Ҷустуҷӯ кунед
Ҷустуҷӯ
37.9 C
Dushanbe
Хона блог саҳифа 71

Гази моеъ 20 дирам арзон шуд

Аз ҷониби
Azda TV 3
-
0

Ин ҳафта ба сабаби бардоштани маҳдудиятҳои фурӯши гази моеъ дар пойтахти кишвар нархи он каме арзон шудааст.

Ҳоло арзиши 1 литр гази моеъ, ки дар Тоҷикистон серистеъмол аст, дар нуқтаҳои фурӯши сӯзишвории шаҳри Душанбе ва атрофи он 8,00 сомонӣ то 7,80 сомонӣ фурӯхта мешавад.

Пеш аз бардоштани маҳдудиятҳо арзиши 1 литр гази моеъ дар нуқтаҳои фурӯши сӯзишвории пойтахт ба қимати 8,20 сомонӣ фурӯхта мешуд.

Ба иллати гармии ҳаво ва барои пешгирӣ аз ҳодисаҳои нохӯш дар нуқтаҳои фурӯшии гази моеъ, ки ба талаботҳои бехатарӣ ҷавобгу набуданд, фурӯши ин навъи сӯзишворӣ аз тарафи шаб иҷозат шуда буд. 

Ёдовар мешвем, ки дар оғози нимсолаи дуюм нархи гази моеъ дар нуқтаҳои фурӯши сӯзишворӣ дар тамоми кишвар беш аз 40 % гарон шуда, аз 5 сомонию 80 дирам барои як литр ба 8 сомонӣ расида буд.

Он замон Вазорати энергетикаи кишвар гарон шудани қимати гази моеъро ба кам будани талаботи сокинон ва зиёд шудани автомобилҳои барқӣ рабт дода буд.

Коршиносон иддаои Вазоратро мантиқӣ намедонанд ва мегӯянд, баръакс, бо кам шудани талабот нархҳо бояд поин раванд ва иллати асосии болоравии нархҳоро ба набудани рақобат дар ин соҳа ва инҳисори он аз ҷониби наздикони раисҷумҳур медонанд.


Чаро Раҳмон иншооти сохати хориҷиҳоро ҳам ба номи худ сабт мекунад? 

Аз ҷониби
Azda Tv
-
0

Эмомалӣ Раҳмон 12-уми сентябр зимни сафари корӣ дар ноҳияи Тоҷикобод аз ҷараёни бунёди маҳаллаи нав дар деҳаи Сафедмуни ҷамоати деҳоти Қалъаи лаби об боздид кард.

Гуфта мешавад, деҳаи Сафедмун дорои 430-хоҷагӣ ва 4-ҳазор аҳолӣ буда ва маҳаллаи навбунёд, ки ибоарт аз 60 хонаи истиқоматӣ аст, барои қишри ниёзманди ноҳия, аз ҷумла ятимону маъюбон, бенавоён ва мисли онҳо сохта мешавад. 

Хадамоти матубуоти раисҷумуҳур танҳо ишора карда, ки “ин лоиҳаи иншооти мазкур дар заминаи ҳамкории ҷамъияти хайриявии “Тоҷикистон” бо шарикони хориҷии рушд бунёд мегардад”.

Аммо дар хабар гуфта нашудааст, ки он шарики хориҷӣ кадом кишвар аст ва кадом мақсаду шурут барои тоҷикони муҳтоҷ манзил бунёд мекнад. Нуктае, ки корбарон онро ба чолиш кашидаанд ва суол додаанд, ки чаро раисҷумуҳур ҳама чизро ба худаш рабт медиҳад? Дар ҳоле, ки онро дигарон месозанд.

Ин ягона ҳолате нест, ки мубаллиғони раисҷумуҳур ҳангоми итфитоҳи иншооти сохати кишвару созмонҳои хориҷӣ, саҳмдорони аслии онро пинҳон кардаву навъе онро ба раисҷумуҳр рабт медиҳанд. 

Дар хабар зикр гардида, ки шарикони рушд аз Имороти Муттаҳидаи Арабӣ буда, нақша доранд, дар он маҳаллаи навбунёд инчунин барои бунёди як мактаб низ маблағгузорӣ кунанд.

Аммо дафтари матбуоти раисҷумҳур менависад, ки маблағгузории шарикони рушд “бо роҳнамоии” Эмомалӣ Раҳмон сурат гирифтааст. Ҳамин аст, ки корбарон мепурсанд, чаро ҳар амали ободкорӣ бояд бо “роҳнамоӣ” ва “ҳидояти” шахси аввал сурат бигирад? Оё ин ба маънои заҳмату талоши дагаронро ба номи худ кардан нест?

Афзоиши ҳамлаҳои Исроил ба Ғазза

Аз ҷониби
AZDA.TV
-
0

Имрӯз аз оғози ҳамлаҳои ҳавоӣ ва заминии артиши Исроил ба Навори Ғазза 343 рӯз мегузарад ва ҳамоно ҷанг идома дорад.

Ба иттилои расонаҳо, артиши Исроил аз бомдоди рӯзи панҷшанбе то имрӯз бевақфа ҳамлаҳои худро болои мардум дар Навори Ғазза шиддат бахшидааст. Бар асари ҳамлаҳои ахир, дасти кам 40 нафар ҷони худро аз додаанд, ки аксарашон кӯдакону занон буданд.

Артиши Исроил ҳамзамон ҳамлаҳои худро дар Каронаи Бохтарӣ, аз ҷумла дар Тулкарм ва Тубос идома дода, ки дар натиҷа 4 нафар кушта ва 4 каси дигар захмӣ шудаанд.

Дар ҳамин ҳол беморхонаҳои Навори Ғазза бар асари ҳамлаҳои Исроил аз норасоии шадиди дору ва имконоти пизишкӣ аз ҷомеаи ҷаҳонӣ кумаки оҷил хостаанд.

Тибқи иттилои Вазорати беҳдошти Фаластин, аксари беморхонаҳо аз байн рафтаанд ва чанд беморхоае, ки боқӣ мондааст, аз норасоии 60 дарсади доруҳои умумӣ ва 85 дарсад аз доруҳои махсуси бемориҳои саратон ва шустани гурдаҳо танқисӣ мекашанд.

Дар ҳамин ҳол Антонио Гутерриш, Дабири кулли Созмони Милали Муттаҳид дар пайи кушта шудани кормандони ин ниҳоди байналмилалӣ дар Ғазза изҳороте нашр кард, ки дар он мегӯяд, “Ончи дар Ғазза мегузарад, ғайри қобили қабул аст.”

Гутерриш бо интиқод аз амалкардҳои артиши Исроил гуфт, ки адами посухгӯӣ дар қиболи қатлу куштори кормандони ин созмон ва нерӯҳои имдодӣ дар Навори Ғазза қобили қабул нест.

Дабири кулли СММ мегӯяд, аз ҷониби артиши Исроил дар Навори Ғазза қонунҳои башардӯстонаи байналмилалӣ ба шиддат поймол шудааст ва ғайринизомиён муҳофизат намешаванд.

Вале Гутерриш дар бораи муҷозот нашудани омилони ҷиноятҳои зидди башарии нерӯҳои исроилӣ, ки дар куштани кӯдакону занон ва пиронсолон даст доранд, чизе нагуфт.

Ёдовар мешавем, ки аз оғози ҷанг то кунун дар Ғазза беш аз 136 ҳазор кас кушта ва захмӣ шуданд ва ҳудуди 10 ҳазор нафар зери овараҳо монда ва ё нопадид гаштаанд. Инчунин ҳазорон хонаву мактаб ва зерсохторҳои ин минтақа аз байн рафта, ин борика ба харобазор табдил шудааст.

Устоди донишгоҳ мегӯяд, Самарқанду Бухоро аз тоҷикон нестанд

Аз ҷониби
AZDA.TV
-
0

Устоди Донишгоҳи Хуҷанд Исомиддинов (Исомитдинов) Ҷӯрабек дар як мусоҳибаи телевизионии Узбекистон мегӯяд, ки тоҷикон набояд дигар дар бораи Самарқанду Бухоро фикр кунанд.

Ин устоди донишгоҳ мегӯяд, дар шаҳрҳои бостонии Самақанду Бухоро замоне ба тоҷикон тааллуқ дошт, вале ҳоло дар ҳудуди Узбекистон ҳастанд ва даъвои ин ки ин ду шаҳр ба тоҷикон марбут асту ҳоло аз онҳо гирифта шудаанд, набояд матраҳ шавад.

“Иддаои ин ки Самарқанду Бухоро аз тоҷикон аст, хато аст. Ҳозир ин шаҳрҳо дар ҳудуди Узбекистон қарор доранд. Ман ҳангоми дарс гуфтан ба шогирдонам мегӯям, ки ин масъала ҳал шудааст, дар байни давлатҳо масъалаи марзу ҳудуд имзо шудааст ва мо ин тавофуқоти имзошударо ҳақ надорем инкор кунем.“, – мегӯяд Исомиддинов дар мусоҳибааш.

Исомиддинов ҳамчунин таъкид мекунад, ки “Чаро мо имрӯз дар бораи Самарқанду Бухоро даъво мекунем, лекин дар бораи Балху Астарободу Машҳад даъво намекунем?“

Ин тарзи баёни устоди Донишгоҳи Хуҷанд Иомиддинов Ҷӯрабек вокуниши аксари корбаронро ба бор овардааст. Дар зери навори мусоҳибаи ӯ корбарони тоҷик аз ӯ шадидан интиқод карда, бархе аз шарҳнависон ӯро “Ватанфурӯш”, “хоин” “Пантуркист” ҳам хитоб карднаанд.

Аз ҷумла, Адибаи Хуҷандӣ менависад: “Ин одам ӯзбек ба фикрам тоҷик нест, таърихро инкор дорад. Вой бар мо. Ин одам боз ҳар рӯз дар телевизиони вилоят аз китоби Тоҷикон ҳарф мезанад. Баракси ҳамин гапҳоро мегуфт…Мо ба мардуми ӯзбек эҳтиром дорем дӯстиву бародарӣ ҳамкориҳои ҳамаҷониба хешутаборӣ дорем. Фақат инсофан лутфан таърихро набояд инкор кард.“

Ҳамчунин корбаре бо номи Бежан Некзод менависад: “Ҳайратовараш он, ки ин пантуркист худро тӯли ин солҳо таърихшиноси тоҷик вонамуд карда, ба донишҷӯён ақидаҳои пантуркистиро тарғиб мекардааст ва на ректори донишгоҳ ва на дигар шахсони масъул ба ин ҳолат таваҷҷӯҳ накардаанд. Ин хоинро мақолаҳову китобҳояшро таҳлил кардан лозим, ки худро ҳамчун таърихшиноси тоҷик муаррифӣ карда чиҳо навишта бошад.“

Ба андешаи мегӯянд, Исоматдинов ҳамчун устоди як донишгоҳи бузурги Тоҷикистон набояд ба ин нуқтаи ҳассос нохун мезад. Зеро ҳам узбекон ва ҳам тоҷикон хуб медонанд, ки ин ду шаҳр ва боз чанд шаҳри дигар, ки ҳоло дар қаламрави Узбекистон шомил ҳастанд, садсолаҳо аз бузургтарин шаҳрҳои тоҷикон буданд.

Azda Tv аз манобеи худ маълум кард, ки Исомиддинов (Исомитдинов) Ҷӯрабек аз соли 2018 то кунун мудири кафедраи таърихи Ватан ва археологияи факултаи таърих ва ҳуқуқи Донишгоҳи давлатии Хуҷандро бар уҳда дорад. Писараш ҳам як муддат дар ин Донишгоҳ фаъолият кардааст.

Гуфта мешавад, Исомиддинов аз узбектаборни ҷамоати Ёваи ноҳияи Бобоҷон Ғафурови вилояти Суғд буда, солҳост дар Донишгоҳи давлатии Хуҷанд ба шогирдон дарс мегӯяд.

Шикояти сокинон аз “Барқи тоҷик”

Аз ҷониби
Azda TV 3
-
0

Марям Давлатова, равоншиноси тоҷик 11-уми сентябр дар Фейсбук аз зиёд ҳисоб кардани пули истифодаи барқ шикоят кардааст.

Ӯ менависад, тақрибан хароҷоти барқи хонааш дар моҳ 150 сомонӣ аст, аммо аз идораи барқ расид дарёфт карааст, ки дар он маблағи 2 моҳа истифодаи барқ 777.74 сомонӣ нишон дода шудааст. Хонум Давлатова менависад, “ин тақрибан 150 дарсад аз хароҷоти воқеӣ зиёд мебошад.”

Хонум Давлатова шикоят мекунад, ки бахши фурӯши шуъбаи барқи ноҳия ҳатто телфон надорад, ки ба саволҳо посух бигирем.

Дар идома ин равоншиноси тоҷик дар масъалаи мушкилоти низоми нави ҳисоби барқ мегӯяд: “Ба ман котиби матбуотии Барқи тоҷик Қурбон Аҳмадзода занг зада хабар дод, ки масъалаи мазкур дар салоҳияти Шабакаҳои тақсимоти барқ аст.” Баназар мерасад талошҳои хонум Далатова бенатиҷа буда, ки дар охири ёдошти худ таъкид мекунад, “айни замон тадқиқоти худҷӯши мо идома дорад.”

Баъд аз шикояти Марям Давлатова котиби матбуотии Барқи тоҷик дар Фейсбук дар ёдоште ба тафаҷҷуҳи сокинон ва ишора ба Марям Давлатова нависшт: “Ҳангоми рӯ ба рӯ шудан бо мушкилотатон аз ҷумлаи интиқол, тақсимот ва пардохти маблағи барқ (хомӯш ва фаъол намудани неруи барқ низ) метавонед ба рақамҳои телефони боварии ҶСК “Шабакаҳои тақсимоти барқ» муроҷиат намоед.”

Қурбон Аҳмадзода мегӯяд, масъалаҳои зиркшуда ба уҳдаи ҶСК “Барқи тоҷик” нест ин гуна мушкилот бар уҳдаи ҶСК “Шабакаҳои тақсимоти барқ” мебошад.

Ин ҳам дар ҳолест, ки Вазорати энергетика мегӯяд, аҳолии кишвар аз барқ 1,5 милиард сомонӣ қарздоранд. Аммо ба иддаои аксари корбарон, аҳолӣ сари вақт пули барқро месупоранд, агар насупоранд масъулин барқи хонаҳояшонро қатъ мекунанд.

Иддаои қарздор будани мардум аз барқ дар ҳолест, ки Мирзо Исмоилзода, собиқ раиси “Барқи тоҷик” 1-уми январи соли 2021 низ гуфта буд, ки мардум аз барқ тақрибан 1,5 милиард сомонӣ қарздоранд.

Ба гуфтаи мунтақидон, дар муддати 3 сол тағйир накардани ин рақамҳо воқеӣ будани омори Вазорати энергетикаро зери суол мебарад. Дар гузашта рӯзноманигорон низ ин миқдор қарздор будани аҳолиро шубҳанок гуфта буданд.

Шаҳрвандони хориҷиро аз зиндонҳои Русия ба кишварҳояшон мефиристанд

Аз ҷониби
AZDA-TV
-
0

Мақомоти Русия тасмим доранд шаҳрвандони хориҷие, ки дар ин кишвар зиндонӣ ҳастанд, идомаи муҳлати ҷазоро дар давлатҳои худашон гузаронанд.

Бино ба иттилои расонаҳои русӣ, кормандони Хадамоти федералии иҷрои ҷазо дар маҳбасҳо аз зиндониёни Украина, Белорус, кишварҳои Осиёи Марказӣ, аз ҷумла Тоҷикистон ва кишварҳои ғарбӣ талаб доранд то зери навиштаи ризоият барои бозпас фиристодан ба кишварҳояшон имзо гузоранд.

Гуфта мешавад, ин тасмими мақомоти Русия дар пасманзари ҳамлаи террористӣ дар СИЗО-и Ростов-на-Дону ва зиндони вилояти Волгоград, ки дар он шаҳрвандони хориҷӣ даст доштанд, гирифта шудааст.

То ҳол маълум нест, ки ҳамаи зиндониёни хориҷӣ ба кишварҳояшон фиристода мешаванд ё на. Чун тибқи қонунҳои Русия афроде, ки бо иттиҳоми “ҷосусӣ” зиндонӣ шудаанд, нисбати онҳо тартиби интиқол ба ватанашон барои адои ҷазо пешбинӣ нашудааст ва одатан ин афрод бо афроди монанд мубодила мешаванд. Мисли мубодилае, ки миёни Ғарб ва Русия 1-уми августи соли ҷорӣ сурат гирифт.

Аммо шаҳрванди Лаҳистон Мариан Радзаевский, ки соли 2019 барои ҷосусӣ ба 14 соли зиндон маҳкум шуда буд, якчунин дархостеро навишта зери он имзо кардааст.

Ин хабар дар ҳоле расонаӣ мешавад, ки мақомоти Русия дар гузашта талош мекарданд то бо зиндониёни хориҷӣ шартнома баста, онҳоро ба ҷанг дар Украина фиристанд.

Аҳмад Масъуд дар табъид ҳукумат ташкил медиҳад?

Аз ҷониби
AZDA.TV
-
0

Аҳмад Масъуд, раҳбари Ҷабҳаи муқовимати миллии Афғонистон зимни нашри изҳороте аз ҷонибдории худ барои ташкили ҳукумат дар табъид хабар дод.

Раҳбари ҶММ 10-уми сентябр дар мусоҳиба бо расонаи “Responsible Statecraft” дар ин маврид ибрози назар кард. Ӯ дар мавриди ин ки чаро вақтҳои охир муборизааш камранг шудааст, гуфт, ки аз мубориза алайҳи Толибон даст накашидааст ва ҷомеаи ҷаҳонӣ ҳам аз пуштибонии муқовимат набояд даст бикашад. 

Ӯ ҳамчунин гуфт, ки мехоҳанд барои пирӯзии муқовимат алайҳи Толибон дар хориҷ аз кишвар ҳукумат ташкил бидиҳанд. Масъуд таъкид кард, ки ҳоло “Ба самти ташкили ҳукумат дар табъид ҳаракат мекунем”.

Ба гуфтаи раҳбари ҶММ, эҷоди ҳукумат дар табъид ниёз ба иттиҳоди густарда ва ҳузури ҳамаи гурӯҳҳои мухолиф дорад. Он чи ки ба гуфтаи Аҳмад Масъуд, гурӯҳҳои мухолифи Толибон ҳанӯз аз дастёбӣ ба он дур ҳастанд.

Пас аз суқути ҳукумати Ашраф Ғанӣ ва ба сари қудрат омадани Толибон дар Афғонистон бори аввал аст, ки яке аз чеҳраҳои мухолифи ин гурӯҳ дар мавриди эҷоди ҳукумат дар табъид сухан мегӯяд.

Ба назари коршиносон, гурӯҳҳои мухолифи Толибон ба хотири вуҷуди ақвому қабоили гуногун дар байнашон шонси эҷоди ҳукумат дар табъидро доранд, вале чизе ки намерасад барои ин кор, адами иттиҳод ва ҳамбастагии онҳост.

Сӯиқасд ба ҷони муфтии Тоҷикистон

Аз ҷониби
Azda Tv
-
0

Сайидмукаррам Абдулқодирзода, раиси Шӯрои уламои Макарзи исломии Тоҷикистон рӯзи 11-уми сентябр дар пайи як сӯиқасд ба ҷонаш захмӣ шудааст.

Дар ин бора имрӯз, дафтари матбуоти Вазорати корҳои дохилии Тоҷикистон хабар дод. ВКД ангезаи асосии ҳамларо шарҳ надод, аммо ин сӯиқасдро “амали авбошӣ” хонд.

Ба гуфтаи ин ниҳод, ҳамлавар ҳангоми ҳуҷум ба сӯи Абдулқодирзода “аз асбоби халандаю бурранда” истифода кардааст.

Гуфта мешавад, ҳамла ба ҷони муфтии Тоҷикистон баъди адои намози аср дар масҷиди марказии шаҳри Душанбе рух додааст. Дар ҳоли ҳозир вазъи саломатии Абдулқодирзода хуб арзёбӣ мешавад.

ВКД дар ин бора ҷузъиёти бештаре нашр накардааст ва ҳувияти ҳамлагару ангезаи асосии ба ин кор даст заданаш низ фош нашудааст.

Тоҷикистон аз Қатар хост, ки марказҳои тиҷоратӣ бисозад

Аз ҷониби
AZDA TV-2
-
0

Сафири Тоҷикистон дар Қатар зимни мулоқот бо намояндаи Палатаи савдо ва саноати Қатар аз вай хост, ки дар Тоҷикистон сармоягузорӣ кунанд.

Бино ба иттилои расмӣ, 10-уми сентябри соли 2024 Нурмурод Маҳмадалӣ, сафири фавқулода ва мухтори Ҷумҳурии Тоҷикистон дар давлати Қатар бо Тувар ал-Куварӣ, муовини якуми раиси Палатаи савдо ва саноати Қатар мулоқот кард.

Ба қавли манбаъ, дар рафти ин мулоқот “ҷонибҳо масъалаҳои марбут ба густариши ҳамкориҳои мутақобилан судманд дар соҳаҳои тиҷорат, саноат, сармоягузорӣ ва биносозӣ, аз ҷумла сохтмони марказҳои савдо ва тиҷоратиро баррасӣ намуданд.”

Ҳамзамон ҷонибҳо ба зарурати барқарор намудани робитаҳои зич байни Палатаи савдо ва саноати Ҷумҳурии Тоҷикистон ва Палатаи савдо ва саноати давлати Қатар таъкид карданд.

Гуфта мешавад, сафири ҷадиди Тоҷикистон дар давлати Қатар дар ин авохир хеле фаъол шуда, талош дорад, ки соҳибкорону тоҷирони давлати Қатарро барои сармоягузорӣ кардан дар Тоҷикитсон ҷалб кунад.

Аммо бо таваҷҷуҳ ба бархе таҷрибаҳои талхи сармоягузорони хориҷӣ дар Тоҷикистон раванди ҷалби сармоягузорон ба мушикилоти зиёд, аз ҷумла адами эътимод ба мақомоти Тоҷикистон рӯбарӯ шудааст.

Набуди эътимод ба мақомоти Тоҷикистон, ки рушди фасоди идорӣ ва ахлоқӣ дар байни онҳо хеле рушд карда, дар бозорҳои сармоягузорӣ рақобатҳои носолимро ба вуҷуд овардаааст. На танҳо ҷалби сармоягузорони арабро мушкилтар карда, балки дар умум фирори тоҷирону сармоягузоронро аз мабалғагузорӣ кардан дар Тоҷикистон низ зиёдтар кардааст.

Будҷаи низомии Тоҷикистон 1 миллиард афзоиш меёбад

Аз ҷониби
Azda TV 3
-
0

Қарор аст соли 2025 аз будҷаи кишвар барои Вазорати дифоъ ва дигар мақомоти ҳифзи ҳуқуқ 4,7 миллиард сомонӣ ҷудо карда шавад.

Дар ин бора Радиои Озодӣ бо такия ба санаде аз Вазорати молияи кишвар хабар додааст. Гуфта мешавад, ин маблағ барои хароҷоти низомӣ нисабат ба соли равон 972,4 миллион сомонӣ зиёд мебошад, ки ин 2,8 дарсади Маҷмуи маҳсулоти дохилӣ (ММД), яъне 3,7 миллиард сомониро ташкил медиҳад.

Ба далели сирри давлатӣ будан ҷузъиёти бештар дар бораи будҷаи низомӣ дода намешавад.

Ин дар ҳоле аст, ки 9-уми августи соли ҷорӣ Насридин Низомзода, сардори Раёсати тафтишоти Ожонсии зидди фасоди Тоҷикистон аз дуздии будҷаи давлатӣ тавассути Вазорати дифоъ хабар дода буд.

Низомзода зимни нишасти хабарӣ гуфта буд, ки дар натиҷаи тафтиши фаъолияти молиявӣ дар Вазорати дифои Тоҷикистон дар маҷмуъ 123 миллиону 972 ҳазор сомонӣ азхудкунии маблағи будҷа ошкор карда шуд ва дар ин робита 9 парвандаи ҷиноятӣ ба Додгоҳи олӣ фиристода шудааст.

Ба гуфтаи ин мақомдори кишвар, пулҳои дуздидашуда бояд барои либосу хӯрок ва нигоҳубини сарбозон ва барои муҳофизати амнияти кишвар сарф мешуд, аммо аз ҷониби масъулони Вазорати дифоъ ин ҳаққи сарбозони кишвар дуздида шудааст. Ӯ мегӯяд, дар робита ба азхудкунии пули давлат дар Вазорати дифоъ нисбат ба 52 нафар парвандаи ҷиноӣ боз шуда, ба додгоҳ фиристода шудааст.

1...707172...677саҳифаи 71 аз 677

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
scattered clouds
31.1 ° C
31.1 °
31.1 °
35 %
1kmh
39 %
Sun
41 °
Mon
42 °
Tue
43 °
Wed
42 °
Thu
41 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст