Вазири корҳои дохилии Тоҷикистон Рамазон Раҳимзодла бо Президенти Ҷумҳурии исломии Эрон Масъуди Пизишкиён мулоқот кард.
Мулоқоти Раҳимзода ва Пизишкиён 28-уми октябри соли ҷорӣ, дар ҳошияи нишасти вазирони кишварҳои узви Созмони ҳамкории иқтисодӣ (ЭКО) дар Эрон баргузор гардидааст. Ҷонибҳо масоили тақвияти ҳамкориҳои амниятӣ, марзӣ ва мубориза бо терроризм ва қочоқи маводи мухаддирро баррасӣ кардаанд.
Раисҷумҳури Эрон дар ин мулоқот изҳори нигаронӣ кардааст, ки “бегонагон дар талошанд” монеи эҷоди робитаҳои нек миёни кишварҳои исломӣ бошанд ва бар зарурати таҳкими ҳамкориҳои минтақавӣ, бахусус бо кишварҳои исломӣ бар асоси умумиятҳои фарҳангӣ, динӣ ва таърихӣ таъкид намуда, пешниҳод карда, ки кишварҳои минтақа метавонанд барои осон кардани робитаҳои иқтисодӣ, пули муштараки минтақавиро таъсис диҳанд.
Пизишкиён ҳамчунин ба раисҷумҳури худкомаи Тоҷикистон Эмомалӣ Раҳмон салом расонда, таъкид карда, ки мардуми ду кишвар аз забон, фарҳанг ва адабиёти муштарак бархӯрдор мебошанд ва ин сарвати фарҳангӣ метавонад заминаи ояндаи дурахшон барои халқҳо гардад.
Дар ҳамин ҳол вазири корҳои дохилии Тоҷикистон Рамазон Раҳимзода таъкид намуда, ки таъмини амният барои густариши робитаҳои иқтисодӣ аҳамияти бузург дорад ва Эрону Тоҷикистон бояд дар самти мубориза бо терроризм ва қочоқ ҳамкории зич дошта бошанд.
Инчунин Раҳимзода иддао кардааст, ки “Мардуми Тоҷикистон Президенти Эронро дӯст медоранд ва шаҳри Теҳронро хонаи худ мешуморанд”.
Мулоқоти Рамазон Раҳимзода ва Масъуд Пизишкиён дар ҳоле сурат мегирад, ки мақомоти Тоҷикистону Эрон дар чанд соли пеш равобити печидае доштанд. Тира шудани муносибатҳои дипломатии ду кишвар аз зиндонӣ шудани Бобаки Занҷонӣ ва қарзи “Барқи тоҷик” аз нерӯгоҳи “Сангтӯда-2” шуруъ шуда, бо бастани Ҳизби наҳзати исломии Тоҷикистон дар соли 2015 тиратар гашта буд.
Аммо соли 2019 пас аз сари қудрат омадани Иброҳим Раисӣ дар Эрон муносибатҳои ин ду кишвар нармтар шуд ва дар замони расиҷумҳурии Раисӣ миёни Тоҷикистону Эрон низоми бидуни раводид барои шаҳрвандони ду кишвар ҷорӣ шуд.
Инчунин дар моҳи январи соли равон сафари расмии Масъуд Пизишкиён, раисҷумҳури нави Эрон ба Тоҷикистон баргузор шуд, ки дар он сафар 23 санади ҳамкории дуҷониба ба имзо расид ва дар ҷараёни он Форуми тиҷоратии кишварҳо дар Душанбе баргузор гашт, бо маблағи зиёда аз 450 млн доллар санадҳои ҳамкорӣ имзо гардид.
Ва то имрӯз чандин мақомдори баландпояи Эрону Тоҷикистон ба кишварҳои ҳамдигар сафарҳои расмӣ анҷом медиҳанд.
