Доналд Трамп, расиҷумҳури Амрико ду рӯз қабл барои Эрон 48 соат муҳлат дода буд, ки тангаи Ҳурмузро боз кунад ва агар то ин муддат ин гузаргоҳи баҳрӣ боз нашавад, нерӯгоҳҳо ва зерсохторҳои энержияшро ҳадаф қарор хоҳад дод.

Аммо субҳи рӯзи 24-уми март Трамп дар шабакаи иҷтимоии марбути худаш “Truth” эълом кард, ки ҳамлаҳо ба нерӯгоҳҳо ва зерсохторҳои энержии Эронро панҷ рӯз ба қафо гузоштааст. Ӯ мегӯяд: “Амрико ва Эрон давоми ду рӯзи гузашта гуфтугӯҳои “бисёр хубу созанда” дар бораи ҳаллу фасли комили даргириҳо дар Ховари Миёна доштанд.”

Трамп ҳамзамон дар эълони худ таъкид мекунад, ки ба Вазорати ҷанги кишвараш дастур додааст, ҳаргуна ҳамлаҳои низомӣ ба нерӯгоҳҳо ва зерсохторҳҳои энержии Эрон 5 рӯз ба қафо гузошта шавад.

Раисҷумҳури Амрико ҳамчунин афзуда, ки “гуфтушунидҳо бо Эрон давоми ҳафтаи ҷорӣ идома хоҳад кард.” Вале баъд аз панҷ рӯз оё зерсохторҳои энержии Эрон мавриди ҳамла қарор мегиранд ё на, Трамп гуфтааст, “ин ба пешрафт ва комёбии гуфтушунидҳо марбут аст.”

Дар ҳамин ҳол Доналд Трамп дар гуфтугӯе бо расонаи “Fox News” гуфта, ки “Тавофуқ бо Эрон мумкин аст тайи панҷ рӯзи оянда ва ё камтар аз он иттифоқ бияфтад.

Аммо дар посух ба эълони Трамп Вазорати корҳои хориҷии Эрон рӯзи душанбе хабар дод, ки “Ҳеч гуфтугӯе байни Теҳрон ва Вашингтон вуҷуд надоранд.” Ин вазоратхона таъкид карда, ки изҳороти раисҷумҳури Амрико “дар чорчӯби талош барои коҳиш нархи энержӣ” ва “касби замон” барои иҷрои тарҳҳои низомии ӯст.

Вазорати хориҷии Ҷумҳурии исломии Эрон ҳамчунин мегӯяд: “Ибтикороте аз сӯи кишварҳои минтақа барои коҳиш додани таниш вуҷуд дорад, вале посухи мо ба ҳамаи онҳо возеҳ аст: мо тарафе нестем, ки ин ҷангро оғоз кардааст ва ҳамаи ин дархостҳо бояд аз Амрико пурсида шавад.”

Дар пайи эълони Трамп аз вуҷуди гуфтушунидҳо, нархи нефт дар бозорҳои ҷаҳонӣ коҳишеро мушоҳида кард. Баъзе коршиносон бар ин назаранд, ки ин тасмим метавонад ба поён рафтани нархи нефт дар бозори ҷаҳонӣ то басташавии биржаҳо дар рӯзи ҷумъа таъсир расонад ва ҳамзамон нишонаи омодагӣ ба ҳамлаи густарда ба Эрон дар поёни ҳафта бошад.

Ёдовар мешавем, ки Амрико ва Исроил дар як ҳамлаи муштарк субҳи рӯзи 28-уми феврали соли ҷорӣ ба Эрон ҳамла карданд. Ҳадафи ин ҳамла нобуд сохтани барномаи атомӣ, аз байни бурдани барномаи мушакӣ ва дар охир сарнагун кардани низоми Эрон эълон шуда буд. Аммо бо гузашти беш аз се ҳафта ҳанӯз ҳам даргириҳои шадид ва радубадалҳо байни тарафҳои даргир идома дорад.

Бо вуруди ҷанги Амрикову Исроил бо Эрон ба рӯзи 17-ум ва шиддат гирифтани буҳрони иқтисодӣ дар ҷаҳон, Доланд Трамп, раисҷумҳури Армрико аз баъзе кишварҳо хост дар бозгушоии тангаи Ҳурмуз кумак кунанд.

Трамп дар изороте гуфт, ки нефте, ки аз тариқи тангаи Ҳурмуз ба Амрико мерасад, ҳамагӣ 2 то 3 дарсад аст. Вале кишварҳое монанди Чин, ки 90 дарсади нефташон аз тариқи ин роҳи баҳрӣ ворид мешавад, бояд барои бозгушоии он вориди амал шаванд.

Трамп ҳамчунин дар хитоб ба муттаҳидони аврупоияш низ гуфт, ки “мо онҳоро дар Украина кумак кардем ва бояд онҳо низ дар ин марҳила ба мо кумак кунанд.”

Раисҷумҳури Амрико ҳамчунин таъкид кард, ки ҳамлаҳо дар Эрон “ба хубӣ” пеш мераванд ва ба ҳуҷуми дигарбора ба Ҷазираи Хорки Эрон низ ишора кард. Ӯ гуфт, ки дар ҷазираи нефтии Эрон қариб ҳеч қувва ва таҷҳизоти низомии Эрон боқӣ намондааст.

Хабаргузории “Axios” ба нақл аз раисҷумҳури Амрико Доналд Трамп навишт, ки ӯ изҳори умедворӣ карда, ки дар ҳафтаи оянда байни давлатҳо барои бозгушоии тангаи Ҳурмуз як эътилофе ташкил мешавад.

Аммо аксари ин кишварҳои мавриди назар дархости Трампро рад карданд. Аз ҷумла, хабаргузории “Ройтерз” иттилоъ дод, ки вазири дифои Омлон Борис Писториус дар паёме гуфт: “Трамп интизор дорад чанд нови ҷангии хурди аврупоӣ битавонанд кореро анҷом диҳанд, ки новгони қудратманди Амрико аз уҳдаи он барнамеояд?” Вазири дифои Олмон таъкид мекунад, ки “Ҷанг бо Эрон ҷанги мо нест ва дар он иштирок нахоҳем кард.”

Ҳамзамон нахуствазири Британия низ дар изҳороте гуфт, ки “Британия дар ҷанг бар зидди Эрон ворид намешавад, вале барои бозгушоии тангаи Ҳурмуз бо роҳҳои имконпазир талош мекунад.”

Ба навиштаи “Ройтерз”, сарвазири Британия бозгушоии тангаи Ҳурмузро “кори душвор” хонда, гуфтааст, ки кишвараш ба сӯи тангаи Ҳурмуз киштиҳои низомӣ намефиристад.

Ҳамчунин сарвазири Ҷопон Санаэ Такаити гуфта, ки кишвараш нақшае барои фиристодани киштиҳои ҳарбӣ ба танги Ҳурмузро надорад. Ӯ ишора карда, ки ҳар гуна амалиёти амниятии баҳрӣ “аз нигоҳи ҳуқуқӣ бисёр душвор” хоҳад буд.

Дар ҳамин ҳол Сипоҳи посдорони Эрон дар эъломияе гуфта, ки ҳуҷум ба Ҷазираи Хорк муодилаи ҷиддиеро дар робита ба нархи нефт ва баровардҳои нефтӣ дар ҷаҳон тағйир хоҳад дод.

Баъзе таҳлилгарон бар ин назаранд, ки Амрико барои поёни ҷанг чанд гузина дорад: идома додан то раисдан ба аҳдоф, ё эълони пирӯзӣ ва баромадан аз ҷанге, ки ҳар ҳалза печидатар мешавад.