд, аммо баъд аз шуюъи бемории ҳамагир ва қатъи парвозҳои доимӣ аксаран корҳои худро аз даст доданд ва хелеҳо низ ба ватан баргаштанд.
Айни замон аз сабаби бекорӣ дар кишвар онҳо рӯзшуморӣ мекунанд, ки кай парвозҳои доимӣ барқарор мешаванду ба сари кори худ бармегарданд.
