Ҳамаи муаллимони мактабҳо дар давраи фаъолияти касбии худ бояд дигар “облава” нашаванд.
Бино ба иттилои расонаҳо, муовини якуми вазири маорифи кишвар Ҳомид Ҳошимзода лоиҳаи тағйирот ба қонун “Дар бораи уҳдадории ҳарбӣ ва хизмати ҳарбӣ”-ро ба парлумон пешниҳод кардааст, ки тибқи он муаллимон пурра аз хидмати ҳатмии ҳарбӣ озод мегарданд.
Ба иддаои Ҳошимзола, ҳадаф аз ин тағйирот баланд бардоштани мақоми омӯзгор ва бартараф кардани норасоии муаллимон дар муассисаҳои таълимӣ мебошад.
Гуфта мешавад, ин тағйирот аз ҷониби Маҷлиси намояндагони Маҷлиси Олии Ҷумҳурии Тоҷикистон қабул гардида, барои қувваи қонунӣ пайдо кардан, он бояд аз ҷониби Маҷлиси миллӣ тасдиқ ва аз тарафи Президент имзо ва дар нашрияҳои расмӣ нашр шавад.
Қонуни амалкунанда танҳо муаллимонеро, ки маълумоти олии педагогӣ доштанд ва дар мактабҳои деҳа фаъолият мекарданд, аз хидмати ҳарбӣ озод мекард. Акнун, баъд аз ба қувваи қонунӣ даромадани ин тағйирот, ин имтиёз ба ҳамаи омӯзгорон дар давраи фаъолияти касбии худ ва новобаста аз ҷойи корашон татбиқ хоҳад шуд.
Бояд гуфт, ки норасоии муаллимон дар мактабҳои Тоҷикистон яке аз мушкилоти ҷиддии солҳои охир дар соҳаи таълим боқӣ монда, ба гуфтаи худи вазири маориф ва илми кишвар Раҳим Саидзода, дар оғози соли таҳсили 2025/2026 дар мактабҳои Тоҷикистон зиёда аз 3800 муаллим намерасид, бо вуҷуди он ки имсол беш аз 13 ҳазор донишҷӯ ихтисосҳои педагогиро хатм кардаанд.
Бо вуҷуди норасоии омӯзгор дар мактабҳо муаллимон ҳатто аз деҳаҳои дурдасти кишвар иҷборан ба хидмати ҳарбӣ бурда мешаванд.
Чанбе пеш расонаҳо аз иҷборан ба хидмати ҳарбӣ бурдани Эҳсон Аҳмадзода, омӯзгори фанновариҳои иттилоотӣ ва математикаи мактаби рақами 75-и ноҳияи Данғара хабар дода буданд. Он замон пайвандонаш гуфта буданд, ки Эҳсонро 20-уми октябр аз мактаб ба комиссариати ҳарбӣ бурдаанд.
Ва маълум нест, агар тағйирот ба қонун “Дар бораи уҳдадории ҳарбӣ ва хизмати ҳарбӣ” қабул шавад, то куҷо сарбозшикори муаллионро аз байн мебарад.
