Хона блог саҳифа 100

ПМТ хостори таъсиси як механизми мустақил барои озодии зиндониёни Бадахшон шудааст

Аз ҷониби
Azda TV 3
-
0

Паймони Миллии Тоҷикистон бо нашри як изҳороти расмӣ ҷомеаи ҷаҳониро даъват намудааст, то барои пешгирӣ ва хотима додани саркӯби мардуми бумии Бадахшон иқдомҳои фаврӣ анҷом диҳанд.

Муҳиддин Кабири, раиси ПМТ, бо нашри паёме дар шабакаи иҷтимоии Х навиштааст, ки ин санад дар посух ба изҳороти ҳашт созмони байналмилалии ҳуқуқи башар таҳия шудааст.

Дар паёми Кабирӣ таъкид мешавад, ки зарур аст бо ҳамкории Созмони Милали Муттаҳид ва Додгоҳи байналмилалии ҷиноӣ механизми мустақили таҳқиқотӣ таъсис дода шавад. Ҳамчунин ПМТ дар изҳороти худ талаб кардааст, ки ҳамаи шаҳрвандони боздоштшудаи бадахшонӣ озод гарданд.

Ёдовар мешавем, ки ҳашт созмони байналмилалӣ, аз ҷумла Созмони ҷаҳонии зидди шиканҷа ва Ҳамкорӣ барои ҳуқуқи башар, рӯзи 4-уми август бо нашри изҳороти муштарак марги чаҳор маҳбуси зодаи Вилояти Мухтори Кӯҳистони Бадахшонро дар зиндонҳои Тоҷикистон маҳкум карданд ва аз мақомоти тоҷик хостанд, ки таъқибу саркӯби помириҳоро бас кунанд.

Созмонҳои ҳомии ҳуқуқ дар изҳороти худ ба вазъи номуносиби боздоштгоҳҳо ва набудани хизматрасонии тиббӣ ишора карда, гуфтанд, ки марги бархе аз боздоштшудагон нишонаи мушкилоти ҷиддӣ дар Тоҷикистон аст. Онҳо афзуданд, ки шиканҷа ва набудани ёрии зарурии тиббӣ боиси бад шудани саломатии маҳбусони помирӣ шуда, нигаронии ҷиддии ҷомеаи байналмилалиро ба бор овардааст.

Сафи тоҷикон дар артиши Русия рӯз ба рӯз меафзояд

Аз ҷониби
AZDA-TV
-
0

Русия ҷалби шаҳрвандони Тоҷикистонро ба ҷанги зидди Украина афзоиш додааст.

Маркази ҳамоҳангсозии асирони ҷангии Украина “Хочу жить” 18-уми августи соли 2025, номи 628 шаҳрванди Тоҷикистонро нашр кардааст, ки дар шаш моҳи аввали соли 2025 бо Қувваҳои мусаллаҳи Федератсияи Русия шартнома бастаанд.

Ин омор баёнгари афзоиши суръати ҷалби хориҷиён ба ҷанги зидди Украина нисбат ба давраҳои соли гузашта мебошад.

Қаблан ҳамин марказ номи 931 шаҳрванди Тоҷикистонро, ки дар солҳои 2023 ва авоили соли 2025 дар сафи артиши Русия зидди Украина ҷангиданд нашр карда буд. Дар ин омор гуфта мешуд 196 нафарашон фавтидаанд, ки ҷавонтаринашон 18 ва калонсолтаринашон 70 сол доштааст.

Ин шумораи бештарин дар байни ҳамаи кишварҳои Осиёи Марказӣ, аз ҷумла Қирғизистон, Қазоқистон ва Узбекистон буда, омор метавонад аз ин ҳам бештар бошад. Чун пештар раҳбари Маъмурияти байналмилалии исломӣ муфтӣ Шафиқ Пшихачев дар ҷаласаи Палатаи ҷамъиятии Федератсияи Русия гуфта буд, ки беш аз 8 ҳазор зодаи Тоҷикистон дар сафи артиши Русия қарор гирифта, бар зидди Украина меҷанганд.

Аммо бар хилофи Узбекистон, ки дар он ҷо иштирок дар ҷанг метавонад ба ҷавобгарии ҷиноятӣ оварда расонад, дар Тоҷикистон то ҳол ягон ҳолати боздошт ё ҳукм нисбати сарбозон ё ҷалбкунандагон ба қайд гирифта нашудааст.

Ҳатто додситони кулли Тоҷикистон Ҳабибулло Воҳидзода зимни нишасти матбуотие ба хабарнигорон гуфта буд, ки дар бештар аз се соли охир касеро барои иштирок дар ҷанги Украина ҷазо надодаанд, чун баъзе аз онҳо душаҳрвандӣ доранд ва ҳар нафаре, ки шаҳрвандии ягон кишварро қабул кунад, талабот ва уҳдадориҳои он давлатро бояд риоя кунад.

Иддаои ин мақомдори тоҷик дар ҳолест, ки борҳо муҳоҷирони тоҷики бе шаҳрвандии Русия аз ҷалби иҷборияшон ба артиши ин кишвар шикоят карда буданд ва дар аксар ҳолат ба муҳоҷирон пас аз адои хидмат ё бастани шартнома бо Қувваҳои мусаллаҳи Русия ҳуҷҷати ин кишвар дода мешавад.

Маркази ҳамоҳангсозии асирони ҷангии Украина “Хочу жить” низ навиштааст, ки мақомоти Русия ҳангоми рейд аз зӯроварӣ ва фишори равонӣ нисбат ба муҳоҷирони Осиёи Марказӣ истифода бурда, онҳоро боздошт карда, баъдан маҷбур месозанд то бо Қувваҳои мусаллаҳи Русия бо ваъдаи шаҳрвандӣ ё пули зиёд шартнома имзо намоянд. Дар сурати рад кардан, муҳоҷиронро бо зиндон таҳдид мекунанд ё ҳатто латтукӯб менамоянд.

Пас аз ворид шудан ба артиш, тоҷиконро аксар вақт дар воҳидҳои ҷудогона ҷамъ карда, ба минтақаҳое равона месозанд, ки талафот дар онҷо махсусан зиёд аст.

Пештар ба Azda.tv як сарбози тоҷик низ гуфта буд, ки шартномаи як солааш бо Вазорати дифои Русия дар моҳи феврали соли ҷорӣ ба охир расид, аммо бо гузашти ду моҳ ва навиштани даҳҳо ариза ва нома ба Додситонӣ ва Вазорати дифои Русия ба ӯ иҷоза надодаанд, ки аз минтиқаи ҷангӣ берун барояд ва ҳатто иҷозаи рухсатиро ба ӯ надодаанд.

Ӯ ҳамчунин таъкид карда буд, ки вазъи руҳияш бад асту чашми чапаш хуб намебинад ва маълумотнома (справка)-и духтур ва тавсифнома (характеристика)-и муовини фармондеҳи дастаи низомӣ (командири рота)-яшро ба даст овардааст, ки дар онҳо гуфта мешавад, ҳаққи идома ширкат дар ин ҷангро надорад.

Вале, ба гуфтаи худаш, бо вуҷуди ин ҳама, ӯро маҷбур доранд, ки боз барои идомаи иштирок дар ҷанги зидди Украина бо шиносномаи русияш шартномаи нав бандад. То ҳол тақдири ин ҷавони тоҷик норӯшан боқӣ мондааст.

Зеленский дар Кохи Сафед чӣ ба даст овард?

Аз ҷониби
AZDA.TV
-
0

Рӯзи гузашта дар Кохи Сафед нишасти махсуси Доналд Трамп бо Владимир Зеленский ва сарони кишварҳои аврупоӣ баргузор шуд.

Гуфта мешавад, асосан дар ин нишаст масъалаи музокироти Украина бо Русия дар нишасти ҳузурии раисҷумҳурон, Владимир Путин ва Владимир Зеленский ва расидан ба оташбасу поён додани ҷанге, ки се сол боз идома дорад, баррасӣ шудааст.

Раисҷумҳури Украина Владимир Зеленский дар ин нишаст аз омодагии худ барои мулоқот бо Путин хабар дода, афзудааст, ки мехоҳад баҳси масоили марзиро шахсан бо худи Путин дар миён гузорад.

Трамп дар ин нишаст ба Зеленский ваъдаи кафолати амниятиро додааст, вале гуфта, ки амнияти Украина аз ҷониби Иттиҳоди Аврупо ва дар мувофиқа бо Амрико таъмин мешавад.

Қаблан сарони Иттиҳоди Аврупо аз Амрико хоста буданд, ки дар ҷараёни гуфтушунидҳо кафолати ҷиддии амниятӣ барои дигарбора таҳдид накардани Русия ба Украина ва дигар кишварҳои аврупоӣ гирифта шавад.

Аммо Путин ҳам дар мулоқоти Аляска бо Трамп шартҳои худро барои додани кафолати амниятӣ ва дигарбора ҳамла накардан ба Украина додааст. Тасарруф ва ба хоки худ илова кардани минтақаи Донбас ва баъзе аз манотиқи Херсон ва Запароже, инчунин бетараф мондани Украина ва шомил нашуданаш ба НАТО аз пешниҳодоти Путин буд.

Ба назари коршиносон, нишасти дирӯзаи Трамп бо Зеленский ва сарони кишварҳои аврупоӣ дар Кохи Сафед ба ҷуз суханпардозӣ ва таърифҳову ташаккургӯиҳои ҷониби Украина дигар чизе малмус набуд. Шояд гуфтугӯҳои пасипардагие сурат гирифта бошад, вале чеҳраҳо зоҳиран розӣ ва хушнуд менмуданд.

Аммо вобаста ба замони баргузории нишасти ояндаи президентҳои Амрико, Русия ва Украина ва макони он то ҳанӯз ба таври расмӣ чизе гуфта нашудааст.

Қаблан Эммануэл Макрон, раисҷумҳури Фаронса барои макони баргузории ин нишаст пешниҳод дода, ки нишасти сеҷонибаи Трампу Путин ва Зеленский дар шаҳри Женеви Шветсария анҷом шавад.

Аммо “Reuters” бо такя ба як мақоми баландпояи амрикоӣ гузориш дод, ки гарчанде Кремл то ҳанӯз расман розигии худро барои нишасти сеҷониба ва макони он эълон накардааст, вале ба эҳтимоли зиёд макони баргузории ин нишаст Маҷористон (Венгрия) хоҳад буд.

Русия мехоҳад сафи муҳоҷирони кориро кам кунад

Аз ҷониби
AZDA-TV
-
0

Вазорати меҳнат ва ҳифзи иҷтимоии Русия тарҳи қонунеро пешниҳод кардааст, ки тибқи он аз соли 2026 саҳми коргарони хориҷӣ дар нуҳ бахши иқтисоди ин кишвар кам карда мешавад.

Дар ин тарҳи қонун пешниҳод шудааст, ки ҳиссаи муҳоҷирони корӣ дар сохтмон, ки дар он асосан зодагони кишварҳои Осиёи Марказӣ, бахусус тоҷикон кор мекунанд, аз 80% то 50% пойин оварда шавад. Инчунин дар корхонаҳои истеҳсолу фурӯши маҳсулоти хурокворӣ ва нӯшокиҳо на камтар аз нисфи ҷойҳои корӣ танҳо ба шаҳрвандони Русия дода шаванд.

Ҳамчунин ҷалби муҳоҷирон дар фурӯши чаканаи машрубот ва маҳсулоти тамоку пурра манъ хоҳад шуд.

Маҳдудиятҳо дар соҳаи кишоварзӣ ва саноати ҷангал низ ҷорӣ хоҳад шуд ва дар парвариши сабзавот, буридани ҷангал ва коркарди чӯб ҳиссаи муҳоҷирон аз 50% то 40% кам карда мешавад.

Бар асоси ин лоиҳа ҳамчунин барои 29 минтақаи Русия хусусиятҳои минтақавӣ пешбинӣ шуда, дар 14 минтақа қонунҳо сахттар хоҳанд шуд. Аз ҷумла, дар вилояти Амур ҷалби муҳоҷирон ба соҳаи истеҳсоли маҳсулоти хӯрокворӣ ва фаъолияти ветеринарӣ пурра манъ ва дар вилояти Уляновск бошад, ба коргарони хориҷӣ иҷозат дода намешавад, ки дар соҳаи мусофиркашонӣ фаъолият кунанд.

Дар гузашта мақомот дар баъзе минтақаҳо кори муҳоҷиронро дар соҳаи мусофиркашонӣ ва ресторану қаҳвахонаҳо маҳдуд карда буданд. Аммо баъзе ин минтақаҳо бо камбуди коргару ронандагон ва шикояти сокинон аз дер мондани нақлиёти ҷамъиятӣ рӯ ба рӯ шуда буданд.

Қаблан Вазорати меҳнат пешниҳод карда буд, хориҷиёне, ки аз дигар кишварҳо бо раводид меоянд бидуни донистани забони русӣ ба вазифаҳое, ки иртиботи доимӣ бо шаҳрвандони Русияро талаб мекунанд, ҷалб нашаванд.

Гуфта мешавад, баҳси кори муҳоҷирон дар бахшҳои муайяни иқтисодиёти Русия миёни мақомдорон ва ҷомеаи ин кишвар давоми чанд соли охир доғтар шудааст.

Ва пас аз ҳодисаи ҳамла ба бинои “Крокус Сити Ҳолл”, ки гумонбаронаш муҳоҷирон мебошанд, дар Русия фазои муҳоҷирбадбинӣ ба авҷи худ расида, мақомоти ин кишвар ҳамроҳи гурӯҳҳои миллатгар бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбат ба муҳоҷирон бадрафторӣ карда, онҳоро латтукӯб мекунанд.

Ба гуфтаи муҳоҷирон, мақомоти амниятии ин кишвар асноди будубошу дигар ҳуҷҷатҳои зодагони кишварҳои Осиёи Марказиро барои нарафтан ба ҷанги зидди Украина бекор мекунанд. Инчунин дар ин муддат дар Русия чандин қонунҳои наве дар Думаи давлатӣ пешниҳоду қабул гардид, ки шароити вазнини муҳоҷиронро мушкилтар мекунад.

Ҳар касе ба назди фолбин меравад муҷозот мешавад?

Аз ҷониби
Azda TV 3
-
0

Ҳукумати Тоҷикистон ба порлумон тарҳи қонунеро пешниҳод кардааст, ки бар асоси он муроҷиат ба фолбин, ҷодугар ва сеҳрдон метавонад бо ҷарима муҷозот шавад.

Гуфта мешавад, тибқи тарҳи пешниҳод намудаи Ҳукумати кишвар ба Кодекси ҳуқуқвайронкунии маъмурии Тоҷикистон банди нави “Истифодабарӣ аз хизматрасонии сеҳрдон, ҷодугар ва фолбин” илова хоҳад шуд.

Бар асоси лоиҳа, шахсоне, ки барои мушкилоташон ба чунин афрод муроҷиат мекунанд, ба ҷаримаи маъмурӣ ба андозаи аз 5 то 10 нишондиҳандаи ҳисоббаробар (375 то 750 сомонӣ) рӯ ба рӯ мешаванд.

Ёдовар мешавем, ки соли 2024 барои худи амали фолбинӣ ва ҷодугарӣ низ муҷозот пешбинӣ шуда буд. Онҳое, ки ба ин кор машғул мешаванд, метавонанд ба андозаи 80 то 100 нишондиҳанда ҷарима шаванд ё то 15 рӯз ҳабси маъмурӣ шаванд.

Вазорати корҳои дохилии Тоҷикистон тайи моҳҳои охир чандин бор аз боздошти афроде хабар додааст, ки ба фолбинӣ, ҷодугарӣ машғул будаанд. Ба иттилои ВКД, ин афрод бо роҳи фиреб, мардумро боваркунонда, маблағҳои зиёдеро соҳиб мешуданд.

Бо вуҷуди он ки беш аз 90 дарсади сокинони кишвар мусалмонанд ва фолбинӣ дар дини ислом ҳаром шумурда мешавад, мутаассифона, бозори фолбинҳо ҳамоно гарм аст. Ба гуфтаи огоҳон, аксарияти муроҷиаткунандагонро, занҳо ташкил медиҳанд.

Трамп: Зеленский метавонад дар бораи Қрим ва НАТО дигар фикр накунад

Аз ҷониби
AZDA.TV
-
0

Владимир Зеленский, расиҷумҳури Украина рӯзи душанбе бо мақсади дидор бо Доланлд Трамп, раисҷумҳур Амрико ва гурӯҳе аз раҳбарони аврупоӣ ба Вашингтон сафар кард.

Интизор меравад, Трамп дар аввал ба таври инфтиродӣ бо Зеленский мулоқот кунад ва сипас ҳарду дар ҷаласаи густардатар бо раҳбарони аврупоӣ ширкат кунанд. Ва гуфта мешавад, натоиҷи ин дидор маълум хоҳад кард, ки мулоқоти сеҷонибаи Трамп, Путин ва Зеленский барои идомаи музокирот сурат мегирад ё на.

Раисҷумҳури Украина имрӯз ҳангоми вуруд ба Вошингтон ба хабарнигорон гуфт, ки умедвор аст, бо шарикони ғарбии худ Русияро ворид ба сулҳ кунад ва ҳарчи тезтар ин ҷанг хотима ёбад.

Аммо Трамп шоми якшанбе дар Кохи Сафед ба хабарнигорон гуфт, ки Зеленский метавонад фавран ҷангро поён диҳад, ба шарти он ки фикри бозпасгирии Қрим ва ё пайвастан ба НАТО-ро аз сараш дур кунад. Зеро, ба гуфтаи ӯ, талаби ин ду аз ҷониби Зеленский “ғайримумкин” аст.

Раҳбарони аврупоӣ, аз ҷумла садри аъзами Омлон Фридрих Мертс, раисҷумҳури Фаронса Эммануэл Макрон, нахутвазири Британия Кир Стермер ва раиси Комиссия Аврупо Урсула фон дер Лейн ба Вошингтон сафар карданд, то дар дидор бо Зеленский ва Доналд Трамп ширкат кунанд.

Вазорати корҳои хориҷии Олмон дар робита ба эҳтимоли расидан ба созишҳо байни Украина ва Русия гуфта, ки “бояд ба Украина замонатҳои амниятии қавӣ дода шавад, то пас аз сулҳ битавонад аз худ дифоъ кунад.”

Ин дар ҳолест, ки рӯзи ҷумъаи гузашта Трамп бо Путин дар Аляска мулоқот доштанд ва ин гуфтугӯ тақрибан се соат тӯл кашид.

Пас аз ин дидор Трамп гуфт, ки “пешрафти бисёр бузург” дар мавзуи Русия ва Украина дар роҳ аст. Аммо Трамп аз ҷузъиёти ин мулоқот чизе нагуфт. Танҳо таъкид кард, ки кӯшиш мекунад бо Зеленский дар ҷаласаи густардае бо ҳузури раҳбарони кишварҳои Иттиҳоди Аврупо мулоқот мекунад.

Тибқи гузоришҳо, тарҳе дар ҳоли баррасӣ аст, ки бар асоси он Русия бахшҳое аз манотиқи ишғол кардаашро дар Укриана раҳо намуда, ақибнишинӣ кунад, дар муқобил Киев манотиқи васеътар дар Шарқ, бахусус Донбасро ба Русия вогузор кунад.

Аз ҷумлаи шартҳои Путин, ки пас аз ин дидор расонаӣ шуд, ин аст, ки Русия омодааст дар ҳол ба ҷанг дар минтақаҳои Запароже ва Херсон хотима диҳад ва дигар ба на ба Украина ва на ба дигар кишваҳои аврупоӣ таҳдид кунад. Аммо дар муқобил бояд Украина ба НАТО напайвандад ва ҳамчун кишвари бетараф боқӣ бимонад.

Трамп ҳам эълом кард, ки пас аз розӣ шудани Зеленский ба шартҳои Путин ва поён додани ҷанг Амрико омодааст ба Украина замонати амниятӣ бидаҳд. Аммо то ҳанӯз тафсилоти замонатҳои амниятии Амрико ва шартҳои он маълум нест.

Тоҷикон 100 сол баъд пулдор мешаванд

Аз ҷониби
Azda TV 3
-
0

Бонки ҷаҳонӣ дар гузориши нави худ таҳти унвони “Тезонидани рушди иқтисодӣ дар кишварҳои Аврупо ва Осиёи Марказӣ” дурнамои рушди чанде аз кишварҳоро баррасӣ кардааст.  

Тибқи ин гузориш, дар асоси суръати миёнаи рушди иқтисодӣ дар даҳсолаи охир, барои расидан ба сатҳи давлатҳои дорои даромади баланд (зиёда аз 14 ҳазор доллар барои ҳар нафар), Тоҷикистон ба муддати зиёда аз 100 сол ниёз дорад.

Ҳамзамон, Бонки ҷаҳонӣ таъкид мекунад, ки чунин ҳисобҳо танҳо дар шароити бақои суръати кунунии рушд мебошанд ва метавонанд дар ҳолати ислоҳоти иқтисодӣ, беҳтар шудани фазои сармоягузорӣ ва рушди бахшҳои муҳими саноативу инфрасохторӣ тағйир ёбанд.

Тибқи маълумоти нашршуда, дар баробари Тоҷикистон, кишварҳои Узбекистон ва Озарбойҷон низ дар ҳамин гурӯҳ қарор гирифтаанд. Аз сӯи дигар, Қазоқистон ва Туркманистон метавонанд пас аз 30–40 сол ба сатҳи даромади баланд бирасанд, дар ҳоле, ки Қирғизистон ба 70–80 сол ниёз дорад.

Ёдовар мешавем, ки Бонки ҷаҳонӣ дар ин гузоришаш кишварҳоро ба чор гурӯҳи даромадӣ ҷудо мекунад:  

– паст (то 1100 доллар),  

– миёнаи поён (1100–4500 доллар),  

– миёнаи боло (4500–14000 доллар),  

– баланд (зиёда аз 14000 дооар).

Дар ҳоли ҳозир даромади миёна барои ҳар як нафар дар Тоҷикистон 2 ҳазору 655 сомони тақрибан 280 долар аст.

Зимнан, бояд қад кард, ки Тоҷикистон зиёда аз 30 сол аст зери роҳбарии Эмомалӣ Раҳмон ва хонаводаи ӯ қарор дорад. Бо вуҷуди ваъдаҳои ислоҳоти иқтисодӣ, сатҳи зиндагии аксарияти мардум паст боқӣ монда, муҳоҷирати корӣ ба Русия ва дигар кишварҳо ягона роҳу воситаи даромади устувори садҳо ҳазор хонавода гардидааст.

Бино ба ҳисобҳои ғарирасмӣ, беш аз ду миллион шаҳрвандони Тоҷикистон дар муҳоҷирати корӣ қарор доранд. Танҳо аз ҳисоби интиқоли маблағҳои онҳо қариб нисфи буҷети кишвар таъмин мешавад.

Сохтори иқтисоди Тоҷикистон то ҳол асосан ба содироти пахта, алюминий ва маҳсулоти кишоварзӣ такя мекунад. Дар дохили кишвар ҷойҳои кори муносиб кам буда, аксарияти аҳолӣ ба кишоварзӣ машғуланд, ки он ҳам бинобар набуди технологияи замонавӣ ва обу зерсохтор, самаранокии баланд надорад.

Коршиносон бар онанд, ки то замоне ки низоми сиёсии кунунӣ ислоҳ нашавад ва фазои сармоягузорӣ шаффофу рақобатпазир нагардад, иқтисоди кишвар дар ҳолати вобастагӣ боқӣ монда, шонси рушди воқеӣ нахоҳад дошт.

Қирғизистон байни марзи худ бо Тоҷикистон симхоркаширо оғоз кардааст

Аз ҷониби
AZDA.TV
-
0

Мақомоти вилояти Ботканди Қирғизистон 13-уми август ба расонаҳо хабар доданд, ки нерӯҳои марзбонии ин кишвар аллакай симхоркашӣ дар марз бо Тоҷикистонро оғоз кардааст.

Гуфта мешавад, мақомоти Қирғизистон аллакай 60 км 951 метри марзро дар деҳаи Оқ-Сойи ноҳияи Ботканд ва мавзеи Катта-Тузи ноҳияи Лайлак симхор кашиданд.

Пештар расонаҳои Қирғизистон хабар дода буданд, ки мақомоти ин кишвар тасмим гирифтаанд марҳилаи аввали симхоркашӣ бо марзи Тоҷикистонро, ки 420 километрро ташкил медиҳад, то охири соли ҷорӣ анҷом диҳанд.

Аммо мақомоти тоҷик то ҳанӯз дар ин маврид чизе нагуфтаанд ва маълум нест кадом минтақаҳоро Тоҷикистон симхоркашӣ мекунад ва оё ба ин кор оғоз кардааст ё на, чизе нашр нашудааст.

Дар охири соли гузашта мақомоти Тоҷикистону Қирғизистон ба таъйин ва аломатгузории нуқтаҳои ҷанҷолӣ ба мувофиқа расиданд ва ба кашмакшу муноқишаҳои хунин поён доданд. Ва моҳи марти соли ҷорӣ президентҳои ду кишвар созишномаи ниҳоиро имзо карданд.

Ҳоло дарозии марзи муштарак байни ду кишвар 1006 километрро дар бар мегирад.

Пас аз поён ёфтани муноқишаҳо байн Тоҷикистону Қирғистон муносибатҳои дипломатӣ, фарҳангӣ ва тиҷоратӣ аз сар гирифта шуд.

Ҳафтаи пеш сардори Раёсати омори вилояти Суғди Тоҷикистон Исомадин Садриддин дар нишасти матбуотӣ ба хабарнигорон гуфт, ки баъд аз саргирии равобит байни ду кишвар, дар давоми ним сол ҳаҷми умумии гардиши мол байни ду кишвар тақрибан 7 миллион долларро ташкил додааст.

Аммо пеш аз он, Вазорати иқтисод ва савдои Қирғизистон хабар дода буд, ки то моҳи июни соли 2025 ҳаҷми гардиши мол байни ду кишвар ба 2,1 миллион доллар расидааст, ки инро “дастоварди назаррас” номаида буд.

Шикояти муҳоҷирони ихроҷшуда аз шароити сахти боздоштгоҳ

Аз ҷониби
Azda TV 3
-
0


Як гурӯҳи муҳоҷирони тоҷик, ки дар боздоштгоҳи муваққатии Русия нигаҳдорӣ мешаванд, бо нашри як навори видеоӣ аз норӯшан будани сарнавишташон ва шароити вазнини нигоҳдориашон шикоят кардаанд.

Дар наворе, ки аз ҷониби муҳоҷирон нашр шуд, гуфта мешавад, ки тақрибан 75 нафар дар як утоқи танг ва номусоид, бе шароити беҳдоштӣ ва ғизои кофӣ нигаҳ дошта мешаванд. Яке аз муҳоҷирон мегӯяд, ки “даҳ рӯз боз дар инҷо ҳастам, рӯзе як дона доширак медиҳанд, дигар чиз не”. 

Ба гуфтаи онҳо, дар байни боздоштшудагон занон, кӯдакони хурдсол ва ҳатто шахсони бемор, аз ҷумла як нафар бо бемории дил низ ҳастанд. 

Муҳоҷирон аз мақомоти тоҷик хоҳиш доранд, ки ба додашон бирасанд ва барои раҳоӣ ва беҳтар кардани шароити онҳо иқдом кунанд.

Ин дар ҳолест, ки борҳо шаҳрвандон аз бетаваҷҷуҳии намояндагиҳои дипломатии Тоҷикистон дар хориҷ, бахусус дар Русия шикоят кардаанд.

Ба гуфтаи таҳлилгарон, дар ин шабу рӯзҳо муҳоҷирони тоҷике, ки дар Русия кору зиндагӣ мекунанд қариб ҳаррӯз аз ҷониби мақомоти интизомии ин кишвар таҳқиру боздошт ва ҳатто ихроҷ мешаванд, вале мақомоти Тоҷикистон на танҳо кумак намекунад, балки дар аксари ҳолатҳо аз вазъи шаҳрвандони худ огоҳ нест.

Кишварҳои арабӣ ғасб мешаванд? Вокуниши арабҳо ба изҳороти Натанёҳу

Аз ҷониби
AZDA.TV
-
0

Давлатҳои Миср, Урдун, Арабистони Саудӣ, Қатар ва чанде аз кишварҳои дигари арабӣ ба таври ҷудогона ба изҳороти Бинёмин Натанёҳу, нахуствазири Исроил вокуниш карданд.

Нахуствазири Исроил дар як мусоҳибае гуфтааст, ки дар сар нақшаи иҷрои тарҳи “Исроили Бузург”-ро мепарварад. Ба гуфтаи коршиносон, ин тарҳ васеъ кардани қаламрави Исроил аз дарёи “Нил то Фурот” аст, ки аз худи Фаластин то Мисру Укрдун, Лубнону Сурия, қисмате аз Арабистону Саудӣ ва Қатару Кувейтро шомил мешавад.

Натанёҳу дар ин мусоҳибааш, ки бо телевизиони исроилии “i24” анҷом додааст, мегӯяд: “Эҳсос мекунам дар як вазифаи муҳими торихӣ ва имонӣ қарор дорам ва аз нигоҳи отифӣ ба чашмандози “Исроили Бузург” сахт бовар дорам.”

Ин изҳори Натанёҳу вокуниши ҷомеаи арабиро ба бор овардааст. Аз ҷумла, Вазорати корҳои хориҷии Арабистони Саудӣ рӯзи чоршанбе, 13-уми август бо нашри баёние изҳороти нахуствазири Исроилро маҳкум кард ва онро “ҳамла ба соҳибихтиёрии давлатҳои арабӣ” унвон кард.

“Шоҳигарии Арабистони Саудӣ бо сахттарин ибораҳо изҳороти Бинёмин Натанёҳу, нахуствазири ҳукумати ишғолии Исроилро, ки дар мавриди “Дидгоҳи Исроили Бузург” содир кард, маҳкум мекунад. Андешаҳо ва нақшаҳои шаҳраксозӣ ва тавсеаталабие, ки мақомоти Исроил дар сар мепарваранд, ба шиддат рад мекунад.”, омадааст дар баёнияи Вазорати корҳои хориҷии Арабистони Саудӣ.

Ҳамзамон Вазорати корҳои хориҷии Қатар низ ба ин изҳорот вокуниш нишон дода, онро маҳкум кардааст. Давлати Қатар “изҳороти Натанёҳу дар мавриди “Дидгоҳи Исроили Бузрг”-ро идомаи “равиши ишғолгарӣ мабнӣ бар худхоҳӣ, барангехтани буҳрону низоъҳо, таҷовуз бар ҳокимияти давлатҳову қонунҳои байналмилалӣ ва Оинномаи СММ” донистааст.

Қатар дар баёнияи худ бар зарурати “ҳамбастагии ҷомеаи байналмилалӣ барои рӯ ба рӯ шудан бо ин гуна иғвоҳо, ки минтақаро ба сӯи хушунату бетартибиҳои бештар мекашонад”, таъкид мекунад.

Ба ҳамин монанд давлатҳои Мисру Урдун низ бо нашри баёнияҳои ҷудогона иҳзороти Бинёмин Натанёҳуро маҳкум карданд. Ва аз ҳукумати Исроил талаб доранд, ки ба таври расмӣ ин иддаои Натанёҳуро рад кунад. Инчунин дар вокунишҳои кишварҳои арабӣ аз ҷомеаи байналмилалӣ хоста шуда, ки пеши роҳи худхоҳӣ ва тавсеаталабии Исроил гирифта шавад.

Ин изҳороти Натанёҳу дар ҳоле расонаӣ мешавад, ки аз ҷанги Ғазза тақрибан ду сол мегузарад. Ва чанде пеш бо фармони Бинёмин Натанёҳу артиши Исроил барои ғасби комили Ғазза ва Каронаи Бохтарӣ омодагӣ мебинад.

Ёдовар мешавем, ки Исроил бо ҳамлаҳои шадиди ҳавоӣ ва заминии худ ду сол боз Ғаззаро бомборон мекунад. Мувофиқи оморҳои расмӣ, шумори кушташудагон аз 7-уми октябри соли 2023 то кунун беш аз 62 ҳазор буда, аммо шумори захмиён марзи 155 ҳазорро гузаштааст.

1...99100101...785саҳифаи 100 аз 785