Мақомоти Русия мехоҳанд шуруъ аз ибтидои соли 2025 барои ихроҷи муҳоҷирони корӣ ва шахсони таҳти назорат феҳристеро омода созанд.

Тибқи иттилои Вазорати корҳои дохилии Русия, дар ҳоли ҳозир дар ин кишвар ҳудуди 630 ҳазор муҳоҷири ғайриқонунӣ вуҷуд дорад. Бо мақсади тезонидани ихроҷи онҳо аз Русия ҳукумати ин кишвар тасмим дорад, ки аз соли 2025 феҳристи шахсони таҳти назоратро роҳандозӣ кунад. Ва то ҳол ҳеч санади муайянкунандаи меъёрҳои ин руйхат ба ҷомеаи ин кишвар рӯнамоӣ нашудааст.

Тибқи иттилои Вазороати умури дохилии Русия, шумораи муҳоҷирони корие, ки дар соли 2023 қонунӣ дар Федератсияи Русия ба сар мебурданд, ба 3,5 миллион нафар рисада, ки аксари онҳо зодагони Узбекистон, Тоҷикистон ва Қирғизистон мебошанд.

Охири моҳи июни соли ҷорӣ, Думаи давлатӣ лоиҳаи қонунеро қабул кард, ки он шароити будубоши муҳоҷирон дар Федератсияи Русияро сахттар мекунад ва руйхати ягонаи “муҳоҷирони қонуншикан” низ дар ин қонун дохил аст. Ин санадро 8-уми август раисиҷумҳур имзо кард ва қарор аст он аз 5-уми феврали соли оянда эътибори қонунӣ пайдо кунад.

Таъсиси феҳристи вежаи афроди таҳти назорат ба ин маъност, ки рӯйхат ва маълумоти ашхосе, ки муҳлати асноди будубош ва ё иҷозати кории онҳо ба охир расида, ё лағв шудааст ва ё ҳуқуқвайронкунии маъмурӣ содир кардаанд, ҷамъоварӣ ва захира мешавад, то аз қаламрави ин кишвар ихроҷ карда шаванд.

Дар ҳамин ҳол муовини аввали вазири корҳои дохилӣ Александр Горовой мегӯяд: “Ҷамъоварӣ ва захираи маълумоти ҳамаи муҳоҷирони ғайриқонунӣ дар як вақт кори мушкил аст. Ба ҳамин хотир беҳтар мебуд барои афроде, ки ҷиноятҳои нисбатан сабук содир кардаанд, авфи умум содир мешуд.”

Дар ҳамин ҳол Владислав Менщиков, сардори Хадамоти якуми Хадамоти амниятӣ Федеролӣ (ФСБ) мегӯяд: “Ин пешниҳодро мумкин аст ФСБ низ дастгирӣ кунад.”

Дар шабакаҳои иҷтимоии тоҷикӣ бархе шаҳрвандони кишвар аз он шикоят доранд, ки барои сафар ба кишвари Имороти Мутаҳидаи Арабӣ наметваонад раводид (виза) бигиранд.

Сокиноне, ки қасди сафар ба ин кишвари арабиро доранд, мегӯянд, ду ҳафта боз дархостҳоияшон барои дарёфти раводид рад карда мешавад.

Гуфта мешавад, ин маҳдудиятҳо танҳо барои мардон буда, занҳо ва ойлаҳо ин мушкилро надоранд. Як ширкати саёҳоӣ низ дар суҳбат бо АЗИЯ-ПЛЮС вуҷуди мушкил дар дарёфти раводиди ин кишварро барои мардҳо тасдиқ кардааст. Масъулони ин ширкат гуфтаанд, дар ҳоли ҳозир фақат дархости раводид барои мардҳои танҳо рад шуда истодааст, занҳо ва касоне, ки ойлавӣ дахост додаанд, дархосташон рад нашудааст.

То ҳол сабаби надодани раводид ба мардони танҳоро ягон ниҳоди расмии марбути ду кишвар шарҳ надодаанд.

Ҳикматулло Ҷураев, масъули сайёҳии ширкати fly.tj мегӯяд, “Аз “Fly Dubai” ба мо гуфтанд, ки шаҳрвандони тоҷиқ ба Дубай меоянд қонунҳоро риоят намекунад, ба ҳамин далел ба мардҳои танҳо, ки дархости виза медиҳанд, рад карда мешавад.”

Вазорати корҳои хориҷӣ низ вуҷуди мушкил барои дарёфти раводид ба мардони танҳоро тасдиқ карда, гуфтааст, вазъиятро пайгирӣ доранд ва дар робита ба мушкили пешомада ба ҷониби ИМА муроҷиат кардаанд ва мунтазири посух ҳастанд.

Артиши Исроил шаби гузашта ба дигар шаҳрҳои Фаластин, аз ҷумла Ҷанин, Ноблус, Тулкарам ва Тубос ҳамлаи густардаеро анҷом дод.

Бино ба иттилои Вазорати беҳдошти Фаластин, дар ин ҳамлаҳои Исроил ба шимоли Каронаи Бохтарӣ дасти кам 11 нафар кушта шудааст, вале ин омори ниҳоӣ нест. Зеро ба гуфтаи ин ниҳод, маълум нест дар зери овораҳо чанд каси дигар ҷон бохтааст.

Расонаҳо гузориш медиҳанд, ки артиши Исроил бо баҳонаи анҷоми амалиёти зидди террористӣ ба урдугоҳи паноҳандагон ва хонаҳои маскунии аҳолӣ дар Ҷанин ва Тулкарам ҳамла кардааст.

Манобеи фаластинӣ хабар додаанд, ки артиши Исроил дар Тулкарам зерсохторҳои обиро мавриди ҳадаф қарор дода, обро аз аҳолӣ қатъ кардааст. Ҳамчунин роҳҳо ба сӯи бемористони Ибни Сино дар Ҷанин тавассути нерӯҳои исроилӣ баста шуда, бемористони Халил Сулаймон муҳосира шудааст.

Исроил ҳадафи ин ҳамлаи густардаро ба дигар шаҳрҳои Фаластин, “нобуд сохтани ячейкаҳои террористӣ” номидааст. Расонаҳои исроилӣ аз қавли сухангӯи артиши ин кишвар навиштаанд, ки ин “амалиёти бузург” дар шимоли Каронаи Бохтарӣ то чанд рӯзи дигар идома хоҳад кард.

Дар ҳамин ҳол Комиссари олии ҳуқуқи башари Созмони Миллали Муттаҳид дар изҳороте ҳамлаи густардаи артиши Исроилро ба дигар шаҳрҳои Фаластин маҳкум карда, онро мухолифи қонунҳои байналмилалӣ арзёбӣ кардааст. Ин ниҳоди СММ мегӯяд, Исроил бо ин рафтори ғайриқонунияш вазъро дар минтақа бадтар мекунад.

Таҳлилгарон ҳам бар ин назаранд, ки Исроил чун дар Ғазза ба ҷуз харобгарӣ ва қатлу куштори мардуми бегуноҳ чизе ба даст наовард, инак мехоҳад домани ҷангро васеътар кунад ва онро аз Ғазза ба Каронаи Бохтарӣ интиқол бидиҳад.

Ёдовар мешавем, ки артиши Исроил аз моҳи октябри соли гузашта то имрӯз ба далели ҷанг бо нерӯҳои ҲАМОС Ғаззаро комилан бомборон дорад. Тибқи гузориши расонаҳо, танҳо субҳи ҳамин рӯз дар натиҷаи ҳамлаҳои ҳавоии Исроил ба Навори Ғазза 24 нафар кушта шудаанд, ки ҳамаи онҳо мардуми оддӣ ҳастанд.

Ба иттилои Вазорати беҳдошти Фаластин, аз оғози ҷанг то ин дам дар Ғазза дар натиҷаи ҳамлаҳои заминӣ ва ҳавоии артиши Исроил 40 ҳазору 534 нафар кушта шудаанд, ки беш аз 70 дарсади онҳоро занону кӯдакон ташкил медиҳанд. Омори захмиён низ ба марзи 100 ҳазор наздик шудааст.

Александр Лукашенко, раисҷумҳури Белорус дастгир шудани муассиси “Телеграмм” Павел Дуровро дар Фаронса кори дуруст хонда аст.

Дар ин бора Лукашенко имрӯз, 27-уми август дар мулоқоте бо Шӯрои ҷумҳуриявии омӯзгорон гуфта аст.

Роҳбари худкомаи Белорус ҳангомои суханронӣ дар бораи таҳсил гуфт, ки аксари онҳое, ки дар мактаб бад таҳсил кардаанд, онҳо ҳастанд, ки ҳукуматро интихоб мекунанд ва иддао доранд, ки Ғарб, масалан Фаронса беҳтар аз ватани онҳост.

“Дидед, дирӯз дар Фаронса чӣ гузашт? Ман онҳоро маҳкум намекунам. Онҳо кори дуруст мекунанд. Дуров бошӣ ва ё ҳар каси дигаре, гуноҳро кардӣ, бояд ҷавоб бигӯӣ. Аммо замоне ки мо бо истифодаи ҳамин усулҳо аз худамон дифоъ мекунем, чаро моро айбдор мекунед?”, мегӯяд Лукашенко.

Ёдовар мешавем, ки Павел Дуров, муассиси шабкаи “Телеграмм” рӯзи 24-уми август ба Фаронса парвоз кард ва расидан баробар фармони боздошти ӯ аз сӯи мақомти Фаронса содир шуд. Худи ҳамон рӯз ӯро пулис дар Фурӯдгоҳи “Ле Бурже” дастгир кард. Ҳоло ӯ дар боздоштгоҳ қарор дорад.

Мақомоти Фаронса ӯро бо 12 айбнома муттаҳам мекунад. Аз ҷумла, ӯ бо “пешниҳод накардани маълумот ба мақомоти ҳифзи ҳуқуқ барои тафтишот”, “ҳамроҳӣ дар фаъолияти платформаи онлайн бо мақсади муомилоти ғайриқонунӣ”, “нигоҳдорӣ ва паҳн кардани порнографияи кӯдакона”, “шарикӣ дар харид, интиқол, нигоҳдорӣ ва фурӯши маводи мухаддир” ва “пулшӯӣ ва пешниҳоди хидматҳои криптографӣ” айбдор мешавад.