Аз чанд ҳафта боз мухолфон ва фаолони маданӣ пайваста аз он шикоят доранд, ки мақомот дар Тоҷикистон, ба пайвандони онҳо фишор меоранд ва маҷбурашон мекунанд то бар зидди онҳо сӯҳбатҳои видеоӣ анҷом бидиҳанд.
Тӯли чанд ҳафтаи охир чандин наворҳо аз тарафи тролҳои зери ҳимояти мақомотҳои қудратӣ дар шабакаҳои иҷтимъӣ ва телевизионҳои давлатӣ ба нашр расид. Маъмулан қаҳрамонҳои чунин наворҳо аз фаолияти пайвандони худ изҳори нигаронӣ мекунанд ва онҳоро ба хиёнат муттаҳам кардаву хоҳиш мекунанд то аз фаолиятҳои сиёсӣ даст бикашанд.
Мухолифон бар ин назаранд, ки ҳамаи ин суҳбатҳо зери фишор наворгирӣ шудааст ва наздикони онҳо пеш аз сабти навор таҳидиду бозпурсӣ шудаанд.Чанд нафар аз пайвандони ва фарзандони зиндониёне, ки СММ онҳоро “зиндонии сиёсӣ” хонда аст, охирҳои моҳи июн дар номае ба унвони раиси ҷумҳур, додситони кул ва ваколатдори ҳуқуқи инсон навишта буданд, ки “Дар телевизионҳои давлатӣ ва шабакаҳои иҷтимоӣ мунтазам матлабу навор ва филмҳое паҳн мешаванд, ки дар онҳо наздикони моро, маҷбурӣ ба навор мегиранд”, то зидди рақибони сиёсӣ истифода кунанд. Ба гуфтаи ин афрод ҳамаи ин наворҳо иҷборан сабт шудаанд. Онҳо аз мақомот талаб доранд то ба чунин аъмол хотима бидиҳанд.
Додситонии кулли Тоҷикистон ба ин нома ҷавоб дод ва гуфт, ки номаи хешовандони чанде аз маҳбусонро таҳқиқ мекунад. Дастгоҳи Омбудсмен ё Ваколатдор оид ба ҳуқуқи инсон дар Тоҷикистон мегӯяд, аз натиҷаи тафтиши нома “ба Омбудсмен ва муаллифони нома хабар дода хоҳад шуд”. Аммо коршиносон мегӯянд, ба ҷавоби ариза умед бастан чандон мантиқӣ нахоҳад буд. Ба гуфтаи Шуҳрат Қудратов, ҳуқуқшиноси тоҷик, ин ариза “ё беҷавоб мемонад ё ҷавоб дода мешавад, ки нисбат ба хешу табори онҳо таҳдид, шиканҷа ва фишор умуман ҷой надорад”.
Ҳамзамон Ҷаннатуллоҳи Комил, масъули дафтари ҲНИТ дар Олмон, аз ҷумлаи онҳонест, ки аз боздошт шудану мавриди бозпурсӣ қарор ги рифтани наздиконаш хабар дод. Ӯ мегӯяд, 13 узви оилаашро мақомоти амниятии кишвар барои бозпурсӣ ба идораҳои амниятӣ бурдаанд ва баъзеашро боздошт кардаанд. Бештари боздоштшудаҳо занону кӯдакон гуфта мешавад.
Мақомот то ба ҳол сабаби боздошти онҳоро шарҳ надодааст. Бино ба гуфтаи Ҷаннатуллоҳи Комил мақомот талаб кардаанд, ки се марди узви оила бояд худро таслим кунанд. Сабаби даъват ба таслими онҳо ҳам маълум нест. Ҷаннатуллоҳи Комил масъули дафтари ҲНИТ дар Олмон мебошад, ба иддаои ӯ ин кор аз тарафи Кумитаи давлатии амнияти миллии Тоҷикистон роҳандозӣ шудааст. Ин масъули ҲНИТ бо нашри аксе, ки гуфта мешавад аз кормандони Кумитаи амнияти ноҳияи Данғара гиифта шудааст, менависад:
“Субҳи имрӯз боз чанд тан аз кормандони амнияти вилояти Хатлон ба хонаи мо, дар ҷамоати Себистон омада, мехоҳанд боз ҳамсари бародрам, апаам, ҳамсари ҷиянам ва духтари акаамро ҳамроҳ бо кӯдакони ширхорашон ба Амнияти минтақа бурда, бозпурсӣ кунанд”.
Дар ин замина Иззат Амон низ дар сафаҳи фейсбукияш навишт:
“Ба таваҷҷӯҳи “фермаи ҷавоб” ва дастандаркорони филме, ки бар алайҳи ӯ сабт шудааст!!! Мулломақсатулло, имоми масҷиди деҳаи Чоряккорон 50 000 доллар дода раиси ҷамоати Чоряккорон таъин гардид. Ҳанӯз 3 моҳ кор накарда сари ӯ туҳматеро бор карда бар зиддаш парванда боз кардед”.
Ба гуфтаи Иззат Амон тамоми молу мулки ин мардро кашида гирифтанд. Гузашта аз ин, ӯро маҷбур кардаанд то зидди ӯ ҳарфҳои музахраф бизанад.
Изат Амон дар сафҳааш навишт, ки “ҳоло домулло бекор ҳасту намедонад чӣ гуна зиндагиашро гузаронад. Ба ман занг зада маъзаратхоҳӣ намуда хоҳиш кард то кумакаш кунам. Ба ҷонаш раҳм намоеду ҳадди ақал нисфи пулашро гардонда диҳед. Одаму одамгариро фаромӯш накунед. Ин мулло хидмати шуморо карду бадбахт гашт. Ба ҷонаш раҳм намоед!”
Иззат Амон ҳомии ҳуқуқи муҳоҷирон дар Русия аст ва чандин маротиба бар алайҳи ӯ низ наворҳо нашр шудааст. Ҳмзамон дар ин авохир писари Зубайдуллоҳи Розиқ, яке аз зиндонии сиёсӣ ва узви Раёсати олии ҲНИТ, Асрориддини Розиқ боздошт шуда буд. Ба иддаои пайвандонаш ӯ нахоста алайҳи падараш баромад кунад ва аз ӯ дифоъ кардааст. Инчунин Мирзои Салимпур, рӯзноманигори маъруфи тоҷик низ аз боздошти хешовандонаш хабар дода ба Дастгоҳи иҷроияи Президенти кишвар Эмомалӣ Раҳмон нома ирсол кард ва аз боздошту бозпурсиҳои ғайриқонунии наздиконаш аз ҷониби кормандони КДАМ шикоят кардааст. Худи оғои Салимпур ин қазияро чунин шарҳ дод.
Ҳамзамон мо аз Муҳаммадҷон Кабиров коршиноси масоили сиёсӣ ва нафаре ки парванади чандин зиндониро бо кумаки созмонҳои ҳуқуқии байнамиллаӣ барои додхоҳи равони СММ кардааст, ва кумитаи ҳуҷуҷи башар барои ин парванаҳо хулосаи худро баровардааст, пурсидем, ки мақомот бо ин кирдорҳояш чи мехоҳад ва то кадом дарҷа мухолифон ин кирдорҳои мақомтро пайгирӣ мекунанд ва оё имкони ба додгоҳҳо кашидани дастандаркорони чунин аъмол вуҷуд дорад? Ё боз ҳам ҳами ин кирдорҳо бе ҷавоб хоҳад монд?
Кушишҳои мо барои гирифтани раъйи мақомотҳои расмӣ бенатиҷа буд ва танҳо Оятулло Гиялев, собиқ фаоли мухолиф ки ҳоло аз мавқеъҳои ҳукумат дифоъ мекунад, даъвои фаъолонро беасос гуфт.
