Раҳбарияти Донишгоҳи Федералии Қазон (ДФҚ) эълон кардааст, ки донишҷӯёни хориҷии он, аз ҷумла аз донишҷӯёни тоҷикистониаш то анҷоми Саммити сарони давлатҳои БРИКС ба Русия сафар накунанд.
Бино ба иттилои расмӣ, раҳбарияти Донишгоҳи Федералии Қазон эълон кардааст, ки дар ин мавсим дарсҳо дар ин донишгоҳ аз 1-уми ноябри соли 2024 оғоз карда мешаванд.
Ба қавли манбаъ, таҳсил дар шакли ҳузурӣ ва ҷойгиршавӣ дар хобгоҳҳо аз 1-уми ноябри соли 2024 оғоз мешаванд, ба ҳамин хотир дар ҳоли ҳозир донишҷӯён аз сафар ба Русия барои идомаи таҳсил дар ин донишгоҳ худдорӣ кунанд.
Раҳбарияти ин донишгоҳҳо далели ду моҳи таъхир дар оғози дарсҳоро чунин шарҳ додааст: “Дар робита бо баргузории Саммити сарони давлатҳои БРИКС дар Қазон, ки 22-24 октябри соли 2024 баргузор мегардад, роҳбарияти Донишгоҳи Федералии Қазон (КФУ) бо мувофиқаи Вазорати маориф ва илми Русия қарор қабул кард, ки тартиби ташкили раванди таълимро тағйир диҳад.
Дар давраи аз 1 сентябр то 17 октябри соли ҷорӣ таълими назариявӣ дар шакли кори мустақилона бо истифодаи технологияҳои таълимии фосилавӣ ташкил карда мешавад. Инчунин аз 18 то 31 октябр ба донишҷӯён таътил дода мешавад.”
Гуфта мешавад, тибқи оморҳои расмӣ, Тоҷикистон ба сурати расмӣ дар кишварҳои хориҷӣ зиёда аз 41 ҳазору 200 донишҷӯ дорад, ки қисми зиёде аз онҳо дар мактабҳои олии Русия таҳсил мекунанд. Теъдоди донишҷӯёни тоҷикистонӣ дар мактабҳои олии Русия 33 ҳазору 178 нафарро ташкил медиҳанд.
Пеш аз ин ҳам вуруди шаҳрвандони Тоҷикистон ба Русия осон набуд. Мақомоти Русия ҳангоми вуруд нисбати шаҳрвандони кишварҳои Осиёи Марказӣ таъбизҳои нонавишатаеро ҷорӣ карда буданд. Онҳоро пас аз соатҳои тӯлонӣ интизор гузоштан ба дохили ин кишвар роҳ медоданд, аммо мақомоти Русия баъд аз ҳамлаҳои хунин ба “Крокус Сити Ҳол” дар умум вуруди ҳамаи тоҷикистониҳоро боз ҳам сахттар кардаанд.
