Ҷустуҷӯ кунед
Ҷустуҷӯ
36.9 C
Dushanbe
Хона блог саҳифа 300

Русия то 300 ҳазор сарбози захиравияшро ба артиш басиҷ мекунад

Аз ҷониби
firuzihait
-
0

Президенти Русия Владимир Путин дар як муроҷаити видеоӣ ба сокинони кишвараш аз қисман басиҷкунӣ ба артиш хабар дод.

Матн ва видеои муроҷиат имрӯз, 21-уми сентябр дар сомонаи Кремл нашр шуд, ки Путин дар он мегӯяд, “барои ҳифзи Ватан ва якпорчагии худ зарур мешуморам, ки аз қисман басиҷкунӣ ба артиш дастгирӣ кунам”.

Президенти Русия гуфт, ки ба артиш онҳое даъват хоҳанд шуд, ки дар артиши Русия хизмат карда, дар ҳайати захиравӣ ҳастанд. Ва қабл аз фиристодан ба қисмҳо, ҳатман аз таълими иловагии ҳарбӣ мегузаранд.

Инчунин шаҳрвандони замони басиҷкунӣ ба хидмати ҳарбӣ даъватшуда, як мақоми муайянеро соҳиб шуда, ҳамаи пардохтҳои барои хизматитчиёни тибқи қарордод пешбинишуда, ба онҳо низ пардохт карда мешавад.

Дар идома Владимир Путин қисман басиҷкунӣ ба артишро “як қадами зарурии фаврӣ барои ҳифзи соҳибихтиёрӣ, амният ва тамомияти арзии кишвар” номида, Ғарбро ба “аз ҳам ҷудо кардан ва аз байн бурдани Русия” муттаҳам кард.  

Вазири мудофиаи Русия Сергей Шойгу дар пайи фармони “қисман басиҷкунӣ” ба артиш ба расонаҳо гуфт, ки “мо на он қадар бо Украина, балки бо Ғарби дастҷамъӣ дар ҷанг ҳастем” ва “тамоми гурӯҳҳои моҳвораии НАТО алайҳи Русия кор мекунанд”.

Ба гуфтаи Сергей Шойгу дар доираи маъракаи қисман басиҷкунӣ ба артиш ҳудуди 300 ҳазор нафар ҳайати захираҳои ҳарбӣ даъват мешаванд.

Инчунин Шойгу иддао дорад, ки Украина аз ҳисоби сарбозонаш ҳудуди 61 ҳазору 207 нафар кушташуда ва 49 ҳазору 368 нафар маҷруҳ дорад. Аммо талафоти ҷониби Русияро 5 ҳазору 937 нафар эълон кард.

Дар ҳоле фармони қисман басиҷкунӣ ба артиш ба имзо мерасад, ки расонаҳо аз ҷалби муҳоҷирон ва зиндониён ба артиши Русия хабар медиҳанд.

Инчунин худи ҳамин рӯз гурӯҳе аз муҳоҷирон дар тамос бо Azda tv гуфтанд, ки аллакай баъд аз эълони Путин ба аксар муҳоҷирони тоҷике, ки шаҳрвандии Русияро доштанд, аз комиссариятҳои ҳарбӣ даъватнома омадааст. “Ҳатто барои баъзе хонаводаҳо ҳам барои падар ва ҳам барои писар даъватнома омадааст“, мегӯянд, муҳоҷирон.

Ёдовар мешавем, ки ҳамлаи низомии Русия ба Украина аз субҳи 24-уми феврали соли ҷорӣ оғоз шуда ва то имрӯз ҷанг дар ин кишвар идома дорад. Бо вуҷуди талафоти зиёди артиши Русия ҳоло ҳам мақомоти ин кишвар онро “амалиёти махсуси низомӣ” меноманд.

Аввалин варзишгар аз Тоҷикистон ба UFC роҳ ёфт

Аз ҷониби
firuzihait
-
0

Нурулло Алиев, варзишгари шинохтаи тоҷик дар қувваозмоии “Dana White’s Contender Series”, ки шаби 20-ум ба 21-уми сентябр дар шаҳри Лас-Вегаси ИМА баргузор гардид, рақиби амрикоиаш Ҷош Уикро дар сонияҳои охири раунди якум бо нокаути техникӣ шикаст дод.

Нурулло Алиев то имрӯз дар ҳафт қувваозмоиаш пирӯз шуда, ягон шикаст надорад. Рақибаш Ҷош Уики 27-сола бошад, 17 қувваозмоӣ карда, дар 12-тоаш пирӯзӣ ба даст овардааст.

Ин варзишгари ҷавони тоҷик, баъд аз пирӯзиаш дар “Dana White’s Contender Series” аввалин варзишгар аз Тоҷикистон аст, ки ба яке аз ташкилотҳои варзишии шинохтаи ҷаҳон “Ultimate Fighting Championship” (UFC) роҳ меёбад.

Пас аз ғалабааш Нурулло бо президенти UFC Дейна Уайт суҳбат карда, гуфтааст, ки аллакай баъди як ҳафта омода аст дар UFC аввалин қувваозмоии худро баргузор намояд ва дар идомаи суҳбаташ қайд карда, ки баъд аз 2 сол қаҳрамони ин ташкилот мешавад.

Президенти UFC Дейна Уайт баъд аз анҷоми қувваозмоиҳои шаби 20-ум ба 21-уми дар “Dana White’s Contender Series”, дар нишасти хабарӣ гуфт, ки “вақте навори тамрини варзишгаронро дар ҳисоби инстаграмам гузоштам, дар зери навори дигар варзишгарон 30 шарҳ навишта шуд. Аммо дар зери навори тамрини Нурулло Алиев 1500 шарҳ пайдо шуд, ки ин нишондиҳандаи он аст, ки тамоми кишвараш аз пушти ӯст”.

Ҳоло ин навори тамрини Нурулло, ки пеш аз қувваозмоиш сабт шудааст дар муддати 9 соат беш аз 6 ҳазор шарҳ дорад, ки бештари онро тоҷикон навистаанд.

Нурулло Алиев 22 сол дошта, зодаи Ванҷи ВМКБ мебошад. Ӯ дар дохил ва хориҷи Тоҷикистон ҳаводорони зиёде дошта, ба хотири шабоҳаташ бо Ҳабиб Нурмагамедов “Уқоби тоҷик” низ меноманд.

Нурулло Алиев ҳунарнамоии касбии худро дар ММА соли 2018 оғоз намуда, дар ташкилоти “Fight Nights Global” низ қувваозмоӣ намудааст. Ӯ аввалин варзишгари тоҷик аст, ки бо яке аз ширкатҳои бузурги менеҷерӣ “First Round Management” қарордод бастааст.

ВКХ ҶТ: Қириғизистон нақшаи ҳуҷуми гусутрдаеро мекашад

Аз ҷониби
amrullokhi
-
0

Вазорати корҳои хориҷии Тоҷикистон бо нашри як изҳорот гуфтааст, ки паҳподҳои таҷассусии Қирғизистон ба хотири ҷамъоварии иттилоот борҳо ҳарими ҳавоии кишварамонро таҷовуз кардаанд.

Имрӯз, 21-уми сентябри соли 2022, Вазорати корҳои хориҷии Тоҷикистон дар изҳороти худ гуфтааст, ки рӯзҳои 19-20-уми сентябри соли ҷорӣ парвози бесарнишинҳои Қирғизистон дар шаҳри Исфара, ноҳияҳои Деваштич, Бобоҷон Ғафуров, Ҷаббор Расулов, Рашт ва Лахши Тоҷикистон ба қайд гирифта шудааст.

Дастгоҳи диплумосии Тоҷикистон аз Қиризистон хостааст, ки протоколҳои имзошударо риоя кунад, дар ғайри ин сурат ҳушдор дода мегӯяд, ки Тоҷикистон ҳам ин иқдомҳои Қирғизистонро ҳамчун омодагӣ барои ҳамлаҳои навбатӣ талаққӣ карда, масъулияти авоқиби он ба дӯши Қириғизистон хоҳад буд.

Гуфта мешавад, ҳодисаҳои хунини рӯзҳои 14-18 моҳи ҷорӣ дар манотиқи назди сарҳадии Тоҷикистон ва Қирғизистон зиёда 100 кушта ва садҳо захмӣ ба ҷо гузоштааст. Дар ин даргириҳо ҳар ду ҷониб якдигарро ба оғози танишҳо муттаҳам карданд.

Вокуниши Тоҷикистон ба изҳороти Марат Имонқулов

Аз ҷониби
AZDA TV
-
0

Вазорати корҳои хориҷии Тоҷикистон ба изҳороти ахири котиби Шӯрои амнияи Қирғизистон Марат Имонқулов вокуниш кард.

Вазорати корҳои хориҷаи Тоҷикистон дар изҳороти худ маълумоти ироа кардаи Марат Имонқуловро “сохтакорӣ” ва “таҳрифи далелҳои қалбакӣ” номида, таъкид мекунад, ки чунин маълумоти “бардурӯғ” метавонад вазъиятро боз ҳам душваор гардонад.

“Дар робита ба мусоҳибаи котиби Шӯрои амнияти Қирғизистон Марат Имонқулов аз 19 сентябри соли 2022, Вазорати корҳои хориҷии Ҷумҳурии Тоҷикистон иттилоъ медиҳад, чунин изҳорот дар асоси сохтакорй ва таҳрифи далелҳои қалбакй, инчунин ба иштибоҳ андохтани аҳли ҷамъияти ҳар ду кишвар нигаронида шудааст. Масъулияти оқибатҳои чунин изҳороти бардурӯғ, ки ба виҷдони муаллифони онҳо вобаста аст, дар ин лаҳзаҳо метавонад вазъиятро барои халкҳои мо душвор гардонад.”, омадааст дар хабари Вазорати корҳои хориҷаи Тоҷикистон.

Ёдовар мешавем, рӯзи сешанбе Azda tv изҳороти дабири Шӯрои амнияти Қирғизистон Марат Имонқуловро нашр кард, ки ин мақоми қирғизӣ 19-уми сентябр дар нишасти хабарие иддао карда буд, ки бар асари даргирҳои хунини ахири марзӣ аз ҷониби Тоҷикистон беш аз 200 сарбоз кушта ва ҳудуди 400 нафар маҷруҳ шуданд. Ӯ ҳамчунин кушташудаҳои ҷониби Қирғизистонро 40 ва маҷруҳонро 70 нафар гуфта буд.

Ин дар ҳолест, ки мақомоти расмии Тоҷикистон омори кушташудаҳои муноқишаи марзиро 41 нафар гуфта буд ва мақомоти расмии Қирғизистон бошад, аз кушта шудани 59 нафару захмӣ шудани 164 кас хабар дода буд.

Эмомалӣ Раҳмон таъзияи ҳамтои қазоқашро “қабул” накард

Аз ҷониби
amrullokhi
-
0

Президенти Қазоқистон дар ҳодисаҳои хунин ва кушта шудани даҳҳо нафар шаҳрванди Тоҷикистон ба Эмомалӣ Раҳмон изҳори тасаллият кард, вале Президенти Тоҷиикстон онро “қабул” накардааст.

Бино ба иттилои Хадамоти матбуоти Президенти Қазақистон 19-уми сентябри солои 2022, Қосим-Жомарт Тоқаев ба намояндагӣ аз мардуми Қазоқистон ва аз ҷониби худ бо ирсоли як барқияи изҳори тасаллият дар бораи куштаҳои ҳодисаҳои хунини рӯзҳои 14-17-уми сентябр дар манотиқи назди сарҳадии Тоҷикистон ба Эмомалӣ Раҳмон таъзият гуфт.

Дар ин тасаллиятномаи Қосим-Жормат Тоқаев омадааст, ки “мо ин ҳодисаҳои ғамангезро дар кишварҳое, ки бародар ва наздики мо ҳастанд бо нигарониҳои зиёд дарк мекунем. Қазоқистон қотеона ҷонибдори он аст, ки ҳама гуна ихтилофот дар минтақа танҳо бо роҳи осоишта ва бо усулҳои сиёсӣ ва дипломатӣ ҳал карда шавад.”

Ба қавли манбаъ, Президенти Қазоқистон дар ҳимоят аз хонаводаҳои қурбониёни ин ҳодисаҳои хунин ба назкидону пайвандони онҳо низ изҳори ҳамдардӣ карда, ба захмишудагон шифои комил ва фаврӣ орзу кардааст.

Дар ин рӯзҳо ҳар чанд бархе аз намояндагони ҳукуматҳои маҳаллӣ дар минтақаҳо ҳангоми интиқолои ҷанозаи кушташудаҳо ва ба наздикону пайвандони онҳо рафта изҳори тасаллият ва аз номи президент ҳам таъзия баён карданд, аммо худи Эмомалӣ Раҳмон расман то ҳол барои ин қурбониён изҳори ҳамдарӣ накардааст.

Инчунин вай барои захмиҳо шифо ҳам нахостааст ва барои зарардидаҳо, ки теъдодашон ба садҳо нафар мерасад, изҳори ҳамдардӣ низ накардааст. Ҳатто дар суҳбатҳояш бо Президенти Русия ва Президенти Ӯзбекистон ҳам ин маъсаларо дуюм ва сеюмдараҷа баҳо дода, бо беэтиноӣ аз он убур кард.

Муроҷиати “Internews” ба журналистон

Аз ҷониби
amrullokhi
-
0

Дафтари “Интернюс” дар Тоҷикистон бо нашри як муроҷиатнома аз расонаҳо ва журанлистони тоҷику қирғиз хостааст, ки “ба касби худ содиқ бошанд.”

Ирмӯз, 20-уми сентябри соли 2022, дафтари минтақавии созмони ”Internews” дар Тоҷикистон аз расонаҳои ва журанлистони Тоҷикистон ва Қирғизистон хостааст, ки “уҳдадории касбии худро иҷро кунанд ва ба эҳсосот дода нашаванд.”

Дар ин муроҷиатно омадааст, ки “дар ин шароити душвор мо аз намояндагони ВАО даъват менамоем, ки ба касби худ содиқ бошанд ва стандартҳои байналмилалии журналистикаро асоси кори худ қарор диҳанд, ки паҳнкунии танҳо иттилооти объективӣ, беғаразона ва муътамадро тақозо мекунад.”

Дафтари “Интернюс” дар Тоҷикистон таъкид мекунад: “Тарзе, ки журналистҳо ҳодисаҳоро инъикос мекунанд, метавонад ба пешрафти ҳодисаҳо дар оянда таъсири калон расонад. Паҳншавии иттилооти бардурӯғ ва забони душманӣ метавонад ба раванди нозуки сулҳомез зиён расонад. Аз ин рӯ, барои рӯзноманигорон ва намояндагони расонаҳои ҳарду кишвар, махсусан муҳим аст, ки принсипи беғаразиро риоят кунанд.”

Гуфта мешавад, ҳодисаҳои хунини ахир, ки рӯзҳои 14-18-уми сентябри соли ҷорӣ дар марзҳои муштараки Тоҷикистон ва Қирғизистон рух дод, беш аз 100 нафар кушта ва садҳо тани дигарро замхӣ сохт.

Дар ин рӯзҳои сангин бархе журналистҳо низ дар қатори дигарон аз ду ҷониб ба эҳсосот дода шуд, дар раванди муборизаҳои иттилоот ба дур аз тақозои касби худ ба иштибоҳоте низ даст зада буданд.

Русия 1500 зиндониро ба ҷанги Украина мефиристад

Аз ҷониби
AZDA TV
-
0

Ба гузориши “Reuters” мақомоти Русия талош дорад сафи низомиёни худро дар ҷанг бо Украина аз ҳисоби зиндониён ва муҳоҷироне, ки мушкилоти асноди будубош доранд, бештар кунад.

“Reuters” аз қавли як мақоми баландпояи Вазорати дифои Амрико хабар дод, ки “Wagner Group”, як ширкати хусусии низомии Русия, талош дорад, беш аз 1500 ҷинояткорони маҳкумшударо барои ширкат дар ҷанги Русия бо Украина ҷалб кунад, аммо бисёре аз онҳо ба ин даъват посухи рад додаанд.

Ин мақоми амрикоӣ бо шарти ифшо нашудани номаш ба ин расона гуфта, ки “маълумоти мо нишон медиҳад, ки Русия дар ҷанги бо Украина ба хотири ҷалби ҷавонон ҷангҷӯёни бетаҷриба талафоти зиёд дидааст”. Зоҳиран Русия мехоҳад ин талафотро акнун аз ҳисоби собиқ ҷангиён ва низомиёни ботаҷриба, ки ҳоло дар зиндонҳо ба сар мебаранд, ҷуброн кунад.

Ба гуфтаи мақомоти амрикоӣ, агарчи “Wagner Group” ниҳоди расмии Русия нест, вале онро алигархҳои наздик ба Путин идора мекунанд ва маҳз онҳо барои ҷалби зиндониён талош доранд.

Раисиҷумҳури Русия Владимир Путин пештар гуфта буд, ки ин гурӯҳ аз давлати Русия намояндагӣ намекунад, аммо он аз ҳампаймонони хусусии ҳарбӣ ба ҳисоб меравад ва онҳо ҳақ доранд дар ҳамаҷо кор кунанд, ба шарти ин ки қонунҳои Русияро нақз накунанд.

Ин расона дар як гузорише пештар бо такя ба манобеаш гуфта буд, ки Русия ба муҳоҷирони бекор ва онҳое, ки ихроҷ таҳдидашон мекунад, моҳона то 3 ҳазор доллари амрикоӣ ҳуқуқ пешниҳод мекунад, то рафта дар сафи артиши Русия дар Украина биҷанганд.

Дар робита ба ин масъала наворҳое аз боздошти сарбозони Русия аз тарафи сарбозони Украина дар шабакаҳои иҷтимоӣ роҳ ёфта буд, ки боздоштшудаҳо мегуфтанд, шаҳрванди Узбекистон ҳастанд ва дар Русия ба сабаби оне, ки асноди будубошашон ба охир расида буд, онҳоро ба ҷанг оварданд.

Мурофиаи додгоҳии Абдуллоҳ Ғурбатӣ оғоз мешавад

Аз ҷониби
firuzihait
-
0

Рӯзи 21-уми сентябри соли ҷорӣ дар Додгоҳи ноҳияи Шоҳмансури шаҳри Душанбе мурофиаи Абдуллоҳ Ғурбатӣ, рӯзноманигори шинохтаи тоҷик баргузор мешавад.

Тавре Радиои Озодӣ дар истинод ба викали мудофеи ӯ Абдураҳмон Шарипов хабар дод, парвандаи Абдуллоҳ Ғурбатиро барои муҳокима як моҳ пеш ба додгоҳ фиристода шуда ва ҳоло маълум нест, мурофиаи ӯ ба таври боз баргузор мешавад ё паси дарҳои баста. Аммо, дар гузашта бо вуҷуди боз эълон шудани мурофиаи баъзе фаъолон ба рӯзноманигорон иҷоза надода буданд, ки ба толори додгоҳ ворид шаванд.

Гуфта мешавад, мақомот ин рӯзноманигори ҷавонро ба таҳқири намояндаи ҳокимият, истифодаи зӯроварӣ ба муқобили намояндаи ҳокимият ва иштирок дар фаъолияти созмонҳои мамнуъ муттаҳам дорад. Худи Абдуллоҳ Ғурбатӣ дар бозпурсиҳо ҳамаи иттиҳомҳоро рад кардааст.

Абдуллоҳ Ғурбатӣ асри рӯзи 15-уми июни соли ҷорӣ аз сӯи масъулини Додситонии ноҳияи Шоҳмансур даъват ва баъдан боздошт гардид.

Мақомот дар аввал Абдуллоҳ Ғурбатиро ба он муттаҳам намуда буд, ки гӯё ӯ як корманди милисаро дар бинои ШВКД Шоҳмансур-1 “лату кӯб” кардааст. Баъдан ба парвандаи ӯ итттиҳоми “иштирок дар фаъолияти созмонҳои мамнуъ” илова карда шуд, ки ин модда аз панҷ то ҳашт сол зиндонро дар назар дорад.

Созмонҳои рӯзноманигорӣ ва ҳомии ҳуқуқи башар аз Ҳукумати Тоҷикистон хоста буданд, ки Абдуллоҳ Ғурбатиро фавран озод карда, парвандаи ӯро қатъ кунад, аммо мақомот ин талаби созмонҳоро мисли ҳамеша нодида гирифт.

Мулоқоти Вазири корҳои хориҷӣ бо Дабири кулли СММ

Аз ҷониби
amrullokhi
-
0

Вазири корҳои хориҷии Тоҷикистон бо Дабири кулли Созмони Миллали Муттаҳид ва муовинаш дар шаҳри Ню-Йорк мулоқот кард.

Акс аз манбаъҳои боз

Бино ба иттилои сомонаи Вазорати корҳои хориҷии Тоҷикистон 19-уми сентябри соли 2022, Сироҷиддин Муҳриддин, вазири корҳои хориҷии Тоҷикистон бо Антониу Гутерриш, Дабири кулли Сомзони Миллали Муттаҳид ва муовинаш Владимир Воронков, роҳбари Дафтари зиддитеррористии СММ (UNOCT) мулоқот кард.

Ба қавли манбаъ, Сироҷиддин Муҳриддин дар мулоқот бо Антониу Гутерриш дар бораи ҳодисаҳои хунини рӯзҳои ахир дар марзи Тоҷикистону Қирғизистон “ба таври муфассал иттилоъ дода” гуфтааст, “Тоҷикистон ҳеҷ гоҳ ташаббускори ҳалли низомии масъалаи марз бо Қирғизистон набуд ва ҳамеша ба равиши сиёсиву дипломатӣ пойбанд мебошад.”

Пас аз ин дидору гуфтугӯҳои Вазири корҳои хориҷии Тоҷикистон бо Владимир Воронков, роҳбари Дафтари зиддитеррористии СММ (UNOCT) низ мулоқоти алоҳидае дошта, дар бораи тақвияти ҳамкориҳои дуҷониба гуфтугӯ карданд.

Инчунин ҷонибҳо “омодагӣ ба Конфронси байналмилалии сатҳи баланд таҳти унвони “Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз ҳаракати террористҳо” (18-19 октябри 2022, Душанбе) дар доираи “Раванди зиддитеррористии Душанбе”-ро баррасӣ карданд.”

Гуфта мешавад, Ҳукумати Тоҷикистон ва дар раъси он Эмомалӣ Раҳмон дар қадами аввал аксари кулли мухолифини сиёсии худро “тероррист” ва “экстримист” медонад ва дар давоми 30 соли раҳбариаш бо ҳамин сиёсат ҳукумат кардааст.

Масъалаи Афғонистон ва хатарҳои эҳтимолӣ аз он сӯи марз баҳси алоҳида ва ҷудо аст, вале мақомоти Тоҷикистон бо баҳонаи қазияи Афғонистон, ки метавонад таваҷҷуҳи ҷаҳониёнро ба худ ҷалб кунад, дар ҳар минтақае, ки фаъолони ҷомеаи маданӣ садояшон баландтар ва ҳақталабиашон бештар шуд, онҳоро низ тероррист эълон карда, бо тамоми тавон саркӯбашон мекунад.

Вазири корҳои хориҷии Тоҷикистон Сироҷиддин Муҳириддин дар ин дидорҳои ахираш бо намоядаҳои воломақоми Созмони Миллили Муттаҳид дар шаҳри Ню-Йорки Амрико низ бештар дар бораи саркӯби фаъолони бадахшонӣ ва дигар мухолифини бурунмарзӣ, ки Тоҷикистон онҳоро низ “тероррист”-у “экстримист” эълон кардааст, гуфтугӯ кардааст.

Амруллоҳи Низом, махсус барои Azda tv

Имонқулов: ҷониби Тоҷикистон 200 кушта ва 400 захмӣ дорад

Аз ҷониби
AZDA TV
-
0

Дабири Шӯрои амнияти Қирғизистон Марат Имонқулов иддао карда, ки бар асари даргирҳои хунини ахири марзӣ аз ҷониби Тоҷикистон беш аз 200 сарбоз кушта ва ҳудуди 400 нафар маҷруҳ шуданд.

Дабири Шӯрои амнияти Қирғизистон Марат Имонқулов

Ба гуфтаи вай, дар ин даргириҳо аз ҷониби Қирғизистон 40 нафар кушта ва беш аз 70 нафар захмӣ шудаанд. Чизе, ки акси оморҳои расмии тақдим намудаи ду кишвар нишон медиҳад.

Имонқулов дар ҳузури хабарнигорон гуфт, “Ман мардуми Тоҷикистонро гунаҳкор намекунам, онҳо дар ин кор гунаҳкор нестанд ва дар ин иғво ширкат накардаанд. Дар ин иғвоҳо доираҳои муайяни сиёсӣ айбдоранд. Мардуми тоҷик гаравгони дасти ин сиёсатмадорон шудааст. Мо нисбат ба мардум даъво надорем. Мо садҳо сол бо сулҳу осоиш умр ба cap мебурдем ва давом хоҳем дод. Аммо мо аз мақомоти Тоҷикистон даъват мекунем, ки минбаъд барои ҳалли мушкилоти марзӣ бо роҳи низомӣ талош накунанд, мо ба ин роҳ намедиҳем”.

Имонқулов зарари умумии ҷониби Қирғизистонро дар натиҷаи даргириҳои рӯзҳои 14-17-уми сентябр 1,5 миллард соми қирғизӣ (баробар ба 18 миллиону 507 ҳазору 277 доллари амрикоӣ) арзёбӣ кард.

Ин иддаои дабири Шӯрои амнияти Қирғизистон дар мавриди омори кушташудагони ҷониби Тоҷикистон дар ҳоле садо медиҳад, ки тибқи оморҳои расмии Вазорати корҳои хориҷии кишвар аз ҷониби Тоҷикистон 41 нафар бо шумули кӯдакон ва ғайринизомиён кушта шудаанд.

Аммо ба маълумоти мақомоти расмии Қирғизистон дар ин даргириҳои 59 шаҳрванди ин кишвар кушта ва 164 нафар маҷруҳ шудааст.

Мақомоти Тоҷикистон то ҳол ба гуфтаҳои дабири Шӯрои амнияти Қирғизистон барои кушташудаҳои Тоҷикистонро зиёд нишон додану аз ҷониби Қирғизистонро камтар аз оморҳои расмӣ баён кардан, вокунише накардааст.

1...299300301...676саҳифаи 300 аз 676

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
37.1 ° C
37.1 °
37.1 °
14 %
3kmh
20 %
Tue
35 °
Wed
39 °
Thu
40 °
Fri
42 °
Sat
43 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст