Раиси Ҷумҳури Тоҷикистон Эмомалӣ Раҳмон бо роҳбарони вилоятҳо ва ноҳияҳо вазъи паёмадҳо аз офатҳои табииро, ки бар асари боронҳои чанд рӯзи ахир ба кишвар расида аст, баррасӣ намуд.

Хабаргузории “Спутник” бо такя ба гузориши дафтари матбуотии раёсати ҷумҳурӣ нигошта, ки Эмомалӣ Раҳмон дар як суҳбати телефонӣ бо Қоҳир Расулзода, раиси вилояти Хатлон Йурбон Ҳакимзода ва сарони дигар минтақаҳо вазъи ба вуҷуд омада дар натиҷаи офатҳои табииро мавриди баррасӣ қарор дод ва дар бораи хисорот ва паёмадҳое, ки ин офатҳои табиӣ ба минтақаҳои тобеи ҷумҳурӣ ва вилояти Хатлон ба бор овардаанд ошно гардид.

Роҳбарони навоҳии Ш.Шоҳтемур, Муминобод, Мир Саид Алии Ҳамадонӣ, Ёвон, Кушониён, А.Ҷомӣ, ва Данғара дар мавриди вазъ ва сухан гуфтанд.

Ба гуфтаи дафтари матбуотии раиси ҷумҳурӣ Эмомалӣ Раҳмон дастур додааст, ки барои бартараф кардани паёмадҳо ва саривақт расонидани кумак ба ҳамаи осебдидагон, барқарор кардани хонаҳои харобшуда, роҳҳо, пулҳо ва дигар биноҳои харобгардида чораҳои фаврӣ андешида шаванд.

Бояд гуфт, ки дар натиҷаи боронҳои шадид ва сел дар як қатор шаҳру ноҳияҳои вилояти Хатлону навоҳии тобеи ҷумҳурӣ хонаҳои сокинони маҳаллӣ хароб гардида, роҳҳо ва дигар иншооти муҳимми иқтисодӣ осеб дидаанд. Алакай 8 нафар қурбонии ин офатҳои табии шудаанд ва дар кишвар як Комиссияи ҳукуматӣ таъсис дода шудааст, ки хисороти воридшударо муайян ва ҳамаи паёмадҳои онро бартараф хохад кард.

Дар ҳайати ин комиссия роҳбарони Вазорати умури дохила, Кумитаи давлатии амнияти миллӣ ва Кумитаи ҳолатҳои фавқуллода ҳамчунин роҳбарони вазорату идораҳои марбутаи Тоҷикистон шомил ҳастанд.

Рӯзи 11 май дар натиҷаи боронҳои шадид дар ҳудуди як қатор ноҳияҳои вилояти Хатлон ва ноҳияҳои тобеи ҷумҳурӣ селу обхезӣ ба вуҷуд омад, ки дар натиҷа боиси марги одамон гардид.

Ҳамчунин Кумитаи ҳолатҳои фавқулодда ва мудофиаи граждании Ҷумҳурии Тоҷикистон аз  вайроншавии манзили истиқоматӣ ва шусташавии роҳҳои автомобилгард хабар дод.

Тибқи маълумоти пешакӣ, дар натиҷаи офати табиӣ дар ноҳияи Шамсиддини Шоҳини вилояти Хатлон 3 нафар аъзои як оила, ки дар дохили мошин буданд, ба ҳалокат расидаанд.

Дар шаҳри Кулоб 3 нафар фавтид, ки аз инҳо 2 нафар дар дохили автомашина будаанд ва 1 нафари дигар аз дохили маҷрои сел дарёфт карда шуд.

Ҳамчунин навбатдори Кумитаи ҳолатҳои фавқулода дар минтақаи Кӯлоб ба Радиои Озодӣ гуфтааст, ки вазъият дар шаҳр вазнин аст ва наздики 80 макони зарардидаро ба қайд гирифтанд.

Қумитаи ҳолатҳои фавқуллода мегӯяд, дар шаҳри Ҳисор як сокини маҳаллӣ бар асари сел ҳангоми чаронидани чорво ба ҳалокат расидааст.

Гуфта мешавад, дар пайи ин ҳодиса Сарвазир Коҳир Расулзода, Раиси вилояти Хатлон Қурбон Ҳакимзода, вазири корҳои дохилӣ Рамазон Раҳимзода ва раиси Кумитаи ҳолатҳои фавқулодда ва мудофиаи гражданӣ Рустам Назарзода ба минтақаҳои аз офатҳои табиӣ зарардидаи Шаҳри Кӯлоб, ноҳияҳои Шамсиддин Шоҳин ва Мӯъмин вилояти Хатлон рафтанд.

Инчунин, бо супориши Раҳмон, як гурӯҳи кории Ҳукумати Ҷумҳурии Тоҷикистон таҳти роҳбарии Сарвазир Коҳир Расулзода ба манотиқи офатзадаи Абдураҳмони Ҷомӣ ва Ёвон рафтанд.

Гурӯҳи корӣ зарари пешакии ба иқтисодиёти ин шаҳру ноҳияҳо расидаро муайян намуда, барои рафъи оқибатҳои офатҳои табиӣ чораҳои таъҷилӣ меандешанд.

Дар ноҳияи Абдураҳмони Ҷомӣ замин фурӯ рафта чандин хона ба куллӣ аз байн рафтааст, ки соҳибонашон мегӯянд, танҳо ҷони худро бадар карданд ва чизе аз хонаҳояшон гирифта натавонистанд. Вале то ҳол сабаби фурӯ рафтани замин муайян нашудааст, вале як сокини ин ноҳия дар тамос бо “Аздо тв” гуфт, ба эҳтимоли зиёд заминҳои ин деҳа аз сабаби он ки дар паси кӯҳе ҷойгир аст, ки он тарафи обанбори Сангтӯда 1 ва 2 ҷойгир ҳастанд, шояд намнокии заминҳои ин деҳа ва фурӯ рафтани хонаҳо ба наздикияшон ба ин онборҳо рабт дошта бошад”.