Хона блог саҳифа 108

Кӯчабандон дар Душанбе

Аз ҷониби
AZDA TV-2
-
0

Раёсати Вазорати корҳои дохилӣ дар шаҳри Душанбе хабар додааст, ки тайи се рӯзи оянда дар бархе кӯчаҳои марказии пойтахт маҳдудияти ҳаракат дар роҳ ҷорӣ карда мешавад.

Бино ба иттилои расмӣ, 23-уми июли соли 2025 Президенти Муғулистон бо сафари расмӣ вориди Тоҷикистон мешавад ва ба ҳамин муносибат мақомоти то замони баргаштани вай ҳаракати нақлиёти ҷамъиятиро дар бархе кӯчаҳои пойтахт маҳдуд мекунанд.

Пеш аз ин иттилоъ дода шуда буд, ки Ухнаагийн Хурэлсух, Президенти Муғулистон асри 23-уми июли соли ҷорӣ вориди шаҳри Душанбе, пойтахти Тоҷикистон мешавад. Раёсати корҳои дохилӣ ҳам дар шарҳи ин хабар гуфтааст, ки пагоҳ “аз соати 18:00 то соати 22:00 ҳаракати воситаҳои нақлиёт тавассути кӯчаҳои М.Мастонгулов, А.Дониш, С.Айнӣ ва хиёбони Рӯдакӣ муваққатан маҳдуд мегарданд.”

Субҳи 24-уми моҳи ҷорӣ дар шаҳри Душанбе Форуми сармоягузории Тоҷикистон ва Муғулистон баргузор мегардад ва шоми ҳамон рӯз низ дар Театри опера ва балети пойтахт баргузории рӯзҳои Фарҳанги Муғулистон дар Тоҷикистон ба нақша гирифта шудааст.

Раёсати корҳои дохилӣ ҳам гуфтааст, ки ҳамзамон “давоми рӯзи 24-уми июл ҳаракати воситаҳои нақлиёт тавассути хиёбонҳои Рӯдакӣ ва Сомонӣ, кӯчаҳои Теҳрон ва Шероз, ҳамзамон санаи 25-уми июл ҳаракати нақлиёт тавассути хиёбони Рӯдакӣ, кӯчаи С.Айнӣ ба самти ш.Ваҳдат ва қисмати бегоҳ ҳаракати нақлиёт тавассути хиёбони Рӯдакӣ, аз дидбонгоҳи «Чорбоғ» ба самти н.Варзоб, дар соатҳои гуногун муваққатан маҳудуд мегарданд.”

Гуфта мешавад, Ухнаагийн Хурэлсух, Президенти Муғулистон, ки бо сафари серӯза ба Тоҷикистон меояд, дар ин муддат бо мақомоти мухталифи кишвар дидору мулоқот карда, дар назар аст, ҷонибҳо чанд созишнома ва шартномаеро ҳам байни ду кишвар ба имзо расонанд.

Бо ин ҳол, Эмомалӣ Раҳмон, ки дар вақти пешвоз гирифтани меҳмонон ба бедаранг харҷ ва исроф кардани садҳо миллион сомонӣ оддат кардааст, ҳанӯз маълум нест, ки ин дафъа шоми 25-уми июл дар Бустонсарои беруназшаҳрии Ҳукумати Тоҷикистон – Такоби ноҳияи Варзоб чӣ қадар пулро обулой мекунад?

Муҳоҷирон дар 3-моҳ 1,8 миллиард доллар ба Тоҷикистон интиқол доданд

Аз ҷониби
Azda TV 3
-
0

Дар семоҳаи аввали соли 2025 аз хориҷ ба Тоҷикистон 1,8 миллиард доллар интиқол ёфтааст. Ба гуфтаи Бонки Авруосиёии Рушд, ин рақам нисбат ба ҳамин давраи соли гузашта 66 дарсад бештар аст.

Дар як изҳороти расмии ин бонк дар Телеграм гуфта мешавад, ки яке аз омилҳои асосии тақвият ёфтани қурби сомонӣ дар баробари доллар, маҳз ҳамин афзоиши интиқоли пул аз хориҷ ва боло рафтани нархи тиллои содиротии кишвар будааст.

Бонки Авруосиёии Рушд мегӯяд, дар пайи афзоиши интиқоли пул ва содироти тилло, арзиши сомонӣ дар муқоиса бо доллари амрикоӣ тақвият ёфтааст.

Аз оғози соли 2025 то имрӯз, қурби сомонӣ 12,5 фоиз баландтар шудааст ва танҳо дар моҳҳои охир 3,3 фоиз болоравиро нишон медиҳад.

Ба таъкиди мутахассисони бонк, ин таҳкими қурби миллӣ ба пастшавии сатҳи таваррум низ таъсир расонда, ки дар моҳи июн то 3,6 дарсад коҳиш ёфтааст, нишондоде, ки назар ба моҳи май камтар аст.

Ин дар ҳолест, ки ҳукумати Эмомалӣ Раҳмон дар гузоришҳои расмӣ камтар аз саҳми муҳоҷирон дар иқтисоди кишвар ёд мекунад ва кӯшиш менамояд, нақши муҳимми онҳоро нодида бигирад.

Бо вуҷуди он ки садҳо ҳазор муҳоҷири тоҷик солона миллиардҳо доллар ба кишвар мефиристанд ва зиндагии садҳо ҳазор хонавода бо пули онҳо таъмин мешавад, мақомоти давлатӣ то ҳол сиёсати муназзами ҳимоят аз ҳуқуқи муҳоҷирон дар Русия ва дигар кишварҳоро роҳандозӣ накардаанд.

Ба гуфтаи таҳлилгарон, иқтисоди Тоҷикистон сахт вобаста ба интиқоли пули муҳоҷирон аст, вале дар амал муҳоҷирони тоҷик дар кишварҳои хориҷ, бахусус Русия, бо бетаваҷҷӯҳии мақомоти тоҷик рӯбарӯ ҳастанд ва дар ҳолатҳои зиёде бо сабаби дарёфт накардани ҳимоятҳои ҳуқуқӣ ба солҳои тӯлонӣ маҳкум ба зиндон мешаванд ва ё аз Русия ихроҷ мегарданд.

Чаҳор ҳазор ҷойи кори холӣ дар мақомоти давлатӣ

Аз ҷониби
Azda TV 3
-
0

Дар шаш моҳи аввали соли ҷорӣ мақомоти давлатии Тоҷикистон бо камбуди ҷиддии кадрҳо рӯбарӯ шудаанд. Илёс Идрисзода, раиси Оҷонсии хизмати давлатӣ дар ин бора хабар додааст.

Раиси Оҷонсии хизмати давлатӣ, ки дар нишасти хабарии худ рӯзи 21 июл бо хабарнигорон суҳбат мекард, гуфт, феълан 4 ҳазору 102 мансаби давлатӣ холӣ боқӣ мондааст ва кадрҳо намерасанд.

Ба гуфтаи ӯ, барои ҳар як мансаби холӣ ҳамагӣ 0,6 довталаб рост меояд, ки нишондиҳандаи нигаронкунанда барои низоми идоракунии давлатӣ маҳсуб мешавад. Ӯ ҳамзамон эътироф кард, ки дар баъзе ҳолатҳо як нафар вазифаи чанд мансабдорро ба дӯш мегирад, амале, ки ба гуфтаи Идрисзода, аз норасоии кадрӣ сарчашма мегирад.

Мансабҳои давлатӣ тибқи қонунгузорӣ аз тариқи баргузории озмунҳо қабул карда мешаванд. Довталабон бояд забони давлатӣ ва қоидаҳои истифодаи компютерро хуб донанд, инчунин бо таъриху фарҳанги миллӣ ва санадҳои ҳуқуқӣ шинос бошанд, иброз дошт Идрисзода

Ҳарчанд дар кишвар сатҳи бекорӣ баланд бошад ҳам, бисёре аз корхонаҳои давлатӣ ва ҳатто бахши хусусӣ аз пайдо кардани мутахассисон танқисӣ мекашанд. Ба эътиқоди корҷӯён, маоши паст яке аз сабабҳои асосии камбуди довталаб ба ҳисоб меравад.

Мақомот пайваста ярмаркаҳои ҷойҳои кориро ташкил медиҳанд, аммо бархе мутахассисон мегӯянд, ки ислоҳоти амиқ дар низоми музди меҳнат ва шароити хуби кор лозим аст, то кадрҳои мутахасисро ҷалб кунанд.

Бо вуҷуди мавҷуд будани ҳазорон ҷойи кори холӣ дар сохторҳои давлатӣ, солҳои охир тамоюли рӯзафзуни фирори мутахассисони соҳибтаҷриба ба хориҷи кишвар, махсусан барои дарёфти маоши бештар ва шароити беҳтари зиндагӣ ба мушоҳида мерасад.

Бархе шаҳрвандон ва коршиносон мегӯянд, ки низоми интихоби кадрҳо дар сохторҳои давлатӣ шаффоф нест ва баъзе мансабҳо ба воситаи шиносбозӣ ва ришва тақсим мешаванд. Ба гуфтаи онҳо, ин сабаб мешавад, ки мутахассисони воқеӣ ва ҷавон барои дарёфти мансаб имконият пайдо накунанд ва роҳи муҳоҷиратро пеш гиранд.

Ҳамзамон, шикоятҳо дар бораи харидуфурӯши мансабҳо ва воситабозӣ барои дарёфти ҷои кор, хусусан дар мақомоти давлатӣ ва мансабҳо, зиёд ба гӯш мерасанд. Ин ҳолат эътимоди ҷомеаро ба низоми хизмати давлатӣ коҳиш медиҳад ва ба рушди кадрӣ ва ташаккули давлатдории миллӣ таъсири манфӣ мерасонад.

Ҳайати улaмои ансор муҳосираи Ғаззаро шикастан мехоҳад

Аз ҷониби
AZDA TV-2
-
0

Ҳайати ҷаҳонии уламои Ансори Паёмбар (с) бо нашри як изҳороти видеоӣ аз Шайхулазҳари Миср хостааст, ки барои шикастани муҳосираи Навори Ғазза ва расонидани кумакҳои инсонӣ ба сокинон ба сурати амалӣ иқдом кунад ва ин иқдом метавонад муодиларо дар минтақа тағйир диҳад.

Уламои ансор хитоб ба Шайхулазҳар мегӯянд, ин як фурсати торихӣ аст ва бо истифода аз он метавонад номи худро ҳамчун Изз бин Абдуссалом дар торих ба некӣ сабт кунад ва дар ғайри он ҳамакаса дар пешгоҳи Худованд барои посух гуфтан омода шаванд.

Дар ин изҳороти расмӣ, ки дирӯз тариқи шабакаҳои иҷтимоӣ нашр шуд, аз сарони кишварҳои арабӣ дар минтақа хоста шудааст, ки ҳамон тавре дар солҳои 1979-1989 роҳи ҷиҳод алайҳи собиқ Иттиҳоди Шӯравӣ дар Афғонистонро боз карда буданд, ин дафъа ҳам барои шикастани муҳосираи Навори Ғазза чунин иқдом кунанд.

Инчунин дар ин изҳороти уламо таъкид шудааст, ки ҳама раҳбарону фаъолони кишварҳои исломӣ дар роҳи шикастани муҳосира ва расонидани кумакҳои иснсонӣ ба мардуми бечора, гурусна ва ташнаи Навори Ғазза бояд саҳми худро бигузоронад.

Ба назар мерасад, уламои ҳайати ансор аз сарони кишварҳо арабӣ дар минтақа он қадар умед надоранд ва ба ҳамин хотир тамоми қабилаҳои кишварҳои ҳамсояи Фаластинро хитоб қарор дода, бо таъкид мегӯянд, ки барои шикастани Навори Ғазза бо ҳам муттаҳид шаванд ва сари вақт иқдом намоянд.

Ин даъватгарон таъкид мекунанд, ки агар мардуми қабоил барои шикастани муҳосираи Навори Ғазза иқдом намоянд, онҳо омодаанд, ки аз пешгомони ин ҳаракат барои расонидани кумакҳои инсонӣ аз қабили обу нон ва доруворӣ ба мардуми Ғазза бошанд.

Ин дархостҳо барои шикастани муҳосираи Навори Ғазза дар ҳоле садо медиҳанд, ки пеш аз ин ҳам чандин гурӯҳҳо ва созмонҳои худҷӯш иборат аз фаъолони кишварҳои гуногун барои шикастани муҳосираи Навори Ғазза иқдом карда буданд, вале ҳамаи онҳо бо шикаст мувоҷиҳ шуданд. Инчунин дар ҳоли ҳозир як гурӯҳ аз фаъолони маданӣ ҳомили киштие бо номи Ҳанзала ҳам барои шикастани муҳосираи Навори Ғазза аз Итолиё ба самти Ғазза дар ҳаракат ҳастанд.

Гуфтанист, Навори Ғаззаи Фаластин 18-сол инҷониб зери муҳосираи Исроил қарор дорад ва дар давоми 4 моҳи ахир вуруди ҳамагуна кумакҳои инсониро ба ин минтақаи ҷангзада маҳдуд кардааст. Созмони Миллали Муттаҳид мегӯяд, ки сатҳи гуруснагӣ дар Навори Ғаззаи Фаластин ба марҳилаи 5-уми радабандиҳои ҷаҳонӣ дар бораи муайн кардани сатҳи гуруснагӣ расидааст. Марҳилае, ки ҳудуди 90% аҳолии онро фаро гирифтааст.

Исроил 8-уми октябри соли 2023 ҳамлаҳои навбатии худ алайҳи Навори Ғаззаро оғоз карда, ки то ҳол ин ҷанг идома дорад. Дар натиҷа, тай ин ин муддат наздик ба 60 ҳазор нафар аз фаластиниён, ки теъдоди аксари онҳоро занону кӯдакон ташкил медиҳанд, кушта шуда, зиёда аз 160 ҳазор каси дигар захмӣ шудаанд. Мақомоти фаластинӣ дар Навори Ғазза теъдоди касоне, ки зери оворҳо мондаанд ва ё нафароне, ки бар асари бомбборонҳои шадид беномунишон гаштаандро ба даҳҳо ҳазор нафар баробар мекунанд.

Оғози мурофиаи додгоҳии гумонбарони ҳамла ба “Крокус”

Аз ҷониби
AZDA-TV
-
0

Нуздаҳ нафаре, ки дар ҳамлаи террористӣ ба толори консертии «Крокус Сити Холл» дар шаҳри Красногорски вилояти Маскав гумонбаранд, аз боздоштгоҳ ба Суди ҳарбии Округи 2‑уми ғарбии Маскав бурда шудаанд.

Бино ба иттилои ТАСС, гумонбарон дар мурофиаи пешакӣ, ки пушти дарҳои баста имрӯз, 21-уми июл баргузор мешавад, иштирок хоҳанд кард.

Инчунин аз 2 ҳазору 300 нафаре, ки ҳамчун ҷабрдида дар ин парванда шинохта шудаанд, тақрибан 150 каси онҳо дар мурофиаҳои додгоҳӣ бевосита иштирок хоҳанд кард.

Дар ҷараёни имурофиаи имрӯза, додрас бояд санаи оғози баррасии асосии парванда ва биноеро, ки дар он мурофиаҳои судӣ баргузор мешаванд, муайян намояд .

Гуфта мешавад, маводи парвандаи ҳамла ба “Крокус” аз 470 ҷилд ва натиҷаи беш аз 200 ташхиси гуногун дар бораи айбдоршавандагон иборат буда, онро ҳайати иборат аз се додрас баррасӣ хоҳанд кард.

Ёдовар мешавем, ки шоми ҷумъаи 22-уми марти соли гузашта пеш аз оғози консерти гурӯҳи “Пикник” чор нафар вориди бинои “Крокус Сити Ҳолл”-и шаҳри Красногорски вилояти Маскав шуда, сӯи мардум аз автоматҳо тир кушоданд. Пас аз чанде ин бино оташ гирифт. Ба иттилои расмӣ, дар натиҷаи тирпарронӣ ва сар задани оташ 149 нафар ба ҳалокат расида, беш аз 609 нафари дигар ҷароҳат бардоштаанд ва 1 нафар бе ному нишон шудааст. Бино ба баҳогузории Кумитаи тафтишотӣ, зарари умумии расонидашуда тақрибан 6 миллиард рублро ташкил медиҳад.

Пас аз ҳамла, гумонбарон талош карданд бо мошин фирор кунанд, вале онҳо дар вилояти Брянск боздошт шуданд. Тибқи иттилои вакили дифои яке аз муттаҳамон, тафтишот бар он аст, ки иштирокчиёни ҳамла аз ҷониби ташкилоти террористии “Вилояти Хуросон”-и “ДИИШ” ҷалб шудаанд. Ба гуфтаи ӯ, пас аз анҷоми ҳамла гумонбарон мехостанд ба Украина фирор кунанд, чун бовар доштанд, ки аз он ҷо ба Русия супурда намешаванд.

Мақомоти рус чор зодаи Тоҷикистон Далерҷон Мирзоеви 32-сола, Саидакрам Раҷабализодаи 30-сола, Шамсидин Фаридуни 25-сола ва Муҳаммадсобир Файзови 19-соларо гумонбарони асосии ин ҳамла медонанд ва иддао доранд, ки онҳо айбномаро пазируфтанд.

Аммо маълум нест онҳо дар чӣ шароите гуноҳро бар дӯш гирифтаанд, чун дар шабакаҳои иҷтимоӣ наворҳое аз рафти шиканҷаи ин афрод нашр шуданд ва дар мурофиаи додгоҳӣ онҳоро бо осори ҷароҳат дар сару рӯяшон намоиш дода буданд.

Кумитаи тафтишотии Русия пеш аз фиристодани парванда ба прокуратура иддао карда, ки ҳамла “ба манфиати роҳбарияти Украина” тарҳрезиву анҷом дода шудааст ва ҳадаф ноором кардани вазъи сиёсӣ дар Русия будааст. Аммо мақомоти Украина пештар ҳамагуна даст доштан дар ин ҳамларо рад карда, он замон бо нашри навори ҳамла гурӯҳи террористии “ДИИШ” масъулияти ҳодисаро ба дӯш гирифта буд.

Ҳамзамон ин ниҳоди интизомии Русия мегӯяд, ки омодагии ҳамлагарон чанд моҳ идома ёфта, бархе аз айбдоршавандагон аз хориҷ, ки он ҷо омӯзиш дидаанд, ба Русия омадаанд, аммо макони омӯзиш зикр намешавад.

Гузашта аз ин, тафтишот муайян кардааст, ки гурӯҳи айбдоршавандагон қасд доштаанд дар шаҳри Каспийски Ҷумҳурии Доғистон як ҳамлаи дигари террористӣ низ анҷом диҳанд, вале он пешгирӣ шудааст.

Мувофиқи иддаои Кумитаи тафтишотӣ, силоҳҳое, ки дар ҳамлаи “Крокус” истифода шудаанд, тавассути ҳамин шаҳр ба вилояти Маскав интиқол ёфтаанд.

Камбуди ронанда дар Хабаровск

Аз ҷониби
AZDA-TV
-
0

Мақомот дар вилояти Хабаровски Русия эҳтимол дорад қарори қаблан ҷоришудаи манъи кори шаҳрвандони хориҷиро дар бахши нақлиёти ҷамъиятӣ бозбинӣ намоянд.

Бино ба иттилои сомонаи “Vostok today”, ин иқдом ба норасоии шадиди ронандагон дар хатсайрҳои шаҳрии вилоят вобаста аст.

Гуфта мешавад, дар аввали соли ҷорӣ мақомоти вилояти Хабаровск мисли дигар шаҳру ноҳияҳои Русия кори муҳоҷиронро дар чанд соҳа, аз ҷумла дар мусофиркашонӣ манъ карда буд. Он замон ин тасмим аз ҷониби миллатгароҳои рус ҷонибдорӣ шуд, вале ҳомиёни ҳуқуқ онро намунаи сиёсати сахти муҳоҷиратӣ ва нақзи ҳуқуқи шаҳрвандони хориҷӣ номида буданд.

Аммо баъди чанд моҳ дар ин вилоят мушкилоти ҷиддӣ ба миён омада, сокинон аз он шикоят доранд, ки автобусҳо аз вақташ дер меоянд ва ё тамоман намеоянд. Инчунин, ширкатҳои нақлиётӣ низ мегӯянд, ки дар баъзе хатсайрҳо камбуди ҳайати ронандагон ба 50% расида, ин боиси қатъ шудани рейсҳо ва риоя нашудани ҷадвали ҳаракат дар роҳҳо мегардад.

Мақомоти шаҳр барои бартараф намудани ин мушкилот бо ҷалби сокинони бумӣ ба кор, музди меҳнатро боло бурда, ба кормандон ҷойи зист дар хобгоҳ пешниҳод кардаанд, вале ин тадбирҳо натиҷаи назаррасе наовардаанд.

Раиси Комиссияи хоҷагии шаҳр ва нақлиёти Палатаи ҷамъиятии Хабаровск Елена Шадуя низ бар ин назар аст, ки дар ҳоли ҳозир бидуни ҷалби муҳоҷирон ҳал кардани ин мушкил ғайриимкон аст.

Ба гуфтаи хонум Шадуя, ширкатҳои нақлиётӣ борҳо аз мақомот хоҳиш карданд, ки ин маҳдудият бекор карда шавад ва ҳоло мақомот ба зарурати бознигарии ин қарор майл доранд.

Бояд гуфт, Хабаровск дар Русия ягона вилояте нест, ки бо ин навъ мушкил рӯ ба рӯ шудаааст. Дигар шаҳру ноҳияҳои ин кишвар низ бо вуҷуди ҷалби муҳоҷирон аз кишварҳои африқоӣ, Кореяи Шимолӣ ва Ҳиндустону Непал дар соҳаҳои мусофиркашонӣ, сохтмон, пайкрасонӣ ва ғайра, ки асосан дар онҳо шаҳрвандони кишварҳои Осиёи Марказӣ кор мекарданд, бо камбуди коргар мувоҷеҳ шудаанд ва мақомоти баъзе аз минтақаҳо мехоҳанд ин маҳдудиятҳоро бардоранд.

Вале маълум нест, ки муҳоҷирон аз Осиёи Марказӣ ба корҳои қаблии худ, ки аз он ронда шуда буданд, дубора бар мегарданд ё не. Чун давоми ду соли ахир, бахусус пас аз ҳодисаи ҳамла ба бинои “Крокус Сити Ҳолл”, ки гумонбаронаш муҳоҷирон мебошанд, дар Русия фазои муҳоҷирбадбинӣ ба авҷи худ расида, мақомоти ин кишвар ҳамроҳи гурӯҳҳои миллатгаро бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбат ба муҳоҷирон бадрафторӣ карда, онҳоро латтукӯб мекунанд.

Ҳамчунин асноди будубошу дигар ҳуҷҷатҳои зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор мекунанд. Инчунин дар ин муддат дар Русия чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар мекунад.

Изҳороти зидду нақизи раиси оҷонсӣ

Аз ҷониби
AZDA TV-2
-
0

Дар идомаи сиёсатҳои маҳдудсозии озодиҳои динии шаҳрвандон дар Тоҷикистон инак раиси Оҷонсии хизмати давлатӣ гуфтааст, ки беҳтар аст, кормадони давлатӣ баъди ба нафақа рафтан ба Ҳаҷ бираванд.

Бино ба иттилои расонаҳо, имрӯз, 21-уми июли соли 2025, раиси Оҷонсии хизмати давлатии Тоҷикистон Илёс Идрисзода ба расонаҳо гуфтааст, ки хизматчиёни давлатӣ беҳтар аст, баъди ба нафақа рафтан ба Ҳаҷ бираванд.

Ба гуфтаи ӯ, “хизматчии давлатӣ бояд вазифаи худашро иҷро кунад, ин фикри шахсии ман аст. Вақте дар мақомоти давлатӣ кор кардӣ, дар хизмати давлатӣ кор кардӣ бояд содиқона, сидқану шаффоф ба давлату миллат хизмат кунӣ. Баъд аз он, ки ба нафақа баромаданд, аз хизмати давлатӣ озод шуданд, марҳамат рафтанд гиранд.”

Ин мавқеъгирии шахсии раиси Оҷонсии хизмати давлатӣ дар ҳоле дар Тоҷикистон садо медиҳад, ки тайи наздик ба ду даҳсолаи ахир мақомоти Тоҷикстон талош мекунанд, ки озодиҳои маҳзабӣ барои мусалмононро бо баҳонаҳои мухталиф то рафта маҳдуд кунанд.

Пеш аз ин Эмомалӣ Раҳмон ва дигар мақомоти Тоҷикистон ҳам борҳо аз минбарҳои расмӣ рафтани мардум барои адои маросими Ҳаҷҷи фарзӣ ва умраро зери интиқодҳои тунд қарор дода, дар муқобил пешниҳод мекарданд, ки ба ҷои Ҳаҷ рафтан, мардум бояд хонаву кошона ва кӯчаву мактабҳои худро обод кунанд. Аммо, онҳо барои мисол, боре ҳам бо чунин лаҳни тунд, нагуфттанд, ки мансабдорони давлатӣ ба фалону фалон ҷойҳо ба сайру саёҳат нараванд.

На Эмомалӣ Раҳмон ва не дигар мақомоти расмӣ ягон маротиба аз тариқи расонаҳо бо садои баланд нагуфтаанд, ки дар вақти омадани меҳмонони хориҷӣ, раҳбарони кишварҳои дуру наздик, ки мешавад, бо ду се ҳазор сомонӣ онҳоро меҳмондорӣ кард, дастгоҳи раёсати ҷумҳурӣ аз 10 то 100 миллион сомонӣ харҷ накунанд.

Бо ин вуҷуд, гуфта мешавад, Ҳаҷ кардан яке аз рукнҳои асосии дини ислом ба ҳисоб меравад ва дар тӯли умр дасти кам як бор адои Ҳаҷ кардан ба ҳама мусалмонон фарз аст. Ба ин хотир, солона ҳудуди 7,500 нафар тоҷикитсонӣ ба сурати расмӣ дар мавсими Ҳаҷҷи фарзӣ барои адои зиёрати Хонаи Худо мераванд ва дар тӯли сол даҳҳо ҳазор нафари дигар чун хароҷоти Ҳаҷҷи фарзӣ зиёд аст ва ба осонӣ навбат гирифта наметавонанд, дар мавсимҳои мухталиф барои Умра кардан ба Арабистони Саудӣ сафар мекунанд.

Даргузашти “Шоҳзодаи хуфта” пас аз 20 сол дар кома

Аз ҷониби
Azda TV 3
-
0

Шоҳзода Ал-Валид бин Холид бин Талал, шоҳзодаи хонадони шоҳии Арабистони Саудӣ, ки ба “Шоҳзодаи хуфта” маъруф буд, пас аз 20 соли пайдарпай дар ҳолати кома буданд, дар синни 36-солагӣ даргузашт.

Ин шоҳзода соли 2005, вақте ки ҳамагӣ 15 сол дошт, дар як садамаи шадиди нақлиётӣ дар шаҳри Лондон дучори кумо шуд. Пас аз ин ҳодиса, вай ба хунрезии мағзӣ гирифтор шуда, ба ҳолати вегетативӣ (кома) афтод ва дигар ҳушёр нашуд.

Ба гуфтаи расонаҳои арабӣ, ӯ дар тӯли ин 20 сол зери назорати пурраи тиббӣ дар Маркази тиббии шоҳ Абдулазиз дар шаҳри Риёз нигоҳубин мешуд. Бо вуҷуди баъзе ҳаракатҳои ғайрииродӣ дар бадани ӯ, ки умедвории оилаашро зиёд мекард, ҳолати умумии ӯ дигаргун нашуд.

Маросими ҷанозаи шоҳзода рӯзи 20 июл дар Масҷиди бузурги Имом Турки бин Абдуллоҳ дар шаҳри Риёз баргузор гардид. Хабаргузориҳои расмии Арабистони Саудӣ ин хабарро тасдиқ карданд.

Шоҳзода Ал-Валид бин Холид фарзанди шоҳзода Талал бин Абдулазиз ва яке аз наберагони бевоситаи шоҳи собиқ — Абдулазиз ибни Сауд мебошад. Ӯ дар Арабистони Саудӣ ба рамзи сабри оилавӣ ва умеди бемаҳдуд табдил ёфта буд.

“Ба Тоҷикистон наёед!” — ноумедии афғонҳо аз кишвари дӯст

Аз ҷониби
Azda TV 3
-
0

Як блогери ҷавони афғон, бо номи Амир Раҷабӣ, ки бо ҳадафи сайру саёҳат ба Тоҷикистон омада буд, бо лаҳне шадид аз рафтори мақомот интиқод кардааст. Ба гуфтаи ӯ, новобаста ба доштани ҳуҷҷатҳои расмӣ, аз ҷумла шиноснома ва раводид, аз қаламрави Тоҷикистон депорт шудааст.

Ин блогер, ки навори видеоии шикояти худро дар саҳифаи Instagram нашр намудааст, мегӯяд, баъд аз ин ки ба Тоҷикистон расидаанд, субҳи барвақт кормандони мақомоти Тоҷикистон ба меҳмонхонае, ки ӯ ва ҳамватанонаш дар он ҷо иқомат доштанд, ворид шуда, ҳуҷҷатҳои ҳамаи шаҳрвандони Афғонистонро ҷамъоварӣ кардаанд.

Ба гуфтаи ӯ, “пас аз се рӯз, мо ҳама депорт шудем — ҳатто хонаводае, ки ҳамроҳи кӯдаки хурдсолашон нав як рӯз пеш ба Тоҷикистон омада буданд”. Вай афзудас, “Ҳукумати Тоҷикистон иҷозат намедиҳад, ки афғонҳо дар пойтахт зиндагӣ кунанд ва зисти онҳоро бо шиддат зери назорат гирифтааст”.

Блогер таъкид мекунад, ки ҳатто шаҳрвандони афғонеро, ки бо харҷи аз 1300, то 1500 доллар раводид гирифта ба Тоҷикистон омадаанд, низ ихроҷ мекунанд. Ӯ дар паёми худ хитоб ба ҳамватанонаш гуфт: “Аслан ба Тоҷикистон наёед, инҷо ҷои хубе нест, шуморо ҳатто бо ҳуҷҷати қонунӣ депорт мекунанд”.

Дар ҳами ҳол, маркази матбуоти Нерӯҳои марзбонии Кумитаи давлатии амнияти миллии Тоҷикистон мегӯяд, муҳоҷирати шаҳрвандони хориҷӣ ба қаламрави кишвар дар моҳҳои охир афзоиш ёфтааст ва бархе аз онҳо ба таври ғайриқонунӣ вориди кишвар мешаванд ё қоидаҳои будубошро дағалона вайрон мекунанд.

Мақомоти Тоҷикистон бидуни он, ки аз шаҳрвандони кишваре ба таври мушаххас ном бибаранд, иддаъо доранд, бархе шаҳрвандони хориҷӣ дар фаъолиятҳои мухталифе даст доранд, ки қонунҳои Тоҷикистонро поймол мекунанд. Аз ҷумла, мақомоти амниятӣ онҳоро ба ташвиқ ва тарғиби ақидаҳои ҳаракатҳои ифротгароёна, тақаллуби ҳуҷҷатҳо барои дарёфти мақоми гурезагӣ, вайрон кардани низоми муҳоҷират, доштани шаҳрвандии кишвари сеюм, истифода бурдани Тоҷикистон ҳамчун кишвари транзитӣ ва муомилаи ғайриқонунии маводи мухаддир муттаҳам мекунанд. Ва акнун яке аз сабабҳои аз кишвар хориҷ кардани теъдоди муайяни шаҳрвандони Афғонистон низ ба ҳамин масъалаҳо рабт дорад, омадааст, дар хабари расмӣ.

Ҳукумати Эмомали Раҳмон, ки солҳо худро яке аз тарафдорони мардум ва гурезагони афғон муаррифӣ мекард, дар пасманзари ихроҷи дастаҷамъии муҳоҷирон ва рондани мухолифони режими Толибон аз қаламрави кишвар, ба назар мерасад, муносибати худро нисбат ба масоили Афғонистон тағйир додааст.

Дар гузашта борҳо шаҳрвандони Афғонистон, аз ҷумла фаъолони сиёсӣ ва корбарони шабакаҳои иҷтимоӣ, Тоҷикистонро ҳамчун “амнтарин ва дӯсттарин кишвар барои гурезагони афғон” мешумориданд. Онҳо Эмомалӣ Раҳмон раисиҷумҳури Тоҷикистонро ҳамчун “раҳбари ҳомии мардуми Афғонистон” тавсиф мекарданд ва барномаҳои ҳукумати ӯро ба унвони намунаи бародарӣ байни ду миллат таъриф менамуданд.

Аммо, имрӯз, дар байни бисёре аз тоҷикҳо ва форсизабонони Афғонистон, ки дар солҳои ҷанги дохилӣ ва пас аз омадани Толибон ба Тоҷикистон умед баста буданд, эҳсоси ноумедӣ ва рӯйгардонӣ аз сиёсатҳои Душанбе эҳсос мешавад.

“Эмомалӣ Раҳмон дар тӯли солҳои зиёд бо истифода аз мавқеъи ҳамдардӣ бо мардуми Афғонистон барои худ имиҷи як раҳбари одил месохт. Аммо рӯйдодҳои ахир нишон доданд, ки манфиатҳои сиёсӣ бар ваъдаҳои ахлоқӣ бартарӣ доранд,” мегӯяд, як таҳлилгари афғон.

Дар гузашта низ гузоришҳое дар бораи депортатсияи шаҳрвандони афғон дар расонаҳо нашр шуда буд, ки боиси нигаронии созмонҳои ҳомии ҳуқуқ гардида буданд.Мавзӯи муносибат бо паноҳҷӯён ва муҳоҷирони афғон, бахусус баъд аз таҳаввулоти сиёсӣ дар Афғонистон, дар Тоҷикистон ва кишварҳои ҳамсоя мавзӯи баҳси рӯз гаштааст.

Вокуниши Эрон: Аврупо таҳдиду фишорро канор гузорад

Аз ҷониби
AZDA TV-2
-
0

Вазири корҳои хориҷии Эрон дар вокуниш ба таҳдидҳои кишварҳои аврупоӣ гуфтааст, созукоре, ки фоқиди ҳаргуна мабнои ахлоқӣ ва ҳуқуқӣ барои он ҳастанд, даст бардоранд.

Бино ба иттилои расмӣ, шоми 17-уми июли соли 2025 вазирони умури хориҷиа се кишвари аврупоӣ ҳамроҳ бо масъулияти сиёсати хориҷии Иттиҳоди Аврупо бо вазири корҳои хориҷии Эрон ба сурати видеоӣ якҷо суҳбат карданд.

Ин нишасти онлайнӣ, ки пас аз ҳамлаҳои 12-рӯзаи Исроил ба Эрон ва ҳамзамон ҳамлаҳои Амрико алайҳи таъсисоти ҳастаии Эрон барои нахустин бор сурат гирифта аст, ҳамроҳ бо таҳдидҳо шурӯъ гардид.

Дар ин нишаст вазирони корҳои хориҷии кишварҳои Олмону Фаронса, Бритонияи Кабир ва масъули сиёсати хориҷии Иттиҳоди Аврупо ҳушдор додаанд, ки агар то поёни тобистони соли ҷорӣ ба як тавофуқи малмусе даст наёбанд, аз механизими моша ё ҳамон “SNAP-BACK” алайҳи Эрон дар Шӯрои амнияти Созмони Миллали Муттаҳид истифода карда, таҳримҳоеро ҷорӣ мекунанд.

Аммо субҳи имрӯз, Аббос Ироқчӣ, вазири умури хориҷаи Эрон бо нашри як иттилоя дар саҳфаи расмии худ дар шабакаи иҷтимоии “Х” навишт,” дишаб як конфроси видеоии муштарак бо вазирони корҳои хориҷии се кишвари аврупоӣ (Е3) ва масъули сиёсати хориҷии Иттиҳоди Аврупо доштам ва дар он нукоти зерро ба равшанӣ баён кардам: Ин Иёлоти Муттаҳидаи Амрико буд, ки аз тавофуқе, ки тайи ду сол ва бо ҳамоҳангии Иттиҳоди Аврупо дар соли 2015 ҳосил шуда буд, хориҷ шуд, на Эрон ва ин Амрико буд, ки дар моҳи июни соли ҷорӣ мизи музокираро тарк карда, ба ҷои ҷои диплумосӣ гузинаи низомиро интихоб кард, на Эрон.

Ба гуфтаи вазири корҳои хориҷии Эрон, агар Иттиҳоди Аврупо ва ин се кишвари аврупоӣ мехоҳанд нақше ифо кунанд, бояд масъулона рафтор кунанд ва сиёсати фарсудаи таҳдиду фишор, аз ҷумла таҳдид ба иҷрои созукори “SNAP-BACK”, ки фоқиди ҳаргуна мабнои ахлоқӣ ва ҳуқуқӣ барои он ҳастанд, даст бардоранд.

Гуфтанист, баъд аз ҷанги 12-рӯзаи Исроилу Эрон, ки Амрико ҳам ба се неругоҳи ҳастаӣ дар ҷумҳурии исломӣ ҳамла карда буд, Теҳрон ҳамкориҳои худ бо Ожонси байналмилалии энержии атомӣ (МАГАТЭ)-ро ба сурати яктарафа қатъ кард. Ин иқдоми Эрон кишварҳои аврупоӣ, ИМА ва Исроилро сахт нигарон кард. Ба ҳамин хотир, ҳоло ин се кишвари аврупоӣ ва Иттиҳоди Аврупо талош доранд, ки Теҳрон дубора ҳамкориҳои худ бо ин созмонро аз сар бигирад ва роҳро барои назорати таъсисоти ҳастаиаш боз кунад.

1...107108109...785саҳифаи 108 аз 785