Мақомоти Тоҷикистон аз ҷалб шудани ҷавонон ба таълимоти – ба гуфти худашон – “ғайриқонунии динӣ” изҳори нигаронӣ карданд.
Ин нигаронии мақомот рӯзи 6-уми майи соли ҷорӣ дар ҷаласаи Шӯрои ҳамоҳангсози фаъолияти мақомоти ҳифзи ҳуқуқи Тоҷикистон, ки бо иштироки роҳбарони вазорату кумитаҳо, намояндагони мақомоти ҳокимияти маҳаллии давлатӣ ва дигар сохтору идораҳо баргузор гардид, садо додааст.
Дар ин нишаст вазъи ҷинояту ҷинояткорӣ тавассти ноболиғон дар давраи солҳои 2023-2024 ва семоҳаи якуми соли 2025 мавриди баррасӣ қарор гирифтааст.
Дар Шӯрои ҳамоҳангсозӣ дар мавриди ба талабот ҷавобгӯ набудани раванди таълим ва рафтору кирдори баъзе хонандагоне, ки даст ба ҷиноят мезананд, гуфта шудааст. Дар ин нишаст мақомоти ҳифзи ҳуқуқ ва мақомоти дигари ваколатдори давлатӣ барои пешгирии ҷинояткорӣ дар байни ноболиғон ва ҷавонон вазифадор шудаанд.
Инчунин мақомдорон дар ин ҷаласа ба роҳҳои пешгирии ба “таълимоти ғайриқонунии динӣ” ҷалб кардани ноболиғон, ки ба иддаои онҳо яке аз омилҳои шомилшавии наврасону ҷавонон ба ҳизбу ҳаракатҳои ифротӣ мебошад, таъкид кардаанд.
Дар ҳамин ҳол як манбаъ аз шаҳри Кӯлоб бо шарти фош нашудани номаш ба Azda.tv гуфт, ки чунин ҷаласаҳо дар ин минтақа ҳамроҳи сокинон, бахусус ҷавонону донишҷӯён баргузор шуда истодааст. Мақомот аз ҷалб шудани ҷавонон ба ҳизбу ҳаракатҳои ифротӣ, шабакаҳои иҷтимоӣ, дарсҳои динӣ, рафтани ноболиғон ба масҷид ва ғайра бо мардум “фаҳмондадиҳӣ” мегузаронанд. Ташкили чунин нишасту мулоқотҳо дар дигар минтақаҳои кишвар низ гузориш мешавад.
Тибқи иттилои Радиои Озодӣ, ҳатто дар шаҳри Исфара омӯзгорон дар вақти гардиши хона ба хона аз сокинон забонхат гирифтаанд, ки фарзандонашонро аз рафтан “ба таълимоти динии ғайрирасмӣ, рафтан ба масҷиди панҷвақта ва намози ҷумъа”, баромадан баъди соати 18 аз хона, иртибот бо шахсони шубҳанок ва бегона ва ба мактаб бурдани телефони мобилӣ боздоранд.
Мақомдорони кишвар омӯхтани таълимоти динӣ ва рафтани ноболиғон ба масҷидҳоор омили асосии шомилшавии қишри ҷавонони кишвар ба ҳизбу ҳаракатҳои ифротӣ медонанд. Аммо коршиносон мегӯянд, баръакс, дур кардани ҷавонон аз таълимоти динӣ сафи ҷинояткорӣ ва пайвастани онҳоро ба гурӯҳҳои террористӣ, ба мисли ДИИШ бештар кардааст.
Ҳамзамон баъзе ҷомеашиносон ва равоншиносони тоҷик бар ин назаранд, ки маҳз мамнуъ сохтани таълимоти динӣ ва ба таври расмӣ ва маҳдуд сохтани он дар кишвар аз ҷониби мақомот боиси афзоиши ҷиноятҳои навзуҳур, ба монанди худкушӣ, нашъамандӣ, таҷовузи ҷинсӣ бадрафторӣ дар дохили хонавода, дар мактабҳо ва ғайра байни ҷавонони кишвар гаштааст.
