Давлатзода Нусратулло Муқим, раиси ивазнашавандаи Кумитаи андози Тоҷикистон, ки аз соли 2009 ба ин курсӣ такя задааст, дар нишасти хабарии имрӯзааш аз иҷрои нақшаи ҷамъоварии андоз дар ҳаҷми 123% дар нимсолаи аввали соли ҷорӣ хабар дод. Мақомоти андоз чанд соли охир ҷамъоварии андозро хеле бештар аз нақша иҷро мекунанд.
Раиси кумитаи андоз гуфт дар ин муддат мақомоти андоз 17,4 миллиард сомонӣ андоз ҷамъоварӣ кардаанд, ки нисбат ба нақшаи пешбинишуда 2,3 млрд сомонӣ бештар мебошад. Ӯ гуфт, ки нақшаи ҷамъоварии андоз дар ҳама минтақаҳои ҷумҳурӣ пурра иҷро шудааст.
Дар ҳамин ҳол, ба гуфтаи Давлатзода бақияи қарзи андозҳо бештар шуда, дар миқёси кишвар ба 1,4 млрд расидааст, ки нисбат ба аввали сол 351 млн сомонӣ бештар мебошад. Яке аз сабабҳои зиёд гардидани қарзи андозҳоро раиси Кумитаи андоз дар ин мебинад, ки дар соли 2025 хоҷагиҳо даромади бештаре нисбат ба соли 2024 доштаанд. Ҳамчунин ӯ аз ҷаримаву фоизбандиҳое, иттилоъ дод, ки кормандони кумита баъди тафтиши хоҷагиҳо бастаанд ва сабаби афзоиши қарзи андозсупорандагон шудааст. Ба гуфтаи ӯ танҳо ҷаримаҳо 113 миллион сомониро ташкил додаанд.
Раиси Кумитаи андоз ҳамчунин аз афзоиши “субъектҳои хоҷагидор забар дод, ки тибқи омори 1-июли соли ҷорӣ ба 351,2 ҳазор адад расида, нисбат ба аввали сол 10,3 ҳазор бештар будааст.
Афзоиши ҳаҷми ҷамъоварии андозҳоро коршиносон аввалан сахттар кардани чораҳои ҷамъоварии маблағҳо аз тарафи мақомоти андоз бо роҳҳои нави назорати электронии савдо, кассаҳои онлайнӣ ва пайгирии амалиёти бонкӣ ва сониян дар натиҷаи ин чораҳо камтар шудани иқтисоди соя ё иқтисоди сиёҳ мебинанд.
