Ҷустуҷӯ кунед
Ҷустуҷӯ
19.9 C
Dushanbe
Хона блог саҳифа 3

То 600 сомонӣ ҷарима барои идгардаки кӯдакон дар Тоҷикистон

Аз ҷониби
AZDA.TV
-
0

Вазорати маориф ва илми Ҷумҳурии Тоҷикистон бо судури қароре идгардакро дар рӯзи иди Рамазон барои кӯдакони боғча то донишомӯзони мактабу донишҷӯён мамнуъ эълон кад.

Ин ниҳод бо ирсоли дархосте ба боғчаву мактаб ва ҳатто донишгоҳҳо аз омӯзгорон ва падару модарон талаб кардааст, ки рӯзи иди Рамазон пеши роҳи идгардаки фарзандон ва донишомӯзонро бигиранд.

Бархе расонаҳои дохилӣ аз манобеи худ дар Вазорати маорифи кишвар хабар доданд, ки дар ҳақиқат чунин дастуре аз вазорат содир шудааст, ки тарбиятгирандагони боғчаву хонандагони мактаб ва донишҷӯён дар ин рӯз ид накунанд.

Масъулони Вазорати маориф ва илми кишвар гуфтаанд, ҳатто барои риоя накардани ин дастур волидайн ва ё худи донишҷӯён ҷавобгарӣ пешбинӣ шудааст.

Дар пайи нашри ин дастур чанде аз корбарон дар шабакаҳои иҷтимоӣ навиштаанд, ки масъулони мактабу донишгоҳҳо аз худи хонандагон забонхат гирифтаанд, ки рӯзи ид идгардак намекунанд ва ё волидайн пеши роҳи идгардаки фарзандонашонро бигиранд, дар акси ҳол то 600 сомонӣ ҷарима хоҳанд шуд.

Гуфта мешавад, Вазорати маорифи кишвар дар баробари волидайн омӯзгорони мактабҳоро низ муваззаф кардаанд, ки шогирдонашонро назорат кунанд ва нагузоранд онҳо ба хонаҳои якдигар ба идгардак бираванд.

Далели судури ин фармони Вазорати маориф маълум нест, аммо ба гуфтаи масъулин, он дар чорчӯби Қонуни танзими анъана ва ҷашну маросимҳо гирифта шудааст. Ин дар ҳолест, ки ба гуфтаи огаҳон, қонуни мазкур идгардакро мамнуъ накардааст, балки масрафҳои зиёди миёншиканро дар ҷашну маросимҳо мамнуъ кардааст.

Ба гуфтаи коршиносон, чунин фармону дастуроти Вазорати маориф ҳадафмандона ва барои барҳам додани урфу одатҳои динӣ ва миллӣ аст. Ба гуфтаи онҳо, қаблан ҳам Вазорати маориф бо судури чунин қарорҳое ҳиҷоби духтарони донишомӯзу донишҷӯён ва риш гузоштани ҷавононро мамнуъ эълон карда буд, ки баъдан он ба таври ғайрирасмӣ ҳукми қонуниро гирифт ва мақомоти қудратӣ ҳатто дар кӯчаву хиёбонҳои шаҳр риши ҷавононро тарошиданду сатри занонро мегирифтанд ва барои ин кор, бовуҷуди он ки қонунӣ набуд, вале ҳеч ниҳоди масъул ва танзимкунандаи қонуни кишвар пеши роҳи чунин рафторҳои мақомотро намегирифт.

Боздошти Сулаймон Давлатов дар Литва

Аз ҷониби
AZDA.TV
-
0

Мақомоти кишвари Литва Сулаймон Давлатов, паноҳанда ва муҳоҷири сиёсии тоҷик дар ин кишварро боздошт кардааст.

Тибқи маълуомоте, ки ба дасти Azda tv расид, Сулаймон Давлатов як фаъоли сиёсии тоҷики муқими Литваро рӯзи ҷумъа 5-уми апрели соли ҷорӣ дар маҳали кораш боздошт карданд. Сулаймон Давлатов ҳамроҳи зану фарзандонаш дар шаҳри Вилнюси Литва зиндагӣ дорад ва ӯ ҳамроҳи фарзандонаш дорои паноҳандагии сиёсӣ мебошад.

Шоҳидони ҳодисаи боздошти Давлатов дар суҳбат ба Azda tv гуфтанд, ки “рӯзи ҷумъа соатҳои дуи баъд аз зуҳр ду нафар бо либоси мулкӣ аз мошини минивен берун омада, бо Сулаймон даст додаанд ва ба самти минивен рафтанд, дарҳол ду нафар бо ниқоб аз мошин берун шуда, ӯро ба дохили мошин маҷбуран савор карда бурданд.

Баъд аз боздошти машкуки Сулаймон Давлатов ҳамсараш ба пулиси маҳали кори шаврҳараш меравад, ва пулис мегӯяд, дар системаи онҳо ҳеҷ маълумоте дар бораи боздошти Сулаймон Давлатов вуҷуд надорад ва танҳо соати 10 шаб, баъд аз 8 соати бедарак шудан пулис хабар медиҳад, ки ӯ дар боздошт қарор дорад.

Рӯзи якшанбе, 7-уми апрел додгоҳе дар шаҳри Вилнюси Литва баргузор шуд ва ҳукми ҳабси пешакӣ барои Давлатов содир кард ва тибқи ҳукми додгоҳ ба муддати 2 моҳ, то 6 июн дар боздошт қарор хоҳад дошт.

Ҷузъиёти боздошти ӯ ҳанӯз барои Azda tv маълум нест ва бо дастрас шудани малумоти бештар шуморо огоҳ хоҳем кард.

Туркия бо Тоҷикистон низоми бераводидро бекор кард

Аз ҷониби
AZDA.TV
-
0

Кишвари Туркия низоми бераводид бо шаҳрвандони Тоҷикистонро аз рӯзи 5-уми апрели соли ҷорӣ бекор кард.

Бино ба иттилои расонаҳои давлатии Туркия, бар асоси фармони раисиҷумҳури ин кишвар Раҷаб Тайиб Эрдуғон, имтиёзи раводид барои дорандагони шиносномаҳои оддии Тоҷикистон барои сафар ба Туркия лағв шудааст.

Гуфта мешавад, ин қарор бар асоси моддаи 18 Қонуни хориҷиён ва муҳофизати байналмилалӣ зери рақами №6458 қабул шудааст.

То ин дам шаҳрвандони Тоҷикистон метавонистанд ба кишвари Туркия бидуни гирифтани раводид (виза) сафар кунанд ва то 90 рӯз ҳаққи будубош дар ин кишварро доштанд.

Худи ин хабар субҳи рӯзи 6-уми апрел дар расонаҳои расмии Туркия нашр шудааст.

Дар ҳамин ҳол сафорати Туркия дар Тоҷикистон низ бо нашри тавзеҳоте дар саҳфаи фейсбукии худ хабари ҷорӣ шудани раводид барои шаҳрвандони Тоҷикистонро тасдиқ карда, гуфтааст, ки “Интизор меравад, ки низоми бо раводид муваққатӣ бошад”.

Инчунин сафорат гуфтааст, ки низоми бо раводид аз рӯзи 20-уми апрели соли 2024 оғоз гардида, то он замон шаҳрвандони Тоҷикистон метавонанд бидуни раводид ба Туркия сафар кунанд. Аммо дар ҳамин шабу рӯзҳо дар шабакаҳои иҷтимоӣ наворҳое нашр шудаанд, ки шаҳрвандони Тоҷикистон аз муаллақ мондан дар фурудгоҳҳои Истанбул шикоят доранд. Ба гуфтаи онҳо, чун визо надоранд, мақомоти Туркия намегузоранд вориди хоки ин кишвар шаванд.

Бо вуҷуди он ки сафаорати Туркия дар изҳороташ гуфт, қарори лағви низоми бераводид байни Туркия ва Тоҷикистон аз 20-уми апрел оғоз мешавад, вале ба гуфтаи шоҳидон, аз рӯзи судури ин фармон аз 6-уми апрел аллакай амалӣ шудааст.

Пирӯзии чаҳор паноҳҷӯи тоҷик дар парвандаи Додгоҳи Аврупо

Аз ҷониби
AZDA.TV
-
0

Додгоҳи ҳуқуқи башари Аврупо кишвари Лаҳистонро барои паноҳ надодани чор шаҳрванди Тоҷикистон ба хоки худаш ҷарима кард.

Ин додгоҳ эълом кард, ки Лаҳистон паноҳҷӯёни тоҷикеро, ки дар кишварашон таҳти таъқиб буданд, ба Украина фиристод ва Украина метавонист онҳоро ба Тоҷикситон ихроҷ кунад. Додгоҳ мегӯяд, Лаҳистон бо сарпечӣ аз қабули паноҳандагони тоҷикистонӣ муқаррароти Конвенсияи Аврупо марбут ба ҳуқуқи башарро нақз кардааст.

Гуфта мешавад, ин чаҳор паноҳҷӯи тоҷикистонӣ баъд аз рад шудани дархости паноҳангияшон дар солҳои 2016 ва 2017 ба Додгоҳи аврупоии ҳуқуқи башар дар Страсбург шикоят мекунанд. Онҳо аз моҳи декабр то феврал чаҳор маротиба кӯшиши убури марзи Лаҳистону Украинаро карда буданд, вале Лаҳистон онҳоро рад кардааст.

Ин афрод иддао кардаанд, ки дар Тоҷикистон зери фишору таъқиб қарор доранд ва дар гузаргоҳҳои марзии Лащистон дархости паноҳандагӣ кардаанд. Аммо Нерӯҳои марзбонии Лаҳистон ин дархосташонро қабул накарданд ва онҳоро ба Украина бозпас фиристоданд.

Шаҳрвандони Тоҷикистон Лаҳистонро муттаҳам карданд, ки онҳо дастрасӣ ба расмиёти дархости паноҳандагӣ надоранд ва мақомоти лаҳистонӣ онҳоро дар ҳоле ба Украина баргардонданд, ки дар он ҷо низ худро дар амн эҳсос накарданд, зеро хатари ихроҷ ба Тоҷикистон онҳоро таҳдид мекарад.

Ин чаҳор шаҳрванди Тоҷикистон дар парвандаи инчунин изхор доштанд, ки Лаҳистон қоидахои Конвенсия дар бораи манъ кардани ихроҷи дастаҷамъии хориҷиёнро вайрон кардааст ва таъкид кардаанд, ки ба онҳо фурсати шикоят кардан аз болои қарорҳои Нерӯҳи марзбонии ҷиҳати рад кардани иҷозати ворид шудан ба Лаҳистонро надоранд, зеро онҳо фавран иҷро карда шуданд.

Яке аз ин паноҳҷӯёни тоҷик Лаҳистонро боз ба як иттиҳоми дигар мувофиқ ба банди 8-и Конвенсия “Дар бораи ҳуқуқ ва эҳтиром ба ҳаёти шахсӣ ва оилавӣ” муттаҳам кардааст. Ин паноҳҷӯи тоҷик изҳор дошта, ки Нерӯҳои марзбонии Лаҳистон ба ӯ иҷозат надоданд, ки бо зан ва фарзандонаш, ки дар Лаҳистон қарор доштанд, бипайвандад.

Додгоҳи аврупоии ҳуқуқи башар дар Страсбург қарор қабқл кардааст, ки ба ҳар яке аз паноҳҷӯёни тоҷик ба маблағи 13.000 евроӣ ҷуброни зарар пардохт кунад. Гуфта мешавад, ин паноҳҷӯён аллакай дар кишварҳои Лаҳистон ва Утриш паноҳанда шудаанд.

Баррасии масоили амниятии Тоҷикистону Чин пас аз ҳодисаи Маскав

Аз ҷониби
AZDA.TV
-
0

Вазири амнияти ҷамъиятии Чин Ван Сяохун 5-уми апрели соли ҷорӣ зимни сафари корӣ ба Тоҷикистон бо мақомоти кишвар дидору гуфтугӯ кард.

Ба иттилои Хадамоти матбуоти Президенти Тоҷикистон, узви Шурои давлатӣ, Вазири амнияти ҷамъиятии Ҷумҳурии Мардумии Чин Ван Сяохун дар мулоқот бо Эмомалӣ Раҳмон, президенти Тоҷикистон дар робита ба таҳкими ҳамкориҳои ду кишвар гуфтугӯ кардааст.

Ба иттилои манбаъ, меҳвари гуфтугӯи Раҳмон бо Вазири амнияти ҷамъиятии Чин масъалаҳои “мубориза бо таҳдиду хатарҳои ҷаҳонӣ, аз қабили терроризм, ифротгароӣ, зуҳуроти тундгароӣ, ҷудоихоҳӣ, ҷинояткории муташаккили фаромиллӣ, гардиши ғайриқонунии маводи мухаддир ва кибер-ҷиноятҳо” будааст. 

Дар ин мулоқот Раҳмон “бо назардошти вазъи ноороми байналмилалӣ ва зарурати таъмини сулҳу субот” таъкид бар зарурати ҳамоҳангӣ ва тақвияти ҳамкориҳои сохторҳои дахлдори ду кишвар кардааст.

Мулоқоти вазири амнияти Чин бо Эмомалӣ Раҳмон дар пасманзари ҳодисаҳои ахири Маскав, ки беш аз 140 нафар ҷон бохту даҳҳо нафари дигар маҷруҳ шуд, сурат мегирад. Ва мақомоти Русия шаҳрвандони Тоҷикистонро гумонбарони аслии ин ҳодиса муаррифӣ кардаанд.

Ба назари коршиносон, пас аз ин ҳодисаи хунин аксари кишварҳо ба шаҳрвандони Тоҷикистон бо чашми эҳтиёт назар мекунанд ва эҳтимол меравад Эмомалӣ Раҳмон бо баҳонаи таъмини суботу амният боз ҳам фишорро болои шаҳрвандони диндори худ бештар кунад, дар чунин вазъият мулоқоти мазкур барои Раҳмон аз аҳамияти боло бархурдор хоҳад буд.

Мақомоти Тоҷикистон риштароширо дубора оғоз кардаанд

Аз ҷониби
AZDA.TV
-
0

Мақомоти Тоҷикистон пас аз ҳодисаҳои хунини атрофи Маскав маъракаи риштароширо аз нав дар пойтахти кишвар оғоз кардаанд.

Гуфта мешавад, ин тасмими мақомоти тоҷик дар пайи боздошти ҳудуди 15 нафар бо иттиҳоми қасди ҳамлаҳои террористӣ доштан дар Тоҷикистон, (ки баъдан Кумитаи давлатии амнияти миллӣ инро рад кард) гирифта шудааст. Аммо худи мақомот то ҳанӯз дар бораи риштарошӣ тавзеҳе надодаанд.

Бархе корбарон дар шабакаҳои иҷтимоӣ аз ин рафтори мақомот шикоят карда, навиштаанд, ки дар Душанбе маъракаи риштарошӣ шуруъ шуда, мақомот ҷавононро боздошт карда, бо таҳқирҳои зиёд “ришашонро қоқ” тарошидаанд. Корбарон чунин рафтори мақомотро нисбати шаҳрвнадон ғайриқонунӣ дониста, сабаби ба вуҷуд омадани гурӯҳҳои ифротгаро донистаанд.

Пештар кормандони Вазорати корҳои дохилӣ ва дар ҳамкорӣ бо дигар ниҳодҳои расмӣ тайи солҳои 2013-2016 чунин маъракаҳоеро ба сурати расмӣ анҷом дода буданд. Ҳатто наворҳое ҳам нашр шуда буд, ки пулис дар кӯчаҳо ҷавонони ришдорро дошта, ришашонро метарошиданд.

Он замон ҳар чанд номи ин маъракаҳои худро “фаҳмондадиҳӣ” ё “ба тартиб даровардани риши мардон ва рӯймоли занон” муаррифӣ мекарданд, аммо ҳама медонист, ки ҳадаф аз роҳандозии ин иқдомҳои ғайриқонунӣ мубориза бо риши мардон ва ҳиҷоби занон аст.

Он замон ҳатто худи Эмомалӣ Раҳмон, президенти кишвар борҳо дар суханрониҳояш ҳадаф аз ҷорӣ намудани ин маъракаҳои риштарошиву сатркаширо “мубориза бо зуҳуроти ифротгароӣ ва терроризм” гуфта, аз онҳо пуштибонӣ карда буд.

Аммо, дар баробар таҷриба нишон дод, ки ҷорӣ намудани ин гуна маъракаҳои ғайриқонунӣ аз чанд ҷиҳат, дар сатҳи ҷаҳонӣ ба зарари эътибори Тоҷикистон анҷом шудааст.

Инчунин тибқи оморҳои расмӣ дар Тоҷикистон теъдоди онҳое, ки ба сафи гурӯҳҳои ифротгаро ва ҳаросафкан пайвастаанд, чанд баробар зиёдтар шудааст.

Гуфта мешавад, ҳодисаҳои хунини Маскав, ки то ҳол таҳқиқ ва тафтиши парвандаҳои гумонбарони боздоштшуда ба анҷом нарасидааст, аллакай суолҳои зиёдеро барои дуруст будани иддаоҳои мақомоти Русия дар ин хусус ба бор овардааст.

Даъвати Садриддини Наҷмиддин аз муҳоҷирон ва мансабдорони тоҷик

Аз ҷониби
AZDA-TV
-
0

Садриддини Наҷмиддин, сарояндаи шинохтаи тоҷик аз муҳоҷирони тоҷики муқими Русия даъват карда, ки ба Ватан баргарданд.

Ин сарояндаи хушовози тоҷик, ки чанд сол боз дар кишвари Канада зиндагӣ дорад, 4-уми апрел дар муроҷиате дар саҳфаи фейсбукиаш аз муҳоҷирони тоҷике, ки шаҳрвандии Русияро доранд, хостааст, ки онро бурда ба “туалет” партоянд, чун мақомдорони рус ҳарвақте хостанд онро бекор мекунанд.

Садриддини Наҷмиддин дар ин муроҷиаташ мегӯяд, ки “ҳоло дигар баҳона пайдо карданд, ки шуморо бе пурсу пос рост ба ҷанг равон кунанд. Ҳайфи ҳамон ҷавонмардоне, ки ҳайф шуданд ва шудаистодаанд”.

Инчунин Садриддин аз муҳоҷирони тоҷик пурсидааст, ки то ба кай таънаи ин “мардуми ношукри фашист”-ро тоқат мекунанд ва аз чеҳраҳои шинохта, бахусус блогерон хостааст, муҳоҷиронро ташвиқ кунанд то ба Ватан баргарданд.

Дар идома ин сарояндаи тоҷик дар муроҷиат ба мансабдорони тоҷик мегӯяд, ки ғами мардумро хӯранд, чун он миқдор пуле, ки дар муддати 32 сол дар бонкҳои хориҷа ҷамъ кардаанд ба ҳама мардум мерасад.

“Навбати шумо вазифадорони азиз, ки ғами мардумро хӯред, чун 32 сол шуморо ғам надоданд. Ҳама аз Русияи фашистӣ бо қиммати ҷони худ ба Ватан пул равон мекарданд, акнун намешавад дигар …. Як бор шумо дасти бахайратонро нишон диҳед, охир Тоҷикистон биҳишти рӯи замин аст ҳамачиро шумо 32 сол барои кӣ сохтед? Албатта ман боварӣ дорам, ки барои халқ аст. Шумо вазифадоред, ки дар ин шабу рӯз бо мардум бошед“-мегӯяд Садриддин.

Ин сарояндаи шинохтаи тоҷик дар ҳоле аз муҳоҷирони муқими Русия даъват дорад то ба Ватан баргарданд, ки баъд аз ҳодисаи хунин дар “Крокус Сити Ҳолл”, ки гумонбарони асосии ин ҳамла тоҷикон мебошанд, вазъи муҳоҷирони тоҷик дар ин кишвар хеле бад шудаааст.

Муҳоҷирони тоҷик аз шаҳру ноҳияҳои гуногуни Русия мегӯянд, ки пас аз ин ҳодиса санҷишу боздошт ва ихроҷи иҷбории тоҷикон афзуда, муносибати мардуму корфармоён бо онҳо тағйир ёфтааст, аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифта истодаанд.

Инчунин ба гуфтаи бархе манобеъ, муҳоҷирони тоҷике, ки барои ивази ҳуҷҷатҳояшон, аз ҷумла шаҳодатномаи ронандагӣ ба мақомоти рус муроҷиат мекунанд, дар баробари иваз намудани ҳуҷҷатҳо ба онҳо даъватнома барои иштирок дар ҷанг бо Украинаро медиҳанд.

Лағви шаҳрванди барои саркашӣ аз хидмат дар артиши Русия

Аз ҷониби
AZDA.TV
-
0

Шаҳрвандии як зодаи Тоҷикистонро барои саркашӣ аз хидмат дар артиши Русия бекор ва худашро ихроҷ карданд.

Кумитаи тафтишоти Федератсияи Русия хабар додаст, ки Додгоҳи вилояти Рязан як зодаи Тоҷикистонро ба хотири саркашӣ аз хидмати ҳарбӣ гунаҳкор донист ва паспорти русии ӯро бекор кард.

Гуфта мешавад, ин зодаи Тоҷикистон соли 2022 шаҳрвандии Русияро ба даст оварда буд ва ҳоло шаҳрвандияш лағв ва худаш аз ихроҷ мешавад.

Дар иттилоияи мақомоти ин кишвар, аз ин зодаи Тоҷикистон ном бурда намешавад, танҳо гуфта шуда, ки ӯ мутавлиди соли 2001 аст. Ба иддаои мақомот гӯё ӯ ба даъватномаи Камиссарияти ҳарбӣ барои хидмати иҷборӣ дар Артиш сарпечӣ карда, ба камисариат ҳозир нашудааст.

Ба мабнои гуфтаҳои бархе муҳоҷирон, Русия раванди соҳиб шудани шаҳрвандияшро хусусан барои ҷавонон осон кардааст, аммо пас аз гирфтани шаҳрвнадӣ дар ҳол барои онҳо рафтан ба ҷанг ва ё хидмат дар артиш пешниҳод мешавад, онҳое, ки намепазиранд, шаҳрвандияшон дар ҳол бекор ва худашон ихроҷ мешаванд.

Ихроҷи ду шаҳрванди Тоҷикистон аз Мари Эл

Аз ҷониби
AZDA.TV
-
0

Додгоҳи Йошкар-Ола ду шаҳрванди Тоҷикистонро аз Ҷумҳурии Мари Эли Русия ихроҷ кард.

Ба гуфтаи мақомоти ин ин кишвар, афроди боздоштшуда тавзеҳ додаанд, ки барои кор ба Русия омадаанд, вале дар идораҳои муҳоҷиратӣ сабти ном нашудаанд.

Тибқи қавонини Русия, шаҳрвандони хориҷӣ метавонанд дар ҳудуди ин кишвар на бештар аз 90 рӯз бидуни раводид (виза) ё патент бимонанд.

Гуфта мешавад, ҳангоми тафтиши ҳуҷҷатҳо шаҳрвандони Тоҷикистонро бахотири вайрон кардани қонуни муҳоҷират ва надоштани санадҳои зарурии иқомат боздошт карданд ва додгоҳ ҳар кадомашонро ба маблағи 2000 рубли ҷарима ва аз Русия ихроҷ кард.

Бар мабнои оморҳои расмӣ, дар се моҳи соли 2024, 21 муҳоҷири ғайриқонунӣ аз Арманистон, Тоҷикистон, Туркманистон, Узбакистон ва Нигерия аз Мари Эл ба ихроҷ шудаанд.

Бад аз ҳамлаи терористии “Крокус Сити Холл”, боздошт ва ихроҷи муҳоҷирни тоҷик зиёд шудааст ва созмонҳои ҳомии ҳуқуқи муҳоҷирин изҳори нигарони аз рушди бегонаситези дар Русия доранд.

Боздошти се нафари дигар бо иттиҳоми кумак дар ҳамла ба “Крокус”

Аз ҷониби
AZDA-TV
-
0

Мақомоти Русия се нафари дигарро бо иттиҳоми кумак дар ҳамлаи террористӣ ба “Крокус Сити Ҳолл”-и Красногорск боздошт карданд.

Бино ба иттилои расонаҳои русӣ, ин се нафар, ки якеаш шаҳрванди Русия ва ду нафари дигар шаҳрвандони кишварҳои Осиёи Марказӣ будаанд, дар шаҳрҳои Маскав, Екатеринбург ва Омск аз ҷониби Хадамоти федералии амнияти Русия (ФСБ) боздошт шудаанд.

Ба иддаои ФСБ, аз боздоштшудаҳо ду нафарашон барои хариди силоҳи оташфишон ва мошин барои анҷоми ҳамла ба толори консерт пул интиқол додаанд ва сеюмӣ бевосита дар ҷалби афрод барои кумак ба ин ҳамла ва маблағгузории омилони он ширкат доштааст.

Дар наворе, ки ФСБ нашр кардааст, дида мешавад ки ҳар сеи гумонбарон дар кӯча боздошт шудаанд ва афсарон аз ду нафари онҳо мепурсанд, ки чаро боздошт шуданд, дар ҷавоб мегӯянд, ки “Барои ҳамлаи террористӣ дар Крокус”.

То ҳол ҳувияти боздоштшудаҳо ва ҷузъиёти қазия пурра ошкор нашудааст.

Ёдовар мешавем, ки шоми ҷумъаи 22-уми марти соли ҷорӣ пеш аз оғози консерти гурӯҳи “Пикник” чанд нафар вориди бинои “Крокус Сити Ҳолл”-и шаҳри Красногорски вилояти Маскав шуда, сӯи мардум аз автоматҳо тир кушоданд. Пас аз чанде дар толори консертӣ таркиш рух дод ва он бино оташ гирифт. Бино ба иттилои расмӣ, дар натиҷаи тирпарронӣ ва сар задани оташ 143 нафар, аз ҷумла се кӯдак ба ҳалокат расида, 182 нафари дигар ҷароҳат бардоштаанд.

Пас аз ин ҳодиса худи ҳамон рӯз гурӯҳи террористии ДИИШ бо нашри наворе масъулияти ин ҳамлаи хунинро бар дӯш гирифт. Хадамоти амнияти федералии Русия иддао дорад, ки хадамоти махсуси Украина низ дар ин ҳамла даст дорад, аммо мақомоти Украина онро рад карданд.

Додгоҳи ноҳияи Басманнийи шаҳри Маскав то ҳол дар пайи ин ҳодиса 10 нафарро ба ҳабси пешакӣ маҳкум кардааст, ки 9 нафарашон зодагони Тоҷикистон мебошанд. Аммо шумори боздоштшудаҳо бо иттиҳоми кумак ба ин ҳамла бештар буда, аксари онҳо зодагони Тоҷикистон мебошад.

Муҳоҷирони тоҷик аз шаҳру ноҳияҳои гуногуни Русия мегӯянд, ки пас аз ин ҳодиса санҷишу боздошт ва ихроҷи иҷбории тоҷикон афзуда, муносибати мардуму корфармоён бо онҳо тағйир ёфта, аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифта истодаанд.

1234...573саҳифаи 3 аз 573

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
scattered clouds
20.1 ° C
20.1 °
20.1 °
60 %
2kmh
40 %
Fri
23 °
Sat
19 °
Sun
23 °
Mon
23 °
Tue
26 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст