Вазъи саломатии Маҳмурод Одинаев, муовини зиндонии раиси ҲСДТ дар маҳбас вахим шудааст.
Зубайда Ҳакимова, ҳамсари Маҳмурод Одинаев мегӯяд, ки аз рӯзи 3 то 7-уми феврали соли ҷорӣ ҳамроҳи кӯдаконаш ба зиндон барои дидани шавҳараш рафта буданд. Ба гуфтаи Ҳакимова, вазъи саломатии шавҳараш бад буда, дучори фишори хун, бемории дил шудааст, аз баста шудани роҳи пешобдон (аденома) азият мекашад ва бидуни асобағал роҳ гашта наметавонад.
Ҳамсари Маҳмурод Одинаев рӯзи 13-уми феврал дар суҳбат ба Радиои Озодӣ гуфта, ки ду сол пеш, вақте аз ҳоли шавҳараш хабар гирифта буд, роҳ гашта наметавонист ва аз бемории дилу фишори хун шикоят мекард ва то ҳол дар ӯ беҳбудие дида намешавад.
Дар идома Зубайда Ҳакимова гуфта, ки шавҳараш пештар дар беморхонаи маҳбас бистарӣ будааст, аммо вазъи саломатияш бетағйир боқимонда, боз ба утоқи маҳбас овардаанд.
Маҳмурод Одинаев дар аввали моҳи феврал нома навишта, аз масъулони маҳбаси Ваҳдат ва Раёсати зиндонҳо хоста будааст, ки ӯро дар бемористон ҷой кунанд. Пайвандону наздиконаш низ аз мақомот талаб доранд, ки вазъи ин зиндонии сиёсӣ ногувор нашуда, ба муолиҷаи ҷиддӣ ниёз дорад ва ӯро бояд дар бемористони маҳбас бистарӣ кунанд.
Ёдовар мешаем, ки моҳи декабри соли 2020 Маҳмурод Одинаев, собиқ муовини раиси ҲСДТ аз тарафи мақомот дастгир ва бо иттиҳоми авбошӣ ва даъват ба сарнагун сохтани ҳокимияти конистутсионӣ гунаҳкор дониста, ба 14 соли зиндон маҳкум шуд. Дертар мақомот дар моҳи сентябри соли 2021 Маҳмурод Одинаевро шомили афв карда, аз 14 соли ҳукми зиндони ӯ 3 солашро кам кардаанд. Аммо худи Одинаев афвро напазируфта хостори раҳоияш шуда буд.
Маҳмурод Одинаев 20-уми ноябри соли 2020 ва баъди дархости гирдиҳамоӣ нопадид шуд. Ӯро баъд аз ду ҳафта дар ҳудуди шаҳри Душанбе дастгир карданд.
Пеш аз боздошти Одинаев писараш Шайхмуслиҳиддин Ризоев низ боздошт шуда буд. Мақомот Шайхмуслиҳиддинро бо иттиҳоми “авбошӣ” ва “кӯшиши таҷовуз ба номус” барои 6 сол аз озодӣ маҳрум кард.
Пайвандони Маҳмурод Одинаев ӯ ва писарашро бегуноҳ медонанд ва боздошти онҳоро фармоишӣ ва ба хотири фаъолиятҳои сиёсии Одинаев арзёбӣ мекунанд.
