Ҳукми зиндони Дилмурод маълум шуд

-

08/07/2025

Субҳи 7-уми июл, Президенти Исроил Исаак Ҳерсог дар қароргоҳаш бо як гурӯҳ аз имомон ва намояндагони ҷомеаҳои мусалмонӣ аз Фаронса, Белгия, Нидерланд, Италия ва Британияи Кабир дидору гуфтугӯ намудааст.

Ҳерсог дар мулоқот бо ин ҳайат аз хоҳиши Исроил барои гузаштан – ба гуфтааш ба як даврони нав — даврони ҳамгироӣ ва сулҳ дар Ховари Миёна ва нақши ҳаётан муҳими аҳолии мусалмони Исроил гуфта, таъкид кардааст, ки мусалмонон ҷузъи ҷудонашавандаи ҷомеаи исроилӣ мебошад.

Дар идомаи Президенти Исроил таъкид кардааст, ки “мо ҳама фарзандони Иброҳим ҳастем” ва изҳори боварӣ намудааст, ки “пешрафти таърихӣ дар минтақаи мо натиҷаи гуфтугӯ байни мусалмонон ва яҳудиён аст”. Ӯ аз имомон хостааст, ки ба ҷомеаҳои худ паёми сулҳро расонанд, чун умедвор аст, ки сулҳ бо Сурия, Лубнон ва ҳатто, «иншоаллоҳ», бо Арабистони Саудӣ низ ба даст хоҳад омад. Вале таъкид карда, ки нерӯҳои ифротӣ талош доранд “ин пешрафт ва хоҳиши воқеии Исҳоқу Исмоилро барои зиндагии якҷоя” боздоранд.

Ин гурӯҳи имомон ба Ҳерсог дар бораи аҳамияти сафари худ, муҳаббат ва дӯстии онҳо ба Исроил ва мардуми яҳудӣ, озод шудани гаравгонҳо ва пойин ёфтани дарду ранҷи мардуми бегуноҳи Ғазза гуфтаанд.

Раҳбари ин ҳайати имомон ва конфронси имомони Фаронса Ҳусейн Чалғумӣ ба Президенти Исроил Исаак Ҳерсог гуфта, ки “Он чизе, ки мо аз 7-уми октябр шоҳид ҳастем, танҳо як низоъ байни Исроил ва ҲАМОС ва ё низоъ байни Исроил ва Ҳизбуллоҳ нест. Баръакс, ин рӯёрӯии ду ҷаҳони комилан мухталиф аст. Шумо намояндаи ҷаҳони бародарӣ, инсондӯстӣ ва шафқат ҳастед. Шумо арзишҳои демократия ва озодиро ҳимоя мекунед.”

Ҳайати имомон аз Аврупо қасд дорад дар доираи ин сафар аз порлумони Исроил (Кнессет), шаҳри қадимаи Ерусалим, марзҳои Сурия ва Лубнон ва дигар ҷойҳо дидан кунанд.

Сафари як гурӯҳ аз имомон аз кишварҳои аврупоӣ ба Исроил дар ҳолест, ки мақомоти Исроил пас аз 7-уми октябри соли 2023 ҳамлаҳои заминиву ҳавоии худро ба Ғазза то имрӯз идома дода истодааст. Ба гузориши расонаҳои ҷаҳонӣ ва созмонҳои байналмилалӣ, то кунун беш аз 180 ҳазор сокини ин борика кушта ва захмӣ шуда, беш аз 11 ҳазор нафар беному нишон гаштаанд, ки аксари онҳоро занону кӯдакон ташкил медиҳанд.

Ҳамзамон гуфта мешавад, 100% аҳолии Ғазза аз гуруснагӣ ба шиддат ранҷ мебаранд. То ҷое, ки кӯдакону пиронсолон тоқати гуруснагиро накарда, рӯзона даҳҳо тан ҷон медиҳад.

Инчунин мувофиқи оморҳои расмӣ, нерӯҳои исроилӣ то имрӯз ба сабаби тир кушодан ба сӯи мардуми бесилоҳе, ки дар навбати ғизо меистанд, 550 нафарро кушта, бештар аз 4 ҳазори дигарро захмӣ кардааст.

Амрико гурӯҳи “Ҳайат Таҳрир аш-Шом”-ро аз листи террористон хориҷ кард

Аз ҷониби

-

08/07/2025

Иёлоти Муттаҳидаи Амрико гурӯҳи “Ҳайат Таҳрир аш-Шом”-ро, расман аз феҳристи созмонҳои террористӣ хориҷ кард.

Ин тасмим рӯзи 7-уми июл, як рӯз пеш аз таърихи эълони расмӣ, аз ҷониби Департаменти давлатии Амрико расонаӣ шуд.

Ба иттилои расонаҳои амрикоӣ, тасмими кунунии Амрико бо ҳамоҳангии вазири корҳои хориҷии ИМА, Марко Рубио, додситони кулл Пам Бондӣ ва вазири молия Скотт Беснетт қабул шудааст. Мақомот мегӯянд, ки ин иқдом посух ба “тағйир дар равиши сиёсӣ ва амалкарди ҳукумати нави Сурия ва гурӯҳи “Ҳайат Таҳрир аш-Шом” мебошад.

Таҳлилгарон бар инанд, ки ҳазфи номи “Ҳайат Таҳрир аш-Шом” аз рӯйхати гурӯҳҳои террористӣ шояд як иқдоми стратегии Вашингтон дар баробари ҳукумати нави Сурия бошад, ки пас аз барканории Башор Асад ба миён омад. Ин метавонад роҳро барои гуфтугӯҳои сиёсӣ ва ҳамкориҳои эҳтимолӣ дар Сурия боз кунад.

Ёдоварм ешавем, ки “Ҳайат Таҳрир аш-Шом”, ки як гурӯҳи исломгаро буд, ки қаблан чанд маротиба номи худро иваз кардааст. Ин гурӯҳ то замони сарнагун кардани ҳукумати Башшор Асад дар қисмати Идлиби Сурия ҳукумат ташкил карда буд ва Аҳмад Шаръ онро идора мекард. Амрико ва кишварҳои ғарбӣ бо сабаби иртибот доштан бо Ал-Қоида онро “гурӯҳҳои террористӣ” эътироф мекарданд.

Вале худи Аҳмад Шаръ пас аз сари қудрат расидан дар Сурия ва сарнагунии ҳукумати Башшор Асад гӯраҳашро аз байн бурд ва онро бо чанд гурӯҳҳои мусаллаҳи дигар, ки ҳамроҳаш муттаҳид буданд, ба давлат ҳамроҳ кард.

Содир Ҷабборов ба Тоҷикистон омад

Аз ҷониби

-

08/07/2025

8-уми июли соли 2025 Президенти Қирғизистон Содир Ҷабборов бо даъвати раисҷумҳури худкомаи Тоҷикистон Эмомалӣ Раҳмон ба Душанбе омад.

Ба пешвози Ҷабборов ба Фурӯдгоҳи байналмилалии шаҳри Душанбе худи Раҳмонов рафта буд ва ба хотири истиқболи ӯ барномаи фарҳангие низ онҷо баргузор гардидааст.

Пас аз ин маросим, дар Кохи Миллат музокироти сарони давлатҳо дар ҳайатҳои маҳдуд ва васеъ баргузор гардида, ҷонибҳо доираи васеи масъалаҳои ҳамкориҳои дуҷонибаро дар соҳаҳои сиёсӣ, иқтисодӣ, фарҳангиву гуманитарӣ ва ҳамкории кишварҳоро дар чаҳорчӯби созмонҳои байналмилаливу минтақавӣ баррасӣ кардаанд.

Инчунин Раҳмонов ва Ҷабборов аз таҳкими ҳамкориҳо дар бахшҳои савдо, сармоягузорӣ, энергетика ва инфрасохтори нақлиётӣ гуфта, тавсеаи робитаҳо дар сатҳи минтақавӣ, аз ҷумла миёни ноҳияҳои наздисарҳадиро зарур шумурдаанд.

Сарони ду давлат аз ниҳоӣ шудани делимитатсияи сарҳади давлатӣ миёни ду кишвар изҳори қаноат намуда, ҳамзамон аз идомаи корҳо доир ба анҷом додани демаркатсия низ бо ҳамоҳангии ҷонибҳо гуфтаанд.

Дар ин гуфтугӯҳо Раҳмонов боз дар мавриди мубориза бо терроризм, экстремизм, тундгароии динӣ, қочоқи маводи мухаддир, киберҷинояткорӣ ва дигар зуҳуроти ҷиноятҳои муташаккили фаромиллӣ гуфта, мушкилоти тағйирёбии иқлим, оқибатҳои гармшавии глобалӣ ва ҳифзи пиряхҳоро низ фаромуш накардааст.

Дар анҷоми музокирот Эмомалӣ Раҳмон ва Содир Ҷабборов изҳороти муштарак дода, дар маросими имзои 13 санади ҳамкорӣ, ки яке аз онҳо “Созишнома миёни Ҷумҳурии Тоҷикистон ва Ҷумҳурии Қирғизистон оид ба тадбирҳои боварӣ” аст, иштирок кардаанд.

Илова бар ин, сарони давлатҳо дар маросими маҷозии бозкушоии гузаргоҳи сарҳадии “Тоҷварон” – “Қарамиқ” дар сарҳади давлатии Тоҷикистону Қирғизистон иштирок намуданд.

Гуфта мешавад, сафари давлатии Президенти Қирғизистон то 9-уми июл идома ёфта, ба ҷуз мулоқоту имзои созишномаҳо баргузории форуми тиҷоратию сармоягузории кишвар низ дар назар аст.

Ин ҳам дар ҳолест, ки ҳаҷми тиҷорату савдо миёнаи Тоҷикистону Қирғизистон дар панҷ моҳи соли равон танҳо 6.1 миллион долларо ташкил додааст, ки хеле ночиз аст. Чун дар соли 2020 ҳаҷми додугирифти Тоҷикистону Қирғизистон солона на камтар аз 40 то 60 миллион доллар будааст.

Гуфта мешавад, то имзои созишномаи марзӣ миёни Тоҷикистону Қирғизистон ин ду ҳамсоякишвар чанд соли охир муносибатҳои хубе надоштанд.

Ҳатто дар баъзе аз нуқтаҳои баҳсбарангез солҳои ахир даргириҳои мусаллаҳона ва куштори шаҳрвандони ду кишвар сурат гирифта буд. Охирин муноқишаи бузург дар марзи Тоҷикистону Қирғизистон 16-уми сентябри соли 2022 рух дод, ки тибқи иттилои мақомоти кишвар, беш аз 250 кас аз шаҳрвандони Тоҷикистон кушта ва захмӣ шуда буданд.

Дар Маскав беш аз 500 муҳоҷирро ба шуъбаҳои пулис бурдаанд

Аз ҷониби

-

08/07/2025

Мақомоти Русия дар шаҳри Маскав барои ошкор кардани роҳҳои муҳоҷирати ғайриқонунӣ “рейд” гузарондааст.

8-уми июли соли ҷорӣ, Кумитаи тафтишотии шаҳри Маскав хабар дод, ки дар ин рейдҳо асосан хостелҳо ва иботахоҳои мусалмононро дар Маскав санҷида, беш аз 500 муҳоҷир барои санҷиши ҳуҷҷатҳо ба шуъбаҳои милитсия бурда шуданд.

“Дар натиҷа, беш аз 30 шаҳрванди хориҷӣ барои вайрон кардани қоидаҳои вуруд ва будубош аз Русия ихроҷ карда шуданд.”, омадааст дар иттилоияи Кумитаи тафтишотӣ.

Ҳамчунин дар ҷараёни ин рейдҳо як нафар, ки дар ҷустуҷӯи федералӣ қарор дошт, боздошт гардидааст.

Гуфта мешавад, давоми ду соли ахир, бахусус пас аз ҳодисаи ҳамла ба бинои “Крокус Сити Ҳолл”, ки гумонбаронаш муҳоҷирон мебошанд, дар Русия фазои муҳоҷирбадбинӣ ба авҷи худ расида, мақомоти ин кишвар ҳамроҳи гурӯҳҳои миллатгаро бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбати муҳоҷирон бадрафторӣ карда, онҳоро латтукӯб мекунанд. Ҳамчунин асноди будубошу дигар ҳуҷҷатҳои зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор мекунанд.

Инчунин дар ин муддат дар Русия чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар мекунад.

Марги мармузи вазири нақлиёти Русия баъди барканорӣ

Аз ҷониби

-

08/07/2025

Роман Старовойт, собиқ вазири нақлиёти Русия рӯзи 7-уми июли соли 2025, чанд соат пас аз сабукдӯш шудан аз мақомаш, ҷасади беҷонашро аз дохилӣ мошинаш пайдо карданд.

Гуфта мешавад, ӯ бо фармони раисиҷумҳур Владимир Путин аз вазифа сабукдӯш шуд. Ҷасадаш бо захми тир аз дохили мошинаш дар ноҳияи Одинтсовои вилояти Маскав пайдо шуд. Мақомот эҳтимоли худкуширо сабаби аслии марг арзёбӣ мекунанд.

Ба иттилои расонаҳои русӣ, дар ҷои ҳодиса таппончае ёфт шудааст, ки ҳамчун тӯҳфаи расмӣ ба Старовойт дода шуда буд.

Старовойт аз моҳи майи соли 2024 ба ҳайси вазири нақлиёт фаъолият мекард ва қаблан беш аз панҷ сол губернатори вилояти Курск буд.

Бархе тахмин мезананд, ки гумонбар шуданаш дар ришваву фасод ва дар истифодаи ғайриқонунии маблағҳои давлатӣ шояд боиси барканорӣ ва марги ӯ гашта бошад.

Гуфта мешавад, яке аз муовинони пешини ӯ Алексей Смирнов, ки қаблан бо иттиҳоми фасодкорӣ боздошт шуда буд, шояд алайҳи Старовойт шаҳодат дода бошад.

Марги нобаҳангоми Старовойт дар замоне иттифоқ афтод, ки Русия бо буҳрони низомӣ ва иқтисодии шадид рӯ ба рӯст. Ба ҷои ӯ Андрей Никитин, собиқ губернатори Новгород, вазири нави нақлиёт таъин гардид.

Фишор болои наздикони фаъолони зодаи Бадахшон

Аз ҷониби

-

07/07/2025

Мақомоти Тоҷикистон фишор болои хонаводаҳои зодагони Вилояти Мухтори Кӯҳистони Бадахшонро, ки дар хориҷ аз Тоҷикистонанду дар ҷустуҷӯ қарор доранд, сахттар кардааст.

Бино ба иттилои сомонаи “Pamir Inside”, кормандони милиса дар Хоруғ, Шуғнон ва Роштқалъа волидон ва наздикони шаҳрвандони дар хориҷ бударо ба Раёсати мубориза бар зидди ҷиноятҳои муташаккили ВКД дар Бадахшон даъват намуда, онҳоро маҷбур доранд, ки ба хешовандони худ дар хориҷ занг зада, онҳоро ба “бозгашти ихтиёрӣ” ба Тоҷикистон водор намоянд.

Мақомот бештар болои пайвандони онҳое фишор оварда истодаанд, ки нисбаташон барои фаъолияти интернетӣ, яъне гузоштани “лайк”, навиштани шарҳ ва бознашри маводҳои интиқодӣ парвандаи ҷиноӣ боз шудаасту дар пайгард қарор доранд. Ин ҳам дар ҳолест, ки раисҷумҳури худкомаи Тоҷикистон Эмомалӣ Раҳмон ҷавобгарии ҷиноятӣ барои гузоштани “писанд”-у “бознашр”-ро бекор карда буд.

Инчунин мақомот ба онҳое, ки бо хоҳиши худ бармегарданду “аризаи афв” менависанд ваъда дода истодаанд, ки онҳоро аз ҷавобгарии ҷиноӣ озод мекунанд. Ҳодисаҳое вуҷуд дорад, ки онҳое, ки бо хоҳиши худ баргаштаанд, воқеан раҳо шудаанд, аммо афроде низ ҳастанд, ки пас аз бозгашт боздошт шуда, маҳкум ба зиндон шудаанд.

“Pamir Inside” менависад, ки кормандони ВКД барои баргардонидани шаҳрвандони дар ҷустуҷӯбуда, рутба ва ё мақоми баландтар мегиранд.

Хабари фишор болои пайвандони зодагони Бадахшон дар ҳолест, ки пулиси Маскав дар метрои Маскав Насима Сӯфишоева, кормандони собиқи милисаи Роштқалъаро боздошт карда, ба Тоҷикистон фиристодаанд. Баъди ба Душанбе овардани ӯ, мақомот доир ба парванда ва ҷойи нигаҳдориаш ба касе хабар надодаанд. Аммо як манбаъ аз Хоруғ бидуни зикри ном ба Радиои Озодӣ гуфтааст, ки мақомоти интизомӣ барои он аз Русия дархости истирдоди Насима Сӯфишоеваро кардаанд, ки ӯро дар як видеоҳои пешин аз ҳамоиши эътирозии зодагони Бадахшон дар Русия дидаанд.

Назари пайвандон ва худи Насима Сӯфишоева, ки хоҳари Сӯфишо Ғарибшоев муовини сардори Шуъбаи корҳои дохилаи Роштқалъа аст ва се духтараш дар Русия боқӣ мондааст то ҳол дар ин бора дастраси расонаҳо нашудааст.

Тазоҳуроти фаъолон дар Олмон: Ҳамкорӣ бо Тоҷикистон қатъ шавад!

Аз ҷониби

-

07/07/2025

Гурӯҳе аз фаъолон дар Олмон бо баргузории тазоҳурот ва дархости озодии Абдуллоҳи Шамсиддин, хостори қатъи ҳамкорӣ бо Тоҷикистон шуданд.

Дар пойтахти Олмон — шаҳри Берлин — гурӯҳи фаъолони ҳуқуқи башар, даст ба тазоҳуроти навбатӣ заданд. Онҳо дар назди сафорати Тоҷикистон ҷамъ омада, шиори “Stop Making Business with Tajikistan!” (Бо Тоҷикистон тиҷорат накунед!)-ро сар доданд. Онҳо аз ҳукумати Олмон талаб карданд, ки ҳамкориҳои иқтисодии худро бо режими Эмомалӣ Раҳмон боздорад.

Тазоҳургарон озодии зиндониёни сиёсӣ дар Тоҷикистон, хусусан Абдуллоҳи Шамсиддин ва Дилмуроди Эргашевро талаб карданд .

Ба гуфтаи созмонҳои ҳуқуқи башар, онҳо қурбонии таъқибҳои сиёсӣ шудаанд, ки баъд аз ихорҷашон аз Олмон ба Тоҷикистон зуд боздошт ва ба ҳабси тӯлонӣ маҳкум гардиданд.

Ин созмонҳо мегӯянд, “бо сабаби ҳамкории мустақим ва хатарноки мақомоти Олмон бо режими саркӯбгар” Абдуллоҳи Шамсиддин ва Билол Қурбоналиев – ду фаъоли мухолифи тоҷик дар соли 2023 аз Олмон ба Тоҷикистон истирдод шуданд. Онҳо ба муҷарради расидан ба Душанбе боздошт ва дертар бо иттиҳоми сохта, аз ҷумла “кӯшиши сарнагун кардани сохти конститутсионӣ” якумӣ ба 7 ва дуюмӣ ба 10 соли зиндон маҳкум гардиданд.

Дилмуроди Эргашев фаъоли шинохтаи узви ҶИРТ дар моҳи ноябри 2024 пас аз рад шудани дархости паноҳандагиаш аз Олмон ба Тоҷикистон баргардонида шуд. Мақомоти Тоҷикистон ӯро муваққатан барои ду моҳ боздошт карданд. Иттиҳомоти расмӣ то ҳол эълон нашудаанд.

Дар ду соли охир зиёда аз 15 тазоҳурот дар шаҳрҳои гуногуни Олмон, аз ҷумла дар Берлин, Франкфурт, Мюнхен ва дигар ҷойҳо баргузор шуданд. Бо вуҷуди маълум будани хатари боздошт ва шиканҷа дар Тоҷикистон барои муҳоҷирони ихроҷшуда, боз ҳам додгоҳҳои Олмон даст ба ихроҷи паноҳҷӯён мезананд.

Гуфта мешавад, ҳамаи шахсони ихроҷшуда собиқаи дарозмуддати фаъолиятҳои сиёсӣ ва зиддиҳукуматӣ доштанд.

Фаъолон бар ин назаранд, ки ҳамкориҳои иқтисодии Олмон бо Тоҷикистон саркӯбро “ғайримустақим” маблағгузорӣ мекунад.

Иттиҳоди Аврупо ахиран эълон кард, ки дар чаҳорчӯби ташаббуси Global Gateway ба кишварҳои Осиёи Марказӣ, аз ҷумла Тоҷикистон 12 миллиард евро ҷудо мекунад.

Тоҷикистон дорои манбаъҳои арзишманди табиӣ, аз ҷумла металлҳои нодир мебошад, ки барои саноати аврупоӣ муҳиманд.

Ба гуфтаи фаъолон, “ин сармоягузориҳо бояд бо шартҳои ҳуқуқи башар пайваст шаванд”, на бо хомӯшӣ нисбати саркӯб.

То ҳол нишонаҳои тағйири сиёсати Тоҷикистон дар баробари мухолифон ва боздоштшудагон мушоҳида намешавад. Ҳукумати Эмомалӣ Раҳмон дар як даҳсолаи охир сиёсати шадиди таъқиби мухолифонро пеш гирифтааст. Гузашта аз ин, Тоҷикистон дар рӯйхати кишварҳои поймолкунандаи озодии баён ва озодии сиёсии созмонҳои байналмилалӣ қарор дорад.

Тазоҳуркунандагон нигарони ҳамкории амиқи иқтисодии Ғарб бо як режимест, ки садҳҳо зиндонии сиёсӣ дорад ва озодии матбуот ва баёнро маҳдуд мекунад.

Муттаҳидони Русия ҳамлаҳои Исроил ба Эрон ва Ғаззаро маҳкум карданд

Аз ҷониби

-

07/07/2025

Раҳбарони кишварҳои узви гурӯҳи БРИКС дар як баёнияи муштарак ҳамлаҳои Исроил ба Ҷумҳурии Исломии Эрон ва Навори Ғаззаро маҳкум карданд.

Ин баёния дар пайи нишасти солонаи БРИКС, ки дар шаҳри Рио-де-Жанейрои Бразилия баргузор гардид, нашр шуд. Дар ин баёния гуфта мешавад, ки ҳамлаҳои Исроил ба “зерсохторҳои ғайринизомӣ ва таъсисоти ҳастаии осоиштаи Эрон” нақзи ҳуқуқи байналмилалӣ маҳсуб мешаванд.

Раҳбарони БРИКС ҳамзамон аз вазъи инсонӣ дар Фаластин ва идомаи ҳамлаҳои Исроил ба Навори Ғазза изҳори “нигаронии амиқ” карданд.

Ин нишаст бо иштироки сарони кишварҳои узв, аз ҷумла Президенти Бразилия Луиз Инасиу Лула да Силва, сарвазири Чин Ли Кецян, вазири корҳои хориҷии Русия Сергей Лавров, вазири корҳои хориҷии Эрон Саид Аббос Ароқҷӣ, сарвазири Ҳиндустон Нарендра Моди, ва сарони кишварҳо Африқои Ҷанубӣ Миср Имороти Муттаҳидаи Арабӣ, Индонезия ва Эфиопия баргузор гардид.

Президенти Русия Владимир Путин дар нишаст ба таври онлайн ширкат намуд.

Дар баёнияи муштараки ин гурӯҳ ҳамчунин ҳамлаи моҳи гузашта дар минтақаи Паҳалгами Кашмири таҳти назорати Ҳиндустон, ки боиси ҳалокати чанд нафар гардид, ҳамчун “ҳамлаи террористӣ” маҳкум шудааст.

Дар нишасти навбатии БРИКС кишвари Индонезия ҳамчун узви ҷадид қабул гардида, низ 10 кишвари дигар, аз ҷумла Белорусия, Қазоқистон, Узбекистону Малайзия ва дигарон шарикони ин иттиҳодия пазируфта шуданд.

Пас аз баргузории ин нишаст ва эълони аъзои ҷадид ба гурӯҳи БРИКС Доналд Трамп, раисҷумҳури Амрико эълон кард, ки болои ҳар кишвари узви он 10% андози гумрукиро афзоиш медиҳад.

БРИКС иборат аз иттиҳоди кишварҳои рӯ ба рушд мебошад, ки талош дорад дар баробари гурӯҳҳое чун G7 ва G20 мавқеи мустақил касб намояд. Гурӯҳ зери роҳбарии Чин ва Русия ислоҳи сохторҳои калидии сиёсӣ ва молиявии ҷаҳониро, аз ҷумла Шӯрои Амнияти СММ ва Сандуқи Байналмилалии Пул, пайгирӣ мекунад.

Гуфта мешавад, БРИКС дар талоши коҳиши вобастагӣ аз доллари амрикоӣ ва рушди як низоми алтернативии молӣ мебошад.

Боздошти ду ҷавони тоҷик дар Русия бо иттиҳоми озори ноболиғон

Аз ҷониби

-

07/07/2025