Алишер Бобоҷонзода, муовини раиси шаҳри Кӯлоб дар умури сохтмон ва замин боздошт шудааст.
Бобоҷонзодаро мақомоти интизомӣ 23-уми феврал бо иттиҳоми “сохтакорӣ” ва “тақсими нодурусти замин” дастгир кардаанд. Вале, мақомот то ҳол расман дар бораи боздошти ҳамакнун собиқ муовини раиси шаҳри Кӯлоб чизе нагуфтаанд.
Аммо Радиои Озодӣ дар истинод ба манобеаш навиштааст, ки “Бобоҷонзода дар пайи тафтиши фаъолияти Бахтиёр Назарзода, раиси собиқи шаҳри Кӯлоб боздошт шудааст.”
Назари худи Алишер Бобоҷонзода ва наздикону вакили дифоаш дар ин бора дастрас нест.
Гуфта мешавад, Бахтиёр Назарзода 7-уми январи соли ҷорӣ бо фармони раисҷумҳур Эмомалӣ Раҳмон аз мансаб барканор шуда, ба ҷойи ӯ, Диловар Пирзода раиси шаҳр таъйин гашт. Аммо бо вуҷуди надоштани мансаб мақоми худро ҳамчун узви Маҷлиси миллӣ ҳифз кардааст ва дар ҷаласаҳои он ширкат мекунад.
Барканории ӯ дар ҳоле сурат гирифт, ки Ҳамзаалӣ Музофиров, додситони минтақаи Кӯлоб, дар нишасти матбуотии соли гузашта гуфта буд, ки 43 қарори раиси Кӯлобро дар мавриди додани замин бекор карданд.
Алишер Бобоҷонзода ягона мансабдоре нест, ки дар Тоҷикистон бо иттиҳоми “сохтакорӣ” ва “тақсими нодурусти замин” боздошт мешавад. Ҳар сол даҳҳо мақомдор дар кишвар бо иттиҳоми ғайриқонунии хариду фурӯши замин боздошт мешавад, вале боз ҳам ин раванд идома дорад.
Ба гуфтаи коршиносон, заминфурӯшону аснод тартиб медодагиҳо бо гирифтани пора ва ё хешутаборбозӣ заминҳои зиёдеро дар ихтиёри дигарон мегузоранд, вале сокинони ниёзманд дарбадари мақомот барои як тикаи замин мегарданду солҳо навбат мепоянд боз ҳам чизе ҳосилашон намешавад.
Таҳлилгарон мегӯянд, фасод ва ришвар дар тамоми соҳаҳои кишвар чунон афзоиш ёфтааст, ки пеши ин ҷиноятҳоро гирифтан маҳол аст. Зеро, ба гуфтаи онҳо, ҳармансабдор худ бо додани ришва ба сари мансаб расидааст, яъне мансабро бо додани пул харидааст ва ӯ низ ин корро анҷом хоҳад дод. Пас ба ҳамин тариқ решаи ин кор рафта ба нафарони асосии кишвар мерасад, ки маҳви он аз имкон дур аст.
