Фаъолиятҳои сафири Тоҷикистон дар Олмон Имомуддин Сатторов фаъолони ҷомеаи тоҷики хориҷ аз кишварро нигарон кардааст.
Гурӯҳе аз намояндагони ҷомеаи шаҳрвандии Тоҷикистон, фаъолони сиёсӣ ва мухолифони ҳукумат, ки берун аз кишвар зиндагӣ мекунанд, ба Вазорати корҳои хориҷии Ҷумҳурии Федеративии Олмон муроҷиати расмӣ ирсол намуда, аз фаъолиятҳои ғайридипломатии сафири Тоҷикистон дар Олмон Имомуддин Саторов изҳори нигаронии ҷиддӣ кардаанд.
Муаллифони нома мегӯянд, ки Сатторов аз мақом ва имтиёзҳои дипломатии худ барои анҷом додани фаъолиятҳое истифода мебарад, ки берун аз доираи ваколатҳои расмияш қарор доранд.
Ба гуфтаи онҳо, сафири Тоҷикистон бо дастуру супоришҳои сохторҳои амниятии кишвар ба ҷамъоварии маълумот дар бораи шаҳрвандони Тоҷикистон, аз ҷумла мухолифони сиёсӣ ва фаъолони ҷомеаи шаҳрвандӣ, ки дар қаламрави Олмон зиндагӣ мекунанд, машғул аст.
Дар нома ҳамчунин аз созмоне бо номи “Пайванд”, ки дар Олмон бо мусоидат ва саҳми Имомуддин Саторов фаъолият мекунад, ёдоварӣ шудааст. Ба гуфтаи фаъолони тоҷик, ин созмон, бо вуҷуди муаррифии худ ҳамчун ташкилоти ҷамъиятӣ, дар асл ба фаъолияти иттилоотӣ ва таблиғотӣ ба манфиати сохторҳои амниятии Тоҷикистон машғул аст.
Илова бар ин, тавассути ин шабака аз бархе донишҷӯён ва шаҳрвандони Тоҷикистон, ки дар соҳаҳои гуногун, аз ҷумла бахши хидматрасонӣ ва меҳмонхонаҳо фаъолият доранд, талаб карда мешавад, ки дар бораи ҷойи кор, фаъолияти худ, ҳамкорон ва мусофироне, ки дар он меҳмонхонаҳо иқомат мекунанд, маълумот ҷамъоварӣ ва ба сафорат пешниҳод намоянд.
Қисмати алоҳидаи нома ба фаъолияти Имомуддин Саторов дар давраи сафири Ҷумҳурии Тоҷикистон дар Федератсияи Русия (солҳои 2014–2021) бахшида шуда, гуфта мешавад, ки дар он давра бо ташаббуси шахии ӯ ва дар ҳамоҳангӣ бо сохторҳои қудратии Русия садҳо шаҳрванди Тоҷикистон боздошт шуда, ба кишвар интиқол дода шуданд ва баъдан мавриди таъқиби ҷиноятӣ қарор гирифтанд. Бояд гуфт, дар давраи сафирии ӯ чеҳраҳои шинохтае мисли Каромат Шарипов ва Иззат Амон аз Русия ба Тоҷикистон ихроҷ шуда буданд.
Дар муроҷиати фаъолони бурунмарзӣ ҳамчунин фарзияҳо дар бораи робитаҳои дарозмуддати ӯ бо сохторҳои амниятии собиқ Иттиҳоди Шӯравӣ ва Федератсияи Русия баён шудаанд.
Дар поёни нома муаллифон аз Вазорати корҳои хориҷии Олмон даъват намудаанд, ки маълумоти пешниҳодшударо ҳамаҷониба мавриди баррасӣ қарор дода, барои пешгирӣ аз таҳдидҳои эҳтимолӣ ба амнияти миллӣ, тартиботи ҳуқуқӣ ва амнияти паноҳандагону шаҳрвандони Тоҷикистон дар Олмон чораҳои дахлдор андешад.
Гуфта мешавад, ин муроҷиат ба ВКХ-и Олмон аз ҷониби гурӯҳе аз рӯзноманигорон, ҳуқуқшиносон, фаъолони ҷомеаи шаҳрвандии тоҷик ва мухолифону озодихоҳони навишта шудааст.
То лаҳзаи нашри ин хабар, Вазорати корҳои хориҷии Олмон ва ё Сафорати Ҷумҳурии Тоҷикистон дар Олмон ба ин муроҷиат расман вокуниш нишон надодаанд.
