Ҷустуҷӯ кунед
Ҷустуҷӯ
3.9 C
Dushanbe
Хона блог саҳифа 47

Эълони мукофотҳо барои иштирокчиёни бозиҳои олимпӣ

Аз ҷониби
AZDA TV-2
-
0

Дар бозиҳои тобистонаи олимпӣ-2024 дар шаҳри Парижи Фаронса 14 нафар аз Тоҷикистон иштирок мекунад.

Бино ба иттилои расонаҳо, мақомоти расмӣ дар Тоҷикистон эълон кардаанд, ки барои ҳар як нафар аз медаловарони бозиҳои тобистонаи олимпӣ дар шаҳри Парижи Фаронса то 300 ҳазор сомонӣ ва як хона дар биноҳои баландошёна дар шаҳри Душанбе тақдим карда мешавад.

Ба ин тартиб барои шахсоне, ки дар ин бозиҳо ғолиб омада, медали тило ба Тоҷикистон меоранд, 300 ҳазор сомонӣ ва як хонаи сеҳуҷрагӣ, барои касоне, ки соҳиби медали нуқра мешаванд, 250 ҳазор сомонӣ ва як хонаи дуҳуҷрагӣ ва барои онҳое, ки сазовори ҷои сеюм шуда, соҳиби медали биринҷӣ мешаванд, 200 ҳазор сомонӣ ва як хонаи якҳуҷрагӣ тақдим карда мешавад.

Имсол дар бозиҳои тобистонаи олимпӣ дар шаҳри Париж Темур Раҳимов, варзишгари шинохтаи кишвар парчамбардори ҳайъати варзишгарони Тоҷикистон интихоб шудааст. Ин ҳайъат аз 14 нафар иборат буда, 6 нафар ҷудокор, 3 муштзан, 2 шиновар, ва боқӣ 1 нафар дар риштаи теквондо, 1 нафар гӯштии озод ва 1 каси дигар щам дар риштаи давидан бо ҳамтоёни худ рақобат мекунанд.

Гуфта мешавад, бозиҳои тобистонаи олимпӣ ба муддати 2 ҳафта, аз 26-уми июл то 11-уми августи соли ҷорӣ дар шаҳри Париж, пойтахти Фаронса баргузор мешаванд. Дар назар аст, ки дар ин бозиҳо 10 ҳазору 500 нафар варзишкор аз 206 кишвари дунё ширкат кунанд.

Баррасии ҳамкориҳои Тоҷикистон ва Туркия

Аз ҷониби
AZDA TV-2
-
0

Мақомоти олии Тоҷикистон ва Туркия дар бораи наҳваи ҳамкориҳои худ суҳбат карданд.

Бино ба иттилои расмӣ, имрӯз, 15-уми июли соли 2024 Исматулло Насредин, муовини якуми вазири корҳои хориҷии Тоҷикистон бо Умумт Аҷар, сафири фавқулода ва мухтори Туркия дар Тоҷикистон мулоқот кардааст.

Вазорати корҳои хориҷии Тоҷикистон бидуни ироаи ҷузъиёти ин мулоқот гуфтааст, ки ҷонибҳо дар вақти ин дидор дар бораи “муносибатҳои Тоҷикистону Туркия дар доираи созмонҳои байналмилалӣ ва минтақавӣ” гап заданд.

Мулоқоти сафири Туркия бо муовини якуми вазири корҳои хориҷии Тоҷикистон дар шаҳри Душанбе дар ҳоле баргузор шудааст, ки ахиран садоҳои эътирозӣ алайҳи сиёсатҳои ҳукумати Тоҷикистон дар робита бо маҳдуд кардани озодиҳои динӣ алайҳи мусалмонон, ва бахусус манъ кардани пӯшишҳои мазҳабӣ, хариду фурӯш, воридоту содирот ва ҳар гуна таблиғи онҳо дар дохили кишвар манъ шуда, ин амр вокунишҳои мухталиферо низ аз Туркия алайҳи Тоҷикистон ба бор овардааст. Коре, ки мақомоти Тоҷикистонро хеле нороҳат кардааст.

Гуфта мешавад, чанд рӯз қабл як гурӯҳ аз мусалмонони турк дар назди консулгарии Тоҷикистон дар Истанбул тазоҳурот карда буданд. Дар видеое, ки нашр шуда буд, дида мешуд як гурӯҳ аз шаҳрвандони турк зоҳиран дар назди консулгарии Тоҷикистон чамъ шуда, ва шиорхои “УМАТИ ИСЛОМ ЗАЛОЛАТРО ҚАБУЛ НАДОРАД”, ва “ҲАРАКАТИ ИСЛОМӢ МАНЪ КАРДА НАМЕШАВАД” шунида мешуд.

Инчунин Анҷумани олимони мусалмон (мақарраш дар Истанбул), бо нашри як изҳороти расмӣ манъи ҳиҷоби бонувон дар Тоҷикистонро маҳкум ва қарори ҳукумати Тоҷикистонро дар ин робита “мухолафати сареҳ бо шариати исломӣ” дониста, таъкид карда буд, ки мақомоти тоҷик бояд ин қарори худро бекор кунанд.

Чин дар Тоҷикистон нерӯгоҳи офтобӣ сохтанист

Аз ҷониби
AZDA TV-2
-
0

Як ширкати чинӣ гуфта, ки қасд дорад барои тавлиди нерӯи барқ дар вилояти Суғд нерӯгоҳи офтобӣ бисозад.

Бино ба иттилои расмӣ, 15-уми июли соли 2024, раҳбари минтақавии ширкати “Чайна Датанг” (China Datang) эълон кардааст, ки ин ширкат қасд дорад дар вилояти Суғди Тоҷикистон нерӯгоҳи бақии офтобӣ бисозад.

Ба қавли манбаъ, Раиси вилояти Суғд Раҷаббой Аҳмадзода ва директори генералии корпоратсияи чинии «China Datang» дар Осиёи Марказӣ Ван Хао дар шаҳри Хуҷанд мулоқот карда, ҷонибҳо дар бораи ба роҳ мондани ҳамкориҳои худ суҳбат кардаанд.

Дар рафти мулоқот раҳбари ин ширкати чинӣ гуфта, дар Узбекистон нерӯгоҳи офтобӣ сохтаанд ва ҳоло ширкат “нақша дорад, ки дар вилояти Суғд низ неругоҳи офтобиро ташкил карда, то 500 мегаватт неруи барқ истеҳсол намояд.”

Пеш аз ин масъулини ин ширкат дар мулоқот бо раиси вилояти Хатлон низ гуфта буданд, ин ширкат “нақша дорад, ки дар вилояти Хатлон корхонаи саноатии батареяҳои офтобиро, ки энергияи тоза истеҳсол мекунанд, таъсис диҳад.”

Гуфта мешавад, ширкати «China Datang» соли 2002 таъсис ёфта, дар ҳоли ҳозир яке аз бузургтарин таъминкунандагони неруи барқ дар Чин аст. Намояндагиҳои ин ширкат дар беш аз 10 кишвар, аз ҷумла Камбоҷа, Лаос, Сингапур, Индонезия ва Узбекистон ҳам фаъолият мекунанд.

Баҳси пойгоҳи низомии Чин дар Тоҷикистон доғ мешавад

Аз ҷониби
AZDA-TV
-
0

Намояндаи Вазорати хориҷаи Чин хабари расонаҳо дар бораи бунёди пойгоҳи низомӣ дар Тоҷикистонро рад кардааст.

10-уми июли соли ҷорӣ, нашрияи ” Telegraph “-и бритониёӣ хабар дода буд, ки Чин тақрибан даҳ сол боз дар Тоҷикистон пойгоҳи низомӣ бунёд мекунад.

Дар хабар гуфта мешавад, ки пойгоҳи низомии махфии Чин дар наздикии рустои Шаймаки Вилояти Мухтори Кӯҳистони Бадахшони Тоҷикистон дар наздикии марз бо Афғонистон ҷойгир буда, тавассути моҳвора  кашф шудааст.

Аммо сухангӯи Вазорати хориҷаи Чин Лин Ҷиан дар як нишасти матбуотӣ хабар дар бораи бунёди пойгоҳи низомӣ дар қаламрави Тоҷикистонро рад кард.

Лин Ҷиан гуфтааст, ки аз ин кор огоҳ нест, аммо “бо итминон метавонам бигӯям, ки Чин ҳамеша сиёсати мустақил ва сулҳҷӯёнаи хориҷиро риоя мекунад ва дар Осиёи Марказӣ ҳеҷ пойгоҳи низомие надорад”.

Хабари сохта шудани пойгоҳи низомии чиниҳо дар хоки Тоҷикистон чанд сол боз баҳсбарангез боқӣ мемонад ва ҳамеша мақомдорони Тоҷикистону Чин вуҷуди пойгоҳи низомии чиниро дар хоки Тоҷикистон рад мекунанд.

Аммо соли 2019 рӯзномаи амрикоии “Вашингтон Пост” навишта буд, ки Ҷумҳурии Мардумии Чин дар Тоҷикистон чанд сол аст, як посгоҳи наздимарзӣ дорад.

Дар соли 2020 сокинони деҳаи Шаймаки ноҳияи Мурғоби Бадахшон низ вуҷуди пойгоҳи низомӣ ва сарбозони чиниро дар ин минтақа тасдиқ карда, гуфта буданд, ки пайваста парвози дронҳои низомиро дар фарзои ин минтақа мушоҳида мекунанд.

Радиои Озодӣ моҳи октябри соли 2021 дар такя ба як санади дар дасташ буда, иттилоъ дода буд, ки дар ин пойгоҳ кормандони чинӣ фаъолият доранд, вале худи иншоот феълан дар ихтиёри Душанбе аст.

Илова ба ин, бар асоси санадҳо, дар дидори раисиҷумҳури Тоҷикистон Эмомалӣ Раҳмон ва вазири дифои Чин Вэй Фэнҳэ моҳи июли соли 2021 масъалаи пурра ва ройгон ба ихтиёри Чин додани ин пойгоҳ дар Шаймаки ноҳияи Мурғоб суҳбат шудааст.

Натиҷаҳои ин гуфтушунид то ҳол расонаӣ нагаштааст ва маълум нест ин пойгоҳ ва замини он ба дасти чиниҳо гузаштааст ё на.

Тоҷикистон паҳподҳои худро месозад

Аз ҷониби
AZDA.TV
-
0

Тоҷикистон тасмим гирифтааст, ки паҳподҳои низомии худро бисозад ва аллакай барномаи рушди ин навъи ҳавопаймоҳоро тасдиқ кард.

Тавре хабаргузории Sputnik Тоҷикистон хабар дод, Вазорати адлияи Тоҷикистон дар сомонаи худ матлаберо нашр карда, ки гуфта мешавад, мақомоти кишвар “консепсияи рушди ҳавопаймоҳои бесарнишинро барои давраи то соли 2044 қабул кардааст.”

Дар матлаби Вазорати адлия дарҷ гардида, ки тибқи консепсияи пазируфташуда, Тоҷикистон бояд худаш паҳподҳои низомияшро бисозад ва ҳамчунин мутахассисонро барои истифодаи онҳо омода созад.

“Консепсияи мазкур бо мақсади муайян кардани роҳу воситаҳои ноил шудан ба рушди ҳавопаймоҳои бесарнишин ва имкони ба сатҳи нав баровардани амнияти Тоҷикистон таҳия шудааст”, – омадааст дар санад.

Дар санад ҳамчунин зикр гардида, ки ин паҳподҳо бо ҳадафи “таъмини амнияти давлатӣ, геодезӣ, кишоварзӣ, топографӣ, нақлиёт, пешгирӣ ва рафъи оқибатҳои офатҳои табиӣ” ва ғайра сохта мешаванд, ки то ин дам Тоҷикистон чунин имкониятҳоро надошт.

Ин ҳам дар ҳолест, ки дар пайи даргириҳои марзии Тоҷикистону Қирғизистон мақомоти тоҷик бо мақсади таъмини амният кӯшиши хариди паҳподҳои туркии “Байрақдор”-ро карда буданд, вале Туркия онро ба Тоҷикистон нафурӯхт. Дар ҳоле, ки Туркия аз ин навъ паҳподҳо ба Қирғизистон фурӯхт ва ҳатто дар як даргирии ахир, ки пурқурбонӣ ба шумор мерафт, аз онҳо истифода ҳам кард.

Аммо дар соли 2022 ширкатҳои эронӣ дар Тоҷикистон корхонаи истеҳсоли паҳподро роҳандозӣ карданд. Корхонаи сохти эронӣ паҳподҳоеро бо номи “Абобил-2” истеҳсол мекунад.

Худкушӣ ё қатли сарбоз дар Фархор?

Аз ҷониби
AZDA-TV
-
0

Ҳакимҷон Самадови 19-сола, сарбози Қушунҳои сарҳадӣ дар марзи Тоҷикистон бо Афғонистон аз зарби тир ҷон бохтааст.

Ин ҳодиса рӯзи 5-уми июли соли ҷорӣ замоне рух додааст, ки сарбоз дар манораи дидбонӣ дар ноҳияи Фархор навбатдорӣ мекардааст.

Бино ба иттилои Радиои Озодӣ, мақомот марги ин сарзбози нерӯҳои марзбониро худкушӣ номидаанд, аммо пайвандонаш ба ин фарзия бовар надоранд ва ба Додситонии низомӣ барои таҳқиқи дурусти ҳодиса шикоят бурдаанд.

Ҳалимҷон Самадов, падари Ҳакимҷон бар ин бовар аст, ки писараш зери шиканҷа фавтидааст, чун дар баданаш нақши сиёҳу кабуд ҷой дошт. Инчунин падари сарбоз гуфтааст, ки дар бадани Ҳакимҷон ду тир зада шудааст, як тир аз тарафи гулӯяш рафта ва тири дигар аз кому бинияш баромадааст.

Дар ҳамин ҳол мақомот як фармондеҳи бахши марзбонии 0307-и Нерӯҳои марзбонӣ дар Фархор бо гумони “берун рафтан аз ҳади ваколат” боздошт карда, рафтораш нисбат ба Ҳакимҷонро таҳқиқ доранд.

Ин бори аввал нест, ки дар расонаҳо хабари марги сарбозон нашр мешавад. Дар аксар ҳолат мақомот бо вуҷуди шикояти сокинон, ки фарзандашон замони хидмат кушта шудааст, марги сарбозонро ба худкӯшӣ ё ягон навъи беморӣ рабт медиҳанд.

Ваколатдори ҳуқуқи инсон дар Тоҷикистон дар як гузориши солонаи худ гуфта, ки дар соли 2023 марги 40 сарбоз дар артиш сабт шуда, аз ин шумора 8 маврид худкушӣ буда, 6 нафар аз беморӣ фавтиданд.

Чанде пеш расонаҳо аз марги сарбоз Солеҳҷон Солиев дар фурӯдгоҳи низомии Айнӣ хабар дода буданд. Додситони ҳарбии Душанбе марги ин сарбозро ба бемории дил рабт додааст, аммо пайвандони ин сарбоз мегӯянд, ки ба фарзияи расмӣ бовар надоранд, зеро дар тани сарбоз изи захм буд.

Бояд гуфт, марги ҷавонон ва бадрафторӣ дар қисмҳои ҳарбии кишвар нисбати сарбозон боис шудааст, ки ҷавонон аз рафтан ба хидмат даст мекашанд ва мақомот барои ҷалби онҳо аз усулҳои “облава” ва фишор ба пайвандону наздиконашон истифода мебаранд. 

Коршиносон бар ин назаранд, ки сохтори Қувваҳои мусаллаҳи кишвар ба як тағйиротӣ куллӣ ниёз дорад. 

Муҷозоти як узбекистонӣ барои иштирок дар ҷандги Украина

Аз ҷониби
AZDA.TV
-
0

Як шаҳрванди Узбекистон бо иттиҳоми ширкат дар ҷангҳои хориҷӣ маҳкум ба зиндони ислоҳӣ шуд.

Додгоҳи шаҳри Оҳангарони Узбекистон шаҳрванди ин кишвар Шавкат Юлдошевро, ки гуфта мешавад, дар суфуфи артиши Русия алайҳи Украина ҷангидааст, бо ҷурми “зархаридӣ” ба муҳлати 2,5 сол ба корҳои ислоҳӣ маҳкум кард.

Гуфта мешавад, Юлдошев 26 сол дошта, охирҳои соли 2019 барои кор ба Русия рафта буд. Аммо Хадамоти матбуоти Додгоҳи олии Узбекистон мегӯяд, ӯ моҳи сентябри соли 2021 дар Русия бо ҷурми қочоқи маводи мухаддир боздошт ва ба 7 соли зиндон маҳкум мешавад.

Шавкат Юлдошев дар ҷанг алайҳи Украина увзи ширкати хусуси низоми “ВАГНЕР” буддааст. Гуфта мешавад, ӯро ин ширкати низомӣ баъд аз як соли зиндон бо ваъдаи пул ва озодии комил аз муҷазот ба ҷанг бурдааст.

Расонаҳо ҳукми 2,5 соли корҳои иҷбории Додгоҳи Узбекистонро нисбати Шавкат Юлдошев ҳукми сабук арзёбӣ карданд, вале мушаххас нест чаро Додгоҳ ба Юлдошев чунин муҷозоти сабук додааст, дар ҳоле ки Қонунгузории Узбекистон барои иштироки шаҳрвандони ин кишвар дар ҷангҳои хориҷӣ аз 5 то 7 соли зиндонро пешбинӣ мекунад.

Додгоҳи олии Узбекистон гуфта, ки Юлдошев дар задухӯрдҳои Украина фаъолона иштирок кардааст, ҳатто бо медали “БАРОИ ШУҶОАТ” қадрдонӣ шудааст. Гуфта мешавад, Шавкат Юлдошев барои иштирок дар ҷанг алайҳи Украина 10800 долар ба даст овардааст.

Талаби ҳабси Сулаймон Давлатов рад шуд

Аз ҷониби
AZDA-TV
-
0

Талаби ҳабси Сулаймон Давлатов аз сӯи Додгоҳи олии Литва рад шуд.

Хадамоти муҳоҷирати Литва қаблан аз Додгоҳ олии ин кишвар хоста буд, ки Сулаймон Давлатов, паноҳандаи тоҷик дар ин кишвари аврупоиро ба ҳабс гирад. Ба иддаои Хадамоти муҳоҷирати ин кишвар, Сулаймон Давлатов ба амнияти миллии Литва хатар доштааст.

Ӯ моҳи апрели имсол бо гумони “хатар ба амнияти миллӣ” дар Вилнюс, пойтахти Литва дастгир шуд ва то аввали моҳи июн дар боздоштгоҳ буд. Аммо 4-уми июн додгоҳе дар шаҳри Вилнюс Давлатовро бо “далели доштани ҳаққи паноҳандагӣ ва фарзандони хурдсол” аз боздоштгоҳ озод кард, вале Хадамоти муҳоҷирати Литва дубора аз Додгоҳ хоста буд, то паноҳандаи тоҷикро ба ҳабс гирад.

Худи ӯ рӯзи 10-уми июл ба Радиои Озодӣ гуфтааст, Додгоҳи олии Литва пас аз шунидани изҳороти ӯ пешниҳоди боздошташ аз сӯи Хадамоди муҳочирати ин кишварро рад кард.

Сулаймон Давлвтов собиқ узви “Гурӯҳи 24” ва Анҷумани нерӯҳои созандаи Тоҷикистон буда, яке аз мунтақидони ҳукумати Эмомалӣ Раҳмон ба шумор меравад.

Кумитаи ҳолатҳои фавқулодда ҳушдор медиҳад!

Аз ҷониби
AZDA.TV
-
0

Рӯзи 10-уми июл Кумитаи ҳолатҳои фавқулоддаи Тоҷикистон бо нашри иттилоияе аз боришоти сахту омадани селҳо сокинону меҳмонони кишварро ҳушдор дод!

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо такя ба иттилои Агентии обуҳавошиносии кишвар ба шаҳрвандон ва меҳмонон ҳушдор медиҳад, ки имрӯз ва фардо (11-12-уми июл) дар баъзе ноҳияҳои тобеи ҷумҳурӣ, вилояти Суғд ва дар ғарби Вилояти Мухтори Кӯҳистони Бадахшон хатари омадани сел вуҷуд дорад.

Ҳамчунин КҲФ хабар медиҳад, ки рӯзҳои 13-14 июли соли 2024 дар чанде аз навоҳии вилояти Хатлон, ноҳияҳои тобеи ҷумҳурӣ ва шаҳри Душанбе “бинобар тағйирёбии обу ҳаво тӯфони гарду ғубор дар назар аст.”

Кумитаи ҳолатҳои фавқулодда дар робита ба ин ҳолат “аз аҳолӣ хоҳиш мекунад, ки ба беморони гирифтори бемориҳои дилу раг, диабети қанд ва гипертония таваҷҷуҳи хоса зоҳир намоянд.”

Ин ниҳоди давлатӣ ба сокинон тавсия медиҳад, ки дар чунин ҳолатҳо бо латтаи намнок зуд-зуд хонаҳои худро тоза кунанд ва “дар ҳолати зарурӣ пӯшидани ниқобҳои тиббиро” фаромӯш накунанд.

Ҳамзамон аз сокинон хоста шуда, ки “то ҳадди имкон аз сафарҳо ба минтақаҳои хатар, ҷамъоварии ҳезум ва доруворӣ худдорӣ кунанд.” Ва инчунин ҳангоми ҳаракат аз тариқи роҳҳи кӯҳиву ағбаҳо эҳтиёт кунанд.

Ҳушдори КҲФ дар ҳолест, ки рӯзи 8-уми июл дар ноҳияи Айнӣ ва дигар ноҳияҳои вилояти Суғд бар асари боришоти сахт сел омада, қисме аз роҳу каналҳо ва заминҳои кормау нуқтаҳои ёрирасонро хароб кард. КФҳ мегӯяд, хушбаахтона, селҳо дар вилояти Суғд талафоти ҷонӣ надошт.

“Алҷазира”-и Қатар Тоҷикистонро реклама мекунад?

Аз ҷониби
AZDA TV-2
-
0

Мақомоти Тоҷикистон мехоҳанд мавзеъҳои сайёҳатии кишварро аз тариқи шабакаи “Алҷазира”-и Қатар “реклама” кунанд.

Бино ба иттилои расмӣ, 9-уми июли соли 2024, Нурмурод Маҳмадалӣ, сафири фавқулъода ва мухтори Тоҷикистон дар давлати Қатар бо Аҳмад бин Солим ал-Ёфиъӣ, директори иҷроияи шабакаи иттилоотии “Алҷазира” дар шаҳри Давҳа мулоқот кардааст.

Ба қавли манбаъ, дар рафти ин мулоқот ҷонибҳо дар бораи “таърих, урфу одатҳои миллӣ, унсурҳои таҳаммулпазири қадимаи халқи тоҷик, фазо ва низоми сармоягузорию имкониятҳои нодири сайёҳии Тоҷикистон маълумоти муфассал ироа намуд ва дар ин замина инъикоси мавзеъҳои нодири сайёҳии Тоҷикистон дар ин шабакаи ҷаҳонӣ баррасӣ шуданд.”

Гуфта мешавад, Тоҷикистон дар чанд соли ахир барои ҷалби сайёҳони кишварҳои арабӣ ва бахусус кишварҳои ҳошияи Халиҷи Форс талошҳои зиёде кардааст. Инчунин ба хотири тарғиби сайёҳони кишварҳои арабӣ барои ба Тоҷикистон омада, ба сурати яктарафа гирифтани раводидро низ барои шаҳрвандони кишварҳои ҳошияи Халиҷи Форс нахуст сода, тариқи электронӣ ва сипас барои бархе аз онҳо онро бекор кардааст.

1...464748...636саҳифаи 47 аз 636

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
mist
4.1 ° C
4.1 °
4.1 °
93 %
3kmh
100 %
Wed
4 °
Thu
3 °
Fri
6 °
Sat
9 °
Sun
10 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст