Коргарон дар Роғун шаш моҳ боз бемаош кор мекунанд

Кормандони ширкати “Асри нур” тӯли ним сол боз маош нагирифтаанд, сарвазир ваъда карда будааст, ки маошҳоятон пардохт мешавад, вале бо гузашти шаш моҳ то ба имрӯз аз маошҳояшон хабаре нест.

Кормандони ширкати мазкур дар ин бора ба Радиои Озодӣ иттилоъ доданд.

Гуфта мешавад, дар ширкати "Асри нур" 160 нафар фаъолият дошта, ки ба сабаби таъхир дар пардохти маош то кунун бист нафар кори худро қатъ кардаанд.

Ҳамсари Темур Кенҷаев Мадина Кенҷаева, сокини ноҳияи Шаҳритӯс, ба Радиои Озодӣ гуфтааст,  шаҳвараш дар ширкати "Асри нур" кор мекунад ва бори охир ба ҳисоби бонкиаш моҳи июни имсол пул гузаштааст.

Дар идома иброз доштааст, ки барои фаҳмидани асли масъала ба номи раҳбарияти нирӯгоҳи "Роғун" ҳам нома навишта, чунин посух дарёт кардаанд:

"Маоши коргарон барои моҳи январи имсол пурра ва моҳи феврал 50 дарсад пардохта шудааст. Бо дарёфти маблағ аз тарафи фармоишгар музди кории Темур Кенҷаев пурра пардохта хоҳад шуд."

Кенҷаева гуфтааст, баъдан масъулони ширкат то моҳи июн ниме аз маоши шавҳарашро доданд, аммо ним сол боз ба ҳисоби бонкиаш чизе нагузаштааст.

Маҳмадсаид Каримов коргари дигари ин  ширкат гуфтааст, шаш моҳ мешавад бе маош фаъолият доранд. "Ҳар ҳафта мегӯянд, маошро медиҳанд, ақаллан 30 ё 50 дарсадашро. Рӯзҳо мегузаранд, вале музди корро намедиҳанд ва сабабашро ҳам намегуянд."

Дар идома иброз доштааст, ки музди кориаш аз 2 ҳазор сомонӣ бештар буда ва ҳар моҳ 15 рӯз дар нақби нерӯгоҳ ба кори сохтмон машғул мешаванд.

Иброз доштааст, ки ба хотири набудани ҷойи кор ва нагирифтани маош корашро идома медиҳад, зеро дар чунин шароит пайдо кардани кор мушкил будааст.

Раиси ширкати "Асри нур" Толиб Раҳимов, дар мавриди пардохт нашудани масъалаи маоши кормандон, телефони худро хомуш карда ба зангҳои пай дар пайи Радиои Озодӣ ҷавоб надодааст.

Ба гуфтаи кормандони ин ширкат Қоҳир Расулзода, сарвазири Тоҷикистон, ки ҳамзамон масъули сохтмони нерӯгоҳи "Роғун" дар ҳукумат аст, дар ҳузури коргарон ваъда дода буд, ки "ба зудӣ маош мешавад", вале бо гузашти шаш моҳ  ҳеҷ тайғироте анҷом нашудааст.