Ҷустуҷӯ кунед
Ҷустуҷӯ
6.9 C
Dushanbe
Хона блог саҳифа 55

Раҳимзода: Дар 6 моҳ сабти 600 ҷинояти террористӣ

Аз ҷониби
AZDA-TV
-
0

Рамазон Раҳимзодва, вазири корҳои дохилии Тоҷикистон мегӯяд, ки танҳо дар давоми шаш моҳи гузашта наздики 600 ҷинояти террорисӣ сабт шудааст.

7-уми августи соли ҷорӣ дар шаҳри Душанбе нишасти матбуотии Вазироти корҳои дохилии Тоҷикистон баргузор шуд. Дар ҷараёни нишаст вазир Рамазон Раҳимзода аз натиҷаҳои – ба гуфтааш – мубориза бо терроризм ва экстремизмро дар шаш моҳи аввали соли 2025 гузориш дод.

Ба иддаои Раҳимзода дар моҳҳои январ-июни соли ҷорӣ 593 ҷиноят, марбут ба терроризм ва экстремизм ба қайд гирифта шудааст, ки барои содир кардани онҳо 411 нафар муттаҳам дониста мешаванд. Аз ин шумора 241 нафар, аз ҷумла 91 ҷавон боздошт шудаанд.

Инчунин кормандони мақомоти ҳифзи ҳуқуқ ду кӯшиши анҷом додани ҳамлаи террористиро дар шаҳрҳои Душанбе ва Ваҳдат пешгирӣ кардаанд. Вале вазир нагуфт, кадом гурӯҳ чӣ кореро мехостаанд, анҷом диҳанд.

Ҳамчунин 162 ҳолати маблағгузории фаъолияти террористӣ ошкор шуда, 51 нафар боздошт шудаанд ва ба гуфтаи ин мақомдор, онҳо “аз кардаи худ изҳори пушаймонӣ намудаанд”.

Раҳимзода нагуфт, ки маблағҳо ба куҷо фиристода мешуданд, вале иддао кард, ки шаҳрвандони камбизоат ва фирефташуда пули охирини худро ба гурӯҳҳои ифротгаро дар Аврупо ва дигар кишварҳо мефиристанд ва аъзои гурӯҳҳои – ба гуфтааш – террористӣ бо ин маблағ зиндагии бошукуҳ мекардаанд.

Ҳамчунин дар давоми шаш моҳ аз беш аз 7500 шахси дар ҷустуҷӯ буда, 1500 нафар боздошт шуда, 200 нафари онҳо аз кишварҳои хориҷӣ баргардонида шудаанд. Аз ҷумла, беш аз 500 нафар дар Русия боздошт шудаанд.

Аз шумораи умумии боздоштшудаҳо, 235 нафарашон аъзои гурӯҳҳои террористӣ буда, ба гуфтаи вазир “166 нафар ихтиёран ба Ватан баргардонда шудаанд.

Дар ҳамин давра 5 оилаи иборат аз 27 нафар, ки 12 нафарашон кӯдакон мебошанду ба гурӯҳҳои террористӣ пайваста будаанд, ба Тоҷикистон баргардонида шудаанд.

Вазири корҳои дохилӣ сабаби шомилшавии ҷавонон ба гурӯҳҳои ифротиро ба таълими ғайриқонунии динии сокинон дар назди нимчамуллоҳои чаласавоб рабт дода, гуфт, ки дар шаш моҳи аввали соли ҷорӣ 105 ҳолати таълими ғайриқонунии динӣ ба қайд гирифта шудааст, ки дар он 175 нафар, аз ҷумла 86 ноболиғ иштирок доштаанд. Ғайр аз ин, 32 донишҷӯ, ки дар хориҷи кишвар таҳсил мекарданд, ба Тоҷикистон баргардонида шуданд.

Дар ҳоле мақомоти Тоҷикистон ҳамасола аз мубориза бо терроризму боздошти аъзои гурӯҳҳои ифротӣ мегӯянд, ки бисёре аз боздоштшудаҳо аъзои гурӯҳҳои мухолифон мебошанд. Ҳуқуқшиносону коршиносон мегӯянд, мақомоти Тоҷикистон пушти муборизаи бо терроризму ифротгароӣ, асосан зидди фаъолони динӣ ва мухолифони сиёсӣ мубориза бурда истодаанд.

Тавофкқи Кобинаи амниятии Исроил бар контроли комили Ғазза

Аз ҷониби
AZDA.TV
-
0

Кобинаи амниятии Исроил ба тарҳи нахуствазири ин кишвар Бинёмин Натанёҳу барои густариш ҳамлаҳои низомӣ ва ишғоли комили Ғазза мувофиқат кард.

Дафтари нахуствазири Исроил рӯзи ҷумъа, 8-уми август эълом кард, ки Кобинаи амниятӣ бо тарҳи контроли комили Навори Ғазза мувофиқат кардааст. Бар асоси ин баёния, ин тарҳ ба пешниҳоди Бинёмин Натанёҳу тасвиб шуда ва артиши Исроил барои ишғоли комили Ғазза омода мешавад.

Натанёҳу бо ин тарҳ пешниҳод намуда, ки Ғазза аз ҷониби артиши Исроил марҳила ба марҳила ба таври комил тасарруф шавад ва беш аз ду миллион аҳолии ин борика ба минтақаи ҷанубии он кӯчонида шаванд.

Дар ҳамин ҳол аксар созмонҳои ҷаҳонии ҳуқуқи башар ва кишварҳо аз паёмадҳои ногувори ин тарҳ ҳушдор додаанд. Аз ҷумла, Фолкер Турк, Комисари олии ҳуқуқи башари Созмони Милали Муттаҳид бо нашри изҳороте хостори таваққуфи фаврии ҳамлаи густардаи артиши Исроил ба Ғазза ва ишғоли комили он шуд.

Изҳороти Турк пас аз эълони Кобинаи амниятии Исроил нашр шуд. Ӯ дар паёмаш таъкид мекунад, ки “Ин иқдоми Исроил ба қарори Додгоҳи байналмилалӣ дар мавриди зарурати ҳарчи зудтар поён додани ишғолгарӣ, татбиқи роҳҳали дукишварӣ ва ҳаққи таъйини сарнавишти фаластиниён” мухолифат дорад.

Вазорати хориҷаи Чин бо нашри изҳороте гуфтааст, ки “Амиқан нигаронии тарҳи Исроил барои ишғоли Ғазза ҳастем.”

Ҳамзамон нахуствазири Британия Кир Стармер низ бо нашри изҳороте рӯзи ҷумъа гуфта, ки тасмими Исроил барои контроли Навори Ғазза “Иштибоҳ” аст ва аз давлати Исроил хостааст дар ин тасмим таҷдиди назар кунад.

Кир Стармер дар баёнияаш гуфтааст: “Тасмими давлати Исроил барои ташдиди ҳамла ба Ғазза иштибоҳ аст ва мо аз онҳо мехоҳем фавран дар он бознигарӣ кунанд. Ин иқдом на ба поён додани ин даргирӣ кумак хоҳад кард ва на ба озодии гаравгонҳо, балки сабаби хунрезии бештар хоҳад шуд.”

Вазири корҳои хориҷии Ҳолланд низ бо изҳороте гуфта, ки тасмими Исроил барои ишғоли Ғазза кумаке ба озодии гаравгонҳо намекунад.

Ҳамҳамон кишварҳои Урдун, Туркия ва бархе дигар аз кишварҳо тасими Натанёҳу барои ишғоли Ғаззаро маҳкум намуда, аз авоқиби вахими инсонии он ҳушдор додаанд.

Дар Тоҷикистон беш аз 858 ҳазор нафақахӯр сабт шудааст

Аз ҷониби
Azda TV 3
-
0

То 1-уми июли соли 2025, шумораи умумии нафақахӯрон дар Тоҷикистон 858 ҳазору 191 нафар мебошад. Дар ин бора имрӯз дар нишасти матбуотии Агентии суғуртаи иҷтимоӣ ва нафақаи ҷумҳурӣ иттилоъ дода шуд.

Аз шумораи умумӣ, 170 ҳазору 52 нафар — нафақахӯрони маъюбанд, ки аз онҳо:

18 ҳазору 220 нафар — маъюбони гурӯҳи якум,

83 ҳазору 691 нафар — маъюбони гурӯҳи дуюм,

33 ҳазору 317 нафар — маъюбони гурӯҳи сеюм,

34 ҳазору 824 нафар — маъюбони то синни 18-сола.

Илова бар ин, то 1-уми июли соли ҷорӣ дар Тоҷикистон 1 ҳазору 149 нафар ятими комил ва 77 ҳазору 649 нафар кӯдаки нимятим ба дастгирии иҷтимоӣ ниёз доранд. Шумораи маъюбон ва иштирокчиёни Ҷанги Бузурги Ватанӣ 15 нафар ва иштирокчиёни ҷанг дар ақибгоҳ 117 нафарро ташкил медиҳад.

Агентии суғуртаи иҷтимоӣ ва нафақа мегӯяд, ки корҳои худро дар ростои таъмини ҳифзи иҷтимоии табақаҳои осебпазир, аз ҷумла нафақахӯрон, маъюбон, ятимон ва собиқадорон идома медиҳад.

Бо вуҷуди ин, маблағи нафақа дар Тоҷикистон назар ба Қазоқистон Қирғизистон Узбекистон ва Туркманистон хеле кам аст ва пиронсолону маъюбон борҳо шикоят кардаанд, ки ҳатто ин пул ба хароҷоти табобат ва хариди дору намерасад.

Додситони кул: Омори дақиқ дар бораи иштирокчиёни тоҷик дар ҷанг алайҳи Украина вуҷуд надорад

Аз ҷониби
Azda TV 3
-
0

Ҳабибулло Воҳидзода, Додситони кулли Тоҷикистон 8-уми август дар нишасти матбуотӣ изҳор дошт, ки маълумоти омории дақиқ дар бораи иштироки шаҳрвандони Тоҷикистон дар ҷанг алайҳи Украина вуҷуд надорад ва касе барои иштирок дар он ба ҷавобгарии ҷиноятӣ кашида нашудааст.

Воҳидзода гуфт, бархе аз шаҳрвандон ду шаҳрвандӣ доранд ҳам шаҳрвандии Тоҷикистон ва ҳам шаҳрвандии Русия. Ба гуфтаи ӯ, вақте шахс шаҳрвандии кишвареро қабул мекунад, бояд талабот ва уҳдадориҳои ҳамон давлатро риоя намояд.

“Масъалаи иштирок дар ҷангро худи давлат нисбат ба шахсе, ки шаҳрвандиро қабул кардааст, муайян мекунад. Барои ҳамин, ин бештар ба шаҳрвандии шахс ва хоҳишу уҳдадориҳои ӯ вобаста аст.”, таъкид кард Додситони кул.

Мақомот то кунун нагуфтаанд, ки чанд шаҳрванди Тоҷикистон мустақим ё ғайримустақим дар ҷанг бар зиддин Украина иштирок доранд, аммо як барномаи давлатӣ дар Украина бо номи “Зистан мехоҳам” номи бештар аз 900 зодаи Тоҷикистонро нашр кард, ки бо артиши Русия қарордод баста, дар ҷанг ширкат кардаанд. 

Ин дар ҳоле аст, ки Владимир Зеленский, раисиҷумҳури Украина 4-уми август дар шабакаи иҷтимоии “Х” навишта буд, ки дар сафи пеши ҷабҳаи ҷанг аз ҷониби артиши Русия зархаридон аз Чин, Тоҷикистон, Узбекистон, Покистон ва чанде аз кишварҳои африқоӣ иштирок доранд.

Ӯ таъкид кард, ки ба чунин ҳолатҳо “посухи сазовор” дода хоҳад шуд, вале тарзи ин посухро шарҳ надод.

Агар қисми тоҷиконе, ки дар ин ҷанг иштирок мекунанд, шаҳрвандии Русияро дошта, бархе дигар бо ваъдаи озодӣ ё гирифтани шаҳрвандии Русия, аз миёни зиндониён ва муҳоҷирони беаснод ба ҷанг ҷалб мешаванд.

Чанде пеш як зодаи Тоҷикистон, ки бо Вазорати дифои Русия шартномаи яксола баста буд, дар суҳбат ба Azda.tv иброз дошта буд, ки пас аз анҷоми шартномааш моҳи феврали 2025 иҷозаи тарки ҷабҳа ва ҳатто рухсатӣ нагирифтааст. Ба гуфтаи ӯ, садҳо тоҷик бо чунин вазъ рӯбарӯянд.

Тибқи қонунҳои Тоҷикистон, иштирок дар ҷанги кишварҳои дигар ҷиноят ҳисобида мешавад. Созмонҳои ҳуқуқӣ ва сиёсӣ борҳо ҳушдор додаанд, ки шаҳрвандони тоҷик фиреби мақомоти Русияро нахӯранд ва ҷони худро зери хатар нагузоранд.

“Авангард” дар Маскав муҳоҷиронро боздошт мекунад

Аз ҷониби
Azda TV 3
-
0

Бо иштироки нерӯҳои вежаи Росгвардия, аз ҷумла дастаи ОМОН бо номи “Авангард”, дар шаҳри Маскав амалиёти густурдаи санҷиши муҳоҷирон баргузор гардид.

Дар натиҷаи ин амалиёт, ки бо ҳамоҳангии Кумитаи тафтишоти ҳарбии Русия рӯзи 5-уми август анҷом ёфт, ҳуҷҷатҳои муҳоҷиратии 400 шаҳрванди хориҷӣ дар як хостел дар маркази пойтахт мавриди санҷиш қарор гирифт.

Мақомот дар ҷараёни санҷиш шиносномаҳо ва иҷозатномаҳои корӣ (патент)-ҳо ва дигар ҳуҷҷатҳои ин афродро тафтиш карда, дар ниҳоят 300 нафарро бо гумони нақзи қонунгузории муҳоҷиратӣ боздошт намуда, ба шуъбаҳои милитсия интиқол доданд, ки дар байнашон шаҳрвандони тоҷик низ ҳаст.

Ин рейд дар пасманзари шиддат гирифтани назорат болои муҳоҷирон дар Русия баргузор шудааст, ки солҳои охир таҳти фишор ва муносибати бад қарор доранд. Ин вазъ ба таври хос муҳоҷирони тоҷикро, ки қисми зиёди коргарони муҳоҷир дар Русияро ташкил медиҳанд, зери зарба қарор додааст.

Солҳо боз муҳоҷирони тоҷик дар Русия бо мушкилоти гуногун, аз ҷумла таъқиб, боздошт, депорт ва муносибати ғайриинсонӣ рӯ ба рӯ мешаванд. Бо вуҷуди ин, дар тӯли беш аз сӣ соли охир, ҳукумати Эмомалӣ Раҳмон натавонистааст аз ҳуқуқ ва манфиатҳои муҳоҷирони тоҷик дар Русия ҳимоят кунад.

Ин дар ҳолест, ки беш аз нисфи буҷети давлатии Тоҷикистон тавассути маблағҳои интиқолии муҳоҷирон таъмин мегардад. Аммо ба ҷойи пуштибонӣ, муҳоҷирон танҳо монда, дар муқобили сиёсати сахтгиронаи Русия бепаноҳ боқӣ мемонанд.

Муҳаққиқон ва коршиносон бар ин назаранд, ки фишор болои муҳоҷирони тоҷик на танҳо масъалаи иҷтимоӣ ва ҳуқуқист, балки як фишори сиёсӣ низ буда метавонад, ки Тоҷикистон бояд нисбат ба он мавқеи ҷиддӣ ва возеҳ бигирад.

Парвандаи муттаҳамони дуздии 120 миллион сомонӣ ба куҷо расид?

Аз ҷониби
AZDA.TV
-
0

Чанде пеш мақомоти кишвар аз боздошти даҳҳо низомии корманди Вазорати мудофеаи кишвар бо иттиҳоми дуздии беш аз 120 миллион сомонӣ хабар дода буданд.

Аммо баъдтар дигар маълум нашуда, ки шумори дақиқи муттаҳамон ба чанд нафар расид ва чанде аз онҳо зиндонӣ шуданду чанд каси дигар раҳо ёфт.

Имрӯз масъулони Додгоҳи олии Тоҷикистон зимни нишасти матбуотӣ дар посух ба суоли хабарнигори Радиои Озодӣ дар ин бора гуфтанд, ки дар қазияи дуздии 120 миллион сомонӣ аз Вазорати мудофеаи кишвар бар зидди 71 нафар парвандаи ҷиноӣ боз шуд.

Гуфта шуд, ки аз ин 71 нафар 28 нафарашон ғайринизомиён ва масъулоне ҳастанд, ки дар дигар идораҳои давлатӣ фаъолият мекарданд ва 43 нафарашон низомиён ва масъулони худи Вазорати мудофеаи кишвар буданд.

Яке аз муовинони раиси Додгоҳи олии Тоҷикистон дар ин нишаст гуфт, ки маблағи дуздидашуда аз Вазорати мудофеаи Тоҷикистон 124 миллиону 857 ҳазору 630 сомониро ташкил медиҳад, ки аз он миқдор 108 миллиону 344 ҳазору 108 сомонии он барқарор шуда, беш аз 16 миллионаш то ҳол барқарор нашудааст.

Намояндаи Додгоҳи олӣ гуфт, ки аз 71 нафар муттаҳаме, ки бар зидашон парвандаи ҷиноятӣ боз шуда буд, танҳо 9 нафарашон аз 5 то 15 сол зиндонӣ шудаанд ва боқӣ бо баргардонидани маблағҳои гирифташуда ва ё ҷарима зиндонӣ нашуданд.

Раиси Додгоҳи олии кишвар илова кард, ки маблағе, ки аз ҷониби масъулоин Вазорати мудофеа дуздида шуд, он барои 124 барои ғизо, сару либоси сарбозон ва таъмини техникаҳои ҳарбӣ ҷудо шуда буд. Вале масъулони ин вазорат ин миллионҳо сомониро ба фоидаи шахсии худ тасарруф карданд.

Ин ҳам дар ҳолест, ки вазъи хӯроку либоси сарбозон дар қисмҳои низомӣ чандон хуб набуда, шикоятҳои зиёде дар расонаҳо ва шабакаҳои иҷтимоӣ нашр мешавад, ки сарбозон бо хӯроки ғизонок таъмин нестанд.

Парвандаи мазкурро расонаҳои давалтӣ нашр намекунанд, то мардум огоҳ шаванд, ки мақомдорони зиёде вуҷуд дорад, ки то ҳанӯз аз буҷаи давлат, ки аз ҷайби мардум таъмин мешавад, пулҳои ҳангуфтеро медузданд ва ба фоидаи шахсии худ сарф карда, хонаҳои баландошёна ва мошинҳои гаронбаҳо мехаранд.

Вазири адлия чаро ба суолҳо посухи равшан намедиҳад?

Аз ҷониби
AZDA-TV
-
0

Имрӯз, 7-уми август дар шаҳри Душанбе нишасти матбуотии Вазорати адлияи Ҷумҳурии Тоҷикистон баргузор гардид. 

Дар ҷараёни нишаст, хабарнигорон аз вазири адлия Музаффар Ашуриён дар бораи шароити нигаҳдории зиндониён дар маҳбасҳои кишвар суол доданд. Аммо ба ҷои ҷавобҳои рӯшан ва дақиқ, вазир изҳоротҳои умумӣ доду аз ҷавоб додан ба масъалаҳои асосӣ худдорӣ кард.

Яке аз саволҳои матраҳшуда ба шикояти наздикони зиндониёни сиёсӣ, аз ҷумла Маҳмурод Одинаев, Аҳмадшоҳ Комилзода ва Абдусаттор Пирмуҳаммадзода рабт дошт, ки ба гуфтаи пайвандонашон аз бемориҳои гуногуне ранҷ мекашанд. 

Аммо вазири адлия дар ҷавоб гуфт, ки СРИҶҶ дорои муассисаи тиббӣ буда, он дар доираи имкониятҳои худ ба маҳкумшудагон ёрии тиббии муолиҷавӣ мерасонад. Инчунин Музаффар Ашуриён иддао кард, ки агар зарур шавад табибоне, ки дар ҳайати вазорат нестанд аз берун оварда мешаванд ва то имрӯз ягон маҳбус бе таваҷҷуҳ намондааст.

Ин ҳам дар ҳолест, ки аз аввали соли ҷорӣ дар зиндонҳои Тоҷикистон чор нафар зиндонии сиёсии зодаи Бадахшон, аз ҷумла  Кулмамад Паллаеви 50-сола, Аслан Гулобови 35-сола, Музаффар Давлатмирови 61-сола ва Эроншо Мамадраҳимови 39-сола фавтидаанд. Наздикони онҳо мегӯянд, ки ба онҳо кумаки зарурии тиббӣ дар зиндон расонида нашудааст ва аз беморӣ даргузаштанд. 

Ашуриён масъалаи ба ШИЗО андонхтани Абдусатор Пермухамадзодаро барои суолаш, ки ӯро “чаро ба рӯйхати афвшудагон ворид накардаанд” низ нодида гирифту дар ин бора чизе нагуфт. 

Инчунин дар  ҷараёни нишаст, аз вазир пурсиданд, ки оё мумкин аст дар моҳҳои наздик барои хабарнигорон имкони боздид аз зиндонҳо фароҳам шавад, то онҳо шахсан бо шароити зиндониён шинос шаванд. Вазири адлия ба ин савол посухи рӯшан надод ва танҳо ишора кард, ки хабарнигорон метавонанд бо дигар ниҳодҳо, мисли Дафтари Омбудсмен, ки дар зиндонҳо гӯё мониторинг мегузаронад, ҳамкорӣ кунанд ва тавассути онҳо маълумот дастрас намоянд.

Дар охир Музаффар Ашуриён мисли нишастҳои қаблӣ боз иддао кард, ки талоши Ҳукумат ба беҳтар намудани шароити зиндонҳои кишвар равона шудааст. Аммо ҳамоно пайвандони маҳбусону худи онҳо ва созмонҳои ҳуқуқи аз вазъи бади зиндонҳо, аз ҷумла норасоии дору, шароити бади санитарӣ ва мушкилоти ғизо дар зиндонҳо, инчунин шиканҷаву фишор болои маҳбусон шикоят доранду бар асари бемориву шиканҷаҳои бардавом маҳбусон мемиранд.

Наздики як миллион сомонӣ ҷарима барои дуздии барқ

Аз ҷониби
AZDA.TV
-
0

Додгоҳи олии Тоҷикистон мегӯяд, дар муддати 6 моҳи аввали соли ҷорӣ ҳудуди 80 нафарро барои дуздии қуваи барқ ҷарима кардааст.

Мирзозода Рустам Пираҳмад, раиси Додгоҳи олии Тоҷикистон 7-уми август зимни нишасти матбуотии ин ниҳод гуфт, ки давоми 6 моҳи гузашта бар зидди 78 нафар барои ғайриқонунӣ истифода намудан аз нерӯи барқ парванда боз шудааст.

Раиси Додгоҳи олии кишвар афзуд, ки аз ин 78 парванда, ба маблағи 955 ҳазору 726 сомонӣ ҳамчун ҷарима ба фоидаи давлат ситонида шудааст.

Аммо Мирзозода шарҳ надод, ки аз ин миқдор парвандаҳо чандтои он ба корхонаву идораҳои давлатии аз барқ қарздор марбут аст ва чандтои он ба шаҳрвандони оддӣ.

Ин дар ҳолест, ки ҳафтаи гузашта, масъулони ширкати “Барқи Тоҷик” дар нишасти матбуотӣ эълон карда буданд, ки аз аҳолии кишвар дида, ширкатҳои бузурге, ки ба хонаводаи раисҷумҳур наздикӣ доранд, аз барқ қарздоранд ва ё ин ки бо роҳҳои ғайриқонунӣ аз барқ истифода мебаранду пули барқро пардохт намекунанд.

Намояндагони ширкати мазкур ба хабарнигорон гуфта буд, ки аҳолии кишвар аз ҳисоби истифодаи барқ 1,7 миллиард сомонӣ қарздоранд, аммо чанде аз сохторҳои муҳими давлатӣ низ дар рӯйхати қарздорони бузург қарор доранд, аз ҷумла, ширкати алюминийи тоҷик (ТАЛКО) — бо қарзи 718 миллион сомонӣ, Агентии беҳдошти замин ва обёрӣ — 238 миллион, идораҳои буҷетӣ — 108 миллион, ва корхонаҳои обу корез — 16,4 миллион сомонӣ ва дигар корхонаҳо – 1 миллиарду 685,6 миллион сомонӣ қарздоранд.

Боздошти як узви “Гурӯҳи 24” дар сарҳади Арманистон

Аз ҷониби
AZDA-TV
-
0

Ҳаракати сиёсии “Гурӯҳи 24” аз боздошти узви фаъолаш Холов Исмоил дар сарҳади Арманистон хабар дод.

Бино ба иттилои ин ҳаракат, Холов 5-уми августи соли ҷорӣ ҳангоми ворид шудан ба хоки Арманистон дар минтақаи сарҳадӣ аз ҷониби марзбонон дастгир шудааст. Аммо маълум нест, ки ӯ аз куҷо ба Арманистон рафтааст ва ҳадафи сафараш чӣ буд.

“Гурӯҳи 24” дар иттилоияаш танҳо гуфтааст, ки ҳоло вакилони дифоъ талош доранд ӯро озод созанд ва аз мақомоти Арманистон ҳам хоста шудааст, ки бо ин мухолифи тоҷик бархӯрди инсондӯстона кунанд ва шароити озодсозии ӯро фароҳам созанд.

Дар ҳамин ҳол як намояндаи посгоҳи сарҳадии Баграташени Арманистон рӯзи 5-уми август дар суҳбат бо Радиои Озодӣ гуфтааст, ки Холов аз тарафи мақомоти Тоҷикистон дар пайгард аст ва бинобар ин боздошт шуда, қазияаш омӯхта мешавад ва тасмими баъдиро додгоҳ мегирад.

Гуфта мешавад, Исмоил Холови 44-сола аз соли 2011 ҳамроҳи аъзои оилааш дар Русия мезисту шаш моҳро дар яке боздоштгоҳҳои Маскав гузарондааст ва соли 2023 дар пайи зиёд шудани таъқибу фишор, ки он борҳо расонаӣ шуда буд, аз ин кишвар берун шуд.

Ӯ аз соли 2015 ба “Гурӯҳи 24” пайваста буд ва мақомоти Тоҷикистон нисбаташ бо иттиҳоми ҳамкорӣ бо созмон ва ҳизбҳои фаъолияташон мамнуъ парванда кушодаанд.

Эълони таъсиси ҳаракати нав дар хориҷ аз ҷониби мухолифони Раҳмонов

Аз ҷониби
AZDA-TV
-
0

Як гурӯҳ аз мухолифони режими имрӯзаи Тоҷикистон дар хориҷ аз кишвар аз таъсиси як ҳаракати нави сиёсӣ хабар доданд.

Ин ҳаракат “Ислоҳотхоҳони Тоҷикистон” номгузорӣ шуда, муассисон ва гурӯҳи тадорукотияш бо нашри эъломияе рӯзи 6-уми августи соли ҷорӣ гуфтанд, ки дар ҷаласаи муштарак бо намояндагиҳо Муҳаммадиқболи Садриддин, мудири пойгоҳи “Ислоҳ”-ро раҳбари ҳаракат интихоб кардаанд.

Дар эъломия гуфта мешавад, ки аксари аъзоёни ин ҳаракати ҷадид дар даҳ соли охир, ба далели зулм ва таъқиб, дар хориҷ аз кишвар ба унвони паноҳанда ба сар мебаранд ва бо нияти “кӯтоҳ кардани роҳи бозгашт ба Ватан ва наҷоти мардум аз як ҳукумати худкома ва оилавӣ” бо ҳам омадаанд ва муборизаро то охири роҳ, яъне сарнагунии режими худкомаи диктаторӣ идома хоҳанд дод.

“Ин режим давлати моро ба дастгоҳи манофеъ барои хонаводааш табдил додааст. Ҳар рӯзе, ки ин режим бар сари қудрат аст, фақр, фасод, муҳоҷират, бедодӣ ва нобаробарӣ бештар мешавад. Моро дигар чораи ҷуз мубориза боқӣ намондааст”, – таъкид шудааст дар эъломияи Ҳаракати сиёсии “Ислоҳотхоҳони Тоҷикистон”.

Масъули ҳаракат Муҳаммадиқболи Садриддин дар суҳбат бо Azda.tv гуфт, ки “Ислоҳотхоҳони Тоҷикистон” дар кишварҳои Фаронса, Олмон, Италия, Испания, Британияи Кабир, Лаҳистон, Латвия, Туркия, ИМА , Канада, Мексика ва Зеландияи Нав намояндагӣ дошта, рӯзҳои наздик масъулон ва нафароне, ки узви ин ҳаракатанд ва шуморааш, ки беш аз 200 нафар гуфта мешавад, аз худ хабар хоҳанд дод.

Ба гуфтаи ӯ, оғози таъсиси ин ҳаракат аз охирҳои моҳи май ва аввали июн шуруъ шуда, ҳоло ба омода намудани сомона ва навиштани низомномаву ойинамо шуруъ кардаанд, то нафароне, ки мехоҳанд узви ҳаракат шаванд аз барномаи он огоҳ бошанд.

Ҳаракати нави мухолифони тоҷик дар хориҷ аз кишвар дар ҳоле таъсис меёбад, ки раҳбари “Ислоҳотхоҳони Тоҷикистон” Муҳаммадиқболи Садриддин аз соли 1999 узви ҲНИТ буд. Ва ӯ чанд моҳи ахир дар барномаҳои ютубии шабакаи “Ислоҳ” аз раҳбари ҲНИТ Муҳиддин Кабирӣ – ба гуфтааш – барои “нагузарондани ислоҳот ва даст назадан ба муборизаи ҷиддӣ” интиқод намуда, истеъфои ӯро талаб карда буд.

Худи Муҳаммадиқболи Садриддин чанд соли ахир дар хориҷ аз Тоҷикистон қарор дорад ва миёни ҷомеа бо интиқодҳояш аз режими худкомаи Эмомалӣ Раҳмон шинохта шудааст.

Мақомоти Тоҷикистон ӯро ба қаллобӣ гумонбар медонанду борҳо аз мақомоти Фаронса хоста буданд, ки ӯро ба Тоҷикистон ихроҷ кунанд. Инчунин додгоҳе дар Маскав Муҳаммадиқболи Садриддинро ба паҳн кардани хабарҳои дурӯғ дар бораи ҷанги Русия дар Украина гунаҳкор донистааст. Худи ӯ иттиҳоми мақомоти Тоҷикистонро рад намуда, онро дорои ангезаҳои сиёсӣ медонад ва мегӯяд, қарори Русия ба фаъолияти ӯ таъсир надораду ба даъватҳояш барои нафиристодани тоҷикон ба ҷанги Украина идома медиҳад.

1...545556...738саҳифаи 55 аз 738

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
overcast clouds
7.1 ° C
7.1 °
7.1 °
65 %
3kmh
100 %
Thu
8 °
Fri
14 °
Sat
17 °
Sun
6 °
Mon
15 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст