Хусрав Бобохонзода, сокини 34-солаи шаҳри Истаравшан аз ҷониби маъмурони Агентии назорати молиявӣ ва мубориза бо коррупсияи Тоҷикистон бо гумони қаллобӣ дастгир шуд. Дар ин бора Ридои Озодӣ аз қавли сардори бахши Агентӣ дар вилояти Суғд хабар дод.

Бино ба гуфтаи сардори бахши Агентӣ дар вилояти Суғд Шараф Аваззода, Хусрав Бобозода худро маъмури Агентии зидидфасод муаррифӣ карда, давоми як сол барои ҳалли мушкилоти сокинон аз онҳо “тақрибан сесад ҳазор сомонӣ гирифтааст”.

Сардори бахши Агентӣ дар вилояти Суғд рӯзи 3 июл зимни нишасти матбуотии ниҳодаш вуҷуди чунин кормандеро дар ниҳодашон рад кард.

Айни замон ин сокини шаҳри Истаравшан дастгир шуда, нисбаташ бо иттиҳоми қаллобӣ парванда боз шудааст. “Нисбат ба ӯ бар асоси моддаи 247, қисми 4, (қаллобӣ) парвандаи ҷиноӣ оғоз кардем. Ба ҳабс гирифта шудааст, парвандаро ба додгоҳ фиристодем.”, афзуд Шараф Аваззода.

Ба иттилои Агентии зидди фасод, Хусрав Бобозода дар давоми як сол дар панҷ ҳолат 293 ҳазору 420 сомонии сокинонро аз худ кардааст. Вале масъулини ин ниҳод шарҳ надоданд, ки гувоҳномаи ин сокини Истаравшан ҳақиқӣ буд ё сохтакоришуда.

Дар Тоҷикистон шахсони алоҳида бардурӯғ худро корманди сохторҳои қудратӣ муаррифӣ кардану аз мардум маблағҳои ҳангуфт гирифтан бори аввал нест, ки расонаӣ мешавад.

Ба гузориши Радиои Озодӣ, соли 2018 додгоҳи Хуҷанд Дилшод Тошмуҳаммадови 32-соларо дастгир карда буд, ки ӯ худро маъмури милиса муаррифӣ карда, аз наздикони чаҳор маҳбус бо ваъдаи раҳоии онҳо ҳудуди 150 ҳазор сомонӣ гирифтааст. Пас аз боздошт додгоҳ ӯро барои 9 сол аз озодӣ маҳрум кард.

Шумораи ҷиноятҳое, ки дар нимсолаи аввали соли ҷорӣ дар Тоҷикистон ба қайд гирифташудааст 13,8 ҳазорро ташкил дод.

Бино ба маълумоти Агентии омори Тоҷикистон, ин рақам нисбат ба ҳамин давраи соли гузашта 12,9% зиёдтар аст.

Дар ин давра ҷиноятҳо дар вилояти Хатлон – 22,2%, вилояти Суғд – 12,3%, ноҳияҳои тобеи марказ – 17,9%, ВМКБ – 18,9% афзоиш ёфтааст.

Ба фарқ аз дигар шаҳру ноҳияҳо, дар ин давра шумораи ҷиноятҳои ба қайд гирифташуда дар шаҳри Душанбе – 8,2% коҳиш ёфтааст.

Дар 6 моҳаи аввали соли ҷорӣ шумораи ҷиноятҳои вазнини ба қайд гирифташуда 2 ҳазору 918 ҳолатро ташкил дод, ки нисбат ба моҳҳои январ-июни соли 2020 12,1% зиёд аст.

Сабти ҳолатҳои одамкушӣ ва сӯиқасд ба куштор 45,7%, таҷовуз ба номус 37,5%, дуздӣ 11,4%, ғоратгарӣ 17,6% ва ғайра афзоиш ёфтааст.

Дар ин давра 40% коҳиши сабти ҳолатҳои хариду фурӯши одамон ба қайд гирифта шудааст.

Сатҳи умумии ошкоркунии ҷиноятҳо дар моҳҳои январ-июни соли равон 80%-ро ташкил дод.

Имрӯз, 3-юми август, Вазири тандурустӣ ва ҳифзи иҷтимоии аҳолии Тоҷикистон дар қабули шаҳрвандон иштирок мекунад.

3-юми август дар суҳбат ба Аздо тв аз Вазорати тандурустӣ ва ҳифзи иҷтимоии аҳолӣ хабар доданд, ки қабули шаҳрвандон бо иштироки Ҷамолиддин Абдуллозода, вазири тандурустӣ ва бо ҳузури ҳайъати комиссияи вазорат аз соати 14 то 16 баргузор мегардад.

Ҳамзамон Суғдмеҳри Маъруфзод, корманди Маркази матбуоти Вазорати тандурустӣ ва ҳифзи иҷтимоии аҳолии Тоҷикистон дар суҳбат бо Аздо тв ҳузури вазирро таъйид кард, вале гуфт, агар кадом сафари хидматие пеш наояд, ҷаноби вазир низ дар қабули шаҳрвандон иштирок мекунад.

Дар вазорат нагуфтанд, ки ҷаноби вазир Ҷамолиддин Абдуллозода кай аз Маскав баргаштааст, вале таъкид карданд, ки вазир дар ҷои кор ҳузур дорад ва имрӯз дар қабули шаҳрвандон ширкат мекунад.

26-уми июли 2021, Ғафур Муҳсинзода, муовини вазири Вазири тандурустӣ ва ҳифзи иҷтимоии аҳолии Тоҷикистон гуфта буд, ки вазир барои имзои қарордоди ворид кардани воксин ба Маскав сафар карда аст. Аммо пас аз чанд соат Радио Озодӣ дар гузорише хабар дод, ки вазири тандурустӣ мавриди латукӯб қарор гирифтааст.

Дар ин гузориш гуфта мешуд, хоҳарзодаҳои Эмомалӣ Раҳмон ба хотири фавти модарашон аз коронавирус вазири тандурустӣ ва ҳифзи иҷтимоии аҳолиро латукӯб карда, дар натиҷа ҷоғи вазир осеб дидааст.

Хабари латукӯби вазири тандурустӣ дар шабакаҳои иҷтимоӣ вокунишҳои зиёди корбарон рӯ ба рӯ шуд, қисме аз он ҳимоят карданд ва қисме дигар ин ҳодисаро фоҷеа хонданд. Инчунин хабари латукӯби вазири тоҷик дар расонаҳои ҷаҳонӣ бозтоб ва ба эътибори низоми давлатдорӣ дар Тоҷикистон латма зад.

Вазорати молияи Тоҷикистон гуфт, ба суратҳисоби боз кардаашон барои дастгирии зарадидагони муноқишаҳои марзӣ касе маблағ ворид накардааст.

Ба гуфтаи вазири молияи Тоҷикистон Файзиддин Қаҳҳорзода, суратҳисобро боз карданд, вақте шаҳрвандон ба он маблағ нагузарониданд ба созмонҳои байналмиллалӣ муроҷиат карданд, то тариқи ин суратҳисобҳо ба зарардидагони муноқишаи марзӣ кумаки худро расонанд.

Дар ҳамин ҳол Раҷаби Мирзо, яке аз ташабубскороне, ки аз ҷониби ҷомеаи шаҳрвандӣ барои зарардидагони муноқишаи марзӣ маблағ ҷамъоварӣ карда буд, дар шабакаи Фейсбук акси расиди 10000 сомонӣ таҳвил додаашро ба суратҳисоби ҳукумат нашр кард. Ӯ менависад, ки “пас 10000 сомонии ворид кардаи мо куҷо рафт?”

Охири моҳи апрели соли ҷорӣ дар марзи Тоҷикистону Қирғизистон даргириҳои хунин рух дод, ки дар натиҷа садҳо нафар аз ду ҷониб захмӣ ва даҳҳо каси дигар ҷони худро аз даст дод ва ҳамчунин даҳҳо хонаи дигар сӯхта валангор шуданд. Дар пасманзари ин даргириҳо ҷамоеаи шаҳрвандии Тоҷикистон барои кумаки зарардидагон суратҳисоб боз кадрда, аз хайрхоҳон ҷамъовароварии кумакҳоро оғоз карданд.

8-уми майи 2021 Вазорати корҳои дохилаи кишвар бо нашри як иттилоия хайрхоҳон ва ташаббускорони ҷомеаи шаҳрвандиро, ки ба ҷамъоварии кумакҳо ба осебдидагон машғул буданд, қаллоб хонда, эълом кард, ки ҷамъоварии маблағро манъ кунанд вамардум кумакҳои худро ба суратҳисоби махсуси мақомот фиристанд. Аммо имрӯз маълум шуд, ки қаллобони асосӣ асосӣ дар Вазорати молия нишастаанду мақомот ин туҳматро ноҷо ба ташаббускорони ҷомеаи шаҳрвандӣ зада буданд.