Кумитаи дини Тоҷикистон рӯзи 12-уми март бо нашри матлабе нархнома барои адокунандагони ҳаҷҷи фарзиро эълон кард.
Ин ниҳоди танзимгари умури динии кишвар, арзиши хизматрасониҳо барои мавсими ҳаҷҷи соли ҷориро 56 ҳазору 800 сомонӣ (муодили 5 ҳазор доллари амрикоӣ) эълон кард.
Маблағи мазкур барои харидории билети ҳавопаймо (рафту баргашт), иҷораи меҳмонхона дар шаҳрҳои Макка ва Мадина, таъмини се вақт хӯрок дар давоми сафар, хидматрасонии роҳбаладон, таъмини шароити иқомат дар Мино, Арафот ва Муздалифа, пардохти маблағи қурбонӣ, таъмини нақлиёт барои интиқоли ҳоҷиён дар масири Ҷидда-Макка-Мино-Арафот-Муздалифа-Мино-Макка-Мадина, ташкили нуқтаҳои тиббӣ дар шаҳрҳои Макка ва Мадина ва таъмини онҳо бо маводи доруворӣ, суғурта, пардохти боҷи давлатӣ, таъмини ҳоҷиён бо китоб дар бораи маносики ҳаҷ ва таҳияи бейҷикҳо истифода мешавад.”, омадааст дар хабари Кумитаи дини Тоҷикистон.
Аммо ин ниҳод таъкид карда, ки довталабони сафари ҳаҷ маблағҳои худро бояд ба таври ғайринақдӣ танҳо тавассути “Ориёнбонк” пардохт кунанд. Ин дар ҳолест, ки “Ориёнбонк”-ро додараруси раисҷумҳур Эмомалӣ Раҳмон Ҳасан Асадуллозода ва дигар аъзои хонаводаи президент идора мекунанд.
Гуфта мешавад, сафари довталабони ҳаҷҷи имсола аз “нимаи дуюми моҳи май” оғоз мешавад. Ин кумита ба сокинон ҳушдор додааст, хоҳишмандони ҳаҷҷи фарзӣ бояд танҳо ба воситаи онҳо бираванд ва тариқи дигар ширкатҳо нараванд.
Аммо солҳои ахир дида мешавад, ки шаҳрвандони Тоҷикистон ба воситаи ширкатҳои сайёҳии дигар кишварҳо ба хотири арзону дастрас будан барои адои ҳаҷ мераванд. Кумитаи дин гуфта, ки шаҳрвандони Тоҷикистон набояд тариқи дигар кишварҳо ба ҳаҷ бираванд.
Масъулони Кумитаи дин низ ҳушдор додаанд, ки афроде, ки бо роҳҳои ғайрирасмӣ барои адои маносики ҳаҷ сафар мекунанд, ҳудуди 13300 доллар ҷарима мешаванд, бар илова 6 моҳ зиндонӣ ва барои даҳсол аз Арабистони Саудӣ ихроҷ мешаванд.
Аммо корбарон дар шабакаҳои иҷтимоӣ менависанд, ки ин таҳдидҳои мақомоти динии кишвар бештар ба хотири касби даромад аст. Чун нархи адои ҳаҷ дар кишварҳои ҳамсоя ва Русия аз Тоҷикистон арзонтар буда ва боз шароити беҳтару хубтареро барои ҳоҷиён фароҳам мекунанд.
