Хона блог саҳифа 371

Сафари сарвазири Русия ба Тоҷикистон

Аз ҷониби
AZDA TV
-
0

Қарор аст дар аввалҳои моҳи марти соли ҷорӣ нахуствазири Русия Михаил Мишустин бо як сафари расмӣ ба Тоҷикистон биёяд. Дар ин бора сафорати Тоҷикистон дар Русия хабар дод.

Михаил Мишустин, сарвазири Русия

Сафорати Тоҷикистон дар Русия дар саҳифаи фейсбукияш иттилоъ дод, ки 24-уми январи соли ҷорӣ сафири Тоҷикистон дар Русия Давлатшоҳ Гулмаҳмадзода бо муовини вазири корҳои хориҷии Русия Михаил Галузин мулоқот карданд.

Гуфта мешавад, дар ин мулоқот ҷонибҳо ба масоили омодагӣ ба сафари дарпешистодаи сарвазири Русия “Михаил Владимирович Мишустин ба Ҷумҳурии Тоҷикистон, ки аввали моҳи марти соли ҷорӣ дар назар аст”, гуфтугӯ карданд.

Дар хабар аз аҳдофи ин сафар ва дигар ҷузъиёти он чизе гуфта нашудааст.

Зоҳиран, пас аз буҳрони ҷанг дар Украина Русия талош дорад бо кишварҳои собиқ Шӯравӣ, аз ҷумла Осиёи Марказӣ робитаҳояшро амиқтар кунад. Русия гарчанд шарики стратегии Тоҷикистон ба шумор меравад, вале давоми як соли ахир дида мешавад, сафарҳои шахсиятҳои сатҳи аввали Русия ба Тоҷикистон бешта шудааст.

Баррасии интиқоли нафту гази Қазоқистон ба Тоҷикистон

Аз ҷониби
AZDA TV
-
0

Рӯзи 24-уми январи соли ҷорӣ дар шаҳри Остонаи Қазоқистон масъалаи интиқоли нафту гази ин кишвар ба Тоҷикистон баррасӣ шуд.

Акс аз сомонаи Вазорати корҳои хориҷаи Тоҷикистон

Тавре Вазорати корҳои хориҷии Тоҷикистон иттилоъ медиҳад, сафири фавқулода ва мухтори Тоҷикистон дар Қазоқистон Ибодзода Хайрулло бо вазири энергетикаи Қазоқистон Акчулаков Болат Уралович мулоқоту гуфтугӯ карданд.

Гуфта мешавад, дар ин мулоқот ҷонибҳо масоили ҳамкориҳои дуҷонибаро дар масоили обу энержӣ, аз ҷумла воридоти нафту газ аз Қаоқистон ба Тоҷикстон баррасӣ карданд.

Тоҷикистон маҳсулоти нафтии худро дар шакли омодашудаи бензин ва салярка асосоан аз Русия ва Қазоқистон тавассути ширкати “Фароз”-и мутааллиқ ба Шамсулло Соҳибов, домоди Эмомалӣ Раҳмон ворид мекунад.

Ёдовар мешавем, ки ду сол пеш ширкати “Фароз” аз барҳамхӯрданаш хабар дода буд, вале таҳқиқоти журналистии расонаҳои дохилӣ нишон дода, ки ин ширкат натанҳо аз байн нарафта, балки ба чанд фаръи дигар тақсим шудааст. Ва ҳоло он аз воридоти газу бензин шуруъ карда, то аз қайди техникӣ гузаронидани мошинҳо ва ҳатто баъзе асонди тиббиву раванди қабули донишҷӯён ба донишгоҳҳо ва даҳҳо тиҷорати дигарро зери даст дорад.

Тоҷиконе, ки шаҳрвандии Русияро доранд ба ватанашон баргашта наметавонанд

Аз ҷониби
firuzihait
-
0

Ба зодагони кишварҳои Осиёи Марказӣ, ки шаҳрвандии Русияро доранд, иҷозаи берун шудан аз ин кишварро надодаанд. Дар ин бора бахшии қирғизии Радиои Озодӣ дар истинод ба чанд зодаи Тоҷикистону Қирғизистон хабар дод.

Зодагони Тоҷикистону Қирғизистон, ки мехостанд аз Русия ба ватани худ бираванд, дар марз ба онҳо гуфтаанд, ки барои вуҷуди номашон дар руйхати мобилизатсия то 12-уми феврал иҷозаи тарки кишварро надоранд.

Гуфта мешавад, муҳоҷирони дорои шаҳрвандии Русия даъватнома барои рафтан ба артиш мегиранд ва ба комиссариатҳои ҳарбӣ барои суҳбат даъват намуда, мефаҳмонанд, ки фирор аз сафи қувваҳои мусаллаҳ ҷазои сахт дар пай дорад.

Ин хабар дар ҳоле расонаӣ мешавад, ки 13-уми январи соли ҷорӣ, раиси Кумитаи тафтишоти Русия Александр Бастрикин гуфта буд, хориҷиён, аз ҷумла тоҷиконе, ки шаҳрванди ин кишвар шудаанд, бояд ба ҷанги Русия ба зидди Украина сафарбар шаванд. Бастрикин афзуд, тайи панҷ соли ахир беш аз ним миллион нафар аз Тоҷикистон ва Қирғизистону Узбекистон шиносномаи Русия гирифтаанд ва уҳдадоранд, ки ба сафи артиш ҷалб гарданд.

Дар Бишкек пойтахти Қирғизистон коргарони дорои шиносномаҳои Русияро аллакай ҳушдор додаанд, ки дар шароити мобилизатсия наметавонанд ба онҳо кумак кунанд. Русия бо Қирғизистон ба фарқ аз Тоҷикистон созишнома дар бораи душаҳрвандӣ надорад.

Бар асоси қонунҳои ин ду кишвар ҳар касе, ки дар ҷангҳои хориҷӣ ширкат мекунад, ба ҷавобгарии ҷиноӣ кашида мешавад.

Маълум нест, ки чӣ қадар зодагони Осиёи Марказӣ, ки шаҳрвандии Русияро доранд, аллакай ба артиш даъват шудаанд ва дар ҷанги Украина ширкат мекунанд. Аммо аз хабару гузоришҳои охир шумораи онҳо хеле зиёд буда, дар ин муддат чандин нафар кушта ва ҳатто бе ному нишон шудаанд.

Дар Хатлон 49 нафар аз қурутоб заҳролуд шуд

Аз ҷониби
amrullokhi
-
0

Дар ноҳияи Шамсиддини Шоҳини вилояти Хатлон 49 нафар, ки пас аз хӯрдани қурутоб заҳролуд шуданд, ба бемористонҳо интиқол додаанд.

Имрӯз, 24-уми январи соли 2023 дар деҳаи Чагамаи ноҳияи Шамсиддини Шоҳини вилояти Хатлон 49 нафар пас аз хӯрдани қурутоб заҳролуд шуда, ҳамаи онҳо ба беморхонаҳои ноҳия ва шаҳри Кӯлоб интиқол дода шудаанд.

Сомонаи Радиои Озодӣ ба нақл аз Шароф Рустамов, сардори Раёсати тандурустӣ дар минтақаи Кӯлоб хабар додааст, “пизишкон ҳанӯз дақиқ накардаанд, ки кадом маҳсулот дар қурутоб сабаби заҳролуд шудани сокинон шудааст.” Ва дар бораи тафсилоти ҳодиса дертар маълумот хоҳанд дод.

Дар аксар манотиқи кӯҳистонии Тоҷикистон қурутобхӯрӣ дар фасли замистон ба як расми маъмулӣ табдил шуда аст ва чун аксари мардум дар дигар фаслҳои сол нисбатан вақти камтаре барои дидорбинии ёру дӯстонашон доранд, дар фасли сармо фурсатро ғанимат дониста, ба баҳонаҳои мухталиф мардумро даъват карда, зиёфат медиҳанд. Ин нафарҳое, ки заҳролуд шудаанд, низ дар меҳмонии яке аз сокинони ин ноҳия ҳузур доштанд.

Гуфта мешавад, мақомоти Тоҷикистон то замони таҳияи ин хабар дар бораи ҷузъиёти ин ҳодиса тафсилоте надодаанд, вале бархе шоҳидони ҳол мегӯянд, 24 нафар аз ин заҳролудшудагон дар беморхонаи ноҳия мавриди ташхис ва табобат қарор гирифта ва боқӣ 25 каси дигарро, ки вазъи саломатиашон нисбатан вахимтар арзёбӣ мешуд, ба бемористони шаҳри Кӯлоб интиқол додаанд.

Боздошти раиси ноҳияи Рашт бо иттиҳоми ришвахорӣ

Аз ҷониби
firuzihait
-
0

Раиси ноҳияи Рашт ва раиси дастгоҳи ҳукумати ин ноҳия барои тақсими ғайриқонунии замин ва гирифтани ришва аз ҷониби маъмурони Ожонси зидди фасоди Тоҷикистон боздошт шудаанд.

Гуфта мешавад, боздошти Муқимӣ Раҳимҷон Набизода, раиси ноҳияи Рашт ва Холмуҳаммад Ортиқов, раиси дастгоҳи ин ноҳия рӯзи 22-юми январ дар ҷойи корашон ва дар ҳузури шоҳидон сурат гирифтааст.

Як манбаъ аз Ожонсии зидди фасод ба Радиои Озодӣ хабар дода, ки “Шикоят расид, ки раиси ноҳия замин фурӯхта, дар маркази ноҳия чанд ҷойро ғайриқонунӣ ба соҳибкорон додааст. Далели тақсими ғайриқонунии замин тасдиқ шуда буд, вале раисро ҳангоми гирифтани беш аз 10 ҳазор доллар боздошт карданд. Ришваро раҳбари дастгоҳ гирифта, ҳангоми ба раиси ноҳия додан дастгир шудааст”.

Дар ҳамин ҳол “Isloh.net” дар истинод ба манобеаш мегӯяд, ки “Айни замон Муқимӣ Раҳимҷон Набизода ба сабаб ин ки узви Маҷлиси миллии Маҷлиси Олии Тоҷикистон мебошад, мақоми дахнопазирӣ дорад ва танҳо баъди лағви ваколат ва масунияти дахлнопазирии вай аз тарафи Маҷлиси миллӣ чораи боздошт алайҳи вай татбиқ хоҳад шуд. Бинобар ин қарор аст дар рӯзҳои наздик ҷаласаи фаврии Маҷлиси миллӣ баргузор шавад.”

То ҳол ягон ниҳоди давлатӣ хабари боздошти раиси ноҳияи Рашт ва зердасташро тасдиқ ё рад накардааст.

Раҳимҷон Набизодаи 61-сола, ки аз соли 2019 раёсати ҳукумати ноҳияи Раштро ба дӯш дорад, дар гузашта сардори Идораи молия ва муовини аввали раиси ҳукумати Рашт буд.

Бо вуҷуди шикояти сокинон, боздошту ба ҷавобгарӣ кашидан ва ҳатто танбеҳи раисони шаҳру ноҳияҳои Тоҷикистон кам сурат мегирад. Дар аксар ҳолат ягон раисе ҳам агар боздошт шуд, мавзуи парванда аз фасоду ришва ба сӯистифода аз мансаб тағйир меёбад ё пурра иттиҳомот бекор карда мешаванд.

Танҳо дар соли 2020 Баҳром Иноятзода, шаҳрдори собиқи Кӯлоб баъд аз танқид карданаш аз Бек Сабур қудои раисҷумҳур ба иттиҳоми фасодкорӣ боздошт ва ба 12 сол зиндон маҳкум шуд.

Маъмурони Ожонси зидди фасод дар Тоҷикистон бошанд бештар ба боздошти омӯзгорону пизишкон ва кормандони зинаҳои поини вазорату кумитаҳои давлатӣ машғуланд.

Мулоқоти вазири корҳои хориҷӣ бо ҳамтоёнаш аз Узбекистон ва Покистон

Аз ҷониби
amrullokhi
-
0

Вазири корҳои хориҷии Тоҷикистон дар ҳошияи нишасти Созмони ҳамкории иқтисодӣ бо ҳамтоёнаш аз Узбекистон ва Покистон мулоқот кард.

Бино ба иттилои сомонаи Вазорати корҳои хориҷии Тоҷикистон, Сироҷиддин Муҳриддин дар ҳошияи нишасти Созмони ҳамкории иқтисодӣ дар шаҳри Тошканд бо иҷрокунандаи вазифаи вазири корҳои хориҷии Ҷумҳурии Узбекистон Бахтиёр Саидов ва вазири корҳои хориҷии Ҷумҳурии Исломии Покистон Биловал Бҳутто Зардарӣ дар алоҳидагӣ мулоқот кард.

Дар ин мулоқотҳо сарони дастгоҳҳои дипломатии кишварҳо дар бораи равобити бисёрҷониба бо ҳам гуфтугӯ намуданд ва таъкид карданд, дар татбиқи созишномаҳо ва мувофиқатномаҳо то ҳол ба имзорасида талош варзанд.

Инчунин дар рафти ин мулоқотҳо пешниҳодҳо оид ба густариши ҳамкориҳои тиҷоратию иқтисодӣ, ҳамкорӣ дар соҳаи нақлиёт ва рушди робитаҳои байниминтақавӣ низ мавриди баррасӣ қарор гирифтанд.

Гуфта мешавад, дар кори 26-умин нишасти Созмони ҳамкории иқтисодӣ, ки 23-юми январи соли ҷорӣ дар пойтахти Узбекистон, шаҳри Тошканд ба кор худ оғод кард, ҳайатҳои кишварҳои Осиёи Марказӣ, Озарбойҷон, Туркия, Эрон ва Покистон, инчунин Котиботи Созмони ҳамкории иқтисодӣ ширкат карданд.

Сарвазири Сувед: Ҳар амали қонунӣ, маънои дуруст будани онро надорад

Аз ҷониби
AZDA TV
-
0

Пас аз ҳодисаи сӯзондани Қуръон дар назди сафорати Туркия дар Стокҳолм сарвазири Сувед Улф Кристерссон бо нашри изҳороте онро маҳкум карда, гуфт, ҳар амале, ки қонунӣ бошад маънои онро надорад, кори дуруст аст.

Бо нашри ин изҳороташ Кристерссон гуфт: “Озодии баён ҷузъи асосии демократия аст, локин ҳар чизе, ки қонунӣ аст, ба ин маъно нест, ки ҳатман кори дурусте бошад. Сӯзондани китоби муқаддас барои аксари мардум амали бисёр нописанду зишт маҳсуб мешавад.”

Сарвазири Сувед дар идомаи изҳороташ аз мусалмонон узрхоҳӣ карда, гуфтааст, “Мехоҳам ба тамоми мусалмононе, ки ба сабаби ончи ки гузашт нороҳат шуданд, изҳори ҳамдардӣ кунам “.

Изҳороти сарвазири Сувед дар ҳолест, ки пештар аз ӯ мақомоти Туркия гуфта буданд, ки сӯзондани китоби муқаддаст ҳечгоҳ ба маънои озодӣ баён шуда наметавонад.

Ёдовар мешавем, ки рӯзи шанбе, 21-уми январи соли ҷорӣ сиёсатмадори рости ифротии суведӣ-донморкӣ Расмус Полудан як нусхаи Қуръонро дар назди сафорати Туркия дар Стокҳолм оташ зад.

Қарор буд, рӯзи 27-уми январи соли ҷорӣ вазири дифои Сувед Пол Юнсон ба Анқара сафар кунад, аммо чун ҳукумати Сувед рӯзи ҷумъа ба сиёсатмадори ифротӣ Полудан иҷозат дод, дар назди сафаорати Туркия дар Стокҳолм гирдиҳамоии эътирозӣ бо сӯзондани Қуръон баргузор кунад, ҳукумати Тукрия сафари вазири дифои Суведро лағв кард.

Баргузории Маҷлиси васеи Ҳукумати Тоҷикистон

Аз ҷониби
amrullokhi
-
0

Дар шаҳри Душанбе ҷаласаи васеи Ҳукумати Тоҷикистон бо ҳузури Президент Эмомалӣ Раҳмон, Қоҳир Расулзода, Сарвазири кишвар ва дигар аъзои ҳукумат оғоз ба кор кард.

Бино ба иттилои сомонаи Хадамоти Президенти Тоҷикистон, субҳи имрӯз, 24-уми январи соли 2023 “дар бинои Ҳукумати Ҷумҳурии Тоҷикистон таҳти раёсати Эмомалӣ Раҳмон маҷлиси васеи Ҳукумати Ҷумҳурии Тоҷикистон ба кори худ оғоз намуд.”

Ба қавли манбаъ, “дар кори маҷлис роҳбарият ва аъзои Ҳукумати кишвар, Дастгоҳи иҷроияи Президенти Ҷумҳурии Тоҷикистон ва воҳидҳои сохтории он, роҳбарони мақомоти марказии давлатӣ, идораҳои назди Президент ва Ҳукумат, корхонаю муассисаҳои ҷумҳуриявӣ, раисони вилоятҳо ва шаҳру ноҳияҳо, роҳбарони муассисаҳои таҳсилоти олӣ, марказҳои татбиқи лоиҳаҳои давлатии сармоягузорӣ, бонкҳои давлатӣ ва саҳҳомӣ, рӯзномаю маҷаллаҳои расмӣ ва дигар шахсони масъул иштирок доранд.”

Гуфта мешавад, дар ин “маҷлиси васеи Ҳукумати Ҷумҳурии Тоҷикистон нишондиҳандаҳои рушди иқтисодию иҷтимоии кишвар дар соли 2022 ва вазифаҳои асосӣ барои соли 2023 муайян карда мешавад.”

Мулло ба хотири тӯи писараш боздошт шуд

Аз ҷониби
firuzihait
-
0

Абдулҳаннон Усмонов, сокини ноҳияи Кӯшониён, ки монеи бо рақсу мусиқӣ гузаронидани тӯйи домодии писараш шуд, мавриди боздошту бозпурсии мақомот қарор гирифтааст.

Акс аз пойгоҳи хабарии “Бомдод”

Чанд рӯз аст, дар шабакаҳои иҷтимоӣ наворе давр мезанад, ки дар он дида мешавад як сокини ноҳияи Кӯшониёни вилояти Хатлон монеи бо рақсу мусиқӣ гузаронидани тӯйи домодии писараш мешавад.

Дар ин навор дида мешавад, ки домоду арӯс дар тан либоси тӯёна зери рақсу мусиқӣ вориди ҳавлӣ мешаванд. Вале дар ин ҳолат як марди ришдор, ки дар тан ҷомаи тоҷикӣ дорад, талаб мекунад, ки рақсу мусиқиро бас кунанд ва “дигар дар инҷо чунин масхарабозӣ накунанд”. Дар натиҷа рақсу мусиқӣ қатъ мешавад ва меҳмонон низ пароканда мегарданд.

Аз баҳси ин мард бо домод бармеояд, ки ӯ падари домод аст. Чун ӯ бо норозигӣ мегӯяд, бо вуҷуди аз пеш талабу шарт гузоштан, домод ҳурмати сухани падарашро шикаста, навозандагонро ба тӯй даъват кардааст.

Дертар маълум шуд, ки ин нафар Усмонов Абдулҳаннон Бурҳонович ном дошта, дар деҳаи Коминтерни ноҳияи Кӯшониён зиндагӣ мекунад ва миёни мардум бо номи домулло Абдулҳаннон маъруф будааст .

Дар ҳамин ҳол пойгоҳи хабарии “Бомдод” дар истинод ба манобеаш хабар дод, ки “писари домулло Абдулҳаннон ваъда дода будааст, ки тӯйро тибқи фармудаи падараш доир мекунад, вале вақте ки ӯ аз хона баромада, куҷое меравад, инҳо ба рақсу мусиқӣ сар мекунанд. Инро касе ба домулло хабар мерасонад ва ӯ аз ними роҳ ба хона баргашта, ба қавли маъруф, тӯйро “клет” мекунад. Баъд аз он домулло мавриди пурсуҷӯи мақомот гирифтааст”.

Дар ҳамин ҳол саҳфаҳои фейкии наздик ба мақомоти Тоҷикистон, аксеро дар фейсбук нашр кардаан, ки дар он домулло Абдулҳаннон дар кадом як идораи давлатӣ дар паси миз нишааст ва баъзе ин саҳфаҳои фейкӣ, ин аксро ба ин навъ шарҳ додаанд, ки мақомоти қудратии Тоҷикистон як азви ҲНИТ-ро боздошт кардаанд.

Аммо Мирзораҳим Карим, муовини раиси Ҳизби наҳзати исломии Тоҷикистон дар суҳбат ба “Azda tv” аъзои ҲНИТ будани мулло Абдулҳаннонро рад кард.

То ҳол ягон ниҳоди расмии Тоҷикистон хабари аз ҷониби мақомоти интизомӣ мавриди боздошт ва бозпурсӣ қарор гирифтани ин сокини ноҳияи Кӯшониёнро  рад ё тасдиқ нақарданд.

Навори мазкур дар шабакаҳои иҷтимоӣ баҳсҳои зиёдеро ба бор оварда, корбаронро ба ду гурӯҳ тақсим кардааст. Гурӯҳи аввал ин амали домуллоро танқид карда, ба рафтори Толибон ташбеҳ намудаанд.

Гурӯҳи дуввум аз мулло Абдулҳаннон пуштибонӣ намуда, ба гуфтаи журналист Азизи Каримов, “Ҳамин мард заррае аз марзи қонун берун пой намондааст! Ин бечора ба мо кор надорад, ки дар хонаамон рақс мекунем ё суруд мехонем. Чаро ӯ ҳақ надошта бошад, ки сураш бидуни рақсу бозӣ бигзарад? Хонаи ӯ ҳарими хусусиаш аст! Шумо чӣ ҳақ доред ба ҳарими ӯ, ки сар мехалонед? Аз ин ҳам бигзарем. Ҳич кадоме аз мо ҷасорати инро надорем, ки аз мақомот талаб бикунем, то бегуноҳеро ҷазо надиҳанд. Аммо дар ин мавридҳо барои талаби ҷазо ҳама далеру ҷасур мешавем. Дареғу афсӯс!”

ВМКБ: Ҳамкории Толибон бо Тоҷикистон

Аз ҷониби
amrullokhi
-
0

Дар манотиқи назди сарҳадии Тоҷикистон бо Афғонистон ҳамкориҳои Толибон бо мақомоти кишвар афзоиш ёфтааст.

Акс аз манбаъҳои боз

Имрӯз, 23-юми январи соли 2023, Забеҳуллоҳи Муҷоҳид, сухангӯи Толибон дар саҳфаи твиттериаш дар бораи ҳамкориҳои дуҷонибаи Аморати исломии Афғонистон бо мақомоти Тоҷикистон дар вилояти Мухтори Кӯҳистон Бадахшони Тоҷикистон ва вилояти Бадахшони Афғонистон хабар дод.

Ба қавли Забеҳуллоҳи Муҷоҳид, “тими пизишкӣ ва таҷҳизоти Вазорати сиҳҳати оммаи Афғонистон аз тариқи Тоҷикистон барои ташхис ва дармони беморон дар вулусволии Вохони Бадахшон вориди он минтақа шуданд.”

Дар  ҷамъи ин гурӯҳ, ки як тими хабарнигорон ҳам аз телевизоини миллии Афғонистон онҳоро ҳамроҳӣ карданд. Ба гуфтаи хабарнигорон, дар ин минтақа беморие хурӯҷ карда ва ба қавли сокинон дар натиҷа он 21 нафар ҳам ҷони худро аз даст додааст.

То замони таҳияи ин хабар Вазорати тандурустӣ ва ё дигар мақомоти Тоҷикитсон, аз он ҷумла Кумитаи давлатии амнияти миллии Тоҷикистон масъули ҳифзи сарҳадоти кишвар аст, мисли пешин дар бораи ин ҳамкориҳои дуҷониба ҳеч иттилое надодаанд.

Пеш аз ин Толибон эълон карда буданд, ки масъулини ширкати Бришнои Афғонистон қарордоди навбатиеро бо ширкати Барқи тоҷик дар хусуси хариди нерӯи барқ барои соли 2023 дар Туркия имзо карданд.

Аз сӯи дигар тарафи Афғонистон Тоҷикистонро ба пойбанд набудан ба бандҳои ин қарордоди бузурги тиҷоратӣ муттаҳам карда, сокинони вилояти Таххори ҳамсоякишвар ҳам иддаъо доранд ба фарқ аз гузашта, шабҳо аз ҷониби Тоҷикистон нерӯи барқ хомӯш карда мешавад.

Гуфта мешавад, рафту омад, доду гирифтҳои тиҷоратӣ ва ҳамкориҳои бузурги иқтисодӣ дар ҳоле байни Тоҷикистон ва Аморати исломии Афғонистон рӯз то рӯз афзоиш меёбад, ки Тоҷикистон расман Толибон як созмони террористӣ медонад ва ҳар навъ ҳамкории шаҳрвандон бо ин гурӯҳро ҷиноят дониста, то кунун даҳҳо нафарро ба ин баҳона зиндонӣ кардааст.

1...370371372...800саҳифаи 371 аз 800