Расонаҳои хабарӣ аз марги зиёда аз 550 нафар зоирони хонаи Худо дар айёми баргузории маросими Ҳаҷ-2024 хабар медиҳанд. Ҳоҷиёни тоҷик ҳама саломат ҳастанд?
Бино ба иттилои расонаҳои хабарӣ, дар рафти баргузории маросими Ҳаҷ-2024 зиёда аз 550 нафар аз зоирони Хонаи Худо аз кишварҳои мухталифи дунё барои баргузории маросим Ҳаҷ ба Арабистони Саудӣ сафар карда буданд, вафот кардаанд.
Ба қавли мақомоти Арабистони Саудӣ, дар замони баргузории маросими Ҳаҷ-2024 дамои ҳаво дар ин кишвар ва бахусус дар шаҳри Макка ва атрофи он зиёда аз 50 дараҷа гарм буда, сабаби марги қисме аз ҷонбохтагони хориҷӣ ҳам тоб наовардани онҳо ба гармои шадид дар ин кишвар арзёбӣ шудааст.
Сухангӯи расмии Маркази миллии боду ҳавошиносии Арабистони Саудӣ гуфтааст, ки душанбеи 17-уми июни соли ҷорӣ дар соати 13:00 минтақаи марказӣ дар Масҷиди ҳаром 51,8 дараҷа гамр, Арафот 48, дар минтақаи Мино ва Муздалифа бошад, 46 дараҷа гармии дамои ҳаво сабт шудааст.
Хабаргузории Фаронса ба нақл аз манбаъҳои дипломатӣ хабар додааст, ки бештарин теъдоди ҷонбохтагон шаҳвандони мисрӣ ҳастанд, ки 323 нафарро ташкил медиҳад. Вазорати беҳдошти Индонизия ҳам аз марги 144 нафар аз зоирони худ дар ин кишвар хабар додааст.
Ҳамзамон мақомоти урдунӣ марги 41 нафар аз шаҳрвандони худро таъйид кардаанд. Хабаргузории Тунис ҳам аз фавти 35 нафар аз шаҳрвандони худ дар Арабистони Саудӣ хабар додааст. Пеш аз мақомоти эронӣ аз марги 12 нафар аз зоирони кишвар хабар дода буданд.
Кумитаи дин, танзими анъана ва ҷашну маросими назди ҳукумати Тоҷикистон, ки масъули фиристодани зоирони Хонаи Худо дар мавсими Ҳаҷ аст, то замони таҳияи ин матлаб ба сурати расмӣ дар бораи марги ҳеч як нафар зоирони тоҷикистонӣ хабар надодааст.
Гуфта мешавад, тибқи оморҳои расмӣ, дар рафти баргузории маросими Ҳаҷ-2024 зиёда 1 миллиону 800 ҳазор нафар аз кишварҳои мухталифи дунё ширкат кардааст. Бар илова, оморҳои ғайрирасмӣ низ аз он ҳикоят доранд, ки бо вуҷуди ихроҷи беш аз 355 ҳазор нафар аз Макка, ҳамоно даҳҳо ҳазор нафари дигар ба сурати ғайрирасмӣ дар ин маросим ширкат кардаанд.
