Бар асари заминларзаи шадид дар ҷанубу шарқи Туркия 912 нафар ҷон бохта 5385 нафари дигар маҷруҳ шудаанд. Дар ин бора раисҷумҳури ин кишвар Раҷаб Тайиб Эрдуғон 6-уми феврал ба расонаҳо иттилоъ дод.

Эрдуғон мегӯяд, то кунун наҷотдиҳандагон ҷони 2470 нафарро аз зери биноҳои фурӯрехта наҷот додаанд. Ба гуфтаи ӯ, бештар аз 9 ҳазор тими наҷотдиҳанда дар ҳоли кумаки зарардидагон ҳастанд.

Раисҷумҳури Туркия гуфт, ин заминларза пас аз соли 1939 сахтарин ва пурхасороттарин заминларза дар торихи ин кишвар ба шумор меравад.

Ба иттилои мақомоти Туркия, бар иловаи талафоти ҷонӣ инчунин 2818 бино сарозер шудааст. Дар ҳамин ҳол муовини расиҷумҳур Фуат Октай гуфт, бештар аз 1000 бино ба куллӣ харобу валонгар шудаанд, ки ин чиз эҳтимоли афзоиши ҷонбохтагонро дар зери биноҳо бештар мекунад.

Шиддати заминларзаро ба шаклҳои гуногун кишварҳои ҳамсоя, Лубнон, Сурия, Ироқу Миср ва Қубрус низ эҳсос карданд. Аз ҷумла, мақомоти Сурия аз кушта шудани 380 ва захмӣ шудани беш аз 600 нафар хабар доданд.

Бино ба маълумоти сабту наворҳое, ки дар шабакаҳои иҷтимоӣ нашр шудааст, заминларза дар минтақаи Бозорчики вилояти Қаҳрамон Мараш бештар аз 1 дақиқа идома пайдо карда, садҳо биноҳои баландошёра ба хок яксон кард.

Ёдовар мешавем, ки соати 4-и бомдоди рӯзи 6-уми феврали соли ҷорӣ заминларзаи шадиде бо қувваи 7.4 дараҷаи Рихтер чанд шаҳри Туркия ва қисме аз Сурияро ларзонд, ки дар натиҷа садҳо кушта ва захмӣ ба ҷо гузошт. Аммо маркази зилзиласанҷии Амрико шиддатнокии ин заминларзаро 7.8 дараҷа гуфтааст.

Раҳбари аҳли суннати Эрон мегӯяд, ки иҳонат кардан ба зиндонӣ ҳаром аст ва касоне, ки иҷозат додаанд, ки бо зӯру шиканҷа эътирофоти иҷборӣ бигиранд, намедонам аз дин чӣ хабар доранд?

Имрӯз, 03-уми феврали соли 2023, мавлавӣ Абдулҳамид Исмоилзиҳӣ дар хутбаи намози ҷумъа дар бораи зиндониҳо суҳбат карда гуфт, “задани зиндонӣ ҷоиз нест, фишор овардан болои зиндонӣ ҷоиз нест, иҳонат кардани зиндонӣ ҳаром аст!”

Раҳбари аҳли суннати Эрон мегӯяд, зиндонӣ эҳсос накунад, ки ин бозҷӯи ман мехоҳад ба ман ҳамла бикунад ва ба дасти душманонам уфтодаам, балки эҳсос кунанд, ки ман ба дасти инсонҳо уфтодаам ва бар илова агар тараф мусалмон бошад, инро бояд эҳсос кунад, ки ман ба дасти як мусалмон уфтодаам ва ҳаққи ман зоеъ (поймол) намешавад.

Имоми масҷиди Маккӣ дар шаҳри Зоҳидони устони Сиистону Балучистони Эрон таъкид мекунад, ки “эътироф ба иҷбор зоеъ кардани ҳаққи зиндонист. Ин таълим таълим ислом нест, ин таълим таълими дин нест ва маълум нест, баъзеҳо, ки ин масоилро иҷозат додаанд, инҳо чӣ тафаккуре доранд, чӣ бардоште аз дин доранд? Ҳамаи инсонҳо ҳурмат доранд!“

Гуфта мешавад, ин хутбаи шадидул лаҳни раҳбари аҳли суннати Эрон дар ҳоле садо медиҳад, ки дар давоми камтар аз чор моҳ мақомоти эронӣ наздик ба 400 нафар ҷавонону наврасони балучро боздошт ва зиндонӣ кардаанд ва хабару гузоришҳои зиёде дар бораи тавҳин, шиканҷа ва гирифтани эътирофоти маҷбурии зиндониҳои сиёсии Эрон дар расонаҳо ва шабакаҳои иҷтимоӣ нашр шуда, ба вокунишҳои зиёде рӯбарӯ шудаанд.

Инчунин 30-уми январи соли ҷорӣ мушовири худи ӯ мавлавӣ Абдулмаҷид Муродзиҳ ва чанд тани дигар аз рӯҳониёни аҳли суннати курдзабонро низ дар дигар минтақаҳои Эрон боздошт карда, пайравони онҳо бо баргузории намоишҳои эътирозӣ хостори озодии онҳо мебошанд, вале аз сӯи дигар ҷонибдорони ҳукумат низ бо роҳандозии иқдомҳое хоҳони аз тариқи эъдом қатл кардани ин рӯҳониён шудаанд ва ҳоло сарнавишти онҳо норӯшан боқӣ мондааст.