Хона блог саҳифа 122

Ғазза қатлгоҳи рӯзноманигорон шудааст

Аз ҷониби
AZDA.TV
-
0

Ба иттилои расонаҳо, шаби гузашта дар як ҳамлаи шадиди ҳавоии Исроил ба Ғазза рӯзноманигори фаластинӣ Муътаз Муҳаммад Раҷаб кушта шуд.

Тавре расонаҳои фаластинӣ дар Ғазза хабар медиҳанд, ин рӯзноманигор ҳангоми фаъолияти касбии худ дар ин борика ҳадафи ҳамла қарор гирифт.

Гуфта мешавад, ба ин тартиб, аз 7-уми октябри соли 2023 то имрӯз Исроил 221 рӯзноманигорро дар Ғазза куштааст, ки бархе онҳо ҳамроҳи хонаводаҳояшон мавриди ҳадаф қарор гирифта буданд.

Дар ҳамин ҳол Дафтари расонаи давлати Фаластин дар Ғазза тайи баёнияе куштори систематик ва ҳадафмандонаи рӯзноманигорон тавассути Исроилро маҳкум карда, аз созмонҳои байналмилалии ҳомии рӯзноманигорон, Иттиҳодияи рӯзноманигорони араб ва дигар созмонҳо хоста, то ҷиноятҳои мақсадноик алайҳи кормандони расонаҳои фаластинӣ дар Навори Ғаззаро маҳкум кунанд.

Ин ниҳод дар баёнияи худ кишварҳои ғарбӣ, бахусус Олмон, Британия ва Амрикоро масъули ҷиноётҳои наслкушӣ ва қатли оме, ки Исроил дар Ғазза анҷом медиҳад, донистааст.

Ба гузориши расонаҳо ва созмонҳои байналмилалӣ, бар асари ҳамлаҳои ҳавоии паёпайи Исроил болои мардуми Ғазза ва монеи вуруди обу ғизо ва кумакҳои башардӯстона шудан ба ин борика, вазъи инсонӣ тоқатфарсо ва тасаввурношаванда гуфта мешавад.

Дар Ғазз рӯзона садҳо зану кӯдак, қисме аз гуруснагӣ ва қисми дигар бар асари ҳамлаҳои Исроил кушта мешаванд.

Шиддат ёфтани авзоъ дар Ғазза дар ҳолест, ки чанде пеш кишварҳои ғарбӣ, бахусус Фаронса ва Британия ба Исроил ҳушдор дода буданд, ки даст аз қатли оми мардуми бегуноҳ бардорад. Ҳамзамон Амрико ба Исроил барои оташбас бо ҲАМОС пешниҳодҳо дод, вале Натанёҳу на ҳушдори кишварҳои ғарбиро шунид ва на пешниҳоди Амрикоро пазируфт.

Ба иттилои Вазорати беҳдошти Фаластин, аз оғози ҳамлаҳои Исроил ба Ғазза то кунун 177 ҳазор нафар кушта ва захмӣ шудаанд, ки аксари онҳоро кӯдакони бегуноҳ ва занону пиронсолон ташкил медиҳанд. Ва бар илова, то кунун беш аз 11 ҳазор сокини ин борика зери овораҳо монда ва ё бенишон гаштаанд.

Пас аз мулоқоти Рустаму Путин вазъи муҳоҷирони тоҷик беҳтар мешавад?

Аз ҷониби
AZDA-TV
-
0

Рустами Эмомалӣ бо мақомдорони Русия масъалаи муҳоҷиронро дар миён гузоштааст. Аммо дақиқан аз кадом мушкилоти муҳоҷирон гуфтааст, маълум нест.

Дидору мулоқоти шаҳрдори Душанбе ва раиси Маҷлиси миллии Маҷлиси Олии Тоҷикистон Рустами Эмомалӣ бо мақомдорони Русия дар доираи сафари расмияш ба Федератсияи Русия рӯзҳои 28–29 май баргузор гардидааст.

Бино ба иттилои расонаҳои ҳукуматӣ, 28-уми майи соли ҷорӣ Рустами Эмомалӣ бо Владимир Путин, раисҷумҳури Русия мулоқот намуда, равобити байнипарламентӣ, ҳамкории мутақобилаи ду кишвар дар бахшҳои сиёсӣ, тиҷоративу иқтисодӣ, фарҳангиву гуманитариро мусбат арзёбӣ кардааст.

Ҳамчунин Рустам аз дастгирии Федератсияи Русия аз ду лоиҳаи – ба гуфтааш муҳими иҷтимоӣ – дар шаҳри Душанбе — сохтмони Театри давлатии русии ба номи Маяковский ва Маркази кӯдакони болаёқат «Сириус» гуфта, ба зарурати фаъол сохтани кори Комиссияи байниҳукуматӣ дар мавриди ҳамкории иқтисодӣ таъкид кардааст.

Дар баробари ҳамкориҳои ду кишвар, Рустам ва Путин вазъи сиёсии ҷаҳон ва минтақа, аз ҷумла вазъияти ноустувор дар Афғонистонро баррасӣ кардаанд.

Шаҳрдори Душанбе ғайричамшдошт аз муҳоҷирати корӣ ва талошҳо барои ҳалли ҷанбаҳои ҳалталаби ин соҳа гуфтааст, аммо расонаҳои ҳукуматӣ ҷузъиёти суҳбати ӯ ва Путинро дар ин маврид нашр накардаанд.

Бояд гуфт, Рустами Эмомалӣ дар доираи ин сафараш бо Раиси Шӯрои Федератсияи Маҷлиси Федералии Русия Валентина Матвиенко ва Раиси Думаи давлатӣ Вячеслав Володин мулоқот намуда, тақрибан ҳамаи он мавзуъҳоеро, ки дар Кремл бо Путин баррасӣ карда буд, бо ин мақомдорони рус дар миён гузоштааст.

Рустами Эмомалӣ дар ҳоле бо мақомдорони баландпояи рус масъалаи муҳоҷиратро баррасӣ мекунад, ки дар Русия фазои муҳоҷирбадбинӣ ба авҷи худ расида, давоми як соли ахир дар ин кишвар чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар мекунад.

Инчунин дар ин муддат, мақомоти ин кишвар ҳамроҳи гурӯҳҳои миллатгаро бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбати муҳоҷирон бадрафторӣ карда, онҳоро латтукӯб мекунанд. Ҳамчунин асноди будубошу дигар ҳуҷҷатҳои зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор мекунанд.

Маълум нест, пас аз ин мулоқотҳо вазъи муҳоҷирони кории тоҷик, ки шуморашон беш аз 1 миллион гуфта мешавад, беҳтар хоҳад шуд ё на. Аммо дар гузашта ҳатто пас аз сафарҳои раисҷумҳури худкомаи Тоҷикистон Эмомалӣ Раҳмон ба Русия ва мулоқотҳояш бо Владимир Путин дар мавриди муҳоҷират, ба ҷойи беҳтар шудан вазъи муҳоҷирони тоҷик бадтар шудааст.

Ҳамзамон дар пасманзари мулоқоти Рустам бо Путин дар Русия, гуфтумонҳо дар бораи интиқоли қудрат аз падар ба писар дар шабакаҳои иҷтимоӣ бештар шудааст.

Дар Душанбе “Маркази яхшиносӣ” месозанд

Аз ҷониби
AZDA.TV
-
0

Эмомалӣ Раҳмон дар мулоқот бо Дабири кулли Созмони ҷаҳонии метеорология масъалаи таъсиси маркази “яхшиносӣ”-ро матраҳ кард.

Мулоқоти Раҳмон бо Дабири кулли Созмони ҷаҳонии метеорология хонум Селеста Сауло рӯзи 28-уми май дар Душанбе сурат гирифт.

Тавре Хадамоти матбуоти Дастгоҳи Президент хабар медиҳад, Эмомалӣ Раҳмон зимни мулоқот бо хонум Сауло масоили вобаста ба густариши ҳамкории дуҷонибаро баррасӣ карда, таъсиси Маркази ҳамоҳангсозии минтақавӣ оид ба яхшиносиро муҳим донистааст.

Гуфта мешавад, таъсиси Маркази ҳамоҳангсозии минтақавӣ оид ба яхшиносӣ бо сарпарастии Созмони ҷаҳонии обуҳавошиносӣ ва дастгирии дигар шарикони рушд дар шаҳри Душанбе анҷом хоҳад шуд.

Ба иттилои манбаъ, Дабири кулли Созмони ҷаҳонии метеорология барои иштирок дар нахустин Конфронси байналмилалӣ дар робита ба ҳифзи пиряхҳо вориди шаҳри Душанбе шудааст.

Ёдовар мешавем, ки аз фардо, 29-уми май то рӯзи 31-уми ҳамин моҳ дар шаҳри Душанбе Конфронси байналмилалии сатҳи баланд оид ба ҳифзи пиряхҳо бо ҳузури кишварҳо, созмонҳои байналмилалӣ ва шахсиятҳои гуногун баргузор мегардад.

Дар Русия нархи “патент” боз боло меравад?

Аз ҷониби
AZDA-TV
-
0

Дар Думаи давлатии Русия пешниҳод карданд, ки будҷаи кишварро аз ҳисоби муҳоҷирон, сарватмандҳо ва ширкатҳои ғарбие, ки ба бозори Русия бармегарданд, бештар кунанд.

Муовини якуми раиси Кумитаи сиёсати иттилоотии Думаи давлатии Русия Антон Ткачёв пешниҳод карда, ки арзиши патент барои муҳоҷирон 1,5 баробар зиёд карда шавад. Ба гуфтаи ӯ, ҳоло дар Русия беш аз 6 миллион муҳоҷир кору фаъолият доранд ва ин иқдом метавонад ба будҷа тақрибан 75 миллиард рубл биёрад.

Ин вакили рус ҳамчунин пешниҳод кардааст, ки барои гирифтани патент боҷи давлатӣ, монанд ба он чи ки шаҳрвандони Русия ҳангоми гирифтани шиносномаи хориҷӣ пардохт мекунанд, ҷорӣ карда шавад ва ин иқдом боз 10 миллиард рубли дигар ба будҷа ворид кунад.

Илова бар ин, Ткачёв аз мақомоти Русия даъват карда, ки назорат аз болои фиристодани пулҳои муҳоҷирон ба хориҷ сахттар шавад. Вай пешниҳод намуда, ки муҳоҷирон танҳо маблағҳои расман бадастомадаро ба хориҷ аз Русия фиристода тавонанд ва дигар маблағҳо бояд декларатсия карда шаванд ва қонунӣ буданашон исбот гардад.

Бояд гуфт, ин тағйиротҳо метавонанд нархи патенро боло бурда, боиси афзоиши фасод ва поймол кардани ҳуқуқи муҳоҷирон, ки аллакай дар шароити вазнин кор мекунанд, гардад.

Дар баробари ин, вакилон рус мехоҳанд аз ширкатҳои ғарбие, ки ба бозори Русия баргаштаниянд, боҷи якдафъаина ба андозаи 2% аз гардиши маблағ гирифта шавад. Ба ҳисоби Ткачёв, чунин иқдом метавонад то 120 миллиард рубли дигар ба будҷаи Русия ворид кунад.

Инчунин вакили дигар Алексей Куринний пешниҳод карда, ки ба масъалаи ҷорӣ намудани низоми андозбандии тадриҷӣ баргарданд, яъне меъёри андоз бо афзоиши даромад афзоиш ёбад.

Ба гуфтаи таҳлилгарон, ҷанг бо Украина, ки беш аз се сол боз идома дорад, хароҷоти Русияро ба таври бесобиқа зиёд кард ва будҷаи давлатии онро заиф кард. Дар чунин шароит, ҳукумат талош дорад сарчашмаҳои нави даромадро пайдо кунад, вале қишре, ки аз вазъи чунин қонунҳо аввалин зарбаро мехӯрад, қишри муҳоҷир аст.

Сафари Рустами Эмомалӣ ба Русия ва дидор бо Путин

Аз ҷониби
Azda TV
-
0

Рустами Эмомалӣ рӯзи 28-уми майи соли ҷорӣ барои мулоқот бо Путин ва анҷоми сафари расмӣ ба Маскав рафт.

Расонаҳои давлатии Тоҷикистон хабар медиҳанд, ки Рустами Эмомалӣ, пирсари раисҷумҳури худкомаи Тоҷикистон Эмомалӣ Раҳмон, ки ҳамзамон мақоми раиси Маҷлиси миллӣ ва шаҳрдори Душанбе ҳам ба ӯ дода шудааст, имрӯз вориди шаҳри Маскав шуд. 

Бино ба гузоришҳо, қарор аст Рустами Эмомалӣ дар доираи ин сафараш бо Владимир Путин, раисҷумҳури Русия мулоқоту гуфтугӯ кунад.

Мақомоти расмӣ ҷузъиёти зиёдеро дар бораи ҳадафҳои мушаххаси ин сафар ва масъалаҳое, ки дар дидор бо Путин баррасӣ хоҳанд шуд, ироа накардаанд.

Ин дар ҳолест, ки маъмулан муҳоҷирон аз сафарҳои мансабдорони баландпояи тоҷик ба Маскав ва мулоқот бо раҳбарияти Русия, ки шарики стратегии Тоҷикистон ба ҳисоб меравад, натиҷаҳои малмусро интизор доранд.

Гуфта мешавад, дар Фурӯдгоҳи байналмилалии Внуково-2-и шаҳри Маскав Рустамро муовини раиси Шӯрои Федератсияи Маҷлиси Федералии Федератсияи Русия ва дигар шахсони расмӣ пешвоз гирифтаанд.

Тибқи иттилои расонаҳо, дар ин сафар раиси Маҷлиси миллиро раисони кумитаҳои Маҷлиси миллӣ ва чанди дигаре аз мақомдорон ҳамроҳӣ мекунанд. Аммо таркиби пурраи ҳайат ва ҳазинаҳои ин сафар – тибқи маъмул – барои умум дастрас нест.

Ин бори аввал аст, ки Рустами Эмомалӣ маҳз барои мулоқот бо Путин ба Русия сафар мекунад. Ба назари таҳлилгарон, ин сафари ӯ метавонад далели наздик шудани замони интиқоли қудрат аз падар ба писар дар Тоҷикистон бошад. Ба гуфтаи онҳо, Рустам барои ба даст овардани ризояти Путин ва чароғи сабз гирифтану доштани ҳимояти ӯ ба Маскав рафтааст.

Сафари Рустам ба Русия дар ҳолест, ки ӯ 11-уми апрели соли ҷорӣ барои бори дувум раиси Маҷлиси миллии Маҷлиси олии Ҷумҳурии Тоҷикистон – палатаи болоии порлумон интихоб шуд.

Тибқи Сарқонуни кишвар, раиси Маҷлиси миллӣ шахси дувум дар Ҳукумати Тоҷикистон ба ҳисоб рафта, дар сурати истеъфо, марг, беморӣ ё аз салоҳиятҳои худ даст кашидани президент, то замони интихобот ӯ иҷрокунандаи вазифаи президент дар кишвар хоҳад буд.

Мунтақидони режими имрӯзаи Тоҷикистон дар вазифаҳои калидӣ кор кардани ӯро ба эҳтимоли интиқоли қудрат аз падар ба писар рабт медидиҳанд ва ин эҳтимол солҳо боз дар кишвар матраҳ аст.

Инчунин коршиносон ҳама боздошту қатли дигарандешон дар 10 соли ахирро маҳз ба “фароҳам кардани шароити мусоид” барои интиқоли қудрат аз Эмомалӣ Раҳмон ба писараш Рустами Эмомалӣ рабт медиҳанд.

“Султон Сулаймон” ва “Аличо” зиндонӣ шуданд

Аз ҷониби
Azda TV
-
0

Ду бозигари маъруфи синамои Туркия, ки дар байни тоҷикон шинохта шудаанд, дар кишаврашон маҳкум ба зиндон шуданд.

Холид Эргенч бозигари нақши “Султон Сулаймон” ва Ризо Коҷаоғлу бозигари нақши “Аличо” бо иттиҳоми шаҳодати дурӯғ дар робита ба эътирозоти боғи Гезӣ дар соли 2013 муҳокима мешаванд.

Расонаҳои туркӣ мегуянд, миёнаҳои моҳи майи соли ҷорӣ ин ду ҳунарманд, ки бо нақшҳояшон дар силсилафилмҳои машҳур ба монанди “Чукур”, “Ҳазору як шаб” ва “Асри боҳашамат” шинохта шудаанд, дар доираи тафтишоти марбут ба эътирозҳои боғи Гезӣ дар соли 2013 бо иттиҳоми “шаҳодати дурӯғ” муҳокима шуда, ҳар кадом ба беш аз ду соли зиндон маҳкум гардиданд.

Аммо додгоҳ ба далели бо эҳтиром рафтор кардани муттаҳамон ҳукми Холид Эргенчро ба як солу 10 моҳ ва Ризо Коҷаоғлуро ба як солу 8 моҳ коҳиш дода, ҳукми онҳоро то замоне, ки ҷурми дигаре содир накардаанд ба таълиқ гузошт ва онҳо дарҳол зиндонӣ нахоҳанд шуд.

Ин ҳунармандон ба дурӯғгӯӣ дар робита ба парванда алайҳи Оиша Борим муттаҳам мешаванд, ки вақте дар соли 2013 аз онҳо дар бораи иртибот доштан бо шӯришгарон суол шуд, онҳо гуфтаанд, ки ҳеҷ иртиботе бо ашхоси калидии паси эътирозот надошттанд. Додгоҳ ин шаҳодати онҳоро дурӯғ баровард.

Ба гуфтаи додгоҳ, Оиша Борим менеҷери шинохташудаи ҳунармандони синамо ва барномаҳои ҳунарӣ аст, ки дар ҷараёни эътирозҳои боғи Гезӣ ҳунармандони таҳти идораи худро ба ҳузур дар таҷаммуъҳо ташвиқ мекардааст ва бо ҷурми тавтеа алайҳи ҳукумат ва ҳамдастӣ бо табодулотгарон гунаҳкор дониста мешавад.

Гуфта мешавад, Холид Эргенч (Султон Сулаймон) бидуни боздошти пешакӣ ва бо ҳамроҳии вакили худ дар ҷаласаи додгоҳ ҳозир шуда, дар дифоъ аз худ изҳор дошт: “Ман танҳо ба саволҳое, ки аз ман пурсида шуд, посух додам. Ҳеҷ нуктаеро пинҳон накардам ва агар аз ман дар бораи дидор ё иртиботе пурсида мешуд, содиқона посух медодам.”

Ёдовар мешавем, ки дар таърихи 28-уми майи соли 2013, шаҳри Истамбул шоҳиди даргириҳои шадид байни нерӯҳои пулис ва эътирозгароне гардид, ки алайҳи тахриби боғи Гезӣ дар майдони Тақсим ба муддати чанд рӯз гирдиҳамоӣ мекарданд. 

Нерӯҳои амниятии Туркия бо истифода аз гази ашковар ва мошинҳои обпош ба сӯи тазоҳуркунандагон ҳамла карда, дар натиҷа садҳо нафар захмӣ ва беш аз 50 нафар боздошт шуданд. Пас аз ин ҳодиса, тазоҳурот ба шаҳрҳои дигари Туркия низ густариш ёфт.

Сабаби аслии ин эътирозҳо як лоиҳаи шаҳрдорӣ буд, ки бар асоси он мебоист қисмате аз дарахтони боғи Гезӣ, воқеъ дар майдони Тақсим бурида шуда, ба ҷои он як маҷмааи фарҳангӣ бунёд мегардид. Илова бар ин, эътирозгарон аз сиёсатҳои ҳукумати Раҷаб Таййиб Эрдуғон низ изҳори норозигӣ мекарданд. Ин даргириҳо аз хушунатбортарин тазоҳурот дар Туркия тайи солҳои охир арзёбӣ мешавад.

Барои як муҳоҷир – як SIM-корт

Аз ҷониби
AZDA-TV
-
0

Мақомоти Русия мехоҳад шумораи SIM-кортҳоро, ки ба номи шаҳрвандони хориҷӣ сабт мешаванд, маҳдуд кунад.

Бино ба иттилои расонаҳои русӣ, дар Думаи давлатии Русия лоиҳаи қонуне таҳия шудааст, ки ба муҳоҷирон иҷозат намедиҳад, зиёда аз як SIM-корт дошта бошанд. Вале ҳоло муҳоҷирон метавонанд то 10 SIM-корт харидорӣ кунанд.

Таҳиягарон мегӯянд, ки ин қонун ба баланд бардоштани сатҳи амнияти миллӣ равона гардида, чунин маҳдудият ба муборизаи самаранок бо таҳдидҳои терроризм, ҷосусӣ, киберҷинояткорӣ ва қаллобӣ кумак мерасонад.

Гуфта мешавад, дар Русия аз 1-уми январи соли 2025 қоидаҳои нави сабти номи SIM-кортҳо барои шаҳрвандони хориҷӣ ва шахсони бешаҳрванд ба иҷро даромада буд. Ва хариди SIM-корт танҳо ҳангоми ҳузури шахсӣ дар дафтари оператори алоқа ва пас аз гузаштани шиносоии биометрӣ имконпазир мебошад.

Раиси Кумитаи меҳнат, сиёсати иҷтимоӣ ва корҳои собиқадорони Дума Ярослав Нилов мегӯяд, ки дар шароити ҷаҳонишавӣ ва афзоиши ҷараёни муҳоҷират зарур аст, ки назорат аз болои робитаҳои шаҳрвандони хориҷӣ пурзӯр карда шавад.

Бояд гуфт, давоми як соли ахир дар Русия фазои муҳоҷирбадбинӣ ба авҷи худ расида, чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар ва назорат аз болои онҳоро бештар мекунад.

Пештар раисҷумҳури Русия Владимир Путин зери қонуне имзо гузошт, ки тибқи он аз 1-уми сентябри соли ҷорӣ дар шаҳри Маскав ва вилояти он дар бораи макони ҷойгиршавии муҳоҷирон тариқи барномаи мобилӣ, озмоиш мегузаронанд.

Дар доираи ин озмоиш, муҳоҷироне, ки бе раводид ба ин минтақаҳо ворид мешаванд, вазифадоранд, ки аз бақайдгирии биометрӣ, аксбардории рақамӣ гузаранд ва барномаи махсуси мобилиро, ки макони будубоши онҳоро мефиристад, дар телефонҳояшон сабт кунанд.

Ва Вазорати корҳои дохилӣ ҳуқуқ пайдо мекунад, ки макони будубоши хориҷиёнро дар ҳудуди Русия ба ҷуз меҳмонхонаву бемерхона назорат намоянд. Агар дар давоми се рӯз ягон сигнал ё маълумот дар бораи макони будубоши шахс ворид нашавад, муҳоҷир аз қайди муҳоҷиратӣ хориҷ карда мешавад ва ин метавонад боиси маҳдудиятҳо дар будубош ё ҳатто сабаби ихроҷ гардад.

Дар Тоҷикистон мухолифонро мекушанд ва хонаҳояшоно соҳиб мешаванд

Аз ҷониби
AZDA.TV
-
0

Мақомоти дахлдори тоҷик наздикони Абдуҳалим Назарзода, собиқ муовини вазири дифои Тоҷикистонро маҷбур доранд, хонаашонро тарк кунанд.

Тавре ҳамсари Мирзокарим Назаров, бародари Абдуҳалим Назарзода (маъруф ба Ҳоҷӣ Ҳалим) дар мусоҳибаи ихтисосие ба Радиои Озодӣ гуфт, Хадамоти иҷрои Тоҷикистон барои онҳо ду рӯз муҳлат додаанд, ки хонаашонро холӣ кунанд. Яъне, хона рӯзи 28-уми май бояд холӣ бошад.

Зиёда Қурбонова, ҳамсари Мирзокарим Назаров мегӯяд, хонае, ки мақомот маҷбур доранд холӣ карда шавад, ба номи шавҳараш нест ва моликияти ӯ ҳисоб намешавад, вале бо вуҷуди ин бо иҷбор хонаро аз дасти соҳибонаш гирифтаниянд.

Ин зан бо нишон додани асноди расмии хона, мегӯяд, хонаро шавҳараш Мирзокарим Назаров соли 2014 ба ӯ ва писараш ҳадия кардааст, вале худашон санади додаи худро қабул надоранд.

“Даҳ сол шуд рафтани шавҳарамро, ӯро куштанд, моро ин қадар азобу ғам дода истодаанд. Мо намедонем куҷо равем, ягон сарпаноҳ надорем”, – мегӯяд Қурбонова.

Қурбонова афзуда, ки соли 2016 додгоҳ ҳукми мусодираи хонаро бароварда буд, вале ба далели ин ки хона моликияти шавҳараш нест ва ҳамчунин ҷойи дигаре барои рафтан надоштанд, дар ҳамин хона монданд.

Ӯ мегӯяд, дар ин хона ҳудуди 30 нафар зиндагӣ мекунад, ки 20 нафари онҳо кӯдакони ноболиғ ҳастанд. Агар мақомот хонаро ба зӯр гирад, онҳо ба куҷо мераванд? Дигар ҳеч хонае барои зиндагӣ кардан надоранд.

Ёдовар мешавем, ки пас аз воқеаҳои моҳи сентябри соли 2015 – ба гуфтаи мақомот ошӯби нокоми Ҳоҷӣ Ҳалим – мақомот се бародари ӯро куштанд ва аксари пайвандону наздиконашро барои солҳои тӯлонӣ зиндонӣ карданд. Ҳамчунин ҳар моликияте, ки доштанд, ҳамаро гирифтанд. Ҳатто ба зану фарзандонашон раҳм накарданд.

Баъдатар, таҳлилгарони зиёде гуфтанд, ки ин як саҳнасозии ҳукумат барои аз майдони сиёсат рондани дигарандешону мухолифон, бахусус ҲНИТ буд. Зеро ҳукумат пас аз ин ҳодиса ин ҳизбро ҳам баст ва ҳизби террористӣ эълон карду раҳбарони онро барои солҳои тӯлонӣ ва ҳатто якумра зиндонӣ кард.

Ба назари мунтақидони ҳукумат, дар Тоҷикистон ҳар ҳукме алайҳи мухолифон бо фармони шахсии худи Эмомалӣ Раҳмон анҷом мешавад. Ва то онҷо, ки мухолифонро мекушанд ва хонаҳояшонро соҳиб мешаванд. Вале ҳеч кас ва ҳеч қонуне пеши ин ҷинояткории онҳоро намегриад.

Духтараки Фаластинӣ миёни шуълаҳои оташ

Аз ҷониби
Azda TV
-
0

Субҳи рӯзи душанбе, 26-уми май артиши Исроил ба як мактаб дар шимоли Ғазза ҳамлаҳои шадидеро анҷом дод, ки то ҳол беш аз 55 нафар кушта шуда, даҳҳо каси дигар захмӣ шудаанд.

Тавре Хадамоти оташнишонӣ ва наҷоти шаҳрвандони Фаластин хабар медиҳад, ин ҳамлаҳои ҳавоӣ субҳи душанбе ба як мактабе дар шаҳраки Ҷабалиё анҷом дода шуд, ки дар он мардуми зиёд, аз ҷумла занону кӯдакон паноҳ оварда буданд.

Шабакаи “Ал-Ҷазира” аз қавли сухангӯи ин ниҳод Маҳмуд Бассал гузориш дод, ки “ҳаддиақал 36 нафар дар ҳамлаи субҳи имрӯз ба мактаби “Фаҳмӣ Ал-Ҷарҷовӣ” дар маҳаллаи “Дараҷ”-и Ғазза кушта шуданд, ки 6 нафарашон кӯдакони ноболиғ буданд.”

Расонаҳо дар такя ба масъулони тиббӣ ва наҷотдиҳӣ гузориш медиҳанд, ки “мактабе, ки Исроил онро бомборон кард, паноҳгоҳи садҳо овора буд ва бештари кушташудаҳо кӯдакону занон буданд.”

Артиши Исроил субҳи рӯзи душанбе иддао кард, ки мақсади ин ҳамла маркази кантроли “терористҳои калидӣ”-и Ҷиҳоди исломии Фаластинӣ буд. Исроил мегӯяд, “чандин қадам бардошта шуд то хисоратҳои инсонӣ ба ҳадди ақал расад.”

Ин иддаои Исроил барои ҳифзи ҷони бегуноҳон дар ҳолест, дар гузориши шабакаи “Ал-Ҷазира” тасвирҳое дида мешавад, ки тамоми синфхонаҳо оташ гирифтаанд ва паноҳандагони хобидаро дар ҳоли доду фиғон ва фиро ҳастанд. Ҳаминтавр кӯдаке саргардон дар миёнаи шуълаҳои оташ низ дида мешавад ва мардуми дар берунбуда ба шиддат дар талошанд то панҷараҳоро шикиста, онҳоро наҷот диҳанд.

Сухангӯи Хадамоти оташнишонии Ғазза Маҳмуд Бассал мегӯяд, дар ҳамлаҳои ҷудогона ба шаҳраки Ҷабалия дар шимоли Ғазза 19 нафар ва дар як ҳамлаи дигар ба як урдугоҳи чодарӣ 6 кас низ кушта шуданд.

Қонунҳои бйналмилалӣ ҳамла ба зерсохторҳои маданӣ бо шумули мактабҳо ва дармонгоҳҳоро манъ мекунад, аммо Исроил мудом чунин маконҳоро дар Ғазза бо иддаои ҳадафгирифтани “марокизи терористӣ” бомборон мекунад. Дар ҳоле, ки тибқи гузоришҳо, дар Ғазза маконе барои апноҳгоҳи мардуми осоишта вуҷуд надорад.

Ин ҳам дарҳолест, ки 19-уми майи соли ҷорӣ раҳбарони кишварҳои бонуфузи ғарбӣ бо як изҳороти муштарак дар баёнияе ба Исроил ҳушдор доданд, ки дар сурати идомаи амалиёти густурдаи низомӣ дар Навори Ғазза ва сабук накардани муҳосираи ин борика, бо таҳримҳои ҷиддӣ рӯбарӯ хоҳад шуд.

Бо вуҷуди бештар шудани фишорҳои байналмилалӣ болои Исроил, сарвазири ин кишвар Бинёмин Натанёҳу исрор дорад, ки кишвараш ҳамлаҳои шадиди низомияшро то пурра ишғол намудани Ғазза идома медиҳад.

Шикояти мусофирон аз “Сомон Эйр”

Аз ҷониби
AZDA.TV
-
0

Корбарон дар шабакаҳои иҷтимоӣ аз режаи корӣ ва муносибати коргарони ширкати ҳавопаймоии Тоҷикистон “Сомон Эйр” шикот кардаанд.

Корбарон дар шабакаи Фейсбук аз он шикоят доранд, дар аксар ҳолат ширкати “Сомон Эйр” то 20 соат парвозҳоро ба таъхир мегузорад, бидуни ин ки далиле барои мусофирон пешниҳод кунад.

Ин бори аввал нест, ки мусофирон аз тарзи фаъолияти ин ширкат шикоят мекунанд. Вале, ба гуфтаи корбарон, чун ин ширкат аз наздикони Эмомалӣ Раҳмон аст, касе ба доди мусофирон намерасад ва масъулони ширкат ҳам чун дар бозор рақибе надоранд, даст ба ислоҳот намезананд.

Гуфта мешавад, ширкати “Сомон Эйр” ба додараруси Эмомалӣ Раҳмон, Ҳасан Асадуллозода, ки ҳамзамон раиси “Ориёнбонк” ҳаст, тааллуқ дорад. Ин ширкат ягона ширкати қавӣ дар Тоҷикистон аст, ки бозори интиқоли ҳавоии мусофиронро пурра инҳисор кардааст. Агарчи ширкати давлатии “Тоҷик Эйр” фаъолият дорад, вале фаъолияташ маҳдуд аст.

Ба назари коршиносон, ширкати “Сомон Эйр” дар бозор рақиб надорад ва иллати фаъолияти бесифат ва муносибати дағал бо мусофирон низ ҳамин аст. Зеро мусофири тоҷик интихоби дигаре надорад ва дар ҳар ҳолат маҷбур аст аз он истифода барад.

1...121122123...785саҳифаи 122 аз 785