Нигаронии раиси Кумитаи равобити хориҷии Кунгураи Амрико аз боздошти М.Одинаев

Кумитаи равобити хориҷии Кунгураи Амрико бо нашри матлабе дар Твиттер аз кавли раиси ин Кумита ҷаноби Грегори Велдон Микс менависад, ки ӯ вазъияти кишварҳои Осиёи Марказиро аз наздик пайгирӣ мекунад ва вазъи сиёсии ин кишварҳоро хуб медонад.

Грегори Велдон Микс аз боздошти мухолифи сиёсии тоҷик Маҳмурод Одинаев, ки чанд рӯз қабл ба 14 соли зиндон маҳкум шуд, нигаронӣ кардааст.

Ӯ мегӯяд, “ҳарчанд озодии рӯзноманигори тоҷик Далер Шарифов хабари хубе аст, аммо боздошти Одинаев бисёр нигарон кунанда аст. Ду қадам ба пеш ва як қадами бузург ба қафо”.

Ҳамчунин Грегори Велдон аз инки Ҷумҳурии Узбекистон дар заминаи решакан кардани корфармоии иҷбории кӯдакон ва муҳассилон дар ҷамъоварии ҳосили пахта пешрафти чашмигире доштааст, изҳори қаноъатмандӣ кард ва онро дастоварди муҳиме дар заминаи пешбурди ҳуқуқи башар дар ин кишвар донист.

Скриншот: https://twitter.com/HouseForeign/status/1355513587679309826?s=09

Маҳмурод Одинаевро рӯзи 5-уми декабри соли 2020 дар ҳудуди шаҳри Душанбе дастгир карданд. Ӯ пеш аз боздошт мақомот ва ҳукумати Тоҷикистонро танқид мекард ва моҳи ноябри соли 2020 дар саҳифаи фейсбукиаш мардумро ба тазоҳурот даъват карда буд. Ӯро пас аз даъвати гирдиҳамоӣ ба шӯъбаи ВКД-и шаҳри Ҳисор даъват карданд ва ба гуфтаи пайвандонаш баъд аз ҳозир нашудани Одинаев ба шӯъбаи ВКД-и Ҳисор ӯро дар ҷустуҷӯ қарор доданд.

Ахиран, 28-уми январ Додгоҳи ноҳияи Рӯдакӣ Маҳмурод Одинаев, муовини боздоштшудаи раиси ҲСДТ-ро ба 14 соли зиндон маҳкум кард. Додгоҳ Одинаевро ба авбошӣ ва даъвати ом ба ифротгароӣ гунаҳкор донист, аммо худи ӯ ин ҳукмро напазируфт.

Маҳмурод Одинаев пештар ба ҳимоят аз ҳуқуқи зиндониён машғул буд ва чанд соли охир ҳамчун муовини раиси Ҳизби сотсиал-демократ фаъолият дошт. Фаъолону мухолифон боздошту эълони иттиҳом бар зидди Маҳмурод Одинаев ва писаронашро тарҳрезишуда меноманд, ки бештар ба фаъолиятҳои сиёсӣ ва танқидҳои пайвастааш аз кори ҳукумат рабт медиҳанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.