Вазирони корҳои хориҷии кишварҳои Осиёи Марказӣ ва Афғонистон аз афзоши нооромиҳо дар Афғонистон изҳори нигаронӣ кардаанд.
Ба гузориши сомонаи ВКХ, нишасти вазирони корҳои хориҷии кишварҳои Осиёи Марказӣ ва Афғонистон бо ибтикори Вазорати корҳои хориҷии Ҷумҳурии Исломии Афғонистон ва Маркази минтақавии СММ оид ба дипломатияи боздоранда барои Осиёи Марказӣ (UNRCCA) сурат гирифтааст.
Дар ин мулоқоти маҷозии вазирони корҳои хориҷии кишварҳои Осиёи Марказӣ ва Афғонистон ҳайати Тоҷикистон таҳти роҳбарии Вазири корҳои хориҷӣ Сироҷиддин Муҳриддин иштирок намуд.
Нерӯҳои Ҳаракати Толибон дар Шимол ва Шимолу Шарқи Афғонистон аксари вулусволиҳои ҳаммарз бо кишварҳои Осиёи Марказиро тасарруф карда, садҳо нафар аз нерӯҳои Афғонистон ба Тоҷикистон ва Ӯзбекистон панаҳ овардаанд. Ин раванд нигаронии кишварҳои Осиёи Марказӣ ва минтақаро афзош додааст.