Хона блог саҳифа 261

Тоҷикистону Қирғизистон масъалаи марзро баррасӣ карданд

Аз ҷониби
AZDA.TV
-
0

Рӯзи 16-уми октябри соли ҷорӣ мулоқоти навбатии Комиссияи байниҳукуматии Тоҷикистону Қирғизистон дар бораи таъйин ва аломатгузории марзи муштараки ду кишвар дар шаҳри Бустони вилояти Суғд баргузор гардид.

Хадамоти матбуоти раиси вилояти Суғд хабар дод, ки дар ин мулоқот ҷониби Тоҷикистонро раиси Кумитаи давлатии амният Саймумин Ятимов ва ҷониби Қирғизистонро раиси Кумитаи давлатии амният Қамчибек Тошиев раҳбарӣ карданд.

Дар хабар гуфта мешавад, ки ҳайтҳои ду ҷониб ҳангоми мулоқот дар бораи раванди “иҷрои мувофиқаи ҷонибҳо вобаста ба тавсифи хати сарҳади давлатии Тоҷикистону Қирғизистон дар минтақаҳои боқимонада изҳори қаноатмандӣ намуданд.“

Ҳамчунин Хадамоти матбуоти раиси вилояти Суғд мегӯяд, барои тезондани кор ва ҳалли мушкилоти боқимондаи марзӣ ба гурӯҳҳои кории топографӣ ва гурӯҳҳои корӣ таъйин ва аломатгузории марзи ду кишвар “дастурҳо” дода шуд.

Низ таъкид мешавад, ки раҳбарони ҳайатҳои корӣ иҷрои ҳатмии “Протоколи №44 аз 2 октябри соли 2023-ро вобаста ба таҳкими раванди делимитатсияи сарҳади давлатии Тоҷикистону Қирғизистон” зарур дониста, “омодагиро барои иҷрои бечунучарои муқарроти он иброз карданд.“

Аммо Хадамоти матбуоти раиси вилояти Суғд дар бораи тафсилоти ин нишаст ва тавофуқоти ҳосилшудаи он чизе нагуфтааст. Мақомоти Тоҷикистон то ҳол боре ҳам аз раванди ин нишастҳо ба расонаҳо ва мардуми кишвар гузориш надодаанд.

Қабл аз ин мулоқот, 2-юми октябри соли ҷорӣ ҷаласаи ҳайатҳои байниҳукуматии ду кишвар дар мавриди таъйин ва аломатгузории марзи давлатии ду кишвар дар шаҳри Бодканди Қирғизистон баргузор шуда буд.

Дар фарҷоми он мулоқот гуфта шуд, ки ҷонибҳо дар бораи “зарурати фаъол намудани тасвири гузариши хатти лоиҳавии сарҳади давлатии Қирғизистону Тоҷикистон дар қитъаҳои боқимонда“ ба тавофуқ расиданд.

Пас аз ин мулоқот, Радиои Озодӣ аз қавли Нурғозӣ Анорқулов, рӯзноманигори наздик ба ҳукумати Қирғизистон хабар дод, ки дар нишасти 2-уми октябр ҷониби “Тоҷикистон аз даъвоҳои ҳудудии худ даст кашид”. Аммо Тоҷикистон то ҳол ба ин иддао вокуниш накардааст.

Ин дар ҳолест, ки 15-уми сентябри соли ҷорӣ, замоне ки президентҳои кишварҳои Осиёи Марказӣ, аз ҷумла президенти Қирғизистон Содир Ҷабборов дар Душанбе бо Раҳмон мулоқот дошт, Тошиев дар изҳороте гуфт, ки агар Тоҷикистон аз даъвоҳои худ дар бораи марз даст накашад, мо ҳам санадҳоеро аз бойгонӣ пайдо кардаем, ки онро пешниҳод хоҳем кард ва агар лозим шавад барои ин кор нерӯ ҳам дорем.

Ҳукумат дар Лаҳистон ба дасти мухолифон мегузарад?

Аз ҷониби
AZDA-TV
-
0

Рӯзи якшанбеи 15-уми октябри соли ҷорӣ дар Лаҳистон интихобти парлумонӣ баргузор гардид.

Дар ин интихобот ҳизби ҳокими “Қонун ва адолат”, “Эътилофи шаҳрвандӣ”, “Роҳи сеюм”, “Чапҳои нав”, “Конфедератсия” ва ғайра барои 450 курсии парлумон рақобат карданд.

Ба фарқ аз интихобҳои қаблии парлумонӣ дар Лаҳистон, имсол беш аз 72,9 дарсади интихобкунандагон ширкат доштанд, ки ин рақам рекордӣ ба ҳисоб меравад.

Тибқи ҳисобҳои пешакӣ ҳизби ҳокими “Қонун ва адолат” 36,6%, “Эътилофи шаҳрвандӣ” 31%, “Роҳи сеюм” 13,5%, “Чапҳои нав” 8,6% ва “Конфедератсия” 6,4 дарсади овозҳоро ба даст оварданд.

Ба гуфтаи таҳлилгарон, ин дафъа ҳизби ҳокими “Қонун ва адолат” бо вуҷуди ба даст овардани бештари оро ҳукумат ташкил карда намеметавонад. Ва ба эҳтимоли зиёд гурӯҳҳои мухолифин эътилоф намуда, ҳукумат ташкил хоҳанд кард.

Номзади асосии мухолифон ба симати сарвазири ин кишвар Доналд Туск, раҳбари “Эътилофи шаҳрвандӣ”, собиқ сарвазири ин кишвар (2007-2014) ва собиқ раҳбари Шурои Аврупо (2014-2019) ба шумор меравад.

Аммо, тибқи қонуни асосии Лаҳистон, пас аз эълони натоиҷи интихобот раисҷумҳури ин кишвар, ки Анҷей Дуда, номзади ҳизби “Қонун ва адолат” мебошад, сарвазирро пешбарӣ мекунад ва ӯ дар навбати худ номзадҳоро ба вазифаҳои вазирӣ пешбарӣ мекунад. Баъд аз он дар парлумони ин кишвар барои қабули ин номзад овоздиҳӣ мегузаронанд.

Дар сурати ба даст наовардани овозҳои лозима, дар давоми 14 рӯз вакилони парлумон худашон сарвазир ва вазирони навро интихоб хоҳанд кард.

Агар ин дафъа низ вакилон нахуствазирро интихоб карда натавонистанд, пас президент раиси нави ҳукуматро таъин мекунад ва дар парлумон овоздиҳӣ гузаронда мешавад. Агар ин дафъа низ раъйи лозима ба даст оварда нашавад,, президент мувофиқи сарқонуни Лаҳистон ваколати парулмонро кам карда, интихоботи нав таъин мекунад.

Боздошти як пирамарди 71-сола бо иттиҳоми қатли кӯдаки 6-солаи фаластинӣ

Аз ҷониби
AZDA.TV
-
0

Пулиси Амрико як пирамарди 71-солаи амрикоиро бо иттиҳоми куштори бераҳмонаи як кӯдаки 6-солаи фаластинӣ боздошт кардааст.

Бино ба иттилои расонаҳои маҳаллӣ, рӯзи шанбе, 14-уми октябри соли ҷорӣ як пирамарди 71-сола дар шаҳри Ҷикагои иёлати Иллинойси Амрико ба хонаи муҳоҷири фаластинӣ ворид шуда, ба як зани 32-сола ва писари 6-солаи ӯ бо корд ҳамла кардааст.

Гуфта мешавад, пирамард ҳангми ворид шудан ба хона аввал ба зан ҳамла карда, ӯро чанд корд мезанад, сипас ба писари 6-солаи ӯ дарафтода, ба бадани кӯдак 26 корд мезанад. Ҳардуро ба бемористон интиқол додаанд, аммо писарбача ба сабаби захми зиёд дар бемористон даргузаштааст ва модари ӯ зиндааст.

Пулиси Чикаго дар шарҳи ин қазия гуфт, муҳоҷими 71-сола ҳангоми ҳамла ба ин хонавода гуфтааст, ки “шумо мусалмонед ва бояд бимиред.” Пулис ангезаи ин аҳмларо “аз рӯи нафрату бадбинӣ” хонда, онро ба даргириҳои ахири Исроилу ҲАМОС рабт додааст.

“Тафтишҳо нишон медиҳанд, ки ҳарду қурбонии ин ҳамлаи ваҳшиёна ба далели мусалмон буданашон ва ба хотири даргирии давомдор дар Ховари Миёна бо ширкати ҲАМОС ва Исроил ҳадафи гумонбар қарор гирифтаанд“, – омадааст дар изҳороти пулис.

Ҷо Байден раисҷумҳури Амрико рӯзи якшанбе дар суҳбат ба хабарнигорон ин ҳамла ба хонаи муҳоҷири мусалмон ва куштани бераҳмонаи кӯдаки 6-солаи фаластиниро маҳкум кард. Ӯ зимни суханронияш ин ҳодисаро “ҳавлнок ва нафратангез” хонд.

Дар пайи ҳамлаи ҲАМОС ба шаҳракнишинони Исроил аз 7-уми октябри соли ҷорӣ артиши Исроил Ғаззаро бомборон дорад. Ба гуфтаи расонаҳо, то имрӯз беш аз 4 тонна бомба болои Ғазза партоб шудааст.

Дар натиҷаи ин ҷанг то имрӯз омори кушташудаҳо дар Ғазза ба 2750 нафар ва захмиён ба 9700 нафар расидааст. Инчунин Исроил низ аз кушта шудани 1400 нафар, ки беш аз 280 нафарашон сарбозоони артиши ин кишвар гуфта мешаванд ва ба асорат афтодани 199 каси дигар хабар додааст.

Сафари вазири дифои Эрон ба Тоҷикистон

Аз ҷониби
AZDA TV-2
-
0

Вазири дифои Эрон дар раъси як ҳайати боломақоми кишвараш бо сафари расмӣ ба Тоҷикистон меояд.

Бино ба иттилои расонаҳои эронӣ, Амир Муҳаммадризо Оштиёнӣ, вазири дифоъ ва пуштибонии Нерӯҳои мусаллаҳи Ҷумҳурии исломии Эрон субҳи 17-уми октябри соли 2023 дар раъси як ҳайати воломақоми кишвараш ба Тоҷикистон сафар мекунад.

Ба қавли манбаъ, Амир Муҳаммадризо Оштиёнӣ зимни ин сафари худ ба Тоҷикистон бо вазири мудофиаи Тоҷикистон Шералӣ Мирзо ва президенти кишвар Эмомалӣ Раҳмон дидор ва дар бораи масъалаҳои дуҷониба ва бисёрҷониба гуфтугӯ хоҳад кард.

Хабаргузории нимарасмии “Таснимнюс” гуфтааст, ки вазири дифои Эрон дар ҷараёни ин сафари худ ба Тоҷикистон аз корхонаи тавлиди “Абобил -2”, ки соле пеш дар Тоҷикистон сохта шуда буд, низ дидан хоҳад кард.

Гуфта мешавад, ин сафари вазири дифои Эрон дар ҳоле ба Тоҷикистон анҷом мешавад, ки ҷанг дар Фаластин ва ҳамлаҳои вайрангари Исроил ба Навори Ғазза на танҳо кишварҳои минтақа, балки тамоми абарқудратҳои дунёро нигарон кардааст.

Вазорати корҳои хориҷии Тоҷикистон дар аввали ҳафтаи гузашта бидуни ном бурдан аз Фаластин ва Исроил бо нашри як изҳорот “аз муташанниҷ шудани вазъ дар Ховари Миёна” изҳори нигаронӣ карда буд.

Латтукӯби кампири 82-сола дар шаҳри Ваҳдат

Аз ҷониби
AZDA TV-2
-
0

Пиразани 82-солае дар шаҳри Ваҳдат иддао дорад, ки нозири минтақавӣ ҳамроҳ бо раиси ҷамоат ва раиси маҳалла ӯро латтукӯб кардаанд.

Дирӯз, 15-уми октябри соли 2023 наворе дар шабакаҳои иҷтимоӣ нашр шуд, ки муаллифи он иддао мекунад, кормандони давлатӣ дар шаҳри Ваҳдат бонуи маъюб ва модари 82-солаашро марвриди латтукӯб қарор додаанд. Ин навор дар як замони кӯтоҳ ба вокунишҳои зиёде рӯбарӯ шуд.

Хонум Сайдигул Ғафурова, сокини деҳаи Одилии ҷамоати деҳоти Симиганҷи шаҳри Ваҳдат дар суҳбат бо Azda.tv гуфт, шоми 14-уми октябри соли 2023, кормандони давлатӣ ба хонаи модари ӯ рафта, онҳоро ҳамроҳ бо модари 82-солааш латтукӯб кардаанд.

Ба гуфтаи хонум Ғафурова, писарандараш Содиқҷони Шарифбек, мутаввалиди соли 2004 аст. Содиқҷони Шарифбек ягона нонбиори хонум Ғафурова модараш будааст.

Ин бону дар идома таъкид кард, ки бидуни фиристодани даъватнома ба Содиқҷони Шарифбек нимашаб нозири минтақавӣ ҳамроҳ бо раиси ҷамоат ва раиси маҳалла ба хонаи онҳо рафта, писарро боздошт карда, бо худ бурданд. Вақте хонум Ғафурова ва модари 82-солааш ба ин кори мақомот эътироз карданд, онҳоро мавриди латтукӯб қарор дода, бо таҳдид гуфтаанд, ки агар ҷое шикоят кунанд, онҳоро ба қатл мерасонанд.

То замони таҳияи ин матлаб мақомоти Тоҷикистон ба сурати расмӣ дар бораи ин иддаоҳои қурбониёни хушунат аз ҷониби кормандони мақомоти мухталифи давлатӣ то ҳол вокуниш накардаанд.

Ҳодисаи латтукӯби наздикону пайвандони навасакарон дар Тоҷикистон бори аввал нест. Дар гузашта низ мақомоти давлатӣ дар нисбати хонавода ва дигар наздикону пайвандони ҷавононе, ки бо далелҳои мухталиф ба сафи нерӯҳои мусаллаҳи Тоҷикистон напайвастаанд, анвои хушунатҳоро раво дида буданд.

Аз ҷумла, баҳори имсол даҳҳо шикоят аз ноҳияҳои мухталифи Тоҷикистон, бахусус аз шаҳри Исфара, ноҳияҳои Ванҷу Дарвоз ва Шаҳринаву Абдураҳмони Ҷомӣ дар расонаҳо чоп шуда буд, ки волидон ва ё дигар пайвандони ҷавононе, ки сари вақт ба сафи қувваҳои мусаллаҳ напайвастаанд, мавриди анвои хушунатҳои мақомот ва ҳатто шинканҷаҳои ҷисмонӣ ва равонӣ қарор гирифта буданд.

Ардуғон: Ончи дар Ғазза мегузарад, қатли ом аст

Аз ҷониби
AZDA TV-2
-
0

Прзединети Туркия, Раҷаб Таййиб Ардуғон дар суҳбат бо вакилони кишвараш гуфтааст, ки ончи дар Ғазза мегузарад, қатли ом аст.

Бино ба иттилои расонаҳо, Президенти Туркия дар нишасти Бунёди ҷавонони (TÜGVA) кишвараш дар Анқара гуфтааст, ҳеч тавзиҳ ва тавҷеҳе барои қатли оми бародаронам дар Ғазза вуҷуд надорад.

Мақомоти исроилӣ минтақаи Ғаззаро, ки дорои беш аз 2,3 миллион аҳолӣ мебошад, 16 сол инҷониб дар муҳосира қарор додаанд. Ба гузориши ББС, Ғазза дар тӯли 16 соли ба зиндоне зери осмон барои беш аз 2,3 миллион нафар табдил шудааст. Се рӯз пеш ҳамагуна интиқоли оби ошомиданӣ, газ, барқ, ғизо, даво ва ғайра низ ба он манъ карда шуд.

Шоми дирӯз мақомоти исроилӣ ба Созмони Милали Муттаҳид гуфта буданд, ки тайи 24 соати оянда 1,1 миллион аҳолии шимоли Ғазза бояд минтақаро холӣ карда, ба ҷануби Ғазза бираванд, зеро ин минтақа мавриди ҳамалоти шадид қарор хоҳад гирифт. Сухангӯи СММ мегӯяд, ин иқдом вазъи фоҷеабори минтақаро фоҷеабортар мекунад.

ҲАМОС дар посух ба ин гуфтааст, ки “душман заъифу тарсӯтар аз он аст, ки миллати моро бори дувум маҷбур кунад, то сарзамини худро тарк кунанд. Дар қомуси мо муҳоҷират танҳо ба самти сарзаминҳои ишғолшудааст, на чизе дигар!”

Ҳамзамон Созмони Ҷаҳонии Беҳдошт дар робита ба ин иқдоми Исроил гуфтааст, “интиқоли афроди ба шиддат бемор ба хориҷ аз Ғазза ҳамчун муҷозоти марг аст. Бархе аз ин афрод дар бемористонҳо ба кумаки дастгоҳҳои танафусси маснуъӣ зинда ҳастанд ва аз ин рӯ, имкони интиқоли онҳо ба маконҳое дигар вуҷуд надорад.”

Аз замони оғози ҷанг дар Исроил ва мавриди ҳамалоти шадид қарор гирифтани Ғазза то ҳол аз ду тараф ҳудуди 3200 нафар кушта ва беш аз 11 ҳазор каси дигар маҷрӯҳ шудаанд. Мақомоти фаластинӣ мегӯянд, бар асари ҳамлаҳои Исроил ба Ғазза дасти кам 478 кӯдак кушта шудааст.

Гуфта мешавад, кишварҳои Норвеҷ, Ирланд ва Брозил ҳам бо маҳкум кардани ин иқдоми Исроил, ҳамлаҳои сангини ин кишвар ба Ғаззаро низ маҳкум карда, онҳоро дар ҳадди ҷиноятҳои ҷангӣ донистаанд. Инчунин ин кишварҳо хостори ҳар чӣ сареътар расонидани кумакҳои аввалия ба мардуми Ғазза шудаанд.

Ҳамзамон дар хеле аз кишварҳои арабӣ ва исломӣ ва ғарбӣ ҳам миллионҳо нафар бо ширкат дар ҳамоишҳои эътирозӣ хостори қатъи ҳамалоти Исроил ба сокинони мулкӣ дар навори Ғазза шуда, ҳар чӣ зудтар расонидани кумакҳои обу ғизо ва дорувориро зарур шумурдаанд.

Гуфтугӯи Раҳмонов ва Ҷабборов дар бораи марз

Аз ҷониби
AZDA-TV
-
0

Имрӯз, 13-уми октябр дар ҳошияи ҷаласаи Шӯрои сарони кишварҳои аъзои Иттиҳоди Давлатҳои Мустақил дар шаҳри Бишкек, президентҳои Тоҷикистону Қирғизистон Эмомалӣ Раҳмон ва Содир Ҷабборов масъалаи марзи ду кишварро баррасӣ карданд.

Бино ба иттилои сомонаи расмии Президенти Тоҷикистон, Раҳмонов ва Ҷабборов вазъи кунунӣ ва дурнамои муносибатҳои Тоҷикистон ва Қирғизистонро дар соҳаҳои сиёсӣ, тиҷоратӣ, иқтисодӣ, фарҳангӣ, гуманитарӣ ва ғайра баррасӣ намуда, ба мувофиқа расиданд, ки муколамаи ҳамешагии сиёсиро дар сатҳи олӣ идома медиҳанд.

Инчунин дар рафти мулоқот дар бораи таъйини “хати сарҳади давлатии Тоҷикистон ва Қирғизистон ва тавофуқҳое, ки чанде пеш дар ин самт ҳосил шуда буданд”, гуфта шудааст.

Ба навиштаи ин манбаъ, раҳбарони ду кишвар ба кори ҳайатҳои ҳукуматӣ оид ба аломатгузории марз баҳои мусбат дода, аз “фаъолсозии минбаъдаи кор изҳори ҷонибдорӣ намуданд”.

Мулоқоти Эмомалӣ Раҳмон ва Содир Ҷабборов дар ҳоле сурат мегирад, ки рӯзи 2-юми октябри соли ҷорӣ дар шаҳри Бодканди Қирғизистон ҷаласаи навбатии Комиссияи байниҳукуматии Тоҷикистону Қирғизистон дар бораи таъйин ва аломатгузории марзи давлатии ду кишвар баргузор шуда буд.

Дар ин ҷаласа раҳбарони КДАМ-и Тоҷикистон ва Қирғизистон Саймумин Ятимов ва Қамчибек Тошиев, “Протоколи 44”-ро ба имзо расониданд. Вале ҳарду тараф аз ҷузъиёти ин протокол чизе нагуфтанд.

Аммо, Нурғозӣ Анорқулов, рӯзноманигори наздик ба ҳукумати Қирғизистон, худи ҳамон рӯз дар саҳифаи фейсбукияш навишта, ки “Тоҷикистон аз даъвоҳои ҳудудии худ даст кашид”.

Навиштаи ин рӯзноманигор сару садоҳои зиёдеро дар шабакаҳои иҷтимоӣ ба бор овард.

Инчунин 8-уми октябри соли ҷорӣ мақомоти Тоҷикистону Қирғизистон аз мувофиқаи гурӯҳҳои маконнигории ҳарду тараф бар сари таъйини 43,32 километри дигари сарҳад хабар доданд. Маълум нест, ки гап дар бораи кадом қитъаи марз меравад.

Ҷониби Тоҷикистон дар аксар ҳолат аз ҷузъиёти нишастҳо ба расонаҳо чизе намегӯяд, ки ин амали мақомоти тоҷик мавриди танқиду норозигии мардум қарор гирифтааст.

Як ҳафтаи ҷанг дар Ғазза: Шумори қурбониён аз ҳарду ҷониб афзоиш меёбад

Аз ҷониби
AZDA.TV
-
0

Дар адвоми як ҳафтаи ҷанг байни Исроил ва ҲАМОС дар Ғазза, дасти кам 1573 фаластинӣ ва 1300 исроилӣ кушта шуданд. Шумори маҷруҳин дар Ғазза бештар аз 6600 ва дар Исроил 3300 нафар гуфта мешавад.

Дар ҳамин ҳол артиши Исроил шоми рӯзи панҷшанбе эълон кард, ки аз 7-уми октябр то ҳоло 6 ҳазор бомб, ки вазни умумии онҳо бештар аз 4 тоннаро ташкил медиҳад, болои Ғазза холӣ кардааст. Марк Гарласко, таҳлилгари низомӣ дар суҳбат бо “Вошингтон Пост” гуфт, ки мушак ва маводҳои таркандае, ки Исроил дар давоми камтар аз як ҳафта болои Ғазза патроб кард, Амрико дар Афғонистон дар як сол ин миқдорро партоб карда буд.

Имрӯз артиши Исроил аз сокинони шимолии Ғазза, ки шуморашон 1,1 миллон нафар мебошад, талаб карда, ки давоми 24 соат хонаҳои худро тарк кунанд ва ба қисмати ҷанубии Ғазза нақли макон кунанд. Исроил иддао дорад, ки бо ин кор мардумро аз ҲАМОС ҷудо карда, онҳоро бомборон хоҳад кард. Аммо сухангӯи ҲАМОС Абуубайда дар изҳороте гуфт, ки Исроил мехоҳад Ғаззаро ишғол кунад, ки мо ба ин иҷозат нахоҳем дод.

Имрӯз дар чандин кишвари дунё, аз ҷумла дар Яман, Урдун, Мсир ва ғайра тазоҳуроти хиёбонӣ барои пуштибонӣ аз мардуми Фаластин баргузор шуд.

Ҳамзамон рӯзҳои гузашта низ дар бархе кишварҳои аврупоӣ чунин тазоҳуроте доир гашта буд, аммо пеши роҳи онҳо гирифта шуд. Ҳукумати Фаронса ҳар навъ тазоҳурот дар бораи ҳимоят аз мардуми Фаластинро мамнуъ эълон кард. Бо вуҷуди он даҳҳо нафар барои эътироз шоми рӯзи гузашта ба кӯча баромаданд, аммо пулис барои пароканда кардани онҳо аз гази ошковар истифода кард.

Терри Бретон, раиси бозори дохилии Иттиҳоди Аврупо шоми рӯзи панҷшанбе ба шабакаи иҷтимоии Х ва Метто 24 соат муҳлат дод, то тамоми муҳтавои навишташуда дар бораи ҲАМОС-ро пок кунанд.

Ин масъули аврупоӣ дар номае ба Элон Маск гуфта, ки “баъд аз ҳамлаи ҲАМОС ба Исроил мо маълумот дарёфт кардем, ки шабакаи шумо муҳтавоҳои дурӯғ ва ғайриқонуниро дар дохили Иттиҳоди Аврупо нашр мекунад.“

Аммо, ба гузориши Ройтерз, Маск дар посух ба ин дархости масъули аврупоӣ гуфта, ки “Сиёсати мо ин аст, ки ҳама чиз ошкору шаффоф бошад, шумо бояд он муҳтавоҳоеро, ки ғайриқонунӣ медонед, пешкаш кунед то ҳама бубинанд.“

Комиссия Аврупо мегӯяд: “Ҳар муҳтавое, ки дар интернет нашр мешавад ва эҳтимоли иртибот ба ҲАМОС-ро дошта бошад, пас он террористӣ дониста шуда, ғайриқонунӣ аст ва бояд пок карда шавад.“

Линда Яккарина, мудири иҷроияи шабакаи иҷтимоии Х ба “Ассошиэйтед пресс” гуфта, ки “мо садҳо ҳисобро, ки ба ҲАМОС марбут буд, пок кардем ва инчунин баъд ҳамлаи ин гурӯҳ ба Исроил низ садҳо муҳтавоҳои нашршуда дар ин бораро пок кардем.“

Дар авҷи даргирҳо байни Фаластину Исроил 12-уми октябр вазири корҳои хориҷии Амрико Энтони Бдӯлинкен аз Исроил дидан кард. Ӯ дар изҳороте гуфт, ки на ҳамчун вазири хориҷӣ, балки ҳамчун як яҳудӣ барои ҳимоят аз Исроил ин кишварро зиёрат кард. Ҳамчунин ӯ такъид кард, ки кишвараш омода аст Исроилро бо тамоми қувва кумак кунад.

Ёдовар мешавем, ки субҳи рӯзи 7-уми октябри соли ҷорӣ ҷабҳаи Қассом – шохаи низомии ҲАМОС бар минтақаи шаҳракнишинони Исроил дар минтақаи девори Ғазза ҳамла карда, чандин низомӣ ва ғайринизомиро асир гирифтанд.

Дар пайи ин ҳамла Амрико ва кишварҳои ғарбӣ аз Исроил ҳимоят карда, мегӯянд, ӯ ҳақ дорад аз худ дифоъ кунад. Аммо ҲАМОС мегӯяд, ин ҳамларо ба далели зулму қатл ва зӯргӯии Исроил боло мардуми Ғазза ва инчунин ғасби заминҳои онҳо анҷом додаанд.

Сафари Эмомалӣ Раҳмон ба Қирғизистон

Аз ҷониби
AZDA TV-2
-
0

Президенти Тоҷикистон дар раъси як ҳайати воломақоми кишвар вориди Қирғизистон шуд.

Бино ба иттилои расмӣ, Эмомалӣ Раҳмон, Президенти Тоҷикистон барои иштирок дар нишасти сарони кишварҳои узви Иттиҳоди Давлатҳои Мустақил ба Бишкек, пойтахти Қирғизистон рафт.

Пеш аз ин рӯзҳои 11-12-уми моҳи ҷорӣ вазирони корҳои хориҷии кишварҳои узви Иттиҳоди Давлатҳои Мустақил тай ду рӯз рӯзномаи барномаи мулоқоти сарони кишварҳои Иттиҳоди Давлатҳои Мустақилро таҳия ва қабул карда буданд.

Дар ҳошияи ин нишасти минтақавӣ Президенти Тоҷикистон бо ҳамтоёни худ аз Қирғизистон ва Русия низ мулоқот карда, дар бораи масъалаҳои сиёсӣ, иқтисодӣ, тиҷоратӣ, сармоягузорӣ ва ғайра гуфтугӯ кардаанд.

Қарор аст сарони кишварҳои ин созмони зери нуфeзи Русия “Аҳднома дар бораи таъсиси Созмони байналмилалӣ оид ба забони русӣ, Нақшаи чорабиниҳои роҷеъ ба омодагӣ ва дар соли 2025 таҷлил намудани 80-солагии ғалаба дар ҷанги Бузурги Ватанӣ, Барномаи байнидавлатии тадбирҳои муштараки мубориза бо ҷинояткорӣ барои солҳои 2024-2028, инчунин як қатор созишнома ва изҳоротҳоро” ба имзо расонанд.

Гуфта мешавад, Иттиҳоди Давлатҳои Мустақил баъди барҳам хӯрдани Иттиҳоди Шӯравӣ дар соли 1992 таъсис дода шуд ва дар ҳоли ҳозир кишварҳои Озарбойҷон, Арманистон, Беларус, Қазоқистон, Қирғизистон, Молдова, Русия, Тоҷикистон, Узбекистон, Украина ва Туркманистон узви он мебошанд.

Сими барқи хонаи модарандари Суҳроби Зафарро ҳам буриданд

Аз ҷониби
AZDA-TV
-
0

Кормандони идораи барқи ноҳияи Восеъ сими барқи хонаи Ойиша Мирзоева, модарандари раиси “Гурӯҳи 24” Суҳроби Зафар ва хоҳари генерали зиндонӣ Ғаффор Мирзоевро буриданд.

Ойиша Мирзоева дар суҳбат бо Радио Озодӣ гуфтааст, ки бо вуҷуди қарздор набудан се корманди идораи барқи ноҳияи Восеъ ба манзили ӯ дар деҳаи Кадучӣ рафта, сими барқи ҳавлияшро буриданд.

Сардори Шуъбаи барқи ноҳия сабаби буридани барқи хонаи Мирзоеваро ба фармони боло рабт дода гуфтааст, ки “агар норозӣ ҳастӣ, худат рафта муроҷиат кун”.

Баъд аз ин хоҳари генерали зиндонӣ Ғаффор Мирзоев ба идораи амният рафтааст, аммо кормандони ин ниҳод гуфтаанд, ки “хабар надорем, дақиқ карда, занг мезанем”.

Гуфта мешавад, дар ин рӯзҳои охир ин шикояти дувуми наздикони мухолифон дар бораи буридани барқи хонаҳояшон аст.

Пештар аз ин кормандони идораи барқи ноҳияи Фархор барқи хонаи Ойишамо Абдуллоева модари Шарофиддин Гадоев, яке аз раҳбарони Паймони миллии Тоҷикистонро қатъ карда буданд.

Ойишамо Абдуллоева, ки бемории қанд дорад гуфта буд, бо вуҷуди он ки пули барқро ҳар моҳ пардохт мекунад ва аз он қарздор нест, вале кормандони барқ далели қатъи онро ба қарздор будану набудан марбут надониста, фақат ҳаминро гуфтанд, ки “писаратон дар Олмон баромад карда, президентро танқид кардааст, фармон аз боло аст.“

То ҳол мақомот расман сабаби буридани сими барқи хонаи наздикони мухолифонро шарҳ надодаанд.

Аммо ба гуфтаи огаҳони умур, ин ҳама фишорҳо болои пайвандони мухолифон посухи мақомот ба эътирози онҳо ва бо тухм задани мошини Эмомалӣ Раҳмон дар Берлин аст.

Ёдовар мешавем, ки мухолифини ҳукумати кишвар алайҳи сафари Раҳмон ба Олмон дар торихи 28-29-уми сентябри соли ҷорӣ гирдиҳамоии эътирозӣ ташкил карданд. Дар ин эътирозҳо рӯзи 29-уми сентябр ҷавонони “Гурӯҳи 24” ба мошини ҳомили Эмомалӣ тухм партоб карданд.

Пас аз ин ҳодиса мақомоти амниятии кишвар наздикону пайвандони мухолифон, ҳатто падару модарони пири онҳоро дар дохили кишвар боздошту бозпурсӣ карданд. Бархе онҳоро то ду се рӯз дар боздоштгоҳҳо нигоҳ доштанд.

1...260261262...786саҳифаи 261 аз 786