Раҳмонов аз кишварҳо хост дар истихроҷи маъдан сармоягузорӣ кунанд

-

01/09/2025

Шаби гузашта дар вилоятҳои Кунар, Нангарҳор, Лағмон ва Нуристони Афғонистон заминларзае шадиде ба вуқуъ пайваст.

Гуфта мешавад, маркази заминларза дар шарқи Афғонистон дар вилояти Кунар буда, 6 дараҷаи Рихтерро ташкил додааст. Бархе сокинони Тоҷикистон гуфтанд, ки нимаи шаби гузашта заминларзаро эҳсос карданд, вале мақомоти кишвар расман дар ин бора чизе нашр накардаанд.

Забиҳуллоҳ Муҷоҳид, сухангӯи Толибон имрӯз, 1-уми сентябр дар нишасти матбуотие дар Кобул гуфт, ки омори ҷонбохтагон бар асари ин заминларзаи шаби гузашта ба 800 нафар расида, беш аз 2500 каси дигар маҷруҳ шудааст. Муҷоҳид афзуда, ки ин омори ниҳоӣ нест ва эҳтимол дорад шумори қурбониён афзоиш ёбад.

Бино ба иттилои расонаҳои афғонистонӣ, сухангӯи Толибон рӯзи душанбе гуфта, ки аксари қурбониёни ин фоҷеа сокинони вилояти Кунар мебошанд. Ӯ ҳамчунин афзуда, ки дар вилояти Нангарҳор 12 нафар ҷон бохта, 255 нафар захмӣ шудааст. Аммо дар вилояти Лағмон ва Нуристон 64 нафар захмӣ шудаанд ва дар Панҷшер ҳам 5 хона вайрон шуда, то ҳол талафоти ҷонӣ сабт нашудааст.

Ин мақомдори Толибон мегӯяд, дар вилояти Кунар бархе хонаҳо ба таври куллӣ хароб шудаанд. Ва азбаски гурӯҳҳои кумакрасон то ҳанӯз ба ҷойҳои ҳодиса пурра нарасидаанд, эҳтимоли афзоиши омори қурбониён зиёд аст.

Ӯ аз кишварҳо ва созмони байналмилалӣ барои рафъи мушкилоти ин фоҷеаи бузурги инсонӣ дархости кумак кардааст.

Дар пайи ин ҳодиса Созмони Милали Муттаҳид, Иттиҳоди Аврупо, кишварҳои Ҳиндустон, Покистон, Эрон, Қатару Арабистони Саудӣ ва дигар кишварҳо изҳори ҳамдардӣ намуда ва омодагии худро барои кумак расондан ба зарардигаон изҳор доштаанд.

То лаҳзаи нашри хабар, Тоҷикистон ҳанӯз ҳам ба ин кишвар изҳори ҳамдардӣ накардааст. Ва расонаҳои давлатӣ низ аз номи Эмомалӣ Раҳмон чизе нашр накардаанд.

Муҳоҷири тоҷик барои ихроҷ нашудан аз Олмон кордро дар гулӯяш гузошт

Аз ҷониби

-

01/09/2025

Як муҳоҷири тоҷик дар Олмон кордро дар гулӯи худаш гузошта, то мақомоти ин кишвар ӯро ба Тоҷикистон ихроҷ накунанд.

Расонаҳои олмонӣ иттилоъ медиҳанд, ки чанде пеш як шаҳрванди 39-солаи Тоҷикистон дар Олмон бо иттиҳоми пайравӣ аз ДИИШ боздошт шуда буд. Додгоҳи олии ин кишвар ӯро ба 5 соли зиндон, бидуни истирдод ба Тоҷикистон маҳкум кард. Аммо Додгоҳи маъмурии Мюнстер бо ин ҳукм розӣ нашуда, ҳукми истирдоди ӯ ба Тоҷикистонро содир кард.

Додгоҳи маъмурии Мюнстер гуфтааст, ки сафорати Тоҷикистон дар Олмон ба онҳо итминон дода, ки парвандаи ин ҷавон мувофиқи қонун дида мешавад ва ӯ дар Тоҷикистон мавриди шиканҷа қарор намегирад. Додгоҳи маъмурии Мюнстер мегӯяд, сафорат ниҳоди муътамади як кишвар аст ва мутмаин шудаанд, ки ӯро ихроҷ кунанд, зеро мавриди шиканҷа қарор намегирад.

Дафтари федеролии дифоъ аз Қонуни Асосии Олмон низ изҳор дошта, ки дар Тоҷикистон далели нақзи ҳуқуқи башар вуҷуд надорад. Ва ин шахс истирдод шавад, мавриди шиканҷа қарор намегирад.

Додгоҳи маъмурии Мюнстер гуфтааст, ки Вазорати корҳои хориҷии Тоҷикистон ба таври шифоӣ ба ин ҷавон итминон доданд, ки барои ҷиноятҳое, ки дар Олмон маҳкум шудааст, пас аз истирдод дар кишвар ба ҷавобгарӣ кашида намешаванд.

Ҳатто қозии додгоҳи мазкур гуфта, ки парвнадаҳои зиёде вуҷуд дорад, ки ба Тоҷикистон истирдод шудаанд, ба онҳо чизе рух надодааст.

Гуфта мешавад, Дафтари федеролии муҳоҷирати Олмон моҳи октиябри соли 2024 ҳукми истирдоди ӯро содир карда буд. Моҳи феврали соли 2025 ин ҷавон ҳангоми дар шуъбаи пулиси ноҳияи Варендорф будани кордро дар гулӯи худаш гузошта, ки ӯро ихроҷ накунанд. Пас за ин Додгоҳии олӣ ҳукми истирдоди ӯро бекор кард ва гуфт, ки дар ҳоли истирдод эҳтимоли шиканҷа шуданаш хеле зиёд аст.

Тибқи иттилои манбаъ, ин ҷавони тоҷик ба он муттаҳам мешавад, ки соли 2015 ба сафи ДИИШ пайваста ва ба Сурияву Ироқ сафар кардааст. Додгоҳи олии вилояти Дюсселдорф ӯро соли 2017 ба ин далел ба зиндон маҳкум карда буд. Дар соли 2018 Идораи федеролии муҳоҷират бо сабаби таҳдиди шиканҷа шудан дар Тоҷикистон ӯро ихроҷ накард. Дар соли 2024 идораи мазкур ин қарорро бекор кард. Аммо ин шаҳрванди Тоҷикистон ба Додгоҳи маъмурӣ шикоят кард.

Гуфта мешавад, ин шаҳрванди Тоҷикистон ҳамроҳи хонаводааш дар ноҳияи Варендорф дар Мюнстерланд зиндагӣ мекунад. Дархостҳои паноҳандагии ӯ дар Олмон борҳо рад шудааст. Мақомот аз ӯ ном нагирифтаанд, назари худи ӯ ва наздиконаш дар ин маврди низ дастарс нест.

Мақомоти Олмон пештар Абдуллоҳи Шамсиддин, писари узви баландпояи ҲНИТ Шамсиддин Саидов, Билол Қурбоналиев, узви “Гурӯҳи 24” ва Дилмурод Эргашев, узви ҶИРТ-ро ба Тоҷикистон ихроҷ карда буд, ки баъдан Абдуллоҳ ба 7 солБилол ба 10 сол ва Дилмурод ба 8 соли зиндон маҳкум шуданд.

Қатъи равобити иқтисодии Туркия бо Исроил

Аз ҷониби

-

29/08/2025

Туркия фазои ҳавоии худро барои ҳавопаймоҳои Исроил баста, равобити иқтисодиро бо ин кишвар қатъ мекунад.

Дар ин бора 29-уми августи соли ҷорӣ, вазири корҳои хориҷии Туркия Ҳоқон Фидон дар ҷаласаи изтирории парлумони кишвараш, ки вазъи Ғаззаро баррасӣ доштанд, хабар дод.

Ба гуфтаи Фидон, Исроил дар Навори Ғазза қатли ом анҷом дода, ба расонидани кумаки башардӯстона монеъ мешавад ва гуруснагиро ҳамчун силоҳ истифода мебарад.

Ӯ изҳор дошта, ки Туркия иҷозат намедиҳад киштиҳои туркӣ ба бандарҳои Исроил ворид шаванд ва киштиҳое, ки техникаи низомӣ ба Исроил мебаранд, ба бандарҳои Туркия роҳ ёбанд.

Ба иддаои ин вазири турк, то имрӯз ягон кишвар нисбат ба Исроил чунин қадамҳои ҷиддӣ набардоштааст, ҷуз Туркия.

Ҳамчунин Ҳокон Фидон Исроилро дар нооромсозии Сурия муттаҳам намуд ва гуфт, ки Тел-Авив мехоҳад ихтилофи қавму мазҳабҳоро барои тақсим кардани ин кишвар истифода барад.

Ба гуфтаи таҳлилгарон, агар Туркия тавонад бо Исроил равобити дипломатӣ ва тиҷоратияшро пурра қатъ кунад, ин метавонад ба иқтисоди Исроил зарба ворид карда, боиси болоравии қимати чиптаҳои ҳавопаймо, сӯзишворӣ ва дигар маводҳо дар Исроил хоҳад шуд. Ва эҳтимол як хезиши бузурги мардумӣ алайҳи ҳукумати Натанёҳу низ аз эҳтимол дур нест.

“Роғун” бо чӣ миқдор пул ва кай сохта мешавад?

Аз ҷониби

-

29/08/2025

Сарвазири Тоҷикистон Қоҳир Расулзода зимни мулоқот бо кормандоин НБО “Роғун” гуфт, ки то моҳи августи соли 2027 Тоҷикистон пурра ба истиқлоли энергетикӣ мерасад.

Худи Президент Эмомалӣ Раҳмон ҳам зимни суханронияш дар ин дидор таъкид кард, ки аз оғози истифодаи ду чархаи аввалини Нерӯгоҳи барқии обии “Роғун” 9,1 миллиард кВт-соат барқ тавлид шудааст, ки аз рӯи арзиш 2,1 миллиард сомонӣ (тақрибан $219 миллион)-ро ташкил медиҳад.

Эмомалӣ Раҳмон зикр кард, ки бояд то поёни соли 2026 чархаҳои доимии панҷум ва шашуми ин нерӯгоҳ насб карда мешаванд, ки бо насби онҳо тавлиди барқ боз ҳам бештар мегардад. Гуфта мешавад, чархаҳо ва дигар таҷҳизоти асосии тавлиди барқи ин нерӯгоҳро ширкати австриявии “Voith Hydro” таъмин намудааст.

Мақомоти кишвар ин пружаи бузургро солҳо боз оғоз кардаанд, ки вале тақрибан ҳар сол маълумот дар бораи маблағии умумии он тағйир меёбад. Қаблан ҳаҷми умумии ин лоиҳа 3 миллиард доллар гуфта мешуд, вале ҳоло ин маблағ ба 8 миллирад доллар бардошта шудааст.

Тибқи оморҳои расмӣ, соли 2024 барои лоиҳаи НБО “Роғун” 2,8 миллиард сомонӣ (тақрибан $292 млн) маблағ ҷудо шуда буд, ки бо истифода аз захираҳои дохилии кишвар ин миқдор ба 4,8 миллиард сомонӣ (зиёда аз $500 млн) расид. Аммо соли 2025 хароҷоти ин лоиҳа ба 4,3 миллиард сомонӣ (тақрибан $450 млн) баробар шудааст.

Кори ин лоиҳа ба таври расмӣ ва оммавӣ аз соли 2008 оғоз шудааст. Худи мақомоти кишвар хароҷоти умумии ин лоиҳаро аз оғози кор, аз соли 2008 то кунун намегӯянд чӣ миқдор масраф шудааст, аммо сомонаи TRT GLOBAL дар як гузорише маҷмуи сармоягузорӣ аз ҳамаи манбаъҳоро то кунун зиёда аз 48,1 миллиард сомонӣ (тақрибан $5 млрд) арзёбӣ кардааст.

Тоҷикистон то кунун барои бунёди ин лоиҳа аз даҳҳо созмону бонкҳои молиявии ҷаҳонӣ маблағҳои ҳангуфт гирифтааст, вале то ҳол дар ҳеч омори расмие маълумот надодааст, ки маблағҳои умумии гирифтааш, чӣ миқдор аст. Аммо тибқи ииттилои расмӣ, Бонки ҷаҳонӣ ба ин лоиҳа дар маҷмуъ $650 млн ҷудо карда, ки $350 миллиони он дар шакли грант мебошад.

Илова бар ин, ҳукумати Тоҷикистон барои бунёди ин нерӯгоҳ бо Бонки осиёии Рушд дар ҳаҷми 500 миллион доллар, Бонки исломии Рушд ва фондҳои арабӣ ба маблағи 450 миллион доллар ва ахиран бо Фонди Рушди Қатар ба маблағи 50 миллион доллар шартномаҳо баста шудааст. Ҳоло гуфтушунидҳо оид ба гирифтани қарзҳо ва грантҳои нав ба маблағи 1,7 миллиард доллар идома доранд.

Ёдовар мешавем, ки Нерӯгоҳи барқи обии “Роғун” лоиҳаи бузургтарини энергетикии Тоҷикистон буда, анҷоми сохтмони он то соли 2031 ба нақша гирифта шудааст. Пас аз анҷом, он бузургтарин нерӯгоҳи барқи обӣ дар Осиёи Марказӣ бо иқтидори 3600 МВт ва истеҳсоли солонаи 13 то 17 миллиард кВт / соат хоҳад буд.

Дар Русия телеграм-бот бо номи “Стоп мигрант” фаъол шуд

Аз ҷониби

-

29/08/2025

Дар Думаи давлатии Русия барои маҳдуд сохтани фаъолияти муҳоҷирон дар ин кишвар телеграм-боти “Стоп мигрант” фаъол шуд.

Муаллифони тарҳ вакилон аз ҳизби “Справедливая Россия – За правду” буда, тариқи ин бот шаҳрвандон метавонанд дар бораи қонуншиканиҳои эҳтимолӣ аз ҷониби муҳоҷирон хабар диҳанд.

Раҳбари ин ҳизб ва вакили рус Сергей Миронов гуфта, ки ба бот метавон паёмҳо дар бораи “хонаҳои резинӣ”, будубоши ғайриқонунии муҳоҷирон дар кишвар, вайрон намудани қоидаҳои ҷамъитӣ, рафтори дағалона ва дигар ҳолатҳои қонуншиканиро ирсол кард.

Ӯ иддао карда, ки ҳамаи муроҷиатҳо санҷидаву ба пулис фиристода мешаванд ва аз мақомоти қудратӣ вокуниши муносиб ба ҳар як муроҷиатро талаб хоҳанд кард. Вале, маълум нест бо хабарҳои дурӯғе, ки аз ҷониби русҳо ворид хоҳад шуд, чӣ хоҳанд кард.

Коршиносон бар ин назаранд, ки фаъол шудани чунин ботҳо дар замоне ки муҳоҷирбадбинӣ дар Русия ба авҷи худ расидааст, боиси зиёд ворид шудани маълумотҳои дурӯғу носанҷида дар бораи муҳоҷирон мешавад ва он метавонад барои шаҳрвандони хориҷӣ дардисарсоз гардад.

Гуфта мешавад, ҳизби “Справедливая Россия – За правду” бо раҳбарии Сергей Миронов муаллифи чандин тарҳи қонунҳои зидди муҳоҷирӣ буда, ин ҳизб ҷонибдори ҷорӣ намудани низоми раводид бо кишварҳои Осиёи Марказӣ, манъ кардани ҷалби муҳоҷирон ба соҳаҳои иҷтимоӣ, ба мисли сохтмон ва нақлиёт мебошад.

Ҳамзамон Миронов борҳо гуфта буд, ки танҳо муҳоҷироне бояд ба Русия роҳ дода шаванд, ки дорои маълумоти биометрӣ ва суғуртаи тиббии пулакӣ ҳастанд ва вуруди муҳоҷирон бо оилаҳо маҳдуд шуда, танҳо ба онҳо усули кории “омад-кор кард-рафт” иҷозат дода шавад. Инчунин ҳизби ӯ пешниҳод карда буд, ки маблағи махсусе барои эҳтимоли ихроҷи муҳоҷирон аз онҳо пешакӣ ситонида шавад то бо пули андози ба гуфтааш русҳо ин кор сурат нагирад.

Генералҳои Тоҷикистон чӣ корнамоӣ кардаанд?

Аз ҷониби

-

29/08/2025

Президенти Тоҷикистон Эмомалӣ Раҳмон боз ба чанде аз мақомдорони низомияш рутбаҳои баландари генерлӣ дод.

Ин маросим рӯзи 28-уми августи соли ҷорӣ бо ҳузури низомиёну кормандони соҳаҳои қудратии кишвар дар шаҳри Душанбе баргузор шуд.

Гуфта мешавад, дар ин маросим бо фармони раисҷумҳур ба гурӯҳе аз кормандони мақомоти ҳифзи ҳуқуқ, додгоҳу додситонӣ ва низомиён барои “хидмати намунавӣ”, “саҳми арзанда дар ҳифзи ҳуқуқҳои конститутсионии шаҳрвандон”, “мубориза бо ҷинояткорӣ”, “нигоҳдории тартиботи ҷамъиятӣ” ва “ҷасорату фидокорӣ” мукофотҳои давлатӣ ва унвону рутбаҳои махсуси олии низомӣ дода шудааст.

Агарчи дар хабари Дастгоҳи Президент ном ба ном гуфта нашудааст, ки ба киҳо аз мақомдорони баландпояи сохторҳои қудратӣ чӣ рутба дода шудааст, аммо ба навиштаи расонаҳои дохилӣ, дар ин маросим, аз ҷумла ба Бобоҷон Ҷамолзода, фармондеҳи Гвардияи миллии Тоҷикистон, Ҳабибулло Воҳидзода, додситони кулли кишвар, Абдураҳмон Аламшозода, муовини аввали вазири корҳои дохилӣ ва Эмомалӣ Собирзода, вазири дифои Тоҷикистон рутбаи нави низомии генерал-полковник дода шудааст.

Рутбаи баландтарини низомӣ гирифтани бархе аз ин мақомдорони соҳаҳои қудратӣ вокуниши корбарон ва мунтақидонро ба вуҷуд овардааст. Аз ҷумла, бархе мепурсанд, ки Абдураҳмон Аламшозода, муовини аввали вазири корҳои дохилӣ дар ҳоле унвони рутбаи баландтар мегирад, ки соли гузашта рутбаи генерал-лейтенант гирифта буд. Дар давоми як сол чӣ корҳои бузургеро анҷом дод, ки имрӯз генерал-полковникро сазовор шуд?!

Инчунин Эмомалӣ Собирзода, вазири дифоъ, ки соли 2018 рутбаи генерал-майорро гирифта буд, дар давоми 6-7 сол чӣ корнамоиҳое дошта, ки тавонист ду рутбаи баландтарини низомиро ба даст биёрад?!

Ба гуфтаи мунтақидон, Тоҷикистон ягона кишварест, генералу номзади илмҳояш хеле зиёд аст. Мақомдорони соҳаҳои қудратии он бидуни корҳои ҷиддии низомӣ, аз ҷумла иштирок ва идораи ҷангу амалиёти низмоӣ рутбаҳои генералиро “сазовор” мешаванд.

Шумораи дақиқи генералҳои Тоҷикистон маълум нест, вале ба гуфтаи бархе огоҳон, агар мисли “Диссернет” ниҳоди мустақиле пайдо шаваду ин рутбадоронро тафтиш кунад, шояд беш аз 50% онҳо ба ҷуз таҷрибаи корӣ дигар корнамоиҳое накардаанд. Ва ин баёнгари вуҷуди ришваву фасодкорист, ки ҳар мақомдоре барои болотар рафтани мақомаш пули бештаре пардохт мекунад, то мақомҳои болотаре гирад ва ба унвону рутбаҳои давлатӣ ва генералӣ “сазовор” гардад.

Чаро Кумитаи тафтишотӣ ва ВКД-и Русия маълумоти дурӯғ доданд?

Аз ҷониби

-

28/08/2025

Марде, ки дар Маскав бо корд ба кормандони пулис ҳамла кард, ҷавони 25-солаи зодаи шаҳри Саратов ва шаҳрванди Русия Шеравган Кунджумов мебошад. Дар ин бора сомонаи “Агентство” бо истинод ба маълумоти “Росреестр” хабар дод.

Ҳодисаи ҳамла ба кормандони пулис рӯзи 27-уми август дар наздикии шоҳроҳи “Щёлковский” рух дода буд. Ҳамлагар аввал ду шиша бо моддаҳои оташзананда ба самти мошинҳои Вазорати корҳои дохилӣ ва ГБУ “Жилищник” партоб карда ва сипас ба пулис бо корд ҳамла кардааст.

Кумитаи тафтишотии Русия худи ҳамон рӯз аз боз шудани парвандаи ҷиноятӣ бо моддаи суиқасд ба ҷони кормандони мақомоти ҳифзи ҳуқуқ ва боздошти як “шаҳрванди хориҷӣ” хабар дода буд. Шабакаи телеграмии “База” дар истинод ба манбаъҳои худ дар ВКД ҳамлагарро “шаҳрванди 26-солаи Тоҷикистон” номид.

Аммо, тибқи маълумоти “Агентство”, боздоштшуда шаҳрванди Русия Шеравган Кунджумов буда, дар шаҳри Саратов ба дунё омадааст ва дар 14-солагӣ шиносномаи русиро дарёфта кардаву баъдтар ба шаҳри Балашиха кӯчидааст.

Инчунин гуфта мешавад, ӯ соли 2017 бо иттиҳоми омодасозии таркишҳо дар маркази савдо ва нақлиёти ҷамъиятӣ боздошт гардида, соли 2019 додрас ӯро бо ҳафт моддаи Кодекси ҷиноятии Русия, аз ҷумла барои омодагӣ ба амалҳои террористӣ айбдор дониста, ба қариб 8 соли маҳрумият аз озодӣ дар колонияи низомаш умумӣ маҳкум карда буд.

Он замон дар қарори додгоҳ гуфта мешуд, ки Кунджумов, “пайрави ақидаҳои ифротгароии исломӣ буда”, бо пешниҳоди узви гурӯҳи террористии “Давлати исломӣ” ҳамроҳ бо се шаҳрванди Тоҷикистон барои анҷоми амалҳои террористӣ омодагӣ медид, то ба ҳукумати Русия таъсир расонад ва онҳоро водор кунад, ки нерӯҳои худро аз Сурия хориҷ намоянд. Дар ҳамон қарор Шеравган Кунджумов шаҳрванди Русия гуфта шудааст.

Шеравган баҳори соли ҷорӣ ба озодӣ баромада, таҳти назорати маъмурӣ будааст ва бе иҷозати пулис ҳаққи аз ҳудуди минтақаи бақайдгириаш берун шуданро надоштааст. Бар асоси маълумоти дарёфтӣ, суроғаи охирини бақайдгирии ӯ шаҳри Балашиха будааст ва маълум нест чӣ гуна ба шаҳри Маскав рафтааст.

Мақомоти Русия то ҳол сабаби сар задани ин ҳодиса ва ҷузъити дигарашро нашр накардаанд. Инчунин шарҳ дода нашудааст, ки чаро Кумитаи тафтишотӣ ва ВКД-и Русия маълумоти носанҷидаро нашр кардаанд.

Занозании гурӯҳии тоҷикону узбекҳо дар Русия

Аз ҷониби

-

28/08/2025

Дар як ҳафтаи охир дар шаҳри Санкт-Петербург ва атрофи он ду занозании гурӯҳӣ бо иштироки зодагони Тоҷикистон, Узбекистон ва Русия рух додааст.

Бино ба иттилои расонаҳои русӣ, 26-уми августи соли ҷорӣ, дар деҳаи Янино-1 наздикии Санкт-Петербург миёни зодагони Тоҷикистон ва Узбекистон занозании гурӯҳӣ бо истифода аз мушту лагад ва чӯб сурат гирифтааст.

Ба гуфтаи мақомоти тафтишотӣ, сабаби асосии низоъро баҳсҳои ҳаррӯза дар майдони сохтмонӣ гуфта, 3 муҳоҷири тоҷики аз 22 то 26-соларо саркардагони ин занозанӣ номидаанд.

Нисбати онҳо тибқи моддаи 213 Кодекси ҷиноятии Федератсияи Русия “Авбошӣ” парвандаи ҷиноятӣ боз шудааст. Боқимонда 23 иштирокчии дигар, аз ҷумла 9 шаҳрванди Тоҷикистон ва 14 шаҳрвандии Узбекистонро ба ҷавобгарии маъмурӣ кашидаанд. Илова бар ин, маълум шуд, ки яке аз шаҳрвандони Узбекистон ғайриқонунӣ дар Русия қарор дошта, ӯро дар боздоштгоҳ барои ихроҷ аз Русия ҷой кардаанд.

Номи иштирокчиёни занозанӣ ва назари онҳо дар ин бора дастраси расонаҳо нест.

Дар ҳамин ҳол раиси Кумитаи тафтишотии Русия Александр Бастрикин ба роҳбарияти идораи минтақавӣ дастур додааст, ки аз раванди тафтишот ҳисобот диҳанд.

Пештар аз ин, шаби 21-уми августи соли ҷорӣ, пулис аз як занозании бузурге дар даромадгоҳи яке аз хонаҳои шаҳри Санкт-Петербург хабар дода буд.

Гуфта мешавад, аввал миёни чор нафар муноқиша сар мезанад, вале ҳамсояҳое, ки мехостанд онҳоро ҷудо кунанд, худашон ба муноқиша кашида шуданд.

Нерӯҳои амниятӣ ба ҷои ҳодиса рафта, 35 иштирокчии занозаниро боздошт кардаанд ва то ҳол ному насиби 29 нафарро муайян карданд. Дар миёни боздоштшудаҳо ду шаҳрванди Русия, ҳашт шаҳрванди Тоҷикистон ва 19 шаҳрванди Узбекистон буданд. Ягона зани боздоштшуда як сокини 43-сола буд, ки зодрӯзашро таҷлил мекардааст ва бузургтарин боздоштшуда 48-сола ва ҷавонтаринаш 24-сола буданд.

То ҳол мақомот ҷузъиёти дигари ин ҳодиса, аз ҷумла маълумот дар бораи осебдидагон, номи иштирокчиён ва боз шудан ё нашудани парвандаро нашр накардааст.

Ин ду занозании гурӯҳӣ бо иштироки муҳоҷирон дар ҳоле сурат мегирад, ки дар Русия фазои муҳоҷирбадбинӣ ба авҷи худ расида, мақомоти ин кишвар ҳамроҳи гурӯҳҳои миллатгаро бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбат ба муҳоҷирон бадрафторӣ ва латтукӯб мекунанд.

Ба гуфтаи муҳоҷирон, мақомоти амниятии ин кишвар асноди будубошу дигар ҳуҷҷатҳои зодагони кишварҳои Осиёи Марказиро барои нарафтан ба ҷанги зидди Украина бекор мекунанд. Инчунин дар ин муддат дар Русия чандин қонунҳои наве дар Думаи давлатӣ пешниҳоду қабул гардид, ки шароити вазнини муҳоҷиронро мушкилтар мекунад.

Ба гуфтаи коршиносон, ҳодисаҳои ахири занозанӣ миёни муҳоҷирон метавонад вазъи онҳоро аз будааш бадтар кунад.

Боздошти сокини Бохтар бо иттиҳоми фиреби шаҳрвандон

Аз ҷониби

Azda TV 3

-

28/08/2025