Ҷустуҷӯ кунед
Ҷустуҷӯ
-1.1 C
Dushanbe
Хона блог саҳифа 2

Ҳукми зиндони сангин ба рӯзноманигор пас аз додхоҳӣ аз Рустами Эмомалӣ

Аз ҷониби
Azda Tv
-
0

Додгоҳи шаҳри Кӯлоб рӯзноманигор ва сардабири ҳафтаномаи “Пайк” Аҳмади Иброҳимро пас аз як рӯзи расонаӣ шудани номаи додхоҳияш аз Рустами Эмомалӣ ба даҳ соли зиндон маҳкум кард.

Номаи Аҳмади Иброҳим дирӯз 9-уми январ дар расонаҳо нашр шуд. Ӯ дар ин номааш, ки ба унвонии Рустами Эмомалӣ нигошта шуда аст, ҳама иттиҳомот алайҳашро рад мекунад. Ҳамзамон рӯзноманигор таъкид мекунад, ки на ба касе пора додаасту на аз касе пора гирифтааст ва ҳамеша бо ифоритоҳо мубориза бурда аст.

Аммо бо вуҷуди ин ҳам Додгоҳи шаҳри Кӯлоб имрӯз 10-уми январ ӯро барои даҳ сол равонаи зиндон кард. Ҳукме, ки пайвандони рӯзноманигор онро қабул надоранд ва бераҳмона медонанд.

Аҳмади Иброҳим ҳанӯз дар моҳи августи соли 2024 боздошт шуда буд. Боздошти ӯ бо иттиҳоми “ришвадиҳӣ ба маъмури Кумитаи давлатии амнияти миллӣ”, “тамаъҷӯӣ” ва “ифротгароӣ” гуфта мешавад. Аммо наздикону дӯстони рӯзноманигор ба ин иттиҳомот боварӣ надоранд ва мегӯянд, ӯ қурбонии кадом бозиҳои мансабдоре шуд. Худи рӯзноманигор низ дар номааш ба Рустами Эмомалӣ ин нуктаро зикр карда, ки боздошташ кори дасти “як раис ва ду корманди мақомот” аст.

Рӯзноманигор аз соли 2012 сардабири нашрияи мустақили “Пайк” аст. Дар гузашта ӯ бо мухолифони ҳукмат низ чанд дафъа даргир шуда аст.

Дар чанд соли ахир дар Тоҷикистон даҳҳо рӯноманигор бо иттиҳомотҳои зидунақиз аз 7 та 10 сол равонаи зиндон шудаанд.

Сафари Пизишкиён ба Тоҷикистон

Аз ҷониби
AZDA-TV
-
0

Раисҷумҳури нави Эрон Масъуд Пизишкиён бори якум бо сафари расмӣ ба Тоҷикистон меояд.

Сафари Пизишкиён ба Душанбе 14-уми январи соли ҷорӣ ба нақаша гирифта шуда, он то 16-уми январ идома мекунад.

Мақомоти ҳарду кишвар аз ҷузъиёт ва барномаи сафари раисҷумҳури Эрон ба Тоҷикистон чизе нагуфтаанд, аммо дар доираи ин сафар форуми соҳибкорону тоҷирони Тоҷикистону Эрон баргузор хоҳад шуд.

Гуфта мешавад, ин бори аввал аст, ки Масъуд Пизишкиён пас аз пирӯз шудан дар интихоботи пеш аз муҳлати президентӣ дар Эрон ба Тоҷикистон меояд. Аммо ӯ моҳи сентябри соли 2024 дар ҳошияи нишастаҳои Маҷмаи умумии Созмони Милал дар Амрико бо раисҷумҳури Тоҷикистон мулоқот карда буд.

Инчунин дар ин шабу рӯзҳо чанде аз блогерони тоҷик ва мубаллиғони ҳукумати Раҳмон дар шаҳрҳои гуногуни Эрон қарор дошта, гардишгарони тоҷикро барои сафар ба Эрон ташвиқ доранд.

Мақомоти Тоҷикистону Эрон дар ин чанд соли ахир робитаи печидае дошта, тира шудани муносибатҳои Тоҷикистону Эрон аз зиндонӣ шудани Бобаки Занҷонӣ шуруъ шуд ва бо бастани Ҳизби наҳзати исломии Тоҷикистон дар соли 2015 ин муносибатҳо тиратар гашта буд.

Мунособати ин ду кишвар дар соли 2019 каме беҳтар шуда, бо раисҷумҳур шудани Иброҳим Раисӣ миёни Тоҷикистону Эрон низоми рафту омади бидуни раводид барои шаҳрвандони ду кишвар оғоз шуд.

Оташсӯзӣ дар Лос-Андҷелес ҳазорҳо манзили гаронбаҳоро нобуд кард

Аз ҷониби
Azda TV 3
-
0

Бино ба гузориши расонаҳои амрикоӣ, оташсӯзии шадид дар шаҳри Лос-Анҷелес ҳазорҳо манзили гаронбаҳоро сӯзонда нобуд кард.

Тибқи оморҳо дар ин оташсӯзӣ 85 нафар ҷон бохта, беш аз 130 ҳазор нафар маҷбур шуданд хонаҳои худро тарк карда, овора шудаанд. Сӯхтор рӯзи сешанбеи 7-уми январи соли ҷорӣ сар зад.

То ҳол сабаби аслии сар задани оташсӯзиро мушаххас накардаанд, вале гуфта мешавад, боди сахт, ки суръати он 97 км дар соат мерасад, сабаби паҳн шудани он шудааст.

Беш аз 2000 иншоот, аз ҷумла манзилҳои истиқоматӣ, мактабҳо ва марказҳои касбу кор дар хиёбони машҳури Сансет ба коми оташ рафтаанд. Хисороти эҳтимолии ин сӯхтор тақрибан аз 135 то 150 милард доллар гуфта мешвад ва сӯхтор то баҳол идома дорад.

Ба иттилои мақомоти амрикоӣ, оташсӯзӣ дар 5 нуқта аз шаҳрҳои Калифорния ва Лос-Анҷелес сар задааст. Ширкатҳои бимаи Амрико мегӯянд, ин бузургтарин ва зиёновартарин оташсӯӣ дар таърихи ин кишвар маҳсуб мешавад.

Дар натиҷаи ин оташсӯзиҳо, чандин ситораҳои Ҳолливуд ва шахсони машҳур, аз ҷумла Лейтон Мистер ва Адам Броди хонаи 6,5 миллион долларии худро дар оташ аз даст додаанд. Билли Кристал ва ҳамсараш, ки 46 сол дар як манзил бо фарзандон ва набераҳояшон зиндагӣ мекарданд, манзилашон ба коми оташ рафтааст. Перис Ҳилтон, ситораи барномаҳои телевизионӣ, изҳор дошта, ки аз даст додани хонаи худ дар Малибу таҷрибаи хеле сахт буд. Ӯ гуфт, ки хонаи худро дар пахши зиндаи телевизионӣ ки дар оташ месӯхт, дидааст.

Шрайвер, ҳамсари пешини ситораи кино Арнолд Шварценеггер дар бораи ба коми оташ рафтани манзилаш гуфт: “Ҳама чизро аз даст додем. Маҳал ва тарабхонаҳои мо ҳама нобуд шуд.”

Ӯ афзуд: “Оташнишонҳо тамоми кӯшишҳояшонро ба харҷ доданд, вале оташ чунон паҳн шуд, ки ғайри қобили назорат гардид.”

Хонаҳои ситораҳои машҳури Амрико, ки ба коми оташ рафтаанд, дар маҳаллаи сарватмандони Пасифик Палисейдс ҷойгир буд, ки ба ҳисоби миёна ҳар як хона 4,5 миллион доллар арзиш доштааст.

Камбуди барқ дар Тоҷикистон сахттар мешавад

Аз ҷониби
AZDA.TV
-
0

Ба иттилоъи сокинон, рӯзҳои аввали соли ҷорӣ хеле аз минтақаҳои кишвар бо камбуди шадиди барқ мувоҷеҳ шудаанд.

Аҳолӣ аз тӯлонитар шудани қатъи барқ нисбат ба ҳафтаҳои гузашта хабар медиҳанд. Гуфта мешавад, ҳатто дар баъзе деҳаҳо чанд рӯз пайҳам барқро қатъ кардаанд. Аз ҷумла, соукинони деҳаи Уртабузи шаҳр Ҳисор гуфтаанд, ки чанд рӯз пай дар пай барқ надоштаанд. Ва низ сокинони бархе деҳаҳои шаҳри Ваҳдат гуфтаанд ин зимистон  ҳатто то 3 рӯз ҳам барқ надоштаанд.

Як моҳ пеш, яъне дар моҳи декабр Вазорати энергетика ва захираҳои оби кишвар барномаи барқрасониеро ба минтақаҳо эълом карда буд, ки тибқи он ба деҳоти кишвар бояд аз тарафи субҳ аз соати 05:00 то 08:00 ва бегоҳ аз соати 04:00 то 11:00 барқ дод мешуд. Аммо сокинон аз қатъи пай дар пайи барқ дар аввалҳои имсол ва иҷро нашудани ин барнома хабар медиҳанд.

Дар пайи бебарқии зиёд дар ноҳияву деҳоти кишвар шаҳрвандон аз гарон шудани нархи ҳезум ва ангишт шикоят мекунанд.

Хеле аз мардум мепурсанд, ки оё чорае вуҷуд дорад? Ва аз масъулон мехоҳанд, ба ин масъалаҳо расидагӣ кунанд. “Чаро мо дар асри 21, бе барқ зиндагӣ дорем?”-, пурсидааст як шаҳрванд.

Масъулони барқи кишвар ин камбудиҳоро ба шароити обу ҳаво марбут медонанд ва мегӯянд, дар фасли сармо сатҳи оби захирашуда дар нерӯгоҳҳои барқӣ поён рафта, тавлиди барқ ҳам кам мешавад.

Аммо ба гуфтаи мунтақидон, ин дар ҳолест, ки дар ҳама фаслҳои сол мақомоти кишвар миқдори фурӯши барқ ба хориҷ аз кишварро кам намекунанд ва мувофиқи қарордодҳо барқро ба ҳамсоякишварҳо мерасонанд.

Камуди барқ яке аз мушкилоти умдаи Тоҷикистон ба ҳисоб рафта, 30 сол аст ҳанӯз бо ин мушкилӣ мувоҷеҳ аст ва сол ба сол таъмини барқро ба сокинон маҳдуд мекунад, вале иқдоми ҷиддие барои бартараф кардани ин мушкилӣ сурат намегирад.

Бо ин ҳол Агентии омори назди Призденти Ҷумҳурии Тоҷикистон гузориш додааст, ки дар давоми даҳ моҳи соли гузашта, содироти барқ аз Тоҷикистон бештар аз 102.4 миллион доллари Амрикоӣ ба кишвар суд овардааст.

Ҳамчунин раиси ширкати “Барқи тоҷик” феврали соли 2024 ба хабарнигорон гуфта буд, ки фурӯши нерӯи барқ ба Афғонистонро барои соли 2024 ҳудуди 20% зиёд кардааст. 

Идомаи тағйироту ҷойивазкунии мақомдорон дар Тоҷикистон

Аз ҷониби
AZDA-TV
-
0

Эмомалӣ Раҳмон, раисҷумҳури худкомаи Тоҷикистон бо мақомдороне, ки ба вазифаҳои роҳбарӣ дар Додситонии кул, Вазорати мудофиа, Гвардияи миллӣ ва Кумитаи ҳолатҳои фавқулода таъйин гардиданд, мулоқот кардааст.

Бино ба иттилои сомонаҳои ҳукуматӣ, дар тағйироту ҷойивазкунии навбатӣ сардорони раёсатҳои Додситонии кул, додситонҳои шаҳрҳои Хоруғ, Конибодом, Турсунзода, Рашт, Фархор, Носири Хусрав ва Балҷувон, инчунин додситонҳои ҳарбии гарнизонҳои Бохтар ва Суғд нав шудаанд.

Ҳамзамон дар Вазорати мудофиа ва Гвардияи миллӣ низ тағйироти кадрӣ дар зинаҳои поёнии он сурат гирифтааст.

Раҳмонов дар мулоқот бо “кадрҳои нав”-аш аз муҳим будани касбият, масъулиятшиносӣ ва омодагӣ ба иҷрои вазифаҳои хидматӣ гуфта, аз онҳо хостааст, ки мубориза бар зидди коррупсия ва муносибатҳои ғайриоинномавиро дар мадди аввал гузошта, фазои солими хидмати ҳарбиро фароҳам созанд.

Раисҷумҳури худкомаи кишвар ҳамеша зимни суханрониҳояш ё ҷойивазкунии мақомдоронаш аз таъмини фазои солими хидмати ҳарбӣ ва мубориза бо коррупсия мегӯяд, аммо коррупсия дар кишвар реша давонда, Тоҷикистон дар 20-гонаи фасодзадатарин кишварҳои ҷаҳон қарор дорад. Инчунин дар қувваҳои низомии кишвар фазои солими хидмати ҳарбӣ вуҷуд надошта, аз сабаби бадрафтори нисбати сарбозон ҷавонон аз хидмат дар артиш фирор мекунанд.

Тибқи маъмул дар Тоҷикистон ҳамасола тағйироти кадрӣ сурат мегирад ва аз аввали соли ҷорӣ раисони баъзе шаҳру ноҳияву кумитаҳо иваз карда шуданд.

Аксари коршиносон ин тағйиротро шаклӣ ва ҷойивазкунӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисосу донишу маҳоратро меъёр қарор намедиҳад, балки меъёр дар интихоби кадрҳо бештар маҳал ва шинос будану наздик будан ба хонавода аст.

Ҳукмҳои сангин ба Усмонзода ва ҳамроҳонаш

Аз ҷониби
Azda TV 3
-
0

Додситонии кулли Тоҷикистон аз Додгоҳи олӣ барои чеҳраҳои маъруфи сиёсӣ ва кормандони пешини давлатӣ, ки бо гумони “ғасби қудрат” боздошт шудаанд, муҳлатҳои сангини зиндонро талаб кардааст.

Мақомот расман дар ин бора чизе намегӯянд, аммо манобеи “Радиои Озодӣ” хабар додаанд, ки Додситонии кул барои мансабдорони шинохта ҷазоҳои сахт, аз ҷумла барои Саидҷаъфар Усмонзода собиқ вакили порлумон ва раиси пешини Ҳизби демократ ва Ҳамроҳхон Зарифӣ, собиқ вазири корҳои хориҷӣ 30 солии зиндонро талаб кардааст.

Додситонӣ барои боздоштшудаҳои дигар дар парвандаи маъруф бар “табадуллот”, аз ҷумла барои Шокирҷон Ҳакимов, ҳуқуқдони шинохта ва муовини раиси Ҳизби сотсиал-демократ – 24 сол, Акбаршоҳ Искандаров, раиси собиқи Шӯрои олӣ – 23 сол, Абдулфайз Атоӣ, собиқ корманди Вазорати корҳои хориҷӣ – 23 сол, – Аҳмадшоҳ Комилзода, муовини собиқи раиси Ҳизби демократ – 23 сол, – Нурамин Ғанизода, сарҳанги бознишастаи КДАМ ва ёвари Ҳамроҳхон Зарифӣ – 26 сол ва барои Ҷамшед Боев, сарҳанги бознишастаи КДАМ – 26 сол зиндон талаб карааст.

То ҳол назари наздикон ва вакилони боздоштшудаҳо ва худи онҳо дар ин бора маълум нест.

Инчунин маълум нест, ки Додситонӣ барои Рухшона Ҳакимова, рӯзноманигор ва бародарзодаи Шокирҷон Ҳакимов, ки бо ҷурми “хиёнат ба давлат” муттаҳам мешавад, чанд соли зиндон талаб кардааст.

Додситонӣ Рухшона Ҳакимоваро ба он муттаҳам карда буд, ки дар мавриди нуфузи Чин дар Тоҷикистон як пурсиш гузаронда, баъзе аз чеҳраҳои боздоштшуда, аз ҷумла Саидҷафар Усмонзода ва Шокирҷон Ҳакимов дар он назар додаанд.

Гуфта мешавад, таҳқиқи парвандаи Рухшона низ ҳамроҳи парвандаи чеҳраҳои шинохтаи кишвар идома дошт. Аммо худи ӯ ба хотири фарзанди 5-моҳа доштан ва ба шарти берун нарафтан аз маҳалли иқомат дар озодӣ аст. Вале мақомот шиноснома ва дигар асноди ӯро гирифта буданд.

Ёдовар мешавем, ки боздошти ин чеҳраҳои шинохта пас аз боздошти Саидҷаъфар Усмонзода, раиси собиқи ҲДТ ва вакили собиқи парлумон, ки мақомот ӯро рӯзи 12-уми июни соли 2024 бо иттиҳоми “ғасби ҳокимият” дастгир карда буд, оғоз ёфт. Додситони кулли кишвар Юсуф Раҳмон ҳангоми дархости бекор кардани дахлнопазирии вакилии ӯ дар парлумон гуфта буд, ки парвандаи ҷиноятӣ бо иттиҳоми “ғасби ҳокимият” ба зидди Саидҷаъфар Усмонзода ва чанд нафари дигар ҳам кушода шудааст. 

Ин чеҳраҳои боздоштшуда бо моддаҳои 189 (барангехтани кинаю адовати милливу мазҳабӣ), 306 (талош барои ғасби қудрат), 247 (қаллобӣ) ва 305 (хиёнат ба давлат)-и Кодекси ҷиноятӣ муттаҳам мешаванд.

Худи гумонбарон дар мурофиаҳои гузашти итиҳомоти мақомотро рад карда гуфта буданд, ки зери фишори сахти муфаттишон қарор гирифтаанд.

Ихроҷи беш аз 80 ҳазор муҳоҷир аз Русия

Аз ҷониби
AZDA-TV
-
0

Дар соли 2024 бо қарори додгоҳҳои Русия беш аз 80 ҳазор муҳоҷир барои вайрон кардани қонунгузории муҳоҷират аз хоки Русия ихроҷ шуданд.

Бино ба иттилои расонаҳои русӣ, аз ин шумори ихроҷшудаҳо беш аз 23 ҳазор нафарашон ба Москав ва вилояти Москав рост меояд, ки аксари онҳо зодагони Тоҷикистон, Қирғизистон ва Узбекистон мебошанд.

Ин дар ҳолест, ки дар соли 2023 аз Русия 44,2 ҳазор ва дар соли 2022 – 26,6 ҳазор муҳоҷир ихроҷ шуда буданд.

Мақомоти Русия иддао доранд, ки сабаби асосии ихроҷи ин афрод вайрон кардани қоидаҳои вуруд ё будубош дар кишвар мебошад ва муҳоҷирони рондашуда то панҷ сол ҳаққи баргаштан ба Русияро надоранд.

Аммо дар соли 2024 хабарҳое нашр шуда буданд, ки муҳоҷирон бе сабаб ва бо доштани ҳамма ҳуҷҷатҳои лозима низ аз Русия ихроҷ шудаанд ва баъзе афрод якумра ҳаққи вуруд ба хоки ин кишварро дигар надоранд.

Назорат болои муҳоҷирин ва ихроҷи онҳо дар Русия баъд аз ҳодисаи хунин “Крокус Сити Холл”, ки гумонбарони он шаҳрвандони Тоҷикистон мебошанд, шиддат гирифт. Пас аз ин ҳодиса чораҳои назоратӣ сахттар шуда, маҳдудиятҳои нав дар бораи фаъолияти меҳнатии муҳоҷирон дар аксар минтақаҳои Русия ҷорӣ карда шуданд.

Инчунин аз 5-уми феврали соли 2025 қонуни наве мавриди амал қарор мегирад, ки ба Вазорати корҳои дохилӣ иҷозат медиҳад муҳоҷиронро бе қарори додгоҳ аз кишвар хориҷ кунад. Дар ин ҳолат интизор меравад, шумори муҳоҷирони рондашуда аз ин кишвар бештар хоҳад шуд.

Мулоқоти Расулзода бо ҳамтоёни қирғизу узбекаш дар бораи марз

Аз ҷониби
AZDA-TV
-
0
CREATOR: gd-jpeg v1.0 (using IJG JPEG v80), quality = 90

Сарвазирони Узбекистон, Қирғизистон ва Тоҷикистон дар бораи марзҳои давлатӣ ва рушди ҳамкориҳо гуфтгӯ карданд.

Мулоқоти сарвазири Тоҷикистон Қоҳир Расулзода, сарвазири Қирғизистон Одилбек Қосималиев ва сарвазири Узбекистон Абдулло Орипов 8-уми январи соли ҷорӣ дар нуқтаи пайвасти марзҳои се кишвар, ҷое, ки вилояти Ботканд, вилояти Фарғона ва вилояти Суғдро бо ҳам мепайванданд, сурат гирифт.

Дар ин мулоқот ҷонибҳо аз анҷоми таъйин ва аломатгузории марзи давлатии Қирғизистон ва Узбекистон, ки ҳанӯз авоили соли 2023 пурра ба охир расида буд, гуфтанд.

Ҳамчунин сарвазирон аз муайян гардидани хати сарҳадои Тоҷикистону Қирғизистон, ки солҳо боз аломатгузории он идома дошт, ёдовар шудаанд.

Сарвазирони се кишвар ба зарурати рушди ҳамкорӣ дар соҳаҳои тиҷорат, логистика, ҳамкориҳои обию энергетикӣ ва робитаҳои фарҳангиву гуманитарӣ низ таъкид кардаанд.

Ёдовар мешавем, ки 4-уми декабри соли 2024 дар шаҳри Бодканди Қирғизистон нишасти Комиссияи байниҳукуматии Қирғизистону Тоҷикистон дар мавриди таъйин ва аломатгузории марзи давлатии ду кишвар баргузор гардид.

Пас аз нишаст раисони Кумитаи давлатии амнияти миллии ин ду кишвар Саймумин Ятимов ва Қамчибек Тошиев ба расонаҳо гуфтаанд, ки мушкили марзии байни ду кишвар ба пуррагӣ ҳал шуд ва он дар шакли созишномаи байнидавлатӣ барои имзо ба президентҳои ду кишвар пешниҳод мегардад.

Аммо Ятимов ва Тошиев дар бораи он ки кадом қаламравҳо дар нуқтаҳои номуайян ба кадом кишвар мегузарад, чизе нагуфта буданд.

Танҳо Қамчибек Тошиев зимни суханронияш дар “Жогорку Кенеш” гуфта буд, ки дар бораи натиҷаҳои таъйин ва аломатгузории марзҳои давлатӣ дар миёна ё охири моҳи январи соли 2025 ҳисобот медиҳад. Вале маълум нест, ки Саймумин Ятимов кай ҳисоботи худро ба парлумони Тоҷикистон ва мардум пешниҳод мекунад.

Дертар рӯзи 13-уми декабр Президенти Қирғизистон Содир Ҷабборов ба фарқ аз раисҷумҳури худкомаи Тоҷикистон Эмомалӣ Раҳмон баъзе аз ҷузъиёти созишномаи марзии ду кишварро ошкор кард.

Ӯ ба расонаҳо гуфта буд, ки бо дар назар гирифтани манфиатҳои ду кишвар дар баъзе ҳолатҳо табодули баробари заминҳо, яъне 50/50 сурат гирифтааст ва ҳуҷҷатгузорӣ дар марҳилаи ниҳоӣ қарор дорад. Аммо Содир Ҷабборов аз ягон нуқтаи марзие ном нагирифт, ки ҷои ҳадсу гумонҳоро дар бораи баробар тақсим шудани нуқтаҳо боз мегузорад.

Гуфта мешавад, Тоҷикистону Қирғизистон бо ҳам беш аз 980 километр марзи муштарак доранд ва дар баъзе аз нуқтаҳои баҳсбарангез солҳои ахир даргириҳои мусаллаҳона ва куштори шаҳрвандони ду кишвар сурат гирифта буд.

Охирин муноқишаи бузург дар марзи Тоҷикистону Қирғизистон 16-уми сентябри соли 2022 рух дод, ки тибқи иттилои мақомоти кишвар беш аз 250 кас аз шаҳрвандони Тоҷикистон кушта ва захмӣ шуда буданд.

Ҳушдори КҲФ ба ронандагон ва сокинони кишвар!

Аз ҷониби
AZDA.TV
-
0

Рӯзи гузашта, 7-уми январи соли 2025, Кумитаи ҳолатҳои фавқулодда бо нашри матлабе гуфт, бо сабаби гармтар шудани ҳаво эҳтимоли лағзиши тарма, резиши санг ва рег дар роҳҳои кӯҳӣю наздикӯҳӣ вуҷуд дорад.

Ба гуфтаи манбаъ, аз сифр боло шудани ҳарорати ҳаво ва боридани барфу борон метавонанд боиси лағзиши тарма, резиши сангу рег шавад ва субҳгоҳон интизори туманро низ бояд дошт. 

Агентии обуҳавошиносии Тоҷикистон мегӯяд, то охири ин ҳафта ҳаво дар кишвар нисбатан гарм боқӣ мемонад.

Кумита барои пешгирӣ аз садамаҳо, ронандагонро огоҳ мекунад, ки то қадри имкон эҳтиёткор бошанд, қоидаҳои роҳро риоят кунанд ва бо суръати муқарраршуда ҳаракат кардаву фосилаи байни мошинҳоро нигоҳ  доранд.

КҲФ ҳушдор медиҳад, ки мошинҳо пеш аз ҳаракат санҷида шуда, ва чархҳои зимистона бояд гузошта шаванд. 

Ҳамчунин ин ниҳод ба сокинони минтақаҳои кӯҳию наздикӯҳӣ тавсия дода, ки дар ингуна рӯзҳо, ҳангоми чорводорӣ, шикору ҳезум ҷамъоварӣ ва дигар фаъолиятҳои беруна эҳтиёткор бошанд.

Тоҷикистон, ки кишвари кӯҳӣ аст, аксар вақт дар фасли зимистон ва аввали баҳор бузургроҳҳои кӯҳии он бо сабаби лағзиши тарма, резиши санг ва дигар офатҳои табиӣ хароб ва барои чанд рӯз масдуд мешаванд.  

Яке аз роҳҳои кӯҳии кишвар ин роҳи Душанбе – Чаноқ мебошад, ки вилояти Суғдро бо пойтахт мепайвандад. Зиёда аз даҳ сол мешавад ин роҳ пулакӣ аст ва масъулияти нигоҳу бини онро ширкати “IRS”-и марбут ба наздикони Эмомалӣ Раҳмон ба дӯш дорад. Аммо бо вуҷуди пулакӣ будан ҳаммасола ин роҳ дар фаслҳои сармо гоҳ-гоҳе масдуд мешавад, ки ронандагон ва сокинони кишвар масъулини “IRS”-ро дар камкорӣ айбдор мекунанд.

Паҳн шудани вируси HMPV дар Чин. Оё вируси ҳамагире дар роҳ аст?

Аз ҷониби
Azda TV 3
-
0

Бар асоси гузориши расонаҳо, афзоиши вируси HMPV (метапневмовируси инсонӣ) дар Чин боиси нигаронӣ ва эҳтимоли ҳамагирии як вируси нави монанд ба COVID-19 шудааст.

Мақомоти беҳдошти Чин ҳанӯз таъид накардаанд, ки вируси HMPV дар ин кишвар афзоиш ёфтааст ё не. Аммо Кан Бяо, раиси бахши бемориҳои сироятии Марказҳои назорат ва пешгирии бемориҳо дар Чин, дар нишасти матбуотие таъид карда, ки ҳолатҳои сироят ёфтан аз ин вирус дар байни афроди зери 14 сол ва бузургсолон ва касоне, ки системи эмини заиф доранд, дар шимоли ин кишвар афзоиш ёфтааст.

Ӯ дар идома гуфта, ки эҳтимол дар фасли зимистон ва баҳор кишвар бо бемориҳои мухталифи сироятии роҳҳои нафас мувоҷеҳ шавад.

Нишонаҳои ин беморӣ сурфа, таб, гулудард, маҳкам шудани бинӣ ё обрави бинӣ ва тангии нафас аст. Вай метавонад барои баъзеҳо хело сахт бошад.

Аммо коршиносон мегӯянд, ин вирус нав набуда, ҳанӯз соли 2001 кашф шудааст.

Ба далели афзоиши ин беморӣ дар Чин ва пахши аксҳову наврҳои зиёд аз пӯшидани ниқоби тиббӣ ва ҳузури афрод дар бемористонҳо дар фазои маҷозӣ, корбарон ин вирусро ба вируси COVID-19 ташбеҳ кардаанд.”

123...634саҳифаи 2 аз 634

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
mist
-0.9 ° C
-0.9 °
-0.9 °
86 %
1kmh
75 %
Wed
10 °
Thu
9 °
Fri
11 °
Sat
9 °
Sun
5 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст