Рӯзи 15-уми марти соли ҷорӣ ҳайатҳои музокиракунанда дар бораи марзи байни Тоҷикистону Қирғизистон мулоқот карданд.
Гуфта мешавад, мулоқоти ҳайатҳои ҳукуматии Тоҷикистон ва Қирғизистон дар бораи таъйин ва аломатгузории марзи давлатии ду кишвар бо раҳбарии Саймумин Ятимов ва Қамчибек Тошие дар меҳмонхонаи ба номи Абдуқодир Ҷаборзода дар шаҳри Бӯстони вилояти Суғд баргузор шудааст.
Хабаргузории Sputnik Тоҷикистон бо такя ба дафтари матбуоти ҳукумати вилояти Суғд иттилоъ дода, ки ҷонибҳо “зимни мулоқот масъалаҳои делимитатсияи сарҳади давлатии Тоҷикистон ва Қирғизистонро баррасӣ намуданд.”
Аммо аз ин мулоқот тафсилоти дигаре то ҳол нашр нашудааст ва маълум нест, ҷонибҳо ба чӣ хулосаҳо расиданд ва кадом нуқтаи ҳалнашуда дар ин нишаст ҳали худро ёфтааст.
Чанде пеш вазири корҳои хориҷии Тоҷикистон, Сироҷиддин Муҳриддин дар изҳороте дар робита ба таъйин ва аломатгузории марзи ду кишвар гуфта буд, ки “минтақаҳои воқеан хеле душвор боқӣ мондааст ва ҳарду ҷониб кӯшиш мекунанд, ки ин равандро ҳарчи зудтар анҷом диҳанд”.
Расонаҳои ду кишвар аз забони мақомоти Қирғизистон навишта буданд, ки масоили марзӣ қариб ниҳоӣ шудааст. Ҳатто гуфта мешуд, ки эҳтимол меравад то моҳи марти ҳамин сол ҳайати музокиротии байни ҳукуматҳо корро ба анҷом расонида, ба мушкилоти марзӣ нуқта мегузорад.
Ёдовар мешавем, ки ҳайатҳои ҳукуматии Тоҷикистону Қирғизистон пас аз мулоқоти ахир дар моҳи феврали соли ҷорӣ ба таъйин ва аломатгузории 1,1 километр муваффақ шудаанд. Қабл аз он рӯзи 16-уми январи соли ҷорӣ, ки дар шаҳир Бодканди Қирғизистон баргузор шуда буд, аз мувофиқа шудани 38,35 километри марзри муштарак хабар дода буданд.
Дар мулоқотҳои қаблӣ дар моҳи январ Саймумин Ятимов ба расонаҳо гуфта буд, ки “бо Қирғизистон дар самтҳои ҳаётан муҳим созиш” кардаанд. Ӯ аз ҷумла, зикр кард, ки дар самтҳои Қулунду, Мақсад, Арка ва роҳи Хистеварз байни ҷонибҳо тавофуқ ҳосил шудааст. Ба гуфтаи раиси КДАМ-и Тоҷикистон, то кунун ҳайтҳои кории ду кишвар ба беш аз 90 дарсади хати марз ба тавофуқ расидаанд.
Ёдовар мешавем, ки Тоҷикистону Қирғизистон бо ҳам ҳудуди 980 километр марзи муштарак доранд. Пас аз пошхӯрии Иттиҳоди Шӯравӣ қисматҳое аз хоки ин ду кишвар норӯшан боқӣ монда буд ва чанд соли ахир байни аҳолии наздимарзӣ задухӯрдҳои мусаллаҳона сурат гиирфт, ки дар натиҷаи садҳо нафар аз ду ҷониб кушта ва захмӣ шуданд.
Тоҷикистону Қирғизистон дар моҳи феврал беш аз 1,1 км марзи муштаракро мушаххас кардаанд.
Ба иттилои вазири корҳои хориҷии Тоҷикистон, дар соли гузашта зиёда аз 197 километр ҳудудҳои мушкил тасвиб шуда, 10% боқӣ мондааст, ки ин аз 97 то 103 километри хати сарҳадро ташкил медиҳад.
Вай илова карда буд, ки арду ҷониб манфиатдоранд, ки ин раванд ҳарчӣ зудтар анҷом ёбад.
Дар маҷмӯъ, хатти сарҳади ду кишвар тақрибан 987 километрро ташкил медиҳад, ки талоши Душанбею Бишкек барои муайянсозии қисматҳои номаълуми он тайи солҳои охир густариш ёфтаст.
